1. Omolwashike twa hafa notu udite etumba, eshi tu li Eendombwedi daJehova?

INATU hafa tuu notu udite etumba, eshi tu li Eendombwedi daJehova! Otwa humbata edina laKalunga nohatu kala metwokumwe nalo, eshi hatu kufa ombinga moilonga yokuudifa nokuninga ovanhu ovahongwa. Ohatu kala twa tunhukwa, ngeenge hatu kwafele umwe, oo a “halelela shili omwenyo waalushe,” a ninge omwiitaveli. (Oil. 13:48) Ohatu kala tu udite ngaashi Jesus, oo a li a ‘hafa unene,’ eshi ovahongwa vaye ve mu lombwela oimoniwa itunhula, oyo va mona moilonga yokuudifa. — Luk. 10:1, 17, 21.

2. Ongahelipi hatu dulu okutala ko oilonga yetu yokuudifa i li oshilonga sha fimanenena?

² Otwa tala ko oilonga yetu yokuudifa ya fimanenena. Omuyapostoli Paulus okwa ladipika Timoteus a ti: “Lipashukila ove mwene nosho yo ehongo loye.” Opo nee Paulus okwa weda ko ta ti: “Ngeenge owa ningi ngaho, oto lixupifa ove mwene nosho yo ovo tave ku pwilikine.” (1 Tim. 4:16) Eemwenyo dovanhu odi li monghuwo i nonghambe. Ohatu lipashukile fye vene, molwaashi otu li ovapangelwa vOuhamba waKalunga. Otwa hala okukala metwokumwe nonghedi oyo tai fimanekifa Jehova nosho yo nonghundana iwa oyo hatu udifa. (Fil. 1:27) Ohatu ulike kutya ohatu ‘pashukile ehongo letu’ mokulilongekidila oukalele nokupula Jehova e tu kwafele, ofimbo inatu udifila vamwe.

3. Mbela keshe umwe ota ka kala e na ohokwe metumwalaka lOuhamba? Yandja oshihopaenenwa.

³ Nonande otashi dulika tu ninge eenghendabala tu udifile vamwe, ovanhu vahapu moshitukulwa shetu otashi dulika vaha kale ve na ohokwe monghundana iwa yOuhamba. Diladila koshihopaenenwa shomumwatate Georg Lindal, oo a li ha udifa oye aeke moIceland okudja mo 1929 fiyo omo 1947. Okwa li a yandja oishangomwa omayovi omilongo, ashike kapa li nande oumwe a tambula ko oshili. Okwa shanga a ti: “Vamwe ova li tava monika  tava pataneke oshili, ashike vahapu vomuvo kava li ve na ohokwe.” Ovatumwa, ovo va li va deulwa kofikola yaGilead, navo ova li va ya ko va ka kwafele. Ova udifila ko oule womido, ashike inava mona nande oumwe a ulika ohokwe. Konima yomido omuwoi, Ovaiceland vamwe ova li ve liyapulila Jehova nokuninginifwa.

4. Otashi dulika tu kale tu udite ngahelipi, ngeenge vamwe kave na ohokwe monghundana iwa?

⁴ Ohatu kala twa nyemata, ngeenge ovanhu kave na ohokwe monghundana iwa. Otashi dulika tu kale tu udite ngaashi Paulus, oo a li e na “oluhodi linene nouyahame itau xulu” omolwOvajuda, ovo va li inava tambula ko Jesus e li Messias omuudanekwa. (Rom. 9:1-3) Ndele ongahelipi ngeenge omukonakoni ita ningi exumokomesho, nowa pumbwa okweefa po okukonakona naye, konima eshi wa ninga eenghendabala da mana mo nowa kala noku mu ilikanena? Ile ongahelipi ngeenge ino kwafela umwe fiyo a ninginifwa? Mbela ou na okukala u udite ondjo, to diladila kutya Jehova ina punika oukalele woye? Moshitukulwa eshi, ohatu ka kundafana omapulo avali: (1) Oshike hashi ulike kutya oukalele otau pondola? (2) Oshike tu na okukala twa teelela, ngeenge hatu udifile vamwe?

5. Omolwashike tashi dulika tuha mone oidjemo oyo twa li twa teelela, moilonga oyo hatu longele Jehova?

⁵ Ombiibeli oya popya shi na sha nomunhu, oo ha longo ehalo laKalunga, tai ti: ‘Ashishe eshi ta ningi, osha fewa.’ (Eps. 1:3) Ashike osho inashi hala kutya ohatu ka mona oidjemo oyo hatu diladila, eshi hatu longele Jehova. Onghalamwenyo yovanhu oi yadi “oupyakadi” omolwokuhawanenena kwavo vene nosho yo kwavamwe. (Job 14:1) Shikwao vali, ovapataneki vetu otashi dulika ve tu kelele noitatu ka udifa twa manguluka. (1 Kor. 16:9; 1 Tes. 2:18) Jehova oha tale kushike, opo a mone kutya oilonga yetu otai pondola? Natu ka taleni komafinamhango Ombiibeli, oo tae tu kwafele tu nyamukule epulo olo.

6. Jehova oha mono ngahelipi kutya oilonga oyo hatu mu longele otai pondola?

⁶ Jehova oha tale keenghendabala nokelididimiko letu. Jehova oha mono kutya oilonga yetu otai pondola, ngeenge hatu longo nelitulemo nosho yo pahole, kashi na nee mbudi kutya ovanhu otave linyenge ngahelipi. Paulus okwa ti: “Kalunga ke fi omuhenouyuki a dimbwe ngeno oilonga yeni nohole oyo mwa ulika omolwedina laye eshi mwa yakula notamu twikile okuyakula ovayapuki.” (Heb. 6:10) Jehova oha dimbuluka oilonga nohole yetu, nonande eenghendabala da tya ngaho itadi eta oidjemo iwa. Ohatu dulu okutula moilonga omayele, oo Paulus a pa Ovakorinto. Okwa ti: “Oilonga oyo tamu longele Omwene kai fi oshimha,” kashi na nee mbudi kutya ohatu mono oidjemo oyo twa li twa teelela, ile hasho. — 1 Kor. 15:58.

7. Oshike hatu lihongo kwaasho omuyapostoli Paulus a popya shi na sha noukalele waye?

⁷ Omuyapostoli Paulus okwa li omutumwa, oo e li oshihopaenenwa shiwa, molwaashi okwa tota po omaongalo mahapu. Ashike eshi ovanhu vamwe va li tave mu kembaula nokupopya kutya  ke fi omuhongi muwa waKristus, ka li a popya kombinga yovanhu ovo a kwafela nova ninga ovaitaveli. Ponhele Paulus e litumbaleke, okwa popya ashike a ti: “Onda longa oilonga ihapu.” (2 Kor. 11:23) Ngaashi Paulus, natu dimbuluke kutya Jehova okwa lenga unene elididimiko letu.

8. Oshike twa pumbwa okukaleka momadiladilo shi na sha noukalele wetu?

⁸ Oukalele wetu ohau hafifa Jehova. Jesus okwa li a tuma ovahongwa vaye 70 va ka udife etumwalaka lOuhamba. Ovahongwa ovo ova li va “aluka nehafo.” Mbela omolwashike va li va hafa? Ova ti: “Nokuli neendemoni oda dulika kufye eshi twa longifa edina loye.” Ashike Jesus okwa li e va pukulula a ti: “Inamu hafa molwaashi eemhepo da nyata da dulika kunye, ndele hafeni eshi omadina eni a shangelwa meulu.” (Luk. 10:17-20) Jesus okwa li e shii kutya haalushe tava ka mona oidjemo iwa moukalele. Katu shii kutya ovahongwa vaJesus ova li va popya novanhu ve fike peni, ovo lwanima va ka ninga ovaitaveli. Ovahongwa ovo ova li va pumbwa okukala va hafa, eshi Jehova a lenga eenghendabala davo, ndele hamwaasho va pondola.

9. Metwokumwe nOvagalati 6:7-9, ohatu ka mona oidjemo ilipi, ngeenge otwe lididimike moukalele?

⁹ Ngeenge otwe lididimike moukalele, ohatu ka mona omwenyo waalushe. Ngeenge otwa kunu nomutima aushe eembuto doshili yOuhamba noku di tekela, ohatu ka ‘kuna yo pamhepo,’ eshi hatu pitike omhepo yaKalunga i longe mufye ya manguluka. Ngeenge inatu ‘loloka,’ Jehova okwa udaneka kutya ote ke tu pa omwenyo waalushe, nonande inatu kwafela umwe a ninginifwe. — Lesha Ovagalati 6:7-9.

10. Ovanhu ohave linyenge ngahelipi ketumwalaka olo hatu udifa?

¹⁰ Ovanhu ohave linyenge she likolelela komitima davo kutya oda tya ngahelipi. Jesus okwe shi yelifa nawa, eshi a longifa efaneko li na sha nomukuni, oo a kuna eembuto momadu a yoolokafana. Ndele okwa mona ashike oidjemo iwa meembuto odo a kuna medu liwa. (Luk. 8:5-8) Jesus okwa popya kutya omadu a yoolokafana otaa faneke omitima dovanhu nghee have linyenge meenghedi da yoolokafana, eshi tava udifilwa “eendjovo daKalunga.” (Luk. 8:11-15) Ngaashi omukuni, nafye ihatu dulu okukulika oiimati yoilonga yetu, molwaashi osho oshe likolelela komitima dovapwilikini. Fye otu na ashike oshinakuwanifwa shokukuna eembuto diwa detumwalaka lOuhamba. Omuyapostoli Paulus okwa ti kutya “keshe umwe ota pewa ondjabi yaye mwene i fike poshilonga shaye mwene,” ndele inai likolelela koidjemo yoilonga yaye. — 1 Kor. 3:8.

11. Omolwashike Noa a pondola e li “omuudifi wouyuki”? (Tala efano kombada yoshifo.)

¹¹ Okutala kondjokonona, ovapiya vaJehova ova kala hava udifile ovanhu ovo ihava pwilikine. Pashihopaenenwa, Noa okwa kala “omuudifi wouyuki,” oule womido 40, ile 50 lwaapo. (2 Pet. 2:5) Osha yela kutya okwa li e na etimaumbwile kutya vamwe otava ka pwilikina kwaasho ta udifa. Ashike Jehova ina popya sha shi na sha naasho. Ponhele yaasho, eshi e mu lombwela a tunge onguluwato, okwa ti: “Ove novana voye ovamati nomwalikadi woye novalikadi vovana voye ovamati, omu na okuya mongulu yomomeva.” (Gen. 6:18) Eshi Kalunga a li te mu lombwele shi na sha nounene wonguluwato, otashi dulika Noa a mona kutya havanhu vahapu tava ka pwilikina, molwaashi monguluwato kamwa li tamu ka kala onhele ya kula. (Gen. 6:15) Ngaashi tu shi shii, kapa li nande oumwe womounyuni, oo wa li wa kolokosha, a tambula ko etumwalaka laNoa. (Gen. 7:7) Mbela Jehova okwa li e mu tala ko ina pondola? Ahowe! Kalunga okwa li e wete Noa a pondola, molwaashi okwa li a ninga filufilu osho e mu lombwela. — Gen. 6:22.

12. Omuprofeti Jeremia okwa li a mona ngahelipi ehafo moukalele waye, nonande okwa li a teka omukumo nokupatanekwa?

 ¹² Omuprofeti Jeremia naye okwa li a udifa oule womido, nonande okwa li a teka omukumo nokupatanekwa. Okwa li a teka omukumo, eshi a li ta ‘tukwa nokushekwa’ kovapataneki vaye. Okwa li ta diladila okweefa po okuudifa. (Jer. 20:8, 9) Ashike nande ongaho, ka li a sholola. Oshike she mu kwafela, opo a finde omadiladilo mai noku mone ehafo moukalele? Okwa li a yandja elitulemo koinima ivali ya fimana. Shotete, etumwalaka olo Jeremia a pewa kuKalunga ola li tali kwafele ovanhu va yandje elitulemo ‘kefimbo lokomesho noketeelelo.’ (Jer. 29:11) Oshitivali, Jeremia okwa li a humbata edina laJehova. (Jer. 15:16) Nafye ohatu udifile ovanhu, opo va kale ve na eteelelo. Otwa humbata edina laJehova, tu li Eendombwedi daye. Ngeenge otwa yandje elitulemo koinima oyo ya fimana yopavali, ohatu dulu okumona ehafo, kashi na nee mbudi kutya ovanhu otave linyenge ngahelipi.

13. Oshike hatu lihongo mefaneko laJesus, olo tali hangwa muMarkus 4:26-29?

¹³ Ohashi pula oule wefimbo, opo omunhu a kale e na eitavelo. Jesus okwa yelifa oshili ya tya ngaho mefaneko laye li na sha nomukuni, oo a ka nangala. (Lesha Markus 4:26-29.) Eembuto domukuni oda enda tadi kulu nefimbo, noka li ta dulu oku di endelelifa di kule. Naave otashi dulika u na okuteelela pa pite efimbo, opo omukonakoni woye a dule okutula moilonga osho te lihongo. Ngaashi ashike omunepya iha fininike oimeno yaye, opo i kule ponhapo oyo a hala, nafye itatu dulu okufininika ovakonakonimbiibeli vetu va ninge exumokomesho she likolelela konhapo oyo twa hala. Onghee hano, inatu sholola, ile tu teke omukumo, ngeenge otashi pula oule wefimbo, opo omukonakoni a ninge omalunduluko, shi dulife pwaasho twa li twa teelela. Ngaashi ovanamapya, okuninga ovanhu ovahongwa otashi pula elididimiko. — Jak. 5:7, 8.

14. Oshihopaenenwa shilipi tashi ulike kutya oidjemo youkalele wetu otai dulu okukwata oule wefimbo?

¹⁴ Moitukulwa imwe, omukonakoni otashi dulika a kwate oule womido, ofimbo ina ninginifwa. Natu taleni koshimoniwa shovamwainakadona vavali. Gladys naRuby Allen ova li va tumwa mo 1959 va ka longe ve li ovakokolindjila vondjikilile modoolopa i li moCanada, moQuebec. Ovanhu kava li ve na ohokwe, omolwomafininiko omoshitukulwa nenwefemo longeleka yaKatolika. Gladys okwa ti: “Otwa kala hatu udifa eumbo neumbo eevili hetatu efiku keshe oule womido mbali, ashike kapa li nande oumwe a pwilikina kufye. Ovanhu ova li have uya pomuvelo, ndele ngeenge ova mono kutya ofye, ohava shuna meumbo. Ashike osho inashi tu tulifa omutwe kepepe.” Lwanima, oikala yovanhu oya ka lunduluka notwa li hatu mono oidjemo ihapu iwa. Paife modoolopa oyo omu na omaongalo atatu. — Jes. 60:22.

15. 1 Ovakorinto 3:6, 7 otave tu hongo shike shi na sha noilonga yokuninga ovanhu ovahongwa?

¹⁵ Okuninga omunhu omuhongwa ohashi pula eenghendabala dovanhu vahapu. Keshe umwe meongalo, ota dulu okukufa ombinga mokukwafela umwe fiyo osheshi a ninginifwa. (Lesha 1 Ovakorinto 3:6, 7.) Pashihopaenenwa, omumwatate otashi dulika a fiile omunhu, oo e na ohokwe, okafo, ile oshifo. Omumwatate oo otashi dulika aha kale e na efimbo lokushuna ko komunhu oo. Opo nee okwa pula omuudifi umwe a shune ko komunhu oo. Omuudifi oo okwa hovela okukonakona Ombiibeli naye. Okwa kala ha shivi ovamwatate novamwameme va yoolokafana, eshi ta ka konakona naye. Ovaudifi ovo ha i ko navo ova twa omukumo omukonakoni oo meenghedi da yoolokafana. Ovamwatate novamwameme aveshe ovo ova kwafela mokutekela eembuto doshili. Ngaashi Jesus a popya, omukuni nomuteyi aveshe otava ka kala va hafa meteyo lopamhepo, ile tu tye eshi omunhu oo ta ninginifwa. — Joh. 4:35-38.

16. Omolwashike to dulu okumona ehafo moukalele, nonande ku na oukolele, ile eenghono?

 ¹⁶ Ongahelipi ngeenge ohatu kufa ombinga moilonga yokuudifa nokuhonga onghundana iwa, ndele katu na oukolele, ile eenghono? Oto dulu okukala wa hafa omolwonghandangala oyo to dana meteyo. Diladila koshimoniwa shohamba David novalumenhu vaye. Ova li va xupifa omaukwaneumbo avo nosho yo oinima yavo, oyo ya li ya nyekwa ko kOvaamaleki. Ovalumenhu omafele avali ova li va loloka okuya molwoodi nova li ashike va fyaala po, opo va kelele oinima yavo. Konima eshi David va findana molwoodi olo, okwa li a popya kutya oinima oyo va kufa kovatondi vavo otai tukulilwa ovalumenhu aveshe shi fike pamwe. (1 Sam. 30:21-25) Osho osha faafana noilonga yetu yomounyuni aushe yokuninga ovanhu ovahongwa. Keshe umwe, oo ta ningi eenghendabala, ota dulu okukala a hafa efimbo keshe ta ku ninginifwa omunhu nokukwafelwa a hovele okweenda mondjila oyo tai twala komwenyo waalushe.

17. Omolwashike tu na okupandula Jehova?

¹⁷ Ohatu pandula Jehova, molwaashi oilonga yetu ohe i tale ko pahole. Oku shii kutya itatu dulu okufininika ovanhu va pwilikine kufye, ile va hovele oku mu longela. Ashike nande ongaho, iha dimbwa oilonga yetu youdiinini nohole yetu yoku mu hola. Ote ke tu pa ondjabi. Ohe tu kwafele yo nghee hatu dulu okumona ehafo, eshi hatu kufa ombinga meteyo linene. (Joh. 14:12) Ohatu dulu okukala noushili kutya Kalunga ota ka kala e tu hokwa, ngeenge inatu sholola.