1. Ongudu inene yomefelemudo lotete oya li ya lombwelwa i ninge shike?

ONGUDU inene yovalumenhu novakainhu va dja koilongo ihapu nohava popi omalaka a yoolokafana ova li va ongala pamwe. Mefiku olo omwa li mwa ningwa oshinima shididilikwedi. Ongudu yOvajuda oya li ya hovela okupopya omalaka aavo ve uya oku va talela po. Osho osha li sha kumwifwa neenghono ongudu oyo. Ashike osho ongudu oyo ya li ya lombwelwa kOvajuda nokomuyapostoli Petrus, osho sha li unene shididilikwedi. Osho sha li sha kwatelwa metumwalaka olo, oshosho kutya ngeenge ova kala ve na eitavelo muJesus Kristus otava ka xupifwa. Etumwalaka olo ola li la kuma neenghono ongudu oyo. Osho osha li she linyengifa ovanhu va pule tava ti: “Oshike tu na okuninga po?” Petrus okwa li e va lombwela ta ti: “Lidilululeni, ndele amushe tamu ninginifwa.” — Oil. 2:37, 38.

2. Oshike hatu ka kundafana moshitukulwa eshi? (Tala efano kombada yoshifo.)

² Opa li pa ningwa oshiningwanima shikumwifi. Ovanhu 3 000 ova li va ninginifwa efiku olo nova ninga ovahongwa vaKristus. Osho osha li ehovelo loilonga yokuninga ovanhu ovahongwa, oshipango osho Jesus a pa ovashikuli vaye. Oilonga oyo otai longwa fiyo okunena kovapiya vaye. Pefimbo letu, ihatu dulu okukwafela omunhu a ninginifwe moule weevili dinini. Omunhu otashi dulika a konakone oule weemwedi, ile wodula, ile nokuli shi dulife po, opo a ninginifwe. Ohashi pula ombuda, opo tu kwafela omunhu fiyo osheshi a ninga omuhongwa waKristus. Moshitukulwa eshi ohatu ka kundafana osho wa pumbwa okuninga, opo u kwafele omukonakonimbiibeli woye fiyo osheshi a ninginifwa.

3. Metwokumwe naMateus 28:19, 20, oshike omukonakoni a pumbwa okuninga, opo a kale a wana okuninginifwa?

³ Omukonakoni okwa pumbwa okutula moilonga osho te lihongo mOmbiibeli, ofimbo ina ninginifwa. (Lesha Mateus 28: 19, 20.) Ngeenge omukonakoni oha tula moilonga osho te lihongo, ota kala a fa “omulumenhu omunaendunge” womefaneko laJesus, oo a tungila eumbo laye kemanya nokwe li fela ekanghameno la ya moule. (Mat. 7:24, 25; Luk. 6:47, 48) Ongahelipi hatu dulu okukwafela omukonakoni a tule moilonga osho te lihongo? Natu ka taleni komaetepo atatu.

4. Ongahelipi hatu dulu okukwafela omukonakoni a ninge exumokomesho fiyo a ninginifwa? (Tala yo oshimhungu “ Kwafela omukonakoni woye e litulile po omalalakano noku a hanga.”)

⁴ Kwafela omukonakoni woye e litulile po omalalakano. Omolwashike wa pumbwa okuninga ngaho? Diladila kefaneko eli: Natu tye nee ngeno oto i molweendo lilelile. Otashi dulika u fikame peenhele diwa odo to hange mondjila. Osho otashi ke ku kwafela uha teke omukumo, nouha kale u wete to anye okufika. Sha faafana, ngeenge omukonakonimbiibeli okwe litulile po omalalakano nokweenda te a hange kanini nakanini, otashi ke mu kwafela a hange elalakano lokuninginifwa. Opo u kwafele omukonakoni woye a ninge exumokomesho, longifa oshimhungu “Omalalakano,” osho tashi hangwa membo Nghee to dulu okuhafela onghalamwenyo fiyo alushe! Pexulilo loshileshwa keshe, kundafana nghee elalakano la pambafana naasho omuhongwa woye te lihongo. Ngeenge owa hala omukonakoni woye a hange elalakano limwe la yooloka ko kwaalo, li shanga opo pa shangwa “Amwe vali.” Kala ho talulula pandjikilile nomukonakoni woye omalalakano oo ta dulu okuhanga moule wefimbo lixupi, ile moule wefimbo lile.

5. Metwokumwe naMarkus 10:17-22, Jesus okwa li a lombwela shike omulumenhu oshipuna, nomolwashike?

⁵ Kwafela omukonakoni woye a ninge omalunduluko. (Lesha Markus 10:17-22.) Jesus okwa li e shii kutya otashi ka kala shidjuu komulumenhu oshipuna, opo a landife po oinima yaye aishe. (Mark. 10:23) Ashike nande ongaho, Jesus okwa li a lombwela omulumenhu oo  a ninge omalunduluko manene monghalamwenyo yaye. Omolwashike mbela? Omolwaashi Jesus okwa li e mu hole. Omafimbo amwe, otashi dulika tu ongaonge okuladipika omukonakoni a tule moilonga osho te lihongo, molwaashi hatu diladila kutya ina wana natango okuninga omalunduluko. Otashi dulika shi pule oule wefimbo, opo omunhu e lidule omunhu mukulu nokudjala omunhu mupe. (Kol. 3:9, 10) Ndele ngeenge owa popi naye diva shi na sha nomalunduluko oo a pumbwa okuninga, ota ka ninga diva omalunduluko. Ngeenge owa kala ho kundafana naye oinima oyo, ota ka mona kutya ou na ko nasha naye. — Eps. 141:5; Omayel. 27:17.

6. Omolwashike tu na okupula omapulo e na sha netaleko lomunhu?

⁶ Osha fimana okukala hatu pula omukonakoni osho ta diladila shi na sha noshikundafanwa. Epulo la tya ngaho otali ku kwafele u mone kutya omukonakoni woye oku udite ko ngoo oshikundafanwa osho, nokumona osho a itavela. Ngeenge owa kala ho ningi ngaho pandjikilile, otashi ke ku kwafela u dule okukundafana naye noupu oikundafanwa oyo ya nyika ouxwenge. Embo Nghee to dulu okuhafela onghalamwenyo fiyo alushe! oli na omapulo mahapu e na sha netaleko lovanhu. Pashihopaenenwa, moshileshwa 04 omu na epulo tali ti: “Mbela oto diladila kutya Jehova oha kala e udite ngahelipi, ngeenge to tumbula edina laye?” Oshileshwa 09 oshi na epulo tali ti: “Oinima imwe ilipi wa hala okwiilikana kombinga yayo?” Pehovelo, otashi dulika omukonakoni a pumbwa efimbo opo a diladile, ofimbo ina nyamukula. Oto dulu oku mu deula a kale ha longifa omishangwa odo tadi yambidida osho ta popi nosho yo omafano oo e li moshileshwa.

7. Ongahelipi hatu dulu okulongifa oimoniwa yavamwe nomupondo?

⁷ Ngeenge omukonakoni woye oku udite ko osho a pumbwa okuninga, longifa oimoniwa yavamwe u mu ladipike. Pashihopaenenwa, ngeenge omukonakoni woye ihe uya kokwoongala pandjikilile, oto dulu oku mu ulikila okavidio Jehova okwa fila nge oshisho taka hangwa koshi yoshipalanyole “Tala ouyelele wa wedwa po” moshileshwa 14. Moileshwa ihapu yembo Nghee to dulu okuhafela onghalamwenyo fiyo alushe! oto dulu okuhanga mo oimoniwa yavamwe koshi yoshipalanyole, “Konakona moule,” ile “Tala ouyelele wa wedwa po.” * Henuka okuyelekanifa omukonakoni woye navamwe mokupopya kutya, “Ngeenge nhumba okwa dula oku shi ninga, naave oto shi dulu.” Efa omukonakoni oye a fike pexulifodiladilo la tya ngaho. Ponhele yaasho, popya oitwa ya fimana oyo ya kwafela omunhu oo e li mokavidio, opo a tule moilonga osho Ombiibeli tai hongo. Oto dulu okupopya omushangwa, ile osho sha kwafela omunhu oo a tumbulwa mokavidio. Apa tashi shiiva, kala ho divilike nghee Jehova a kwafela omunhu oo.

8. Ongahelipi hatu dulu okukwafela omukonakoni wetu a kale e hole Jehova?

⁸ Kwafela omukonakoni woye a kale e hole Jehova. Ngahelipi mbela? Konga eemhito u kwafele omukonakoni woye e lihonge kombinga yomaukwatya aJehova. Mu kwafela a kale a tala ko Jehova e li Kalunga, oo ha kala alushe a hafa noha yambidida ovo ve mu hole. (1 Tim. 1:11; Heb. 11:6) Mu kwafela a mone kutya ota ka mona ouwa, ngeenge oha tula moilonga ouyelele oo tamu kundafana. Mu yelifila kutya omauwa oo, otaa ulike kutya Jehova oku mu hole. (Jes. 48:17, 18) Osho otashi ke linyengifa omukonakoni a ninge omalunduluko, eshi ohole yaye yokuhola Jehova tai ende tai kulu. — 1 Joh. 5:3.

9. Metwokumwe naMarkus 10:29, 30, oshike tashi ka kwafela omukonakoni a ninge omaliyambo noku kale a wana okuninginifwa?

⁹ Omukonakoni okwa pumbwa okuninga omaliyambo, opo a ninge exumokomesho fiyo a ninginifwa. Ngaashi omulumenhu oshipuna oo a tumbulwa pehovelo, ovakonakoni vamwe ova pumbwa okweefa po oinima yopamaliko. Ngeenge oilonga oyo hava longo kai li metwokumwe nomafinamhango Ombiibeli, otashi dulika va pumbwa okukonga oilonga imwe. Vahapu ova pumbwa okweefa po okweendafana nookaume ovo ihava longele Jehova. Vamwe otashi dulika vehe niwe ko nasha navo kovapambele, ovo ve tonde Eendombwedi daJehova. Jesus okwa popya kutya otashi ka kala shidjuu kuvamwe okuninga omaliyambo a tya ngaho. Ashike okwa udaneka kutya ovo tave ke mu shikula itava ka nyematekwa. Otava ka pewa ondjabi inene youkwaneumbo wopamhepo unahole. (Lesha Markus 10:29, 30.) Ongahelipi to dulu okukwafela omukonakonimbiibeli woye a mone ouwa moshali oyo ya denga mbada?

10. Oshike hatu lihongo moshimoniwa shaManuel?

¹⁰ Panga oukaume nomukonakoni woye. Osha fimana okuulikila omukonakoni woye kutya ou na ko nasha naye. Omolwashike mbela? Natu taleni kwaasho sha popiwa kuManuel wokoMexico. Okwa popya kombinga yaao a konakona naye a ti: “Alushe ofimbo inatu hovela okukonakona, okwa li ha pula nge kutya ondi li tuu nawa. Okwa kwafela nge ndi kale nda manguluka oku mu lombwela osho ndi udite. Onda mona kutya oku na ko nasha naame shili.”

11. Ongahelipi ovakonakoni vetu tashi dulika va mone ouwa mokukala efimbo nafye?

¹¹ Kala ho kala efimbo novakonakoni voye, ngaashi Jesus a li ha kala novashikuli vaye. (Joh. 3:22) Ngeenge omukonakoni woye ota ningi omalunduluko, oto dulu oku mu shiva e uye keumbo leni, opo mu nwe otee, ile mu lye pamwe, ile mu tale o-broadcasting. Otashi dulika omukonakoni woye e ke shi pandule, unene tuu ngeenge owe mu shivi pefimbo loivilo  yomatango manene, efimbo olo tashi dulika ha kala e likalela oye aeke. Kazibwe, wokoUganda, okwa ti: “Onda mona kutya onde lihonga shihapu kombinga yaJehova, eshi handi kala efimbo naao ha konakona naame, shi dulife osho handi lihonga pekonakono. Onda mona nghee Jehova ha file oshisho ovapiya vaye, nanghee va hafa. Naame osho naanaa nda li nda hala onghalamwenyo yange i kale ya tya ngaho.”

12. Omolwashike twa pumbwa okukala hatu i novaudifi va yoolokafana kovakonakoni?

¹² Kala ho i novaudifi va yoolokafana kovakonakonimbiibeli voye. Omafimbo amwe, otashi dulika tu kale hatu i komukonakoni ofye atuke, ile tu kale ashike hatu i ko nomuudifi a faafana efimbo keshe. Ashike omukonakoni wetu ota ka mona ouwa, ngeenge otwa kala hatu i ko novaudifi va yoolokafana alushe. Dmitrii, wokoMoldova, okwa ti: “Omuudifi keshe, oo ha kala pekonakono lange, oha yelifa oinima monghedi ye likalekelwa. Osho osha kwafela nge ndi mone eenghedi dimwe omo handi dulu okutula moilonga osho handi lihongo. Osha kwafela nge yo ndiha kale nda fya eehoni eshi nda ya kokwoongala oshikando shotete, molwaashi onda li ndi shii nale ovamwatate novamwameme vahapu.”

13. Omolwashike twa pumbwa okukwafela ovakonakoni vetu va kale have uya kokwoongala?

¹³ Kwafela omukonakoni woye a kale he uya kokwoongala. Omolwashike mbela? Omolwaashi Jehova okwa lombwela ovapiya vaye va kale hava ongala pamwe, osho shi li oshitukulwa shelongelokalunga letu. (Heb. 10:24, 25) Shikwao vali, ovamwatate novamwameme ove li oukwaneumbo wetu wopamhepo. Ngeenge tu li navo pokwoongala, ohatu kala twa fa tu li navo meumbo, hatu hafele okulya pamwe. Ngeenge owa kwafele omukonakoni woye a kale he uya kokwoongala, kungaho oto mu kwafele a katuke onghatu imwe yomeenghatu da fimanenena, opo a kale a wana okuninginifwa. Ashike otashi dulika shi kale shidjuu kuye okukatuka eenghatu. Ongahelipi embo Nghee to dulu okuhafela onghalamwenyo fiyo alushe! tali dulu okukwafela omukonakoni a finde omashongo oo a taalela?

14. Ongahelipi hatu dulu okuladipika omukonakoni wetu a hovele okwoongala?

¹⁴ Longifa oshileshwa 10 shembo Nghee to dulu okuhafela onghalamwenyo fiyo alushe! opo u ladipike omukonakoni woye a kale he uya kokwoongala. Ofimbo embo olo inali pita, ovaudifi vamwe va pyokoka ova li va lombwelwa va ninge omalolelo oshileshwa osho. Osha kwafela ovakonakoni vavo va hovele okwoongala. Oshoshili kutya katu na okuteelela tu fike koshileshwa 10, opo tu shive ovakonakonimbiibeli vetu kokwoongala. Mu shiva diva ngaashi tashi dulika nokukala ho mu shivi lwoikando. Ovakonakonimbiibeli ova taalela omandangalati a yoolokafana. Onghee hano, kala ho yandje elitulemo keemhumbwe domukonakoni keshe nokutala nghee to dulu oku mu pa ekwafo tali longo. Ino tula omutwe kepepe, ngeenge ihe uya kokwoongala. Lididimika nokutwikila oku mu shiva.

15. Omukonakoni wetu otashi dulika a kale a tila shike?

¹⁵ Mbela oto dimbuluka pomhito imwe wa li wa tila okuninga Ondombwedi yaJehova? Tashi dulika wa li to diladila kutya ku na fiku u ka udife moipafi. Ile tashi dulika wa li wa tila kutya ovapambele voye, ile ookaume koye otave ke ku pataneka. Ngeenge osho, otashi ke ku kwafela u udile oukwao wananghali omukonakoni woye. Jesus okwa popya kutya ohatu dulu okuhangwa koumbada wa tya ngaho. Ndele nande ongaho, okwa ladipika ovashikuli vaye vaha efe oumbada u va efife po okulongela Jehova. (Mat. 10:16, 17, 27, 28) Jesus okwa kwafela ngahelipi ovashikuli vaye va finde oumbada? Nongahelipi to dulu okushikula oshihopaenenwa shaye?

16. Ongahelipi hatu dulu okudeula omukonakoni wetu a kale ha lombwele vamwe osho te lihongo?

 ¹⁶ Deula omukonakoni woye a kale ha lombwele vamwe osho te lihongo. Ovahongwa vaJesus otashi dulika va li va tila eshi e va lombwela va ka udife. Ashike Jesus okwa li e va kwafela eshi e va lombwela a pa ve na oku ka udifila, naasho va li tava ka udifa kombinga yasho. (Mat. 10:5-7) Ongahelipi to dulu okuhopaenena Jesus? Kwafela omukonakoni woye a mone kutya onaini e na okuudifa. Pashihopaenenwa, mu pula ngeenge oku shii umwe oo a hala okuyelifilwa kombinga yoshinima shonhumba mOmbiibeli. Opo nee mu endifa po pwaasho ta ka tya, to mu ulikile monghedi i li paunafangwa. Ngeenge otashi shiiva, otamu dulu okulilongekida pamwe naye tamu longifa okamhungu, “Vamwe ohava ti” nosho yo “Umwe otashi dulika a pule kutya,” oyo tai hangwa membo Nghee to dulu okuhafela onghalamwenyo fiyo alushe! Eshi tamu ningi ngaho, deula omukonakoni woye a kale ha longifa Ombiibeli nokuyandja omanyamukulo taa ti sha, te shi ningi nelungi.

17. Ongahelipi hatu dulu okulongifa Mateus 10:19, 20, 29-31, eshi hatu kwafele omukonakoni wetu a kale e lineekela muJehova?

¹⁷ Kwafela omukonakoni woye a kale e lineekela muJehova. Jesus okwa li a lombwela ovahongwa vaye kutya Jehova ote ke va kwafela, molwaashi Jehova oku va hole. (Lesha Mateus 10:19, 20, 29-31.) Dimbulukifa omukonakoni woye kutya Jehova oku mu hole. Mu kwafela a kale e lineekela muJehova, to ilikana pamwe naye kombinga yomalalakano aye. Franciszek, wokoPoland, okwa ti: “Omuhongi wange okwa li ha kwatele momailikano aye omalalakano ange. Eshi nda mona kutya Jehova okwa nyamukula omailikano omuhongi wange, naame onda hovela diva okukala handi ilikana. Onda li nda mona kutya Jehova okwa kwafela nge, eshi nda li nda indila efudo koilonga, oyo opo nda li nda mono, opo ndi kale handi i kokwoongala nosho yo koshoongalele sha kula.”

18. Jehova oku uditile ngahelipi oilonga oyo tai longwa kOvakriste?

¹⁸ Jehova oku na ko nasha unene novakonakonimbiibeli vetu. Oha pandula neenghono oilonga oyo tai longwa kOvakriste noku va hole, eshi tava kwafele ovanhu va ehene popepi elela naye. (Jes. 52:7) Nonande ku na omukonakoni paife, oto dulu okukwafela ovakonakonimbiibeli va ninge exumokomesho fiyo va ninginifwa mokukala ho waimine ovaudifi vakweni pomakonakonombiibeli avo.