OHO ningi po shike ngeenge owa hala okushiiva kutya ongapi? Otashi dulika u tale kovili yoye. Ngeenge kaume koye okwe ku pula kutya ongapi, oto ka nyamukula ngahelipi? Oto dulu okupopya efimbo meenghedi da yoolokafana. Ngahelipi mbela?

Natu tye nee ngeno oimwe yomutenya ya pitifa ominute 30. Otashi dulika u nyamukule kutya 1:30. She likolelela opo ho kala nosho yo onghedindjikilile ya po, otashi dulika u tye 13:30. Onghedi yokupopya ovili oye likolelela komukokomoko weevili 24 defiku. Keenhele dimwe ovanhu ohava dulu okupopya kutya “etata lombali,” sha hala okutya oku na ominute 30 ombali i denge.

U li omuleshi wOmbiibeli, otashi dulika u lipule kutya ovanhu ovo va li ko pefimbo opo Ombiibeli tai shangwa ova li hava popi ngahelipi efimbo? Kava li ashike hava longifa onghedi imwe. Oitukulwa yOmbiibeli yOshiheberi oya tumbula omafimbo ngaashi “ongula,” ‘pomusha,’ “mokati komutenya” nosho yo “komatango.” (Gen. 8:11; 19:27; 43:16; Deut. 28:29; 1 Eeh. 18:26) Ashike peemhito dimwe, efimbo ohali popiwa kondadalunde.

Pefimbo lOmbiibeli, osha li onghedindjikilile okulongifa ovanangeli. Ova li hava kala unene va pumbiwa oufiku. Omafelemido ofimbo Jesus ina dalwa, Ovaisrael ova li va tukaula oufiku momafimbo atatu haa ifanwa omanangelo. (Eps. 63:6) Ovatokolipangeli 7:1 ova tumbula ‘enangelo lopokati koufiku.’ Pefimbo laJesus, Ovajuda ova li va tambula ko omukalo wOvagreka nOvaroma wokutukula oufiku momafimbo anhe okunangela.

Omavangeli okwa tumbula omafimbo oo lwoikando yonhumba. Pashihopaenenwa, osha li “openangelo etine loufiku” eshi Jesus a li ta ende kombada yomeva a yuka kombautu omo mwa li ovahongwa vaye. (Mat. 14:25) Jesus okwa popya mefaneko laye a ti: “Mwene weumbo ngeno e nowino, efimbo lilipi omulunga te uya, ngeno ta pashukile eumbo laye liha teywe.” — Mat. 24:43.

Jesus okwa popya shi na sha nomafimbo anhe eshi a li ta lombwela ovahongwa vaye ta ti: “Hano osho kaleni mwa pashuka, osheshi kamu shi shii onaini mwene weumbo te uya, ngeenge onguloshi ile opokati koufiku ile opekweno [lekondobolo] ile ongula.” (Mark. 13:35) Enangelo lotete lomomanangelo oo ola li “onguloshi,” hali hovele eshi etango tali ningine fiyo opomuwoi wokonguloshi lwaapo. Enangelo etivali ola li “opokati koufiku,” hali hovele okudja pomuwoi wokonguloshi lwaapo fiyo omokati koufiku. Enangelo etitatu ola li “opekweno lekondombolo,” hali hovele okudja pokati koufiku fiyo oponhatu yokeengulasha lwaapo. Otashi dulika ekondobolo la li la kwena penangelo olo moufiku oo Jesus a li a kwatwa po. (Mark. 14:72) Enangelo etine loufiku ola li “ongula,” hali hovele ponhatu yokeengulasha lwaapo fiyo etango tali piti.

Nonande ovo va li ko pefimbo lOmbiibeli kava li ve na eevili ngaashi fye kunena, ova li ve na osho hashi va lombwele kutya ovili oyomutenya ile oyoufiku.