1-2. Omanangeko noupuna elipi omunhu ha mono konima eshi a ninginifwa?

 OHATU kala twa hafa, ngeenge hatu ninginifwa nokuninga oshitukulwa shoukwaneumbo waJehova. Oshi li oufembanghenda munene okukala tu na ekwatafano lopofingo naJehova. Ohatu tu kumwe neendjovo domupsalme David, oo a ti: “Omunelao ou, we mu hoolola, ndele oto itavele a ehene kwoove, ye a kale momikala doye.” — Eps. 65:​4, KB-13.

² Jehova iha pitike keshe omunhu momikala daye. Ngaashi twa kundafana moshitukulwa sha tetekela, oha hoolola ovo va ulika kutya ova hala okukala ve na ekwatafano lopofingo naye. (Jak. 4:8) Ngeenge owe liyapulile Jehova nowa ninginifwa, ohashi ku ehenifa popepi naye monghedi ye likalekelwa. Oto dulu okukala u na oushili kutya, konima eshi wa ninginifwa ote ke ku “lokifila enangekonoupuna la wanenena.” — Mal. 3:​10, KB-13; Jer. 17:​7, 8.

3. Ovakriste ovo ve liyapulila Kalunga nova ninginifwa, ove na oshinakuwanifwa shilipi sha kwata moiti? (Omuudifi 5:​4, 5)

³ Eninginifo olo ehovelo loye lokulongela Jehova monghalamwenyo yoye. Konima eshi wa katuka onghatu oyo, oto ka kala wa hala okuninga ngaashi to dulu u kale metwokumwe neano leliyapulo loye, nonande owa taalela omashongo, ile omayeleko eitavelo. (Lesha Omuudifi 5:​4, 5.) U li omuhongwa waJesus, oto ka shikula oshihopaenenwa nosho yo oipango yaye, ngaashi to dulu. (Mat. 28:​19, 20; 1 Pet. 2:21) Oshitukulwa eshi otashi ke ku kwafela u ninge ngaho.

 “KALA NOKUSHIKULA” JESUS, NONANDE OWA TAALELA OMASHONGO NOMAYELEKO

4. Omeityo lilipi ovahongwa vaJesus hava humbata ‘omuti womahepeko’? (Lukas 9:23)

⁴ Konima yeninginifo, itashi ti kutya ito ka kala u na omaupyakadi monghalamwenyo yoye. Ponhele yaasho, Jesus okwa yelifila ovahongwa vaye kutya otava ka humbata ‘omuti womahepeko,’ notava ka ninga ngaho “efiku keshe.” (Lesha Lukas 9:23.) Mbela Jesus okwa li ta ti kutya ovahongwa vaye otava ka mona oixuna alushe? Hasho nandenande. Ponhele yaasho, okwa li ta divilike kutya, kakele komanangeko noupuna oo tava ka mona, otava ka taalela omashongo. Omashongo amwe oo otaa ka kala madjuu neenghono. — 2 Tim. 3:12.

5. Omanangeko noupuna elipi Jesus a udanekela ovo hava ningi omaliyambo?

⁵ Otashi dulika wa patanekwa koilyo youkwaneumbo weni, ile wa ninga omaliyambo mokukala uhe na oimaliwa ihapu, ile wa efa po oinima yonhumba, opo u dule okupitifa komesho Ouhamba waKalunga monghalamwenyo yoye. (Mat. 6:33) Ngeenge osho wa ninga ngaho, kala u na oushili kutya Jehova oku shii oilonga yoye youdiinini. (Heb. 6:10) Otashi dulika wa mona oushili weendjovo daJesus tadi ti: “Keshe oo a fiya po eumbo, ile ovamwainamati, ile ovamwainakadona, ile xe, ile ina, ile ounona, ile omapya omolwedina lange nomolwonghundana iwa, ota mono lwefele paife, omaumbo, ovamwainamati, ovamwainakadona, ooina, ounona nomapya pamwe nomahepeko, nomounyuni tau uya, omwenyo waalushe.” (Mark. 10:​29, 30) Omanangeko noupuna oo wa mona oku dulife omaliyambo keshe oo wa ninga. — Eps. 37:4.

6. Konima yeninginifo loye, omolwashike wa pumba okutwikila okukondjifa “okahalu kombelela”?

⁶ Konima yeninginifo loye, oto pumbwa natango okukondjifa “okahalu kombelela.” (1 Joh. 2:16) Osho osho shi li ngaho, molwaashi ou li natango omunhu oo ina wanenena. Omafimbo amwe, otashi dulika u kale u udite ngaashi omuyapostoli Paulus. Okwa shanga, a ti: “Onda hokwa neenghono omhango yaKalunga nomutima aushe. Ndele ondi wete vali omhango imwe molutu lange tai kondjifa omhango oyo tai pangele omadiladilo ange notai kondjifile nge moupika womhango youlunde oyo i li molutu lange.” (Rom. 7:​22, 23) Otashi dulika u kale u udite wa teka omukumo, molwaashi ou na natango okulwifa omahalo a puka. Ashike okudiladila kombinga yeudaneko olo wa ningila Jehova, eshi we mu liyapulila, otaku ke ku pameka, opo u dule okukondjifa omashongo. Oushili oyoo kutya ngeenge wa taalela omayeleko, eano leliyapulo loye otali ke ku kwafela. Ngahelipi?

7. Ongahelipi okukala we liyapulila Jehova taku ku kwafele u twikile okukala omudiinini kuye?

⁷ Ngeenge owe liyapulile Jehova, oho kala we lixupula. Osho osha hala okutya, owa hoolola okuhenuka omahalo oye opaumwene nomalalakano oo itaa ka hafifa Jehova. (Mat. 16:24) Ngeenge oto yelekwa, ile to piti monghalo idjuu, ito ka pumbwa okudiladila kutya oshike u na okuninga po. Owa tokola nale kutya oto ka ninga po shike, opo u kale omudiinini kuJehova. Owa tokola toko okuhafifa Jehova. Kungaho, oto kala wa fa Job. Nonande okwa li a taalela omayeleko madjuu neenghono, okwa popya, a ti: “Itandi ka efa po oudiinini wange.” — Job 27:5.

8. Ongahelipi okudiladila keilikano loye lokuliyapulila Jehova taku ku kwafele, opo u kondjife omayeleko?

⁸ Okudiladila keilikano loye, eshi we liyapulila Jehova, ohaku ku kwafele, opo u mone eenghono u kondjife omayeleko. Pashihopaenenwa, mbela oto ke lihumbatela umwe oo ehe fi kaume koye kopahombo monghedi  oyo tai kokele momilele? Hasho nandenande! Owa udanekela nale Jehova kutya ito ka ninga oshinima shi li ngaho. Ngeenge ino efa omaliudo e li ngaho a kule, ito ka pumbwa oku a kondjifa. Oto ka ‘kanduka mo melila lovahenakalunga.’ — Omayel. 4:​14, 15, KB-13.

9. Ongahelipi okudiladila keilikano loye leliyapulo taku ku kwafele u twikile okukala wa pitifa komesho okulongela Jehova monghalamwenyo yoye?

⁹ Ongahelipi ngeenge owa pewa oilonga kuumwe, oyo tai ke ku imba okwoongala pandjikilile? Oto ka kala u shi shii osho u na okuninga. Ofimbo ino pewa oilonga oyo, owa tokola nale nokutya ito ka tambula oilonga oyo tai ke ku imba okuya kokwoongala. Kungaho, ito ka yelekwa okukala wa hala okutambula ko oilonga ya tya ngaho, noto ka konga onghedi omo to dulu okupitifa Jehova komesho. Okudilonga koshihopaenenwa shaJesus, otashi ke tu kwafela. Okwa li a tokola okuhafifa Xe. Ngaashi Jesus, kala wa tokola toko, opo u henuke diva oshinima keshe osho u shii kutya itashi hafifa Kalunga oo we liyapulila. — Mat. 4:10; Joh. 8:29.

10. Ongahelipi Jehova te ke ku kwafela konima yeninginifo loye u kale to ‘shikula’ Jesus?

¹⁰ Osho ho ningi ngeenge u na omaupyakadi, ile to yelekwa okuninga oshinima sha puka, ohashi ulike kutya owa hala okukala to ‘shikula’ Jesus. Ngeenge owa ningi ngaho, kala u shi shii kutya Jehova ote ke ku kwafela. Ombiibeli oya ti: “Kalunga omudiinini, noita efa mu yelekwe neyeleko olo itamu dulu okulididimikila, ndele ote mu kwafele mu dule okulididimika ngeenge mu li momayeleko.” — 1 Kor. 10:13.

OSHO TO DULU OKUNINGA U KALE TO SHIKULA JESUS

11. Onghedi imwe ya denga mbada yokukala to shikula Jesus oilipi? (Tala yo efano.)

¹¹ Jesus okwa longela Jehova nomutima  waye aushe nokwa kala ha ilikana kuye. (Luk. 6:12) Onghedi imwe ya denga mbada, opo u kale to shikula Jesus konima yeninginifo loye omokutwikila okuninga oinima oyo tai ku ehenifa popepi elela naJehova. Ombiibeli oya ti: “Ngaashi twa kala nokuninga exumokomesho, natango natu twikileni okweenda mondjila imwe.” (Fil. 3:16) Efimbo nefimbo, ohatu udu oimoniwa yovamwatate novamwameme ovo va tokola okuninga shihapu moilonga yaJehova. Otashi dulika va ya kOfikola yOvaudifi vOuhamba, ile va tembukila konhele oko ku na omhumbwe inene. Ngeenge oto dulu okulitulila po elalakano la tya ngaho, pula komesho. Oshiwana shaJehova osha halelela okutamununa mo oukalele washo. (Oil. 16:9) Ongahelipi ngeenge ito dulu okuninga ngaho pomhito ei? Ino diladila kutya ove ito dulu okuninga sha. Osho sha fimana oshosho kutya oto twikile okulididimika. (Mat. 10:22) Ino dimbwa kutya oto hafifa Jehova unene, ngeenge wa ningi ngaashi eenghalo doye tadi ku pitike. Eshi oshi li onghedi ya fimana, opo u kale to shikula Jesus konima yeninginifo loye. — Eps. 26:1.

12-13. Oshike to dulu okuninga, ngeenge owa mono kutya oto kanifa ouladi? (1 Ovakorinto 9:​16, 17) (Tala yo oshimhungu “ Kala mefiyafanepo.”)

¹² Oshike u na okuninga po, ngeenge ou udite kutya eilikano loye itali di komutima, ile iho hafele vali oukalele ngaashi wa li ho u hafele nale? Ngahelipi ngeenge iho hafele vali okulesha Ombiibeli, ngaashi wa li ho ningi nale? Ngeenge ou udite ngaho konima yeninginifo loye, ino fika pexulifodiladilo kutya ku na vali omhepo yaJehova. Molwaashi inatu wanenena, omaliudo etu otaa dulu okulunduluka efimbo nefimbo. Ngeenge oto kanifa ouladi woye, diladila koshihopaenenwa shomuyapostoli Paulus. Nonande okwa kendabala okuhopaenena Jesus, Paulus okwa kala e shi  shii kutya omafimbo amwe iha kala a halelela okuninga osho a pumbwa okuninga. (Lesha 1 Ovakorinto 9:​16, 17.) Okwa ti: “Nonande itandi shi ningi nehalo liwa, ondi na oku shi ninga molwaashi onde shi lineekelelwa kuKalunga.” Noitya imwe, Paulus okwa li a tokola toko okuwanifa po oukalele waye, kashi na nee mbudi kutya oku udite ngahelipi pomhito oyo.

¹³ Sha faafana, ino ninga omatokolo she likolelela ashike kwaasho u udite. Kala wa tokola toko okuninga osho shi li mondjila, nonande hasho wa hala okuninga. Ngeenge owa kala to ningi osho sha yuka, mokweendela ko kwefimbo, otashi dulika omaliudo oye a lunduluke. Ngeenge owa twikile okukala ho konakona paumwene, ho ilikana, ho ongala nokuudifa, otashi ke ku kwafela u kale ho shikula Jesus konima yeninginifo loye. Eshi ovamwatate novamwameme tava tale kelididimiko loye mokulongela Jehova, otashi ke va twa omukumo. — 1 Tes. 5:11.

“KALENI NOKULIKONAKONA”

14. Oshike u na okukonakona pandjikilile, nomolwashike? (2 Ovakorinto 13:5)

¹⁴ Konima yeninginifo loye, osha fimana okulikonakona pandjikilile. (Lesha 2 Ovakorinto 13:5.) Efimbo nefimbo, oshiwa okukala ho konakona onghalamwenyo yoye nosho yo eenghedindjikilile doye, opo u tale kutya oho ilikana ngoo efiku keshe, ho lesha nokukonakona Ombiibeli, ho ongala nokukufa ombinga moukalele. Konga eenghedi odo tadi ku kwafele u hafele nokumona ouwa muhapu moinima oyo. Pashihopaenenwa, lipula omapulo ngaashi: ‘Ohandi dulu ngoo okuyelifila vamwe omahovelohongo Ombiibeli? Ongahelipi handi dulu okuhafela oukalele wange? Omailikano ange ookondadalunde ngoo, nohaa ulike ngoo kutya onde lineekela muJehova filufilu? Ohandi ongala ngoo pandjikilile? Ongahelipi handi dulu okuxwepopaleka okuyandja elitulemo nosho yo okukufa ombinga mokwoongala?’

15-16. Oshike to lihongo koshimoniwa shomumwatate umwe kombinga yokufinda eyeleko?

¹⁵ Osha fimana yo okukala tu shii omaunghundi etu. Omumwatate wedina Robert okwa popya oshimoniwa osho tashi yelifa oshitwa osho. Okwa ti: “Eshi nda li ndi na omido 20 lwaapo, onda li ndi na oilonga yetatafiku. Efiku limwe konima yoilonga, omukainhu umwe hatu longo naye, okwa li a shiva nge keumbo laye. Okwa lombwela nge ta ti, ohatu ka kala ofye atuke nohatu ka hafela pamwe. Potete, onda li handi ningi omalipopilo anafangwa, ashike lwaxuuninwa, onde ke mu lombwela handi ti ahowe, nonde mu yelifila  kutya omolwashike.” Robert okwa li a kondjifa eyeleko olo, naasho oshi shii okupandulwa. Lwanima, Robert okwa diladila kwaasho sha li sha ningwa po, nokwa mona kutya okwa li ta dulu okulinyenga monghedi i lili. Okwa popya a ti: “Kanda li nda anya diva, ngaashi Josef a li a anya omukulukadi waPotifar. (Gen. 39:​7-9) Nokuli onda li nda kumwa okumona nghee sha li shidjuu, opo ndi dule okwaanya. Oshiningwanima osho osha kwafela nge ndi mone kutya onda pumbwa okupameka ekwatafano lange naJehova.”

¹⁶ Oto dulu okumona ouwa mokulikonakona ove mwene, ngaashi Robert a ninga. Nonande owa pondola mokukondjifa eyeleko, lipula kutya, ‘Osha pula nge efimbo li fike peni opo ndi tye ahowe?’ Ngeenge owa mono kutya owa pumbwa okuxwepopala, ino teka omukumo. Kala wa hafa, eshi wa mona kutya ou na ounghundi oo. Ilikana kuJehova kombinga younghundi woye, ndele to ningi oinima oyo tai ku pameke u kale wa hala okudulika kuye. — Eps. 139:​23, 24.

17. Edina laJehova ola li la kwatelwa mo ngahelipi moshimoniwa shaRobert?

¹⁷ Ope na oshinima shimwe vali osho hatu dulu okulihonga koshimoniwa shaRobert. Okwa twikila ko, a ti: “Konima eshi nda anya eshivo lomukainhu oo hatu longo naye, okwa ti, ‘Owa pita!’ Onde mu pula kutya okwa hala okutya ngahelipi. Okwa yelifa a ti, kaume kaye womulumenhu, oo a li Ondombwedi, okwa li e mu lombwela kutya ovanyasha aveshe vEendombwedi ohava ningi oinima ya puka meholeko, ngeenge va mona omhito. Nokwa li a lombwela kaume kaye kutya ota ka tala nge po. Onda li nda hafa neenghono okushiiva kutya onda fimanekifa edina laJehova.”

18. Owa tokola okuninga shike konima yeninginifo loye? (Tala yo oshimhungu “ Oitukulwa ivali oyo to ka hafela.”)

¹⁸ Eshi we liyapulila Jehova nokuninginifwa, oto ulike kutya owa hala okuyapulifa edina laye, kashi na nee mbudi kutya oshike tashi ningwa po. Kala u shii kutya Jehova oku shii omashongo oo wa taalela noku shii yo omayeleko oo to piti muo. Ota ka nangeka noupuna eenghendabala doye dokukala omudiinini. Lineekela kutya ote ke ku pa eenghono okupitila momhepo yaye iyapuki u ninge ngaho. (Luk. 11:​11-13) Kekwafo laJehova, oto ka dula okushikula Jesus konima yeninginifo loye.