JESUS okwa li a xunganeka kutya ovashikuli vaye otava ka hafela eteyo linene pefimbo eli lexulilo. (Mat. 9:37; 24:14) Tala kunghee eendjovo daye da wanifwa shili monghedi ididilikwedi moshitukulwa shaTranscarpathia, Ukraine. Meedolopa nhatu domoshitukulwa osho, omu na omaongalo 50 nosho yo ovaudifi ve dulife po 5 400. * Movakalimo vane vomeedolopa odo nhatu, umwe womuvo Ondombwedi yaJehova.

Mbela oshitukulwa osho hashi udifilwa osha tya ngahelipi? Omumwatate umwe womoshitukulwa osho wedina Vasile okwa ti: “Ovanhu moshitukulwa eshi ova fimaneka Ombiibeli neenghono, ove hole ouyuki, ove na ekwatafano liwa momaukwaneumbo avo nohava kendabala okukwafela vakwao. Haalushe hava tu kumwe neitavelo letu. Ashike ngeenge otwe va ulikile sha mOmbiibeli, ohava pwilikine nelitulemo.”

Ovamwatate novamwameme ohava shakeneke omashongo ngeenge tava udifile moshitukulwa osho shi na ovaudifi vahapu. Pashihopaenenwa, eongalo limwe oli na ovaudifi 134, ashike moshitukulwa osho omu na ashike omaumbo 50 ovanhu ovo vehe fi ovaudifi. Mbela ovaudifi ohava ungaunga ngahelipi nonghalo ya tya ngaho?

Ovamwatate novamwameme vahapu ohava tamununa mo oukalele wavo moku ka udifila koitukulwa oko ku na omhumbwe inene. Omumwatate wedina Lonash, oo e na omido 90, okwa ti: “Omuudifi keshe oku na okuudifila omaumbo avali moshitukulwa osho hashi longwa keongalo letu. Ohandi udifile momikunda, nefimbo opo la di ko eshi oukolele wange wa li tau nyangwaanyangwa onda li handi i koshitukulwa osho ihashi longwa shi li kokule oshinano sheekilometa 160, nonda li handi udifa melaka lOshihungarian.” Ovaudifi ove na okuninga omaliyambo opo va ka kwafele koitukulwa imwe. Lonash okwa ti: “Opo ndi ye neshina, onda li handi penduka ponhee yokeengula nonda li handi udifa fiyo opo hamano yokomatango eshi eshina tali shuna keumbo. Onda li handi shi ningi oikando ivali ile itatu moshivike.” Mbela okwa li ngoo e udite kutya eenghendabala daye otadi ti sha? Okwa ti: “Onda mona ehafo linene moukalele wa tya ngaho. Onda li ndi na oufembanghenda wokukwafela oukwaneumbo umwe oo wa li u li moshitukulwa she likalela u lihonge oshili.”

Haaveshe momaongalo omoshitukulwa eshi tava dulu okweenda oinano ile. Ndele aveshe, mwa kwatelwa ovaudifi ovanamido, ohava kendabala okuudifila oshitukulwa shavo nawanawa. Oshidjemo, mo 2017, eedolopa odo nhatu oda li da ningila Edimbuluko pamwe, novanhu ovo va li po ova li ve dulife lwomapa avali omuvalu wovaudifi, ile tu tye etata lovakalimo aveshe. Kape na omalimbililo, keshe apa hatu longele, otu na shihapu okulonga “moilonga yOmwene.” — 1 Kor. 15:58.