1, 2. (a) Jesus okwa li ha yandje elitulemo koilonga ilipi monghalamwenyo yaye, nomolwashike? (b) Oshike tu na okuninga opo tu pondole tu li “ovalongi pamwe naKalunga”?

JESUS KRISTUS okwa li omuhongi womiti nomuyakuli. (Mark. 6:3; Rom. 15:8) Oilonga aishe oyo okwa li e i shii nawanawa. E li omuhongi womiti, okwa li e lihonga okulongifa oilongifo ya pamba oilonga yaye, opo a nduluke po oinima momiti i na oshilonga. E li omuhongi wonghundana iwa, okwa li ha longifa noukeka eshiivo laye lOmishangwa opo a kwafele ovanhu va ude ko oshili yEendjovo daKalunga. (Mat. 7:28; Luk. 24:32, 45) Eshi Jesus a li e na omido 30, okwa li a efa po oilonga yaye yokuhonga omiti molwaashi okwa li e shii kutya okukala omuyakuli osho sha li sha fimana unene. Okwa li a popya etomheno limwe olo Kalunga a li e mu tumina kombada yedu kutya olo okuudifa onghundana iwa yOuhamba waYe. (Mat. 20:28; Luk. 3:23; 4:43) Jesus okwa li ha yandje unene elitulemo koukalele monghalamwenyo yaye, nokwa li a hala vamwe ve mu waimine moilonga oyo. — Mat. 9:35-38.

² Otashi dulika fye katu fi ovahongi vomiti, ashike otu li ovayakuli vonghundana iwa. Eifano olo la kwatela mo Kalunga ola fimana unene; fye otu li “ovalongi pamwe naKalunga.” (1 Kor. 3:9; 2 Kor. 6:4) Otwa dimina kutya, “etindi londjovo [yaJehova] olo oshili.” (Eps. 119:159, 160) Nomolwaasho twa hala okukala noushili kutya otu shii “okutukula nawa ondjovo yoshili” moukalele. (Lesha 2 Timoteus 2:15.) Opo tu ninge ngaho, otu na okutwikila okuxwepopaleka ounghulungu wetu mokulongifa Ombiibeli, oshilongifo sha fimana osho hatu longifa opo tu honge oshili kombinga yaJehova, yaJesus nosho yo yOuhamba. Opo ehangano laJehova li tu kwafele tu pondole moukalele, ola eta po oilongifo oyo twa pumbwa okushiiva nawanawa. Exwata loilongifo oyo oya lukwa Oshikefa shoilongifo yokuhonga.

3. (a) Oshike tu na okuyandja elitulemo kusho momukokomoko wefimbo la xupa ko olo tu na okuyandja oundombwedi? (b) She likolelela kOilonga 13:48, ovanhu velipi po tu na okukonga?

³ Otashi dulika u lipule kutya omolwashike tashi ifanwa Oshikefa shoilongifo yokuhonga ndele kashi fi Oshikefa shoilongifo yokuudifa. “Okuudifa” osha hala okutya okupopya etumwalaka; ashike “okuhonga” osha hala okutya okufindila etumwalaka olo momadiladilo nomomutima womunhu, opo a dule okukatuka metwokumwe naasho e lihonga. Momukokomoko wefimbo la xupa ko olo tu na okuyandja oundombwedi, elalakano letu nali kale okuhovela omakonakonombiibeli nosho yo okuhonga ovanhu oshili. Sha hala okutya otu na okukonga filufilu ovo “va nuninwa okuya momwenyo waalushe” noku va kwafela va ninge ovaitaveli. — Lesha Oilonga 13:44-48.

4. Ongahelipi hatu dulu okushiiva ovo “va nuninwa okuya momwenyo waalushe,” nongahelipi hatu dulu oku va mona?

⁴ Ongahelipi hatu dulu okushiiva ovo “va nuninwa okuya momwenyo waalushe”? Ngaashi sha li mefelemudo lotete, onghedi omo hatu dulu okumona ovanhu ovo oyo okuyandja oundombwedi. Onghee hano, otwa pumbwa okuninga ngaashi Jesus e tu lombwela eshi a ti: “Mukeshe moshilando ile momukunda tamu fiki mo, puleni, olyelye a wana.” (Mat. 10:11) Inatu teelela ovanhu ovo vehe na omutima muwa, ovakwanyanya, ile ovo vehe na ehalo loinima yopamhepo va tambule ko onghundana iwa. Ohatu kongo ovanhu ovo ovanashili, ovalininipiki nosho yo ovo va fya ondjala yoshili. Ohatu dulu oku shi faafanifa naasho Jesus, e li omuhongi womiti, tashi dulika a li ha ningi mokukonga omiti diwa opo a honge omivelo, eendjoko, ile oinima imwe vali. Shimha a mono omuti muwa, okwa li ha kufa okakefa kaye koilongifo, ha longifa ounghulungu waye nokunduluka po oshinima shonhumba. Otu na okuninga sha faafana eshi hatu kendabala okuninga ovanamitimadiwa ovahongwa. —Mat. 28:19, 20.

5. Oshike twa pumbwa okushiiva kombinga yoilongifo oyo i li moshikefa shetu shoilongifo yokuhonga? Shi yelifa. (Tala efano pehovelo loshitukulwa.)

⁵ Oshilongifo keshe shi li mokakefa koilongifo oshi na elalakano lokondadalunde. Pashihopaenenwa, diladila koilongifo oyo Jesus a li a longifa e li omuhongi womiti. * Okwa li a pumbwa oilongifo yokumetifa noyokudidilikifa; yokuteta, yokumboolifa, yokuyukililifa, yokuyelekanifa nosho yo yokupatela ko oitukulwa imwe. Sha faafana, oshilongifo keshe shi li moshikefa shetu shoilongifo yokuhonga oshi na elalakano lokondadalunde. Onghee natu taleni moshikefa shetu shoilongifo yokuhonga nokumona nghee tu na okulongifa oilongifo oyo twa pewa.

6, 7. (a) Owa longifa ngahelipi oukalata vo-JW.ORG? (b) Okakalata kokushiva ovanhu kokwoongala oke na omalalakano opavali elipi?

⁶ Oukalata vo-JW.ORG. Ove li ounima vanini hava pondola ovo hatu dulu okulongifa moku tu shiivifa kovanhu noku va twala ko-website yetu, oko tava dulu okulihonga shihapu kombinga yetu nokupula nokuli ekonakonombiibeli. Fiyo opapa, ovanhu ve dulife 400 000 ova pula ekonakonombiibeli okupitila ko-jw.org, nefiku keshe ovanhu ve dulife pomafele ohava pula ekonakonombiibeli. Oto dulu okukala u na oukalata vo-JW.ORG opo u longife omhito keshe u yandje oundombwedi eshi we lipyakidila noilonga yoye yakeshe efiku.

⁷ Oufo veshivo. Okafo kokushiva ovanhu kokwoongala oke na omalalakano opavali. Oka ti: “Oto shivwa u konakone Ombiibeli pamwe nEendombwedi daJehova.” Oto dulu okuninga ngaho kutya nee ‘opokwoongala kwetu kwomoipafi’ “ile pekonakonombiibeli lopeumbo.” Onghee hano, oshilongifo osho itashi popi ashike kombinga yetu, ndele ota shi shivi yo “eehepele domhepo” di konakone Ombiibeli pamwe nafye. (Mat. 5:3) Osha yela kutya ovanhu ova manguluka okuuya kokwoongala kwetu kutya nee ova tambula ko ekonakonombiibeli ile hasho. Ngeenge ova ongala, otava ka mona nokuuda osho tu na okuyandja monghedi yehongo loshili lOmbiibeli.

8. Osha fimana shi fike peni kovanhu ve uye kokwoongala kwetu nande oshikando ashike shimwe? Yandja oshihopaenenwa.

⁸ Osha fimana okushiva ovanhu ve uye kokwoongala kwetu nande lumwe ashike. Omolwashike mbela? Otava ka mona eyooloko olo lili pokati komudingonoko u yadi eendja dopamhepo pokwoongala kwetu nosho yo onghalo yopamhepo inyikifa oluhodi oyo i li muBabilon Shinene. (Jes. 65:13) Ray naLinda, ovalihomboli vamwe moUnited States ova li va didilika oshinima osho omido da ya. Ova li va tokola okukala hava i kongeleka. Ova li va itavela muKalunga nova li ve shii omhumbwe yavo yopamhepo, onghee ova li va hovela okuya keengeleka adishe odo di li moshilando shavo. Moshilando shavo omwa li mu na eengeleka dihapu. Ovalihomboli ovo ova li va tokola okutala koinima ivali mongeleka keshe omo tava i. Shotete, ova li ve na okulihonga sha pefimbo lelongelokalunga, noshitivali, oilyo yongeleka oya li i na okumonika ngaashi ovanhu ovo ve lile po Kalunga. Konima yomido donhumba, ova li va ya kongeleka keshe i li moshilando, ashike ova li va nyematekwa neenghono. Kava li ve lihonga sha, naavo va li hava i keengeleka eholokepo lavo ola li li lili filufilu. Konima eshi va dja mongeleka yaxuuninwa momusholondodo wavo, Linda okwa li a ya koilonga yaye na Ray okwa li a shuna keumbo. Mondjila yaye yokuya keumbo, okwa li a pita pOlupale lOuhamba nokwa li e lipula kutya, ‘Omolwashike itandi i mo nokumona osho tashi ningwa mo?’ Osho osha li oshimoniwa shiwa kuvo. Aveshe pOlupale lOuhamba ova li va hafa, ve na omhepo youkaume nova li va djala monghedi tai wapalele. Ray okwa li a kala omutumba komukweyo wokomesho nokwa li a hokwa osho a li e lihonga. Osha li ashike ngaashi omuyapostoli a popya kombinga yomunhu oo opo e uya kokwoongala kwopaKriste oshikando shotete nokwa popya ta ti: “Kalunga oku li shili mokati keni.” (1 Kor. 14:23-25) Okudja opo, Ray okwa kala he uya kokwoongala Osoondaxa keshe nokonima yaasho okwa kala he uya kokwoongala keshe kwomokati koshivike. Linda naye okwa li a hovela okuya kokwoongala, naashi va li ve na omido 70 nasha ova li va tambula ko ekonakonombiibeli nova li va ninginifwa.

9, 10. (a) Omolwashike oufo vapu okulongifa? (b) Yelifa nghee to dulu okulongifa okafo Ouhamba waKalunga oshike?

⁹ Oufo. Otu na oufo vahetatu vapu okulongifwa ovo ve li oilongifo yokuhovela eenghundafana. Okudja mo 2013 eshi oufo ovo va hovela okulongifwa, opa li pa nyanyangidwa oufo omabiliyona atano. Oilongifo oyo oi na ouwa molwaashi ngeenge owa shiiva okulongifa shimwe shomuyo, oto dulu oku i longifa aishe molwaashi oina omutungilo wa faafana. Ongahelipi to dulu okulongifa okafo opo u hovele eenghundafana nomunhu?

¹⁰ Oto dulu okulongifa okafo Ouhamba waKalunga oshike? Pula omunhu epulo olo li li kombada yokafo ndele to mu pula kutya: “Mbela owe lipulile ngoo nale kutya Ouhamba waKalunga oshike? Mbela oto ti kutya . . . ” Mu pula kutya lilipi lomomanyamukulo atatu ta ka hoolola po. Nopehe na oku mu lombwela kutya enyamukulo laye oli li mondjila ile ola puka, mu ulikila opo pa shangwa “Osho Ombiibeli tai ti” ndele tamu kundafana omushangwa waDaniel 2:44 nosho yo Jesaja 9:6. Ngeenge otashi shiiva, twikileni neenghundafana. Mu ulikila epulo olo li li konima yokafo koshi yoshipalanyole “Diladila kombinga yaashi”: “Onghalamwenyo otai ka kala ya tya ngahelipi koshi yOuhamba waKalunga?” Naasho otashi ku kwafele udike po ekanghameno laasho tamu ka kundafana moshikando tashi landula ko. Ngeenge omwa ka shakena vali, mu ulikila oshileshomwa oshiti-7 mokambo Onghundana iwa ya dja kuKalunga!, oko ke li shimwe shomoilongifo yetu yokuhovela ekonakonombiibeli.

11. Oifo yetu oya nuninwa shike, notu na okushiiva shike kombinga yayo?

¹¹ Oifo. Oshungonangelo no-Awake! oyo unene hai nyanyangidwa nokutolokwa mounyuni aushe. Molwaashi ohai longifwa mounyuni aushe, oipalanyole yokombada oya nuninwa okupendula ohokwe yovanhu keshe pamwe. Onghee hano, natu i longife opo i pendule ohokwe yovanhu va mone kutya oshike lela sha fimana kunena monghalamwenyo. Ashike otwa pumbwa okushiiva nawa omaliudo omunhu keshe opo tu dule oku mu pa oshifo osho tashi mu kwafele.

12. (a) O-Awake! oya nuninwa oolyelye, nelalakano layo ola shike? (b) Oshilongifo osho oshe ku kwafela ngahelipi u pondole efimbo opo la di ko?

¹² O-Awake! oya nuninwa ovanhu ovo ve na eshiivo linini lOmbiibeli ile vehe i shii nandenande. Ovanhu va tya ngaho otashi dulika kave shii omahongo opaKriste, inave lineekela lela momalongelokalunga ile tashi dulika vehe shii kutya Ombiibeli oi na omayele taa longo. O-Awake! oya nuninwa unene tuu okutomha ovanhu ovo va itavele kutya Kalunga oko e li. (Rom. 1:20; Heb. 11:6) Oya nuninwa yo okukwafela ovaleshi va kale va itavela kutya Ombiibeli oi “li shili ondjovo yaKalunga.” (1 Tes. 2:13) Oipalanyole itatu yokombada yee-Awake! domo 2018 oyo: “The Way of Happiness,” “12 Secrets of Successful Families,” nosho yo “Help for Those Who Grieve.”

13. (a) Oshungonangelo yomoukalele oya nuninwa oolyelye? (b) Oshilongifo osho oshe ku kwafela ngahelipi u pondole efimbo opo la di ko?

¹³ Oshungonangelo oyo hai yandjwa moukalele oya nuninwa ovanhu ovo va fimaneka ngoo Kalunga nosho yo Eendjovo daye. Nonande ove na eshiivo lonhumba lOmbiibeli, kave udite ko lelalela omahongo ayo. (Rom. 10:2; 1 Tim. 2:3, 4) Oipalanyole itatu yokombada yEeshungonangelo domo 2018 oya nyamukula omapulo ngaashi: “Ombiibeli otai dulu ngoo oku tu kwafela kunena?,” “Onakwiiwa oye tu tuvikilila shike?,” nosho yo “Mbela Kalunga oku na ko ngoo nasha naave?”

14. (a) Elalakano louvidio vanhe ovo ve li moshikefa shetu shoilongifo yokuhonga olashike? (b) Oshike wa pondola eshi wa ulika ouvidio ovo?

¹⁴ Ouvidio. Pefimbo laJesus, omuhongi womiti okwa li ashike ha longifa oilongifo yokomake. Ashike nande ongaho, ovahongi voipilangi vokunena ove na yo oilongifo yoshinanena ngaashi oishaaxa, eemboola, eembapila dokulalakanifa, oushina vokupata eembosha naikwao vali imwe. Kakele ashike koishangomwa oyo ya pilindwa, otu na yo ouvidio vawa ovo hatu ulikile ovanhu, nomoshikefa shetu shoilongifo yokuhonga omu na ouvidio vanhe ngaashi: Omolwashike u na okukonakona Ombibeli?, Oshike hashi ningwa pekonakonombibeli?, Oshike hashi ningwa kOlupale lOuhamba?, nosho yo Eendombwedi daJehova odo oolyelye? Ouvidio ovo hava dana meni lominute mbali ovawa okulongifa petalelepo lotete. Ouvidio ovo vale otava dulu okuulikilwa omalishuneko nosho yo ovo ve na efimbo lihapu. Ouvidio ovo otava dulu okulinyengifa ovanhu va konakone Ombiibeli nove uye kokwoongala kwetu.

15. Ohashi kumu ngahelipi ovanhu ngeenge va tale ouvidio vetu momalaka avo?

¹⁵ Natu tye nee ngeno omumwameme okwa shakena nomukainhu a dja koMicronesia noha popi elaka lOshiyapese, omumwameme okwe mu ulikila okavidio Omolwashike u na okukonakona Ombibeli? melaka laye. Eshi okavidio ka hovela okudana, omukainhu okwa ti: “Oke li melaka lange. Itandi shi itavele. Omutono wewi laye owa ulika kutya okwa dja kokanhunhu oko nda dja. Oha popi elaka olo handi popi.” Konima yaasho, okwa ti kutya ota ka lesha nokutala oinima aishe oyo i li ko-jw.org melaka laye. (Yelekanifa Oilonga 2:8, 11) Diladila vali koshimoniwa shimwe. Omumwameme umwe moUnited States okwa li a tumina okaana ka dalwa komumwainamati o-link oyo ye ka twala kokavidio oko ke li melaka lako. Okwa li ke ka tala ndele take mu tumine o-e-mail ka ti: “Oshitukulwa osho sha popya kutya omunawii oye ta pangele ounyuni osha kuma nge neenghono. Onda li nda pula ekonakonombiibeli.” Oha ka di koshilongo oko oilonga yetu ya shilikwa.

16. Yelifa elalakano lokondadalunde lokambo keshe: (a) Kala ho pwilikine kuKalunga opo u ka kale nomwenyo fiyo alushe. (b) Onghundana iwa ya dja kuKalunga! (c) Oolyelye tava longo ehalo laJehova kunena?

¹⁶ Oumbo. Ongahelipi to dulu okuhonga oshili omunhu oo ehe shii nawa okulesha ile pehe na oshishangomwa shopaMbiibeli shi li melaka olo ha popi? Otu na oshilongifo osho tashi dulu okukwafela, okambo Kala ho pwilikine kuKalunga opo u ka kale nomwenyo fiyo alushe. * Okambo Onghundana iwa ya dja kuKalunga! oke li oshilongifo shiwa nokuhovela ekonakonombiibeli. Oto dulu okuulikila omunhu oipalanyole 14 oyo i li konima ndele to mu pula kutya shilipi po unene a hala okuuda enyamukulo kusho. Ndele tamu hovele okukonakona oshitukulwa osho a hoolola. Mbela owa kendabala ngoo okulongifa okambo aka komalishuneko oye? Okambo Oolyelye tava longo ehalo laJehova kunena? oko okambo okatitatu ke li moshikefa shetu shoilongifo yokuhonga. Oka nuninwa okukwafela ovakonakonimbiibeli va shiive nawanawa ehangano letu. Opo u shiive nghee u na oku ka longifa pekonakonombiibeli keshe, tala oshitukulwa mokafo Onghalamwenyo yopaKriste noilonga yokuudifa, Marsa 2017.

17. (a) Elalakano lokondadalunde lembo keshe olashike? (b) Ovo opo va ninginifwa ova teelelwa va ninge shike, nomolwashike?

¹⁷ Omambo. Konima eshi mwa hovela ekonakonombiibeli mokambo, pomhito keshe otamu dulu okulundulukila membo Oshike hatu lihongo mOmbiibeli? Oshilongifo osho otashi ka hapupalifa eshiivo lomunhu lomahovelohongo Ombiibeli. Konima eshi mwa mana ko embo olo nongeenge omukonakonimbiibeli ota twikile okuninga exumokomesho lopamhepo, twikileni okukonakona membo Nghee to dulu okulikaleka mohole yaKalunga. Oshilongifo osho otashi ka honga omukonakonimbiibeli nghee e na okutula moilonga omafinamhango Ombiibeli monghalamwenyo yaye yakeshe efiku. Dimbulukwa kutya nokuli nokonima yeninginifo, ovo vape ova pumbwa okutwikila nekonakonombiibeli lavo fiyo osheshi va mana ko omambo oo. Osho otashi ke va kwafela va kale va pama moshili. — Lesha Ovakolossi 2:6, 7.

18. (a) 1 Timoteus 4:16 ote tu ladipike tu ninge shike tu li ovahongi voshili, notashi ka eta oidjemo yashike? (b) Elalakano letu oli na okukala lashike eshi hatu longifa oshikefa shetu shoilongifo yokuhonga?

¹⁸ Tu li Eendombwedi daJehova, otwe lineekelelwa ‘eendjovo doshili yevaengeli,’odo tadi dulu okupefa ovanhu omwenyo waalushe. (Kol. 1:5; lesha 1 Timoteus 4:16.) Otwa pewa Oshikefa shoilongifo yokuhonga osho shi na oinima oyo twa pumbwa. (Tala oshimhungu “ Oshikefa shoilongifo yokuhonga.”) Natu longife oilongifo oyo noukeka ngaashi tashi shiiva. Omuudifi keshe ota dulu okutokola kutya oshishangomwa shilipi shomoishangomwa yomoukalele ta ka yandja komunhu oo e na ohokwe nonokutya onaini. Elalakano letu kali fi ashike okuyandja oishangomwa; kali fi okuyandja oishangomwa kovanhu ovo vehe na ohokwe metumwalaka letu. Elalakano letu olo okuninga ovanhu ovahongwa ovo ve li ovanashili, ovalininipiki nosho yo ovo va fya ondjala yoshili, ovo “va nuninwa okuya momwenyo waalushe.” — Oil. 13:48; Mat. 28:19, 20.