1-2. Oshike twa pumbwa okuninga, opo Kalunga a kale a hokwa onghedi omo hatu mu longele?

 OSHIKE hashi uya momadiladilo oye, ngeenge owa udu oshitya “okulongela” Kalunga? Otashi dulika u faneke momadiladilo oye omumwatate a twa eengolo e li polwaamba lombete yaye ta ilikana a mana mo notashi di komutima. Ile tashi dulika u diladile kombinga youkwaneumbo wa hafa, oo u hole okukonakona Ombiibeli.

² Eenghalo adishe odo dopavali oda kwatelwa mokulongela Jehova. Mbela Jehova ota ka kala ngoo a hokwa onghedi omo tave mu longele? Heeno, ngeenge ohava kala metwokumwe nehalo laye notave shi ningi pahole nonefimaneko. Nafye otu hole Jehova neenghono. Otu shii kutya okwa wana okulongelwa. Onghee hano, otwa hala oku mu longela monghedi ya denga mbada.

3. Oshike hatu ka kundafana moshitukulwa eshi?

³ Moshitukulwa eshi, ohatu ka tala eenghedi dokulongela Jehova odo a li a hokwa pefimbo lonale. Ohatu ka tala yo eenghedi hetatu odo a hokwa kunena. Eshi hatu ningi ngaho, natu diladile pauhandimwe opo twa pumbwa okuxwepopala. Ohatu ka tala yo komatomheno oo taa ulike kutya elongelokalunga lashili ohali weda ko kehafo letu.

4. Ovapiya vaJehova, ovo va li ko ofimbo Jesus ine uya kombanda yedu, ova li va ulika ngahelipi kutya ova fimaneka Jehova nove mu hole?

⁴ Ovalumenhu ovadiinini, ovo va li ko nale ofimbo Jesus ine uya kombanda yedu, ngaashi Abel, Noa, Abraham naJob ova ulika kutya ova fimaneka Jehova nove mu hole. Ngahelipi mbela? Omokukala ovaduliki, ve na eitavelo nova ninga omaliyambo. Ombiibeli inai popya kondadalunde onghedi omo va li  hava longele Jehova. Ndele osha yela kutya ova li hava ningi ngaashi tava dulu, opo va fimanekife Jehova. Ova li yo have mu longele monghedi omo a hokwa. Lwanima, Jehova okwa pa oludalo laAbraham Omhango okupitila muMoses. Eemhango odo da pambafana oda li da popya omalombwelo okondadalunde e na sha nanghee Jehova e na okulongelwa.

5. Elunduluko lilipi la ka ningwa melongelokalunga lashili, konima yefyo laJesus nenyumuko laye?

⁵ Konima yefyo laJesus nenyumuko laye, Jehova ka li vali a teelela ovanhu va dulike kOmhango oyo a li pa Moses. (Rom. 10:4) Ovakriste ova li ve na okushikula omhango ipe, “omhango yaKristus.” (Gal. 6:2) Ova li ve na okudulika ‘komhango’ oyo mokushikula oshihopaenenwa shaJesus nosho yo omahongo aye. Ndele haku a kopela ashike momutwe, ile okukala ve na omusholondodo woinima oyo ve na okuninga, naayo vehe na okuninga. Sha faafana nokunena, Ovakriste ohava ningi ngaashi tava dulu, opo va shikule Kristus nova kale va hokiwa kuJehova ‘nokulimonena etulumuko.’ — Mat. 11:29.

6. Ongahelipi hatu dulu okumona ouwa moshitukulwa eshi?

⁶ Eshi hatu konakona onghedi keshe, lipula kutya: ‘Exumokomesho lilipi nda ninga moshinima eshi?’ Otashi dulika yo wa pumbwa okulipula kutya, ‘Mbela openi nda pumbwa okuxwepopala?’ Oto dulu okukala wa hafela exumokomesho olo wa ninga. Ndele apa wa pumbwa okuninga omalunduluko, ilikana kuJehova tashi di komutima e ku kwafele.

7. Jehova oha tale ko ngahelipi omailikano etu taa di komutima?

⁷ Ohatu longele Jehova, ngeenge hatu mu ilikana. Omishangwa oda faafanifa omailikano etu netwimino olo la longekidwa nawa, olo la li hali yandjwa ketwalihangano, nolwanima okotembeli. (Eps. 141:2) Etwimino ola li hali di omwifi wedimba liwa, olo la li hali hafifa Kalunga. Sha faafana, Jehova ota ka kala a “hokwa” omailikano etu taa di komutima, nonande otwa longifa ashike oitya i li paunafangwa. (Omayel. 15:8; Deut. 33:10) Onghee hano, otu na etomheno liwa lokwiitavela kutya Jehova oha kala a hokwa okupwilikina komailikano etu, eshi hatu mu lombwele kutya otu mu hole notwe mu pandula. Okwa hala okuuda hatu mu lombwele osho hatu lipula nasho, kombinga yoinima oyo twa teelela naasho twa hala. Ofimbo ino popya naJehova okupitila meilikano, omolwashike ito diladila komesho yefimbo kombinga yaasho to ka popya? Ngeenge owa ningi ngaho, oto ka pa Xo womeulu “etwimino” la denga mbada.

8. Otu na omhito itunhula ilipi omo hatu dulu okutanga Kalunga?

⁸ Ohatu longele Jehova, ngeenge hatu mu tange. (Eps. 34:1) Ohatu tange Jehova, ngeenge hatu popi kombinga yomaukwatya aye mawa noilonga yaye itunhula. Ohatu mu tange tashi di komutima. Ngeenge otwa kongo efimbo lokudilonga koilonga aishe iwa oyo Jehova e tu ningila, ohatu ka kala tu na omatomheno mahapu oku mu tanga. Oilonga yokuudifa oi li omhito ye likalekelwa yokuyandja ‘omahambeleloyambo nokutya, oshiimati shomilungu detu.’ (Heb. 13:15) Ngaashi ashike hatu dilonga komesho yefimbo osho hatu ka popya naJehova okupitila meilikano, otwa pumbwa okukala hatu diladila komesho yefimbo shi na sha naasho hatu ka popya naavo hatu shakeneke moukalele. Otwa hala alushe “omahambeleloyambo” etu a kale a denga mbada. Onghee hano, natu kale hatu popi nondjungu, eshi hatu udifa.

9. Ngaashi Ovaisrael vonale, ouwa ulipi hatu mono, ngeenge twa ongala pamwe? Yandja oshihopaenenwa shoye shopaumwene.

⁹ Ohatu longele Jehova, ngeenge twa ongala  pamwe. Oshiwana shaIsrael shonale osha li sha lombwelwa taku ti: “Lutatu momudo keshe ovalumenhu voye aveshe ve nokuholoka koshipala shOmwene Kalunga koye.” (Deut. 16:16) Ova li hava fiye po omaumbo avo, nomapya avo kaa li haa kelelwa. Jehova okwe va udanekela ta ti: “Itapa kala nande umwe e nolwisho lokuhala oshilongo shoye, fimbo ove to i u ka holoke koshipala shOmwene Kalunga koye.” (Ex. 34:24) Ovaisrael, ovo va li ve na eitavelo netilokalunga, ova li hava i koivilo yokomudo. Ova li hava mono ondjabi inene. Ova li hava kala ve udite ko nawa Omhango yaKalunga, hava dilonga kouwa waye nokuhafela eendafano tali tungu novaitaveli vakwao. (Deut. 16:15) Nafye ohatu mono ouwa wa faafana, ngeenge otwa ningi omaliyambo tu kale pokwoongala kwopaKriste. Diladila nghee Jehova ha kala a hafa, ngeenge twe lilongekidila okwoongala komesho yefimbo, hatu yandje omatyekosha e li pauxupi notaa tungu.

10. Omolwashike okwiimba ku li oshitukulwa sha fimana shokulongela Kalunga?

¹⁰ Ohatu longele Jehova, ngeenge hatu imbi pamwe novamwatate novamwameme. (Eps. 28:7) Ovaisrael ova li va tala ko okwiimba ku li oshitukulwa sha fimana shokulongela Kalunga. Ohamba David oya li ya hoolola Ovalevi 288 va ka imbe motembeli. (1 Omaf. 25:1, 6-8) Kunena, ohatu ulike kutya otu hole Kalunga, ngeenge hatu imbi omaimbilo pamwe novamwatate novamwameme. Omutono womawi etu hao wa fimanenena. Diladila keyelekanifo eli: Ngeenge hatu popi, “ohatu ningi omapuko luhapu,” ashike osho ihashi tu imbi tuha popye meongalo nosho yo moukalele. (Jak. 3:2) Sha faafana, inatu efa oushima, oo wa etifwa po kokuhawanenena, u tu imbe okwiimbila Jehova.

11. Metwokumwe nEpsalme 48:13, omolwashike twa pumbwa okulitulila po efimbo lokukonakona Ombiibeli pamwe tu li oukwaneumbo?

¹¹ Ohatu longele Jehova, ngeenge hatu konakona Eendjovo daye nokuhonga oludalo letu kombinga yaye. Eshabata ola li hali kwafele Ovaisrael ve limangulule koinakuwanifwa yakeshe fiku, opo va dule okuyandja elitulemo kokupameka ekwatafano lavo naJehova. (Ex. 31:16, 17) Ovo va li ovadiinini ova li hava hongo ovana kombinga yaJehova nosho yo ouwa waye. Nafye otwa pumbwa okulitulila po efimbo pauhandimwe lokulesha nokukonakona Eendjovo daye. Onghedi oyo oi li oshitukulwa shokulongela Jehova nohai tu kwafele tu ehene popepi elela naye. (Eps. 73:28) Ngeenge hatu konakona pamwe tu li oukwaneumbo, ohatu kwafele oludalo letu, olo li li epupi lipe, lipameke pauhandimwe ekwatafano naXe womeulu omunahole. — Lesha Epsalme 48:13.

12. Oshike hatu lihongo monghedi omo Jehova a li a tala ko oilonga yaavo va longa etwalihangano?

¹² Ohatu longele Jehova, ngeenge hatu tungu nokukaleka monghalo iwa eenhele detu dokwoongalela. Ombiibeli oya popya kutya oilonga yaavo va tunga etwalihangano oi li ‘oilonga iyapuki.’ (Ex. 36:1, 4) Kunena, Jehova okwa tala ko oilonga yokutunga Omalupale Ouhamba nosho yo eenhele dikwao dokwoongalela iyapuki. Ovamwatate novamwameme vamwe ova longifa efimbo lihapu moilonga oyo. Otwa pandula neenghono adishe omaliyambo oo va ninga omolwoilonga yOuhamba. Oshoshili kutya navo ohava kufa ombinga moilonga yokuudifa. Ashike vamwe vomuvo otashi dulika va li va hala okukala ovakokolindjila. Ovakulunhuongalo ohava ulike kutya otava yambidida oilonga yokutunga mokukala itava ongaonga okunangeka po ovalumenhu novakainhu ovadiinini ve li ovakokolindjila, ngeenge ova wanifa po oiteelelwa. Kashi na nee mbudi kutya otu na owino moilonga yokutunga, ile hasho, atusheni ohatu dulu okukala hatu wapaleke eenhele detu dokwoongalela nosho yo oku di wapekulula.

13. Otu na okutala ko ngahelipi omayambidido oo hatu yandje omolwoilonga yOuhamba?

 ¹³ Ohatu longele Jehova, ngeenge hatu yandje omayambidido omolwoilonga yOuhamba. Ovaisrael kava li ve na okuya koshipala shaJehova hamakasha. (Deut. 16:16) Ova li hava twaalele eeshali odo ve na, she likolelela keenghalo davo. Kungaho, ova li hava ulike kutya ova pandula omalongekido aeshe oo a ningwa, opo va dule okumona ouwa meendja dopamhepo. Ongahelipi hatu dulu okuulika kutya otu hole Jehova nonokutya otwa pandula eendja dopamhepo odo e tu longekidila? Onghedi imwe omo hatu dulu oku shi ninga omokuyandja omayambidido opashimaliwa meongalo letu nosho yo moilonga yokuudifa yomounyuni aushe she likolelela keenghalo detu. Omuyapostoli Paulus okwa ti: “Kalunga oha tambula ko eeshali odo hadi yandjwa nomutima aushe, osheshi okwa teelela omunhu keshe a yandje osho e na, ndele hashosho ehe na.” (2 Kor. 8:4, 12) Onghee hano, Jehova okwa lenga neenghono adishe omayambidido oo hatu yandje nehalo liwa, kashi na nee mbudi kutya oku fike peni. — Mark. 12:42-44; 2 Kor. 9:7.

14. Metwokumwe nOmayeletumbulo 19:17, Jehova okwa tala ko ngahelipi eeshali odo hatu pe ovamwatate ovo ve li momhumbwe?

¹⁴ Ohatu longele Jehova, ngeenge hatu kwafele Ovakriste vakwetu ovo ve li momhumbwe. Jehova okwa li a udaneka kutya ota ka alulila Ovaisrael ovo hava yandje eeshali keehepele. (Deut. 15:7, 10) Onghee hano, efimbo keshe hatu kwafele Omukriste mukwetu, oo e li momhumbwe, kungaho otwa fa hatu yandje oshali oyo kuJehova. (Lesha Omayeletumbulo 19:17.) Pashihopaenenwa, eshi Ovakriste vomuFilippi va li va tumina Paulus eeshali, eshi a li modolongo, Paulus okwa ti kutya ‘eyambo olo oli li edimba liwa la tambulwa ko nola hokiwa kuKalunga.’ (Fil. 4:18) Natu kale hatu konenene meongalo letu, ndele hatu lipula kutya: ‘Mbela olyelye handi dulu okukwafela?’ Jehova oha kala a hafa, ngeenge te tu tale hatu longifa efimbo, eenghono, owino noiniwe yetu, opo tu kwafele ovo ve li momhumbwe. Okwe shi tala ko shi li oshitukulwa shoku mu longela. — Jak. 1:27.

15. Ngeenge okukala melongelokalunga lashili otashi pula efimbo neenghendabala, omolwashike lihe fi omutengi?

¹⁵ Otashi pula efimbo neenghendabala okukala melongelokalunga lashili. Ashike kali fi omutengi. (1 Joh. 5:3) Omolwashike mbela? Omolwaashi ohatu longele Jehova, hatu linyengifwa kohole yoku mu hola. Diladila shi na sha nokamonamati oko ka hala okupa sha xe. Otashi dulika ka longife eevili donhumba taka fanekele xe efano. Ashike okamonamati oko itake ke lipa oushima omolwefimbo olo ka longifa. Oke hole xe noka hafa eshi ke mu pa oshali ya tya ngaho. Sha faafana, molwaashi otu hole Jehova, ohatu kala twa hafa, ngeenge hatu longifa efimbo nokuninga eenghendabala, opo tu mu longele.

16. Metwokumwe nOvaheberi 6:10, Jehova okwa tala ko ngahelipi eenghendabala odo hatu ningi pauhandimwe, opo tu mu hafife?

¹⁶ Ovadali ovanahole ihava kala va teelela ovana ve va pe eeshali da faafana. Ove shii kutya ounona ova yoolokafana, nokudula kwavo inaku faafana. Sha faafana, Tate yetu womeulu oku shii eenghalo dakeshe umwe pauhandimwe. Otashi dulika u kale ho longo shihapu shi dulife vakweni ovo u shii nou hole. Ile otashi dulika ito dulu okuninga shihapu ngaashi vamwe, tashi dulika omolwomido doye, okuhe na oukolele, ile oinakuwanifwa youkwaneumbo. Ashike ino teka omukumo. (Gal. 6:4) Jehova ke na efiku a dimbwe oilonga yoye. Ota ka kala a hafa, shimha ashike to mu pe osho sha denga mbada noto shi ningi nelinyengotomheno  la yuka. (Lesha Ovaheberi 6:10.) Jehova oku shii yo osho shi li momutima woye. Okwa hala u kale wa hafa nokuninga ngaashi to dulu, opo u mu longele.

17. (a) Oshike to ka ninga po, ngeenge owa mono kutya oshidjuu okutula moilonga eenghedi dimwe dokulongela Jehova? (b) Ouwa ulipi wa mona muimwe yomeenghedi odo di li moshimhungu “ Weda ko kehafo loye”?

¹⁷ Ongahelipi ngeenge oshidjuu okutula moilonga eenghedi dokulongela Kalunga, ngaashi okuninga ekonakono lopaumwene, ile okuudifa moipafi? Ngeenge ohatu kufa ombinga momalipyakidilo onhumba, ohatu hovele okukala tu a hole nohatu mono mo ouwa. Ohatu dulu okuyelekanifa omalipyakidilo etu opamhepo nokulideulila okushika oshishikomwa shonhumba. Ngeenge otwa kala ashike hatu shiki omafiku amwe, otashi dulika itatu ka ninga exumokomesho. Ashike ngeenge otwa kala hatu shiki efiku keshe, ohatu ka ninga exumokomesho meendelelo. Otashi dulika tu hovele nokukala hatu shiki efimbo linini, ndele hatu ende hatu weda ko kefimbo. Eshi hatu ende hatu mono nghee hatu xwepopala, ohatu ka enda hatu weda ko kefimbo letu nohatu ke shi hafela. Onghee hano, ohatu dulu okuninga sha faafana shi na sha neenghedi detu dokulongela Kalunga.

18. Oshinima sha fimana shilipi hatu dulu okuninga, noidjemo ilipi hatu ka mona?

¹⁸ Oshinima sha fimana osho hatu dulu okuninga osho okulongela Jehova nomutima aushe. Osho ohashi tu kwafele tu kale twa hafa, onghalamwenyo yetu i kale i na eityo nosho yo eteelelo lokulongela Jehova fiyo alushe. (Omayel. 10:22) Ohatu kala tu na ombili yopamadiladilo, molwaashi otu shii kutya Jehova oha kwafele ovapiya vaye, ngeenge ve li moudjuu. (Jes. 41:9, 10) Onghee hano, otu na omatomheno mawa okukala twa hafa, eshi hatu longele Tate yetu omunahole, oo a ‘wana okupewa efimano netumbalo’ koishitwa yaye aishe. — Eh. 4:11.