Mbela owa lesha ngoo nawanawa Eeshungonangelo odo opo da piti? Ngeenge owe di lesha, kendabala okunyamukula omapulo aa taa landula apa:

Oinima inhe ilipi tai dulu okuxwepopaleka okwiimba kwetu?

Ohatu dulu okukala ofika twa yukilila tu kwete eimbilo letu nawa. Otu na okukala hatu fuda twa manguluka. Ngeenge otwa makuka twa manguluka nokwiimba mokule, ohatu ka imba nawa. — w17.11, ep. 5.

Oshike tashi dulu oku tu kumwifa shi na sha neenhele nosho yo neendjila odo da li da yuka koihondamenolando muIsrael?

Opa li pe na eendjila da yuka koihondamenolando ihamano, noda li hadi kalekwa monghalo iwa. Nomolwaasho omunhu oo a dipaa shihe fi oshiningilewina a li ha mono eameno diva. — w17.11, ep. 14.

Omolwashike oshali yaKalunga yekuliloyambo okupitila muJesus i li oshali ya denga mbada i dule eeshali adishe?

Ohai wanifa po ehalo letu lokukala nomwenyo fiyo alushe, nohai tu mangulula moupika woulunde nefyo. Kalunga oku tu hole tu li oludalo laAdam nokwe tu pa ekuliloyambo laJesus nonande otu li ovalunde. — wp17.6, ep. 6-7.

Epsalme 118:22 ola ulika ngahelipi kenyumuko laJesus?

Jesus ka li a tambulwa ko e li Messias nokwa li a dipawa. Opo a ninge “omutwe wokolonela,” okwa li e na okunyumunwa. — w17.12, ep. 9-10.

Mbela omusholondodo wepata omo mwa ka dja Messias owa li wa kanghamena kokukala oshiveli?

Omafimbo amwe, omusholondodo wepata laJesus owa li we likolelela komonamati woshiveli, ashike haalushe. David ka li omonamati woshiveli waIsai; ashike Messias okwa dja moludalo laDavid. — w17.12, ep. 14-15.

Omafinamhango amwe opaunamiti elipi taa hangwa mOmbiibeli?

Koshi yOmhango, ovo va li ve na omikifi donhumba ova li have likalekelwa. Ovanhu ova li ve na okulikosha ngeenge va kwata oshimhu. Omhango oya ti kutya onyata yovanhu oi na okufudikwa kokule. Okukenghwa okwa li ku na okuningwa mefiku etihetatu longhalamwenyo yokaana kokamati molwaashi ohonde yako ohai dulu okuhekela nawa. — wp18.1, ep. 7.

Omolwashike Omukriste e na okukala e lihole oshiyeleke?

Otu hole vakwetu ngaashi tu lihole fye vene. (Mark. 12:31) Ovashamane ove “nokuhola ovakainhu vavo ngaashi omalutu avo vene.” (Ef. 5:28) Ohole yokulihola otai dulu okupengifa etaleko letu. — w18.01, ep. 23.

Eenghatu dimwe dilipi twa pumbwa okukatuka opo tu twikile okuninga exumokomesho pamhepo?

Otwa pumbwa okukonakona Eendjovo daKalunga, okudilonga kudo nosho yo okutula moilonga osho twe lihonga. Otwa pumbwa okweefa omhepo iyapuki i nwefwe mo omadiladilo nomitima detu, nokutambula ko nolupandu ekwafo olo hatu pewa kuvamwe. — w18.02, ep. 26.

Mbela ovanyanekeli otava dulu okumona osho tashi ka ningwa monakwiiwa?

Ope na omatomheno mahapu, ashike etomheno olo la fimana ololo kutya Ombiibeli oya tokola oinima aishe oyo. — wp18.2, ep. 4-5.

Otu na okutala ko ngahelipi okutambula ko eshivo li na sha noku ka hafela eendja pamwe?

Ngeenge otwa tambula ko eshivo lonhumba, otwa pumbwa okukala ovanashili meendjovo detu. (Eps. 15:4) Katu na oku li kaleka inashi pumbiwa. Oo e tu shiva otashi dulika a longekida nale eendja. — w18.03, ep. 18.

Ovalumenhu ovo va nangekwa po otava dulu okulihonga shike kuTimoteus?

Timoteus okwa li e na ko nasha novanhu, nokwa li a pitifa komesho oinima yOuhamba. Okwa li ha longo noudiinini moilonga iyapuki, nokwa li ha tula moilonga osho e lihonga. Okwa kala he lideula, nokwa li e lineekela omhepo yaJehova. Ovakulunhuongalo nosho yo vamwe otava dulu okuhopaenena oshihopaenenwa shaye. — w18.04, ep. 13-14.