Ombiibeli otai twikile ngoo okulundulula onghalamwenyo yoye?
“Shitukeni vape momadiladilo eni.” — OVAROMA 12:2.
OMAIMBILO: 61, 52
1-3. (a) Omaluduluko elipi tashi dulika a kale madjuu kufye okuninga konima eshi twa ninginifwa? (b) Ngeenge okuninga omaluduluko okudjuu kufye, omapulo elipi hatu dulu okulipula? (Tala efano pehovelo loshitukulwa.)
OMUMWATATE wedina Kevin okwa kala ha ndobola, ha shili omakaya, ha kolwa nokulongifa oingangamifi oule womido dihapu. [1] (Tala eshangelo lopexulilo loshitukulwa.) Opo nee okwa li e lihonga kombinga yaJehova nokwa li a hala okuninga kaume kaye. Ashike opo a ninge ngaho, osha li tashi mu pula a ninge omalunduluko manene monghalamwenyo yaye. Okwa li a dula okulunduluka kekwafo laJehova nokeenghono dEendjovo daye, Ombiibeli. — Ovaheberi 4:12.
2 Konima eshi Kevin a ninginifwa, okwa li natango e na okutwikila okulundulula omaukwatya aye opo a kale e na elihumbato lopaKriste. (Ovaefeso 4:31, 32) Pashihopaenenwa, okwa li ha handuka diva. Ashike okwa ka kumwa eshi a ka didilika kutya onghee ngoo shidjuu kuye okupangela ehandu laye. Kevin okwa ti kutya okulihonga okupangela ehandu oko unene kwa li kudjuu ku dule okweefa po oinima ii oyo a li ha ningi fimbo ina ninginifwa. Ashike okwa li a dula okuninga omalunduluko eshi a pula Jehova e mu kwafele naashi a konakona nawa Ombiibeli.
3 Fimbo inatu ninginifwa, vahapu vomufye otwa li tu na okuninga omalunduluko manene monghalamwenyo yetu opo tu kale metwokumwe naasho Ombiibeli tai ti. Ndele natango ohatu mono kutya ope na omalunduluko manini oo twa pumbwa okuninga opo tu hopaenene Kalunga naKristus. (Ovaefeso 5:1, 2; 1 Petrus 2:21) Pashihopaenenwa, otashi dulika twa didilika kutya ohatu ngongota unene ile hatu ambe vamwe noku va popila mowii. Ile omafimbo amwe tu kale twa tila osho vamwe tava diladila ile tava popi kutya ihatu longo osho sha yuka. Otashi dulika twa kala hatu kendabala okuninga omalunduluko oule womido dihapu ndele natango ohatu endulula ashike omapuko a faafana. Otashi dulika tu lipule kutya: ‘Omolwashike shidjuu kwaame okuninga omalunduluko moinima oyo? Oshike ndi na okuninga opo ndi tule moilonga osho Ombiibeli tai ti opo ndi twikile okuxwepopaleka omaukwatya ange?’
OTO DULU OKUHAFIFA JEHOVA
4. Omolwashike ihatu dulu okuhafifa Jehova mukeshe shimwe osho hatu ningi?
4 Otu hole Jehova notwa halelela nomutima wetu aushe oku mu hafifa. Ndele shinyikifa oluhodi, itatu dulu oku mu hafifa efimbo keshe molwaashi inatu wanenena. Ohatu kala tu udite ngaashi omuyapostoli Paulus oo a ti: “Ehalo ondi li kwete, ndelenee eenghono dokuwanifa ouwa, ahowe.” — Ovaroma 7:18; Jakob 3:2.
5. Omalunduluko elipi twa ninga manga inatu ninginifwa, ashike okuhawanena kulipi tashi dulika tu kale hatu kondjifa?
5 Fimbo omunhu ina ninga Ondombwedi yaJehova oku na okweefa po okuninga oinima oyo Jehova e tonde. (1 Ovakorinto 6:9, 10) Ndele osho inashi hala kutya okwa wanenena. (Ovakolossi 3:9, 10) Onghee hano, ohatu twikile okuninga omapuko nonande otwa ninginifwa pwa pita omido dihapu. Efimbo nefimbo ohatu kwatwa komahalo nokomaliudo a puka ile tu nyengwe okupangela omaukwatya etu mai. Kakele kaasho, otashi dulika tu na okukondjifa oukwatya wonhumba wii oule womido.
6, 7. (a) Oshike she shi ningifa tashi shiiva opo tu pange oukaume naJehova nonande inatu wanenena? (b) Omolwashike tuhe na okwoongaonga okupula Jehova e tu dimine po?
6 Nonande inatu wanenena, ohatu dulu okukala ookaume kaJehova noku mu longela. Dimbuluka alushe eshi wa hovela okuninga kaume kaye. Oye a mona sha shiwa mwoove nokwa li a hala u mu shiive. (Johannes 6:44) Oku shi shii yo kutya oho ningi omapuko, u na omaunghundi noto ka kala ho ningi omapuko. Ashike nande ongaho, Jehova okwa hala u ninge kaume kaye.
7 Jehova oku tu hole neenghono eshi e tu pa oshali i na ondilo. Okwa li a tuma Omona waye Jesus kombada yedu a yandje omwenyo waye u ninge oikulila yomatimba etu. (Johannes 3:16) Ngeenge otwa ningi epuko, ohatu dulu okupula Jehova e tu dimine po. Ekulilo ole tu shilipaleka kutya ote ke tu dimina po nohatu ka twikila okukala ookaume kaye. (Ovaroma 7:24, 25; 1 Johannes 2:1, 2) Dimbuluka kutya Jesus okwa fila ovalunde ovo ve livela ombedi. Onghee hano, nonande otwa kala tu udite kutya osho twa ninga osha puka neenghono, inatu efa okwiilikana Jehova e tu dimine po. Ngeenge itatu pula Jehova e tu dimine po, ohatu ka kala ashike ngaashi omunhu e na omake a kaka ndele ina hala oku a kosha. Inatu hafa tuu eshi Jehova e shi ninga tashi shiiva opo tu ninge ookaume kaye nonande inatu wanenena! — Lesha 1 Timoteus 1:15.
Ngeenge otwa hala okweehena popepi naJehova, otu na okutwikila okukendabala oku mu hopaenena nosho yo Omona waye
8. Omolwashike tuhe na okulipwilikila okuhawanenena kwetu?
8 Oshoshili kutya itatu dulu okulidimbika omaunghundi etu ile tu kale hatu ningi omalipopilo kombinga yao. Jehova okwe tu lombwela kutya ovo va hala okukala ookaume kaye ove na okukala va tya ngahelipi. (Epsalme 15:1-5) Onghee hano, ngeenge otwa hala okweehena popepi naye, otu na okutwikila okukendabala oku mu hopaenena nosho yo Omona waye. Otu na yo okukendabala okupangela omahalo e tu mai, notashi dulika nokuli tu ka pondole oku efa po amwe omuo. Kashi na nee mbudi kutya otwa ninginifwa efimbo li fike peni, otu na okutwikila okuxwepopaleka omaukwatya etu. — 2 Ovakorinto 13:11.
9. Otu shi shii ngahelipi kutya ohatu dulu okutwikila okudjala omunhu mupe?
9 Omuyapostoli Paulus okwa lombwela Ovakriste a ti: “Mu nokulidula omunhu mukulu, ou mwe mu shikula nale, ndele ohe linyono po mokushikula ouhalu u nekonda. Ndele mu shituke vape momhepo yomadiladilo eni, ndele nye mu djale omunhu mupe a shitwa a fe Kalunga omouyuki nomouyapuki woshili.” (Ovaefeso 4:22-24) Osho osha hala okutya otu na okutwikila okuninga eenghendabala tu lunduluke notu “djale omunhu mupe.” Onghee hano, kashi nee mbudi kutya otwa kala hatu longele Jehova oule wefimbo li fike peni, ohatu dulu okulihonga okukulika omaukwatya a fa aYe. Ombiibeli otai dulu yo oku tu kwafela tu twikile okulundulula omaukwatya etu opo tu mu hopaenene.
OMOLWASHIKE SHIDJUU?
10. Oshike tu na okuninga opo tu kale hatu ningi omalunduluko kekwafo lOmbiibeli, nomapulo elipi tashi dulika tu lipule?
10 Atushe otwa hala okudulika kwaasho Ombiibeli tai ti. Ashike otwa pumbwa okulonga noudiinini ngeenge otwa hala okutwikila okuninga omalunduluko. Omolwashike tu na okuninga eenghendabala da tya ngaho? Mbela omolwashike Jehova ite shi tu ningile ashike shipu tu kale hatu longo osho sha yuka?
11-13. Omolwashike Kalunga a teelela tu kale hatu ningi eenghendabala dokupangela okuhawanenena kwetu?
11 Ngeenge hatu diladila keshito noinima aishe ei i li mo, itatu ka kala vali nomalimbililo kutya Jehova oku na eenghono dokuninga keshe shimwe. Pashihopaenenwa, okwa shita etango olo li na eenghono dinene. Osekonde keshe, etango ohali yandje ouyelele noupyu muhapu neenghono, ndele eenghono ashike dinini da pumbiwa kedu opo ku kale oinima i na omwenyo. (Epsalme 74:16; Jesaja 40:26) Jehova oha yandje yo eenghono kovapiya vaye kombada yedu ngeenge ve di pumbwa. (Jesaja 40:29) Osha yela kutya, ngeno Jehova okwa li a hala, ngeno okwe shi ninga lela shipu kufye okukondjifa okuhawanenena kwetu opo tuha kale vali nomahalo mai. Mbela omolwashike ine shi ninga?
12 Jehova okwe tu pa emanguluko lokuninga omatokolo. Okwe tu pitika tu hoolole kufye vene ngeenge otwa hala okudulika kuye ile hasho. Ngeenge otwa hoolola okudulika kuye nokulonga noudiinini tu longe ehalo laye, ohatu ulike kutya otu mu hole notwa hala oku mu hafifa. Satana okwa ti kutya Jehova ke na oufemba wokupangela ovanhu. Ndele ngeenge ohatu dulika kuJehova, ohatu ulike kutya otwa hala a ninge Omupangeli wetu. Ohatu dulu okukala noushili kutya Tate yetu omunahole okwa lenga eenghendabala detu adishe odo hatu ningi opo tu dulike kuye. (Job 2:3-5; Omayeletumbulo 27:11) Onghee hano, ngeenge otwa kala hatu longo noudiinini tu pangele omaukwatya etu mai nonande kashipu, ohatu ulike kutya otu li ovadiinini kuJehova notwa hala a ninge Omupangeli wetu.
13 Jehova okwe tu lombwela okupitila mEendjovo daye tu longe noudiinini opo tu hopaenene omaukwatya aye. (Ovakolossi 3:12; lesha 2 Petrus 1:5-7.) Okwa hala yo tu longe noudi inini opo tu pangele omadiladilo nomaliudo etu. (Ovaroma 8:5; 12:9) Luhapu ngeenge twa longo noudiinini tu ninge omalunduluko ndele hatu pondola, ohatu kala twa hafa.
EFA EENDJOVO DAKALUNGA DI TWIKILE OKU KU LUNDULULA
14, 15. Otu na okuninga po shike opo tu kulike omaukwatya oo Jehova e hole? (Tala oshimhungu “ Ombiibeli neilikano oya lundulula onghalamwenyo yavo.”)
14 Oshike tu na okuninga opo tu kulike omaukwatya oo Jehova e hole? Ponhele yokukala hatu tokola kufye vene osho twa hala okuxwepopaleka, otwa pumbwa okweefa Kalunga oye e tu wilike. Ombiibeli mOvaroma 12:2 oya ti: “Inamu [faafana] nounyuni ou, ndelenee shitukeni vape momadiladilo eni, opo mu shiive okukonakona ehalo laKalunga lilipi, naashi shiwa, sha wapalela nosha wana.” Opo tu shiive osho Jehova a hala tu ninge, otwa pumbwa okukala twe lineekela ekwafo olo e tu pa. Otwa pumbwa okulesha Ombiibeli efiku keshe, okudilonga kwaasho twa lesha nokwiilikana kuJehova e tu pe omhepo yaye iyapuki. (Lukas 11:13; Ovagalati 5:22, 23) Ngeenge otwa ningi ngaho, ote ke tu kwafela tu ude ko osho tashi mu hafifa nohatu ke lihonga tu kale hatu tale ko oinima ngaashi ye. Oshidjemo, osho hatu diladila, osho hatu popi naasho hatu ningi otashi ka hafifa Jehova notashi ke tu kwafela tu pangele omaukwatya etu mai. Ndele nande ongaho, otwa pumbwa okutwikila okukondjifa alushe omaukwatya a tya ngaho. — Omayeletumbulo 4:23.
Konga oitukulwa moishangomwa yetu ile omishangwa dOmbiibeli odo de ku kwafela u kondjife okuhawanenena nokukala ho di lesha efimbo nefimbo (Tala okatendo 15)
15 Kakele kokulesha Ombiibeli efiku keshe, otwa pumbwa oku i konakona pamwe noishangomwa yetu ngaashi Oshungonangelo no-Awake! Oitukulwa ihapu oyo i li moifo oyo otai tu hongo nghee hatu dulu okuhopaenena omaukwatya aJehova nonghee hatu dulu okukondjifa omaukwatya etu mai. Ohatu dulu okuhanga mo oitukulwa nomishangwa donhumba odo tadi dulu oku tu kwafela. Ohatu dulu okukonga mo omishangwa noitukulwa oyo, opo tu kale hatu endulula mo efimbo nefimbo.
16. Omolwashike tuhe na okuteka omukumo ngeenge otu wete itatu ningi omaluduluko meendelelo?
16 Otashi pula efimbo opo tu lihonge okuhopaenena omaukwatya aJehova. Ngeenge ou udite kutya ino ninga omalunduluko mahapu ngaashi wa li wa hala, ino sholola. Potete otashi dulika wa pumbwa okukondja u ninge osho Ombiibeli tai ti. Ndele eshi to twikile okudiladila nokulihumbata monghedi oyo Jehova a hokwa, otashi ka kala shipu kwoove okutala ko oinima ngaashi ye nokuninga osho sha yuka. — Epsalme 37:31; Omayeletumbulo 23:12; Ovagalati 5:16, 17.
DILADILA KOMBINGA YONAKWIIWA YETU ITUNHULA
17. Ngeenge otu li ovadiinini kuJehova, ohatu ka mona onghalamwenyo itunhula ilipi?
17 Otwa teelela nodjuulufi eshi hatu ka kala twa wanenena nokulongela Jehova fiyo alushe. Pefimbo opo itatu ka pumbwa okukondjifa omaunghundi asha notashi ka kala shipu kufye okuhopaenena Jehova. Ashike nopaife ohatu longele Jehova molwaashi okwe tu pa oshali yekulilo. Nonande inatu wanenena, ohatu dulu oku mu hafifa ngeenge otwa twikile okulonga noudiinini tu ninge omalunduluko nokudulika kwaasho he tu hongo mOmbiibeli.
18, 19. Ongahelipi hatu dulu okukala noushili kutya Ombiibeli oi na eenghono dokutwikila okulundulula onghalamwenyo yetu?
18 Omumwatate Kevin okwa ninga ngaashi ta dulu opo e lihonge okukondjifa eamo lokuhanduka diva. Okwa dilonga kwaasho a lesha mOmbiibeli nokukendabala okuninga omalunduluko monghalamwenyo yaye. Natango okwa shikula omayele oo a li a pewa kOvakriste vakwao. Nonande osha pula eedula opo Kevin a ninge omalunduluko, lwanima okwa ka ninga omuyakuliongalo. Nopaife ota longo e li omukulunhuongalo oule weedula 20. Ndele natango oku shi shii kutya okwa pumbwa okutwikila okukondjifa omaunghundi aye.
19 Ngaashi Kevin, ohatu dulu okulundulula omunhu wetu womeni. Ngeenge otwa ningi ngaho, ohatu ka twikila okweehena popepi elela naJehova. (Epsalme 25:14) Nongeenge otwa ningi eenghendabala tu ninge omalunduluko opo tu mu hafife, ote ke tu kwafela tu pondole. Ohatu kala noushili kutya Ombiibeli otai tu kwafele tu twikile okuninga omalunduluko monghalamwenyo yetu. — Epsalme 34:9.
^ [1] (okatendo 1) Edina olo halo lomunhu oo lelalela.
