1-2. Oshiningwanima she likalekelwa shilipi sha li sha ningwa mefiku laPentekoste mo 33 O.P.?

OSHA li ongula yOsoondaxa muJerusalem. Odula oyo oya li 33 O.P., nola li efiku laPentekoste. Ongudu yovahongwa 120 lwaapo oya li ya ongala monduda yopombada. (Oil. 1:13-15; 2:1) Omafiku manini ofimbo osho inashi ningwa, Jesus okwa hangwa e va lombwela kutya nava kale muJerusalem molwaashi ova li ve li pokupewa oshali ye likalekelwa. (Oil. 1:4, 5) Oshike sha li tashi ka ningwa po?

² “Fimbo va li omutumba, ohaluka ova uda epopomo la dja meulu la fa omhepo inene.” Aveshe ovo va li meumbo ova li va uda epopomo olo. Opo nee, “omalaka a fa omundilo” okwa wila kombada yomitwe dovahongwa nova “tililwa omhepo iyapuki.” (Oil. 2:2-4) Monghedi ye likalekelwa ya tya ngaho, Jehova okwa li a tilila omhepo iyapuki ongudu oyo. (Oil. 1:8) Ovo va li votete va vaekwa nomhepo iyapuki * nokukala ve na eteelelo loku ka pangela pamwe naJesus meulu.

3. Omolwashike ovo va li pOpentekoste va li va tomhwa kutya ova vaekwa nomhepo iyapuki?

³ Ngeno naave owa li umwe womwaavo va li monduda yopombada efiku olo, ngeno ku na efiku u dimbwe oshinima  osho. Omwa li mwa hovela okupopya omalaka eshi mwa tililwa omhepo iyapuki oyo ya fa omalaka a tema omundilo oo a li pombada yomitwe deni. (Oil. 2:5-12) Osho oshe ku shilipaleka kutya owa vaekwa nomhepo iyapuki. Mbela ovo va vaekwa nomhepo iyapuki ova li va vaekwa pefimbo limwe nomonghedi ya faafana? Ahowe. Otu shi shii ngahelipi?

4. Mbela ovavaekwa aveshe vomefelemudo lotete ova li va vaekwa pefimbo limwe? Shi yelifa.

⁴ Natu ka konakoneni efimbo opo Ovakriste va li va vaekwa. Ongudu yOvakriste 120 lwaapo havo ashike va li va vaekwa nomhepo iyapuki pOpentekoste 33 O.P. Lwanima mefiku olo tuu olo, ovanhu 3 000 lwaapo ova li va vaekwa nomhepo iyapuki. Ova li va vaekwa pefimbo opo va ninginifwa. (Oil. 2:37, 38, 41) Ashike eedula da ka shikula ko, havaKriste aveshe ovavaekwa va vaekwa pefimbo opo va ninginifwa. Ovasamaria ova ka vaekwa pa pita efimbo okudja eshi va ninginifwa. (Oil. 8:14-17) Ashike Kornelius noukwaneumbo waye ova vaekwa monghedi ikumwifi, molwaashi ova vaekwa ofimbo inava ninginifwa. — Oil. 10:44-48.

5. She likolelela ko 2 Ovakorinto 1:21, 22, oshike hashi ningwa po ngeenge umwe ta vaekwa nomhepo iyapuki?

⁵ Natu ka konakoneni yo eshi hashi ningwa po ngeenge omunhu a vaekwa nomhepo iyapuki. Vamwe ovo va vaekwa otashi dulika va mone shidjuu okutambula ko kutya ova hoololwa kuJehova. Otashi dulika ve lipule kutya, ‘Omolwashike Kalunga aame a hoolola?’ Ashike vamwe otashi dulika hasho ve udite ngaho. Kashi na nee mbudi kutya omunhu oha kala e udite ngahelipi, omuyapostoli Paulus okwa popya osho hashi ningwa po shi na sha novavaekwa aveshe a ti: “Omwa didilikwa * nomhepo iyapuki oyo mwa li mwa udanekelwa. Omhepo iyapuki oi li eshilipaleko kutya Kalunga ota ka wanifa po ashishe osho e tu udanekela.” (Ef. 1:13, 14) Onghee hano, Kalunga oha longifa omhepo yaye iyapuki opo a shilipaleke aveshe ovo a hoolola. Monghedi ya tya ngaho, omhepo iyapuki ohai va ‘udanekele’  noku va shilipaleka kutya otava ka kala nomwenyo fiyo alushe meulu, ndele hakombada yedu. — Lesha 2 Ovakorinto 1:21, 22.

6. Omukriste omuvaekwa oku na okuninga shike opo a ka mone ondjabi yaye yoku ka kala meulu?

⁶ Ngeenge Omukriste okwa vaekwa, mbela osho osha hala okutya otai meulu? Ahowe. Oha kala e shii kutya okwa hoololwa a ka kale meulu. Ashike okwa pumbwa okukaleka momadiladilo elondwelo e li: “Ovamwatate, longeni noudiinini opo mu kale vamwe vomwaavo va ifanwa nova hoololwa kuKalunga, osheshi ngeenge omwa kala tamu kulike omaukwatya oo, otamu kala ovadiinini.” (2 Pet. 1:10) Nonande Omukriste okwa hoololwa ile okwa vaekwa a ka kale meulu, ota ka mona ashike ondjabi oyo ngeenge okwa kala omudiinini. — Fil. 3:12-14; Heb. 3:1; Eh. 2:10.

7. Ovavaekwa ohava shiiva ngahelipi kutya ove na eifano lomeulu?

⁷ Omunhu oha shiiva ngahelipi kutya oku na eifano lomeulu? Enyamukulo otali hangwa meendjovo daPaulus odo a li a shangela Ovaroma ovo va li va ‘hoololwa va kale ovayapuki.’ Okwe va lombwela a ti: “Omhepo yaKalunga ihai tu ningi ovapika ile i tu mbadapaleke, ndele oye tu ninga ovana vaye, noye tu linyengifa tu tye: ‘Abba, Tate!’ Omhepo oyo vene tai hepaulula pamwe nomhepo yetu kutya fye ovana vaKalunga.” (Rom. 1:7; 8:15, 16) Onghee hano, Kalunga oha shiivifile ovavaekwa kutya ove na eifano lomeulu okupitila momhepo iyapuki. — 1 Tes. 2:12.

8. Ongahelipi 1 Johannes 2:20, 27 a ulika kutya ovavaekwa inava pumbwa umwe e va shiivifile kutya ove li ovavaekwa?

⁸ Jehova iha tula momalimbililo omadiladilo nosho yo omitima daavo a shiva va ka kale meulu. (Lesha 1 Johannes 2:20, 27.) Ovakriste ovavaekwa navo ohava hongwa kuJehova okupitila meongalo ngaashi ashike ovanhu aveshe. Ashike inava pumbwa umwe e va shiivifile kutya ove li ovavaekwa. Jehova oha longifa eenghono daye dinenenene meshito alishe, omhepo iyapuki, opo e va shiivifile kutya okwe va vaeka.

9. Metwokumwe nOvaefeso 1:18, omonghedi ilipi omunhu oo a vaekwa ha lunduluka?

⁹ Ovapiya vahapu vaKalunga kunena ohava mono shidjuu okuuda ko osho hashi ningwa po ngeenge Kalunga okwa vaeke umwe. Osho shi na okukala ngaho molwaashi vo inava vaekwa. Kalunga okwa shita ovanhu va kale nomwenyo fiyo alushe kombada yedu, ndele hameulu. (Gen. 1:28; Eps. 37:29) Ashike okwa hoolola vamwe va ka kale meulu. Onghee hano, ngeenge e va vaeke, oha lundulula eteelelo lavo nonghedi yavo yokudiladila opo va yandje elitulemo keteelelo loku ka kala nomwenyo meulu. — Lesha Ovaefeso 1:18.

10. Osha hala okutya ngahelipi ‘okudalululwa’? (Tala eshangelo lopedu.)

¹⁰ Ngeenge Ovakriste ova vaekwa nomhepo iyapuki, ova “dalululwa,” ile tashi dulika va “dalwa okudja pombada.” * Jesus naye okwa ulika yo kutya ohashi kala shidjuu okuyelifila omunhu oo ehe fi omuvaekwa nghee ovo va “dalululwa,” ile “va dalwa komhepo” hava kala ve udite. — Joh. 3:3-8.

11. Yelifa nghee okudiladila komunhu oo a vaekwa haku lunduluka.

¹¹ Ovakriste ohava lundulula ngahelipi okudiladila kwavo ngeenge va vaekwa? Ovakriste ovo ova li ve na eteelelo loku ka kala nomwenyo waalushe kombada yedu, ofimbo Jehova ine va vaeka. Ova li hava kala va teelela nodjuulufi  efimbo olo Jehova ta ka hanauna po oukolokoshi aushe nokuninga edu oparadisa. Otashi dulika va li hava kala va teelela nodjuulufi oku ka hambelela ovapambele ile ookaume kavo eshi tava ka nyumuka. Ashike eshi va vaekwa, ohava hovele okudiladila monghedi i lili. Omolwashike mbela? Hamolwaashi ngeno va loloka ile inava hala oku ka kala nomwenyo waalushe kombada yedu. Ihava lundulula okudiladila kwavo molwaashi ngeno va polimana ile va mona oixuna ya ileni mu tale oku kombada yedu. Ihava kala ve udite kutya okukala nomwenyo oku kombada yedu oshinima shihe fi shihokwifa. Ponhele yaasho, Jehova oha longifa omhepo yaye iyapuki opo a lundulule okudiladila kwavo nova yandje elitulemo keteelelo lavo litunhula.

12. Metwokumwe 1 Petrus 1:3, 4, ovo va vaekwa ohava kala ve udite ngahelipi?

¹² Omunhu oo a vaekwa otashi dulika a kale e udite ehe na oshilonga omolwoufembanghenda we likalekelwa oo a pewa. Ashike iha kala a limbililwa ngeenge Jehova okwe mu hoolola ngoo shili. Oha kala a hafa nokwa pandula ngeenge ta diladila keteelelo lomeulu olo e na. — Lesha 1 Petrus 1:3, 4.

13. Ovo va vaekwa ohava kala ve uditile ngahelipi onghalamwenyo oku kombada yedu?

¹³ Mbela osho osha hala okutya ovo va vaekwa ova hala okufya? Omuyapostoli Paulus okwa nyamukula epulo olo. Okwa yelekanifa omalutu avo netwali, a ti: “Fye ava tu li metwali eli ohatu keme notwa wililwa po molwaashi inatu hala oku li dula mo, ndele otwa hala okudjala likwao opo olutu olo hali fi li pingenwe po komwenyo waalushe.” (2 Kor. 5:4) Ovakriste ovo inava loloka okukalamwenyo kwokombada yedu, noinava hala okufya diva. Ponhele yaasho, ohava hafele onghalamwenyo nova hala okulongela Jehova pamwe nomaukwaneumbo nookaume kavo. Ashike nande ngaho, kashi na nee mbudi kutya otava ningi shike, ohava kaleke momadiladilo eteelelo lavo litunhula lomonakwiiwa. — 1 Kor. 15:53; 2 Pet. 1:4; 1 Joh. 3:2, 3; Eh. 20:6.

14. Oshike ihashi ulike kutya omunhu okwa vaekwa nomhepo iyapuki?

¹⁴ Otashi dulika ho kala to lipula ngeenge owa vaekwa nomhepo iyapuki. Ngeenge osho, diladila komapulo a fimana taa shikula: Mbela oho kala wa halelela okulonga ehalo laJehova? Mbela oho longo ngoo nondjungu moilonga yokuudifa? Mbela oho hafele ngoo okukonakona Ombiibeli nokulihonga kombinga ‘yoinima yomoule yaKalunga’? (1 Kor. 2:10) Mbela ou udite kutya Jehova okwe ku pa oidjemo iwa moilonga yokuudifa? Mbela oho kala u udite u na oshinakuwanifwa shokukwafela vamwe ve lihonge kombinga yaJehova? Mbela owa mona oumbangi kutya Jehova okwe ku kwafela meenghedi dihapu da yoolokafana monghalamwenyo yoye? Ngeenge enyamukulo loye komapulo aeshe oo oheeno, mbela osho osha hala okutya ou na eifano loku ka kala nomwenyo meulu? Ahowe, osho hasho tashi ufa. Omolwashike mbela? Omolwaashi ovapiya vaKalunga aveshe otava dulu okukala ve udite ngaho, kutya nee ova vaekwa ile hasho. Jehova ota dulu okukwafela omupiya waye keshe okupitila momhepo iyapuki, kashi na nee mbudi kutya oku na eteelelo lashike. Ngeenge owa limbililwa ngee owa vaekwa nomhepo iyapuki, osho osha hala okutya ino vaekwa. Ovo va hoololwa kuJehova ihava kala va limbililwa ngeenge ova vaekwa ile hasho. Ove shii filufilu kutya ova vaekwa.

15. Otu shi shii ngahelipi kutya haaveshe ovo va pewa omhepo yaKalunga va hoololwa va ye meulu?

¹⁵ MOmbiibeli omu na oihopaenenwa ihapu  yovalumenhu ovadiinini ovo va li va pewa omhepo iyapuki, ashike kave na eteelelo loku ka kala meulu. David okwa li a wilikwa komhepo iyapuki. (1 Sam. 16:13) Omhepo iyapuki oya li ye mu kwafela a ude ko oinima yomoule kombinga yaJehova noya li yo ye mu wilika a shange oitukulwa imwe yOmbiibeli. (Mark. 12:36) Omuyapostoli Petrus okwa ti kutya David “ina londa a ya keulu.” (Oil. 2:34) Johannes Omuninginifi naye okwa li a “yadifwa omhepo iyapuki.” (Luk. 1:13-16) Jesus okwa ti kutya kaku na omunhu nande oumwe e dule Johannes, ashike okwa ti kutya Johannes ina kwatelwa mOuhamba womeulu. (Mat. 11:10, 11) Jehova okwa li a longifa omhepo yaye iyapuki opo i pe ovalumenhu ovo eenghono va dule okulonga oikumwifilonga, ashike ka li a longifa omhepo opo i va hoolole va ka kale meulu. Mbela osho osha hala kutya kava li ovadiinini ngaashi ovo va hoololwa va ka pangele meulu? Hasho nandenande. Jehova ote ke va nyumunina mOparadisa kombada yedu. — Joh. 5:28, 29; Oil. 24:15.

16. Ovapiya vaKalunga vahapu ove na eteelelo lashike kunena?

¹⁶ Ovapiya vaKalunga vahapu ovo ve li kombada yedu kunena kave na eteelelo loku ka kala meulu. Ova teelela nodjuulufi oku ka kala nomwenyo kombada yedu eshi Ouhamba waKalunga tau ke va pangela, ngaashi Abraham, Sara, David, Johannes Omuninginifi nosho yo ovalumenhu novakainhu vahapu ovo va popiwa mOmbiibeli. — Heb. 11:10.

17. Omapulo elipi hatu ka kundafana moshitukulwa tashi shikula ko?

¹⁷ Molwaashi ovavaekwa vamwe ove li natango mokati koshiwana shaKalunga kunena, otashi dulika natango tu na omalipulo. (Eh. 12:17) Pashihopaenenwa, mbela ovavaekwa ove na okulitala ko ngahelipi? Ngeenge umwe meongalo letu okwa hovele okulya omungome nokunwa omaviinyu, otu na okuungaunga naye ngahelipi? Nongahelipi ngeenge omuvalu wovavaekwa otau ende tau hapupala? Mbela otwa pumbwa okukala twa limbililwa? Oshitukulwa tashi shikula ko otashi ka nyamukula omapulo oo.