ITASHI hekeleke tuu okuulikila vamwe onghenda! Ohatu kala twa hafa ngeenge otwa didilike kutya umwe oku na ko nasha nafye. Ndele molwaashi ohatu kala twa hala okuungaungiwa nafye nonghenda, ongahelipi hatu dulu okukulika oukwatya oo muwa?

Onghenda oya kwatela mo okunakonasha nonghalonawa yavamwe, nokunakonasha kwa tya ngaho ohaku ulikwa okupitila meendjovo nosho yo moilonga tai ti sha. Molwaashi onghenda oya kwatela mo oilonga, inashi wana ashike okukala neenghedi diwa kombada. Onghenda yashili ohai ulikwa nohole yomoule nosho yo olukeno. Kakele kaasho, oukaume ou li oshitukulwa shoiimati yomhepo iyapuki yaKalunga oyo Ovakriste va lombwelwa va kulike. (Gal. 5:22) Opo tu kulike oukwatya woukaume, natu ka konakoneni nghee Jehova nOmona va li va ulika oukwatya oo nanghee hatu dulu okushikula oshihopaenena shavo.

Jehova oku na onghenda noku na ko nasha novanhu aveshe, mwa kwatelwa ovo “vehe shii okupandula naava vai.” (Luk. 6:35) Pashihopaenenwa, Jehova “etango laye ote li pitifile ava vai naava vawa, nodula ote i lokifile ovayuki naava vehe fi ovayuki.” (Mat. 5:45) Nokuli naavo inava itavela kutya Jehova okuli Omushiti wavo ohava mono ouwa momafiloshisho aye opahole notashi dulika va kale ve na ehafo lonhumba.

Otu na oshihopaenenwa sha denga mbada shonghenda shi na sha naasho Jehova a li a ningila Adam naEva. Diva ashike konima eshi Adam naEva va nyona ova li va “hondjela kumwe omafo omukwiyu, ndele tave liningile omateta.” Ashike Jehova okwa li e shii kutya ova pumbwa oikutu tai wapalele molwaashi ova li tava ka dja kondje yaEden, oko edu la li la fingilwa “omakiya neeshosholo.” Jehova okwa li a wanifa po pahole omhumbwe yavo eshi e va ningila “oikutu yoipa.” — Gen. 3:7, 17, 18, 21.

Nonande Jehova oha ulikile onghenda “ava vai naava vawa” okwa halelela unene okuulikila onghenda ovapiya vaye ovadiinini. Pashihopaenenwa, pefimbo lomuprofeti Sakaria, omweengeli okwa li a uda nai eshi a mona okutungululwa kwotembeli muJerusalem kwa kanghama. Jehova okwa li a pwilikina komweengeli oo nokwa li e mu nyamukula ‘neendjovo diwa dehekeleko.’ (Sak. 1:12, 13) Jehova okwa li a ungaunga nomuprofeti Elia monghedi ya faafana. Pomhito imwe, omuprofeti okwa li a teka omukumo nokwa li a pula Jehova e mu dipae. Jehova okwa li a yandja elitulemo kunghee Elia a li e udite nokwa li a tuma omweengeli e mu pameke. Shikwao vali, Kalunga okwa li a shilipaleka omuprofeti kutya ke li oye aeke. Konima eshi Elia a li a uda eendjovo donghenda nokwa pewa ekwafo olo a li a pumbwa, okwa li a twikila okuwanifa po oshinakuwanifwa shaye. (1 Eeh. 19:1-18) Mokati kovapiya vaJehova, olyelye a li unene a hopaenena oukwatya waJehova wonghenda wa denga mbada?

Jesus okwa li a shiivikila oukwatya wonghenda nosho yo okunakonasha navamwe pefimbo  loukalele waye kombada yedu. Kali e na onyanya ile ha pangele vamwe. Okwa popya nolune a ti: “Ileni kwaame, nye amushe hamu longo nomwa lolokifwa, Ame ohandi mu pe etulumuko. . . Osheshi ondjoko yange oiwa.” (Mat. 11:28-30) Omolwonghenda yaye, ovanhu ova li have mu shikula keshe apa ta i. Molwaashi Jesus okwa li ‘a udila ovanhu olukeno’ okwa li e va palula, e va velula komaudu avo nokwe va honga “oinima ihapu” kombinga yaXe. — Mark. 6:34; Mat. 14:14; 15:32-⁠38.

Molwaashi Jesus okwa li omunanghenda, okwa li e udite ko noha tokola pauyuki ngeenge ta ungaunga novanhu. Kashi na nee mbudi kutya osha li tashi pula shike, okwa li ha ‘kundu’ ile ha tambula ko aveshe ovo va li ta ve mu kongo. (Luk. 9:10, 11) Pashihopaenenwa, ka li a hanyena omukainhu oo a li a kwata koshikutu shaye e na elineekelo kutya ota ka veluka ketiko lohonde nonande ka li a koshoka. (Lev. 15:25-28) Molwaashi Jesus okwa li e uditile onghenda omukainhu oo a li a vela omido 12, okwa li e mu lombwela a ti: “Omumwangekadona, eitavelo loye ole ku velula. Inda nombili, ove u kale wa veluka koudu woye.” (Mark. 5:25-34) Oyo kai fi tuu onghatu iwa yokuulikila vamwe onghenda!

Moihopaenenwa ya tetekela, otwa mona kutya onghenda yashili ohai ulikwa okupitila moilonga. Jesus okwe shi yelifa meyele lOmusamaria omunamutimanghenda kutya opa pumbiwa okukatukwa onghatu. Nonande opa li outondwe pokati kOvasamaria nOvajuda, omulumenhu Omusamaria oo a popiwa meyele olo okwa li a etela onghenda omulumenhu oo a li a nyekwa oinima yaye, a dengwa nokwa fiwa mondjila e na okamwenyo kanini. Onghenda oya li ye linyengifa Omusamaria a katuke onghatu. Okwa li a hakula oipute yomulumenhu oo ndele temu twala kongulu yovaenda. Omusamaria okwa li a futa mwene weumbo lovaenda opo a file oshisho omulumenhu oo a li a mona oshiponga nokwa li nokuli a futa oipumbiwa ya wedwa po. — Luk. 10:29-⁠37.

Nonande onghenda luhapu ohai ulikwa okupitila moilonga, otai dulu okuulikwa okupitila meendjovo tadi ti sha notadi tungu. Nonande “oshisho shomomutima womunhu otashi u fidimike poshi,” Ombiibeli oya popya kutya “ondjovo yehekeleko otai u hafifa.” (Omayel. 12:25) Ngeenge otwa kala tu na onghenda nohatu ningile vamwe ouwa, ohatu ke va lombwela eendjovo detwomukumo naasho otashi ke va kwafela va kale va hafa. * Eendjovo detu donghenda otadi ka ulika kutya otu na ko nasha navo. Ngeenge otwe va lombwele eendjovo detwomukumo, otashi ka kala shipu kuvo okulididimikila omaupyakadi oo tava shakeneke. — Omayel. 16:⁠24.

Molwaashi ovanhu aveshe ova shitwa ‘oshifeka shaKalunga,’ otava dulu okukulika oukwatya wonghenda. (Gen. 1:27) Pashihopaenenwa, Julius, omukulunhu wetangakwaita laRoma oo a li a tulifa modolongo omuyapostoli Paulus, okwa li a ungaunga naye nombili nokwa li e “mu efa a ka talele po ookaume kaye, a yakulwe kuvo” koshilando shaSidon. (Oil. 27:⁠3) Pomhito imwe, ovakalimo vomuMalta ova li va ungaunga ‘nombili youkaume’ naPaulus nosho yo vamwe ovo va li va xupa moshikepa oyo ya li ya teka. Ovakalimo ova li nokuli va shakala omundilo opo ovo va xupa moshikepa oyo va xuxumukwe. (Oil. 28:1, 2) Oilonga yavo oi shii okupandulwa, onghenda oya kwatela mo shihapu shi dulife ashike okulonga ouwa omafimbo amwe.

Opo tu hafife Kalunga pauyadi, otu na okukulika onghenda i kale oshitukulwa shomaukwatya etu nonghedi yetu yokukalamwenyo. Omolwetomheno olo, Jehova okwe tu lombwela tu ‘djale’ efilonghenda. (Kol. 3:12) Ashike haalushe hatu mono shipu okukulika oukwatya oo wopakalunga. Omolwashike mbela? Otashi dulika tu ongaonge okuulika onghenda  omolwoumbada, tuhe na elineekelo, hatu patanekwa, ile tu na oikala yokuliholamwene. Kakele kaasho, ohatu dulu okufinda omaupyakadi a tya ngaho mokukala twe lineekela momhepo iyapuki nosho yo mokuhopaenena onghedi yaJehova yokuulika onghenda. — 1 Kor. 2:⁠12.

Mbela ohatu dulu okudidilika opo twa pumbwa okuxwepopaleka mokuulika onghenda? Ohatu dulu okulipula kutya: ‘Mbela ngeenge handi pwilikine kuvamwe ohandi kala ngoo ndi udite olukeno? Mbela ohandi yandje ngoo elitulemo keemhumbwe davamwe? Onaini nde lixula okuulikila umwe onghenda oo ehe fi omupambele ile kaume kange kopofingo?’ Opo nee ohatu dulu okulitulila po omalalakano, ngaashi okushiiva shihapu kombinga yavamwe ovo ve tu dingilila, unene tuu meongalo lopaKriste. Kungaho ohatu dulu okushiiva kombinga yeenghalo nosho yo yeemhumbwe davo. Natu kendabale okuulikila vamwe onghenda monghedi oyo nafye twa hala vamwe ve i tu ulikile ngeenge twe i pumbwa. (Mat. 7:12) Xuuninwa, Jehova ota ka nangeka noupuna eenghendabala detu dokukulika onghenda ngeenge otwe mu pula ekwafo. — Luk. 11:⁠13.

Eshi omuyapostoli Paulus a tumbula oinima oyo ya li hai mu didilikifa mo e li omuyakuli waKalunga, okwa li a kwatela mo ‘ombili.’ (2 Kor. 6:3-⁠6) Ovanhu ova li hava kala va nanenwa kuPaulus molwaashi okwa li ha kala e na ko nasha navo, nokwa li e shi ulika moilonga nomeendjovo daye donghenda. (Oil. 28:30, 31) Sha faafana, nafye ohatu dulu okunanena ovanhu koshili okupitila melihumbato letu liwa. Ngeenge ohatu ulikile onghenda ovanhu aveshe, mwa kwatelwa ovo have tu pataneke, ohatu ke va kwafela vaha kale ovahandunhu nosho yo va kale hava ungaunga nafye nombili. (Rom. 12:20) Mokweendela ko kwefimbo, otashi dulika nokuli va ka nanenwe ketumwalaka lOmbiibeli.

MOparadisa oyo tai ke uya kombada yedu, kape na omalimbililo kutya ovanhu vahapu ovo tava ka nyumunwa otava ka kala va hafa okuulikilwa onghenda yashili, tashi dulika nokuli oshikando shotete. Olupandu otali ke ve linyengifa navo va ulikile vamwe onghenda. Keshe umwe oo ta ka anya okuulika onghenda nokukwafela vamwe ita ka kala mo fiyo alushe mOparadisa. Shikwao vali, ovo va tambulwa ko kuKalunga va kale nomwenyo fiyo alushe otava ka ungaunga navamwe pahole nosho yo nonghenda. (Eps. 37:9-11) Ounyuni oo itau ka kala tuu u na eameno nombili! Ashike ofimbo efimbo olo litunhula inali fika, ongahelipi hatu dulu okumona ouwa mokuulikila vamwe onghenda?

Ombiibeli oya ti: “Omulumenhu onakufilonghenda ota kongele omwenyo waye ouwa.” (Omayel. 11:17) Ovanhu ohava nanenwa komunhu oo e na onghenda, nohava ungaunga yoo naye nonghenda. Jesus okwa ti: “Oshiyelekifo eshi tamu shi yelekifa, nanye yo tamu ke shi yelekifwa.” (Luk. 6:38) Nomolwaasho, omunhu oo e na onghenda oha mono noupu noha kala e na ookaume vawa.

Omuyapostoli Paulus okwa li a kumaida ovo va li meongalo lomuEfeso a ti: “Kalafaneni mu noukaume nokufilafana onghenda nokudiminafana po omatimba.” (Ef. 4:32) Eongalo ohali mono unene ouwa ngeenge ovo ve li mo ohava ulikilafana olukeno nonghenda nohava kongo ekwafo kovaitaveli vakwao. Ovanhu va tya ngaho ihava diladila okulongifa omalaka mai, okupopila vamwe mowii, ile oku va mbweenga. Ponhele yokutandaveleka olwaambo, ohava kendabala okulongifa elaka lavo va kwafele vamwe. (Omayel. 12:18) Oshidjemo, eongalo ohali kala la pama nohali longele Jehova nehafo.

Onghenda oo oukwatya oo hau ulikwa meendjovo nomoilonga. Ngeenge otu na onghenda, kungaho ohatu hopaenene onghenda nosho yo onghedi yokuyandja yaKalunga, Jehova. (Ef. 5:⁠1) Oshidjemo, ohatu ka pameka eongalo letu nohatu ka nanena vamwe kelongelokalunga la koshoka. Natu shiivikileni alushe oukwatya wonghenda.