1-2. (a) Omapangelo amwe okwa katukila oshiwana shaJehova onghatu ilipi, ndele oshe linyenga ngahelipi? (b) Ongahelipi hatu dulu okukala twa hafa, nonande ohatu hepekwa? (Tya sha yo shi na sha nefano lokombada yoshifo.)

 MOPAIFE oilonga yetu oya tulilwa po eendjidikila, ile ya shilikwa moilongo i dulife 30 mounyuni aushe. Moilongo imwe yomwaayo, ovapangeli ova tulifa ovamwatate novamwameme modolongo. Ova ninga shike sha puka? Pataleko laJehova, kave na eshi va ninga sha puka. Osho hava ningi okulesha ashike Ombiibeli noku i konakona, okulombwela ovanhu vakwao shi na sha neitavelo lavo nokwoongala pamwe novaitaveli vakwao. Ihava kufa yo ombinga moinima yopapolotika. Nonande ova taalela omapataneko a kwata moiti, ovapiya vaKalunga ovo ovadiinini, ova kanyatela oudiinini * wavo, tava ulike kutya ovadiinini kuJehova. Ohava kala va hafa, eshi tava ningi ngaho.

² Otashi dulika wa mona omafano Eendombwedi dimwe odo diladi, nowa didilika nghee oipala yado ya hafa. Oda hafa, molwaashi odi shii kutya Jehova okwe di hokwa, eshi da kanyatela oudiinini wado kuye. (1 Omaf. 29:17a) Jesus okwa ti: “Ovo tava hepekelwa ouyuki otava kala va hafa . . . Hafeni nokunyakukwa, osheshi ondjabi yeni oinene.” — Mat. 5:10-12.

3. Metwokumwe nOilonga 4:19, 20, ovayapostoli vaJesus ova li ve linyenga ngahelipi, eshi va li tava hepekwa, nomolwashike?

³ Ovamwatate novamwameme ova taalela onghalo ya faafana naayo ovayapostoli va li ve lididimikila pefimbo lavo, eshi va li  tava hepekwa, molwaashi tava udifa kombinga yaJesus. Ovapanguli vomhangu yopombada yOshijuda ova li ve va ‘kunghilila vaha popye sha vali kombinga yedina laJesus.’ (Oil. 4:18; 5:27, 28, 40) Ova li ve linyenga ngahelipi? (Lesha Oilonga 4:19, 20.) Ova li ve shii kutya ‘ova lombwelwa va udifile ovanhu nokuyandja oundombwedi nawanawa’ kombinga yaKristus, kuumwe oo e na eenghonopangelo dinenenene. (Oil. 10:42) Onghee ovapopikalelipo vavo, Petrus naJohannes, ova li va popya nouladi kutya otava ka dulika kuKalunga, ponhele yokudulika kovapanguli. Ova li yo va popya kutya itava ka efa po okupopya kombinga yaJesus. Kungaho, ova fa va li va pula ovapanguli ovo kutya, ‘Mbela otamu diladila kutya omalombwelo eni okwa fimanenena e dule aKalunga?’

4. Metwokumwe nOilonga 5:27-29, ovayapostoli ova tulila po Ovakriste aveshe oshihopaenenwa shilipi, nongahelipi hatu dulu oku va hopaenena?

⁴ Ovayapostoli ova tula po oshihopaenenwa shiwa, osho Ovakriste aveshe va kala nokushikula, shi na sha ‘nokudulika kuKalunga e li omupangeli ponhele yokudulika kovanhu.’ (Lesha Oilonga 5:27-29.) Konima eshi ovayapostoli va dengwa, molwaashi va kanyatela oudiinini wavo, ova li va dja momhangu yopombada yOvajuda “va hafa eshi va talika ko va wana okuhepekwa omolwedina laJesus,” nova li va twikila okuudifa. — Oil. 5:40-42.

5. Omapulo elipi twa pumbwa okunyamukula?

⁵ Oshihopaenenwa osho sha tulwa po kovayapostoli osha pendula omapulo amwe. Pashihopaenenwa, ongahelipi ovayapostoli va li ve na okudulika kuKalunga ponhele yokudulika kovanhu, nopefimbo opo tuu opo ove na okudulika kelombwelo loPamishangwa li na sha ‘nokudulika kovapangeli’? (Rom. 13:1) Ngaashi omuyapostoli Paulus a popya, ongahelipi hatu dulu ‘okudulika kovapangeli nokwaavo ve na eenghonopangelo, nopefimbo opo tuu opo ohatu kanyatele oudiinini wetu kuKalunga, oo e li Omupangeli a shiya ko? — Tit. 3:1.

6. (a) Oolyelye ‘ovapangeli’ ovo va tumbulwa mOvaroma 13:1, notu na okuungaunga navo ngahelipi? (b) Oushili ulipi u na sha novapangeli aveshe vopanhu?

⁶ Lesha Ovaroma 13:1. Outumbulilo ‘ovapangeli,’ oo wa popiwa movelishe oyo, otau ulike  kovapangeli vopanhu, ovo ve na eenghonopangelo dokupangela ovanhu vakwao. Ovakriste ova teelelwa va dulike kovapangeli va tya ngaho. Ovapangeli ovo ohava tula po elandulafano moshiwana, hava shilipaleke kutya omhango otai tulwa moilonga, nomafimbo amwe ohava popile nokuli oshiwana shaJehova. (Eh. 12:16) Nomolwaasho tu na okufuta oifendela kuvo, oku va fimaneka, oku va tila nokudulika keemhango davo. (Rom. 13:7) Ashike nande ongaho, omapangelo oo opanhu oku na ashike eenghonopangelo, molwaashi Jehova okwe a pitika a kale e di na. Jesus okwa yelifa nawa efinamhango olo, eshi a li ta pulwaapulwa kungoloneya waRoma, Pontius Pilatus. Eshi pilatus a li a popya kutya ota dulu okuxupifa omwenyo waJesus, ile oku mu dipaifa, Jesus okwe mu lombwela a ti: “Ngeno kwa li wa pewa eenghonopangelo kuKalunga dokupangela, ngeno ku di na.” (Joh. 19:11) Ngaashi pilatus, eenghonopangelo dovapangeli aveshe vopanhu nosho yo dovanapolotika kunena oda ngabekwa.

7. Omeenghalo dilipi tuhe na okudulika kovapangeli vopanhu, noshike ve na okukaleka momadiladilo?

⁷ Ovakriste ohava dulika keemhango dovapangeli vopanhu, shimha ashike dihe li omhinge neemhango daKalunga. Ndele ihatu dulika kovanhu, ngeenge tave tu pula tu ninge osho Kalunga a indika, ile tave tu indike osho a teelela tu ninge. Pashihopaenenwa, otashi dulika va pule ovalumenhu ovanyasha va ye moukwaita. * Ile otashi dulika va shilike Ombiibeli, ile oishangomwa yetu ya kanghamena kOmbiibeli, ve tu kelele tuha udife notuha longele Kalunga pamwe. Ngeenge ovapangeli tava longifa nai eenghonopangelo davo, ngaashi okuhepeka ovashikuli vaKristus, ove na oku ke lihokolola kuKalunga. Jehova oku wete osho tava ningi. — Omuud. 5:8.

8. Eyooloko oli li peni pokati ‘komupangeli’ nosho yo ‘omukombadambada,’ nomolwashike tu na okulipula shi na sha naasho?

⁸ Oshitya ‘omupangeli’ osha hala okutya omupangeli “e li xwepo, munene, ile e na ondodo yopombada.” Ashike inashi hala kutya omupangeli a “denga mbada, munenenene, ile e na ondodo yopombada elela.” Olo olo efatululo loshitya ‘omukombadambada.’ Nonande omapangelo opanhu okwa talika ko e li ‘ovapangeli,’ ope na epangelo limwe olo li na ondodo yopombada elela, sha hala kutya la shiya ko. Jehova Kalunga okwa popiwa lwoikando ine mOmbiibeli e li ‘Omukombadambada.’ — Dan. 7:18, 22, 25, 27.

9. Omuprofeti Daniel okwa mona shike momamoniko?

⁹ Omuprofeti Daniel okwa mona omamoniko oo a ulika filufilu kutya Jehova oku na eenghonopangelo dinenenene e dule ovapangeli aveshe. Daniel okwa mona tete oilyani ine inene, oyo i lile po omapangelo omanaenghono, oo a li taa pangele nale nosho yo oo taa pangele kunena, ngaashi Babilon, Medo-Persia, Greka, Roma nosho yo epangelo lopamuhanga, olo tali pangele kunena mounyuni laAmerika naBritina. (Dan. 7:1-3, 17) Konima yaasho, Daniel okwa mona Jehova Kalunga e li omutumba kolukalwapangelo meulu. (Dan. 7:9, 10) Osho omuprofeti, oo omudiinini, a ka mona lwanima, oshi li elondwelo kovapangeli vokunena.

10. Metwokumwe naDaniel 7:13, 14, 27, Jehova okwa pa lye eenghonopangelo dokupangela kombada yetu, naasho otashi holola shike shi na sha naYe?

¹⁰ Lesha Daniel 7:13, 14, 27. Kalunga okwa kufa omapangelo aeshe eenghonopangelo nokwe di yandja kuumwe, oo a wana noku na eenghono dinene. Olye mbela oo? ‘Oumwe oo a fa omona womunhu,’ sha hala kutya Jesus Kristus, nosho yo “oshiwana shovayapuki vaau wOkombadambada,” ovanhu 144 000, ovo tava ka pangela ‘fiyo alushe.’ (Dan. 7:18) Osha yela  kutya Jehova oye ‘Omukombadambada,’ molwaashi oye aeke e na eenghonopangelo dokukatuka onghatu ya tya ngaho.

11. Oshike vali Daniel a li a shanga osho tashi ulike kutya Jehova oku na eenghono dinenenene di dule doiwana?

¹¹ Oshiningwanima osho Daniel a mona memoniko otashi tu kumwe noshinima shimwe osho a li a popya nale. Daniel okwa ti: ‘Kalunga komeulu, ota xutula eehamba noha nangeke eehamba.’ Okwa ti yo: “Ou wOkombadambada e kwete eenghonopangelo kombada yoilongo yovanhu, ndele te i yandje kwaau Ye a hala.” (Dan. 2:19-21; 4:17) Mbela ope na peemhito dimwe opo Jehova a li a kufa, ile a tula ovapangeli vamwe koipundi? Osho naanaa!

12. Yandja oshihopaenenwa osho tashi ulike nghee Jehova a li a kufa eehamba omalukalwapangelo monakudiwa. (Tala efano.)

¹² Jehova okwa ulika kutya oku na eenghonopangelo dinenenene e dule ‘ovapangeli.’ Natu ka taleni koihopaenenwa itatu. Ohamba Farao yaEgipti oya li ya ninga oshiwana shaJehova ovapika, noya kala ya dika eenyala medu lwoikando inai hala oku va mangulula. Ashike Kalunga okwa li e va mangulula nokwa li a dipaa Farao mEfuta Litilyana. (Ex. 14:26-28; Eps. 136:15) Ohamba Belsassar yaBabilon oya li ya ninga oshivilo noye “linenepeka nokutwila Omwene weulu ondubo” ‘noye litangela oikalunga yoshingoldo noyoshisiliveli,’ ponhele yaJehova. (Dan. 5:22, 23) Ndele Kalunga okwa li a ninipika omulumenhu oo omulinenepeki. “Oufiku tuu winya” Belsassar, okwa li a dipawa nouhamba waye owa li wa yandjwa momake Ovamedia nOvapersia. (Dan. 5:28, 30, 31) Ohamba Herodes Agrippa I yaPalestine, oya li ya dipaifa omuyapostoli Jakob nokutulifa modolongo omuyapostoli Petrus, nelalakano loku mu dipaa. Ashike Jehova okwa li a kelela Herodes aha wanife po omhangela oyo. “Omweengeli waJehova okwe mu handukila, ndele ta kwatwa koudu,” nokufya. — Oil. 12:1-5, 21-23.

13. Yandja oshihopaenenwa shanghee Jehova a li a finda eengudu doiwana, odo da li de limanga kumwe.

¹³ Jehova okwa li yo a ulikila eengudu doiwana, odo da li de limanga kumwe, kutya oku na eenghonopangelo dinenenene. Okwa li a lwila Ovaisrael noku va kwafela va hanaune po oiwana ye limanga kumwe yeehamba 31 dOvakanaan, nova kwate ko oitukulwa inene yomEdu lEudaneko. (Jos. 11:4-6, 20; 12:1, 7, 24) Jehova okwa li yo a kwafela Ovaisrael va finde  filufilu ohamba Benhadad nosho yo eehamba dikwao 32 daSiria, odo da li tadi lwifa Israel. — 1 Eeh. 20:1, 26-29.

14-15. (a) Ohamba Nebukadnesar nosho yo Darius oda popya shike shi na sha nounamapangelo waJehova? (b) Omupsalme okwa popya shike shi na sha naJehova nosho yo oshiwana shaYe?

¹⁴ Jehova okwa kala nokuulika kutya oku li Omukombadambada lwoikando ihapu. Eshi ohamba Nebukadnesar yaBabilon ya li ye litangela ‘eenghono dayo dihapu netumbalo leenghonopangelo dayo,’ ponhele yokudimina nelininipiko kutya Jehova oye a wana okutangwa, Kalunga okwa li e mu handukila, ndele ta i eenghwengu. Konima eshi Nebukadnesar a veluka, okwa “pandula ou wOkombadambada” nokwa dimina kutya ‘epangelo [laJehova] otali kala fiyo alushe.’ Okwa weda ko a ti: “Kape na ou ta dulu okukelela eke laye.” (Dan. 4:30, 33-35) Konima eshi oudiinini waDaniel muJehova wa yelekwa, naashi Jehova e mu xupifa mekololo leenghoshi, ohamba Darius oya popya ya ti: “Ovanhu ve nokutila nokukakama koshipala shaKalunga kaDaniel. Osheshi Oye Kalunga omunamwenyo, ndele ota kala fiyo alushe. Noshilongo shaye kashi shii okuhanaunwa po, nepangelo laye kali na apa tali xulu po.” — Dan. 6:7-10, 19-22, 26, 27.

¹⁵ Omupsalme okwa ti: “Omwene okwa hanauna po eemhangela doiwana, nomadiladilo ovanhu okwe a xutula.” Okwa weda ko a ti: “Oshiwana oshinelao, osheshi shi na Kalunga kasho Omwene, e shi lihoololela, shi ninge efyuululo laye.” (Eps. 33:10, 12) Olo kali fi tuu etomheno la femba lokukanyatela oudiinini wetu kuJehova!

16. Otu na elineekelo lilipi li na sha ‘noudjuu munene,’ nomolwashike? (Tala efano.)

¹⁶ Otwa lesha osho Jehova a ninga monakudiwa. Ndele oshike twa teelela shi ka ningwe monakwiiwa i li popepi? Ohatu dulu okukala nelineekelo kutya Jehova ota ka xupifa ovapiya vaye ovadiinini pefimbo ‘loudjuu munene,’ oo tau ke uya. (Mat. 24:21; Dan. 12:1) Ota ka ninga ngaho, eshi oiwana ye limanga kumwe, oyo ya shiivika Gog yaMagog, tai ka ponokela nonyanya ovapiya vaJehova mounyuni aushe, ovo ovadiinini  kuye. Nonande oiwana oyo ye limanga kumwe oya kwatela mo oilyo aishe 193 yOiwana ya Hangana, itai ka dula okulwifa Omukombadambada netangakwaita laye lomeulu. Jehova okwa ti: “Ame ohandi ke liholola ngaashi Omwene nOmuyapuki moipafi yoiwana ihapu. Ndele vo otava ka shiiva nokutya, Aame Omwene.” — Hes. 38:14-16, 23; Eps. 46:10.

17. Ombiibeli oya xunganeka onakwiiwa ya tya ngahelipi i na sha neehamba dokombada yedu nosho yo ovo ovadiinini kuJehova?

¹⁷ Eponokelo loita yaGog otali ka twala fiyo opoita yaArmagedon, eshi Jehova ta ka hanauna po ‘eehamba adishe dokombada yedu.’ (Eh. 16:14, 16; 19:19-21) Mepingafano naasho, “ovanashili [otava] ka nangala oshilongo, naava vehe noshipo tava ka kala mo.” — Omayel. 2:21.

18. Ovakriste vahapu ova kala va tokola toko okuninga shike, nomolwashike? (Daniel 3:28)

¹⁸ Momukokomoko womido omafele, Ovakriste vashili vahapu ova kala nokukanifa emanguluko lavo nokutula nokuli eemwenyo davo moshiponga omolwohole yavo yokuhola Jehova, oo e li Omupangeli wavo Munenenene meshito alishe. Ove li ovadiinini, ngaashi Ovaheberi vatatu, ovo va li va xupa mediko lomundilo la hanya, molwaashi va kala ovadiinini kwaau wOkombadambada. — Lesha Daniel 3:28.

19. Jehova ota ka tokola oshiwana shaye pakanghameno lashike, noshike twa pumbwa okuninga paife?

¹⁹ Omupsalme David okwa shanga nghee sha fimana okukanyatela oudiinini wetu kuKalunga, a ti: “Omwene ota tokola oiwana. Omwene, yukifile nge pauyuki wange nopaukoshoki wange.” (Eps. 7:8) David okwa shanga vali a ti: “Oukoshoki noukalinawa nau amene nge.” (Eps. 25:21) Opo tu kale nonghalamwenyo ya denga mbada, otu na okukala ovadiinini kuJehova. Natu kanyatele oudiinini wetu muye, kashi na nee mbudi kutya oshike tashi ningwa po. Ngeenge otwa ningi ngaho, ohatu ka kala tu udite ngaashi omupsalme, oo a shanga a ti: “Ovanelao ovava, [ovadiinini, NW], ndele tava ende pamhango yOmwene.” — Eps. 119:1.