OSHITUKULWA SHOKUKONAKONWA 17
Tambula ko ekwafo laJehova u kondjife eemhepo dowii
‘Ekondjo letu okulwifa eemhepo dowii mevalelwa.’ — EF. 6:12.
EIMBILO 55 Inamu va tila!
EXUKU LOSHITUKULWA *
1. Ngaashi sha yelifwa mOvaefeso 6:10-13, omonghedi imwe ilipi ya denga mbada omo Jehova ha ulike kutya oku na ko nasha nafye? Shi yelifa.
ONGHEDI imwe ya denga mbada omo Jehova ha ulike kutya oku na ko nasha novapiya vaye, oyo oku tu kwafela tu kondjife ovatondi vetu. Satana neendemoni ove li ovatondi vetu vanene. Jehova okwe tu londwela kombinga yovatondi ovo, nokwe tu pa osho twa pumbwa opo tu va kondjife. (Lesha Ovaefeso 6:10-13.) Ngeenge otwa tambula ko ekwafo laJehova nokukala twe lineekela muye filufilu, ohatu ka pondola mokukondjifa Ondiaboli. Ohatu dulu okukala tu na elineekelo la faafana naalo omuyapostoli Paulus a li e na. Okwa shanga a ti: “Kalunga ngeenge e tu ama, olyelye ta tu ondubo nafye?” — Rom. 8:31.
2. Oshike hatu ka konakona moshitukulwa eshi?
2 Tu li Ovakriste vashili, ihatu yandje elitulemo kuSatana nokeendemoni. Ohatu yandje elitulemo mokulihonga kombinga yaJehova noku mu longela. (Eps. 25:5) Ashike otwa pumbwa okushiiva eenghedi odo Satana ha longifa. Omolwashike? Opo tu henuke okufindwa kuye. (2 Kor. 2:11) Moshitukulwa eshi, ohatu ka konakona onghedi ya tongomana omo Satana nosho yo eendemoni hava kendabala okupukifa ovanhu. Ohatu ka konakona yo nghee hatu dulu oku va kondjifa nomupondo.
NGHEE EEMHEPO DOWII HADI PUKIFA OVANHU
3-4. (a) Oumhulile oshike? (b) Eitavelo moumhulile ola tandavela shi fike peni?
3 Oumhulile ou li onghedi ya tongomana omo Satana nosho yo eendemoni hava kendabala okupukifa ovanhu. Ovo hava kufa ombinga moumhulile ohava ti kutya ove shii, ile ohava pangele oinima oyo ovanhu ihava dulu okushiiva, ile okupangela. Pashihopaenenwa, vamwe ohava ti kutya otava dulu okushiiva kombinga yonakwiiwa mokunyanekela. Vamwe otava dulu okuliningifa va fa ngeno hava popi noonakufya. Vamwe ohava kufa ombinga moulodi, nohava kendabala okulowa ovanhu vakwao. *
4 Mbela eitavelo moumhulile ola tandavela shi fike peni? Omakonakono amwe oo a ningilwe moilongo 18 moLatin America nomoCaribbean, opa li pa monika kutya omunhu umwe womovanhu vatatu okwa itavela moumhulile, moulodi, ile a itavela kutya otashi shiiva okupopya neemhepo. Natango omakonakono amwe okwa li a ningwa moilongo 18 muAfrica. Onghee ovanhu vahapu vomwaavo va pulwapulwa ova ti kutya ova itavela moulodi. Onghee hano, keshe apa tu li natu kale twa lungamena oumhulile. Komesho yaaishe, Satana ota hongaula “ounyuni aushe.” — Eh. 12:9.
5. Jehova oku uditile ngahelipi oumhulile?
5 Jehova oye “Kalunga omudiinini,” ile tu tye Kalunga koshili. (Eps. 31:5) Mbela oha kala e uditile ngahelipi oumhulile? Oku u tonde. Okwa li a lombwela Ovaisrael a ti: “Mokati keni muha kale nande umwe, ou ta endifa omona waye omumati ile okakadona momundilo, ile ou ha diinine oundudu ile enyanekelo ile ta xunganeke omadidiliko ile ta pulike ile ta longifa oupule ile ta pula keemhepo dovafi ile komhepo yovashitukifi ile ta kongo omapukululo kovafi. Osheshi keshe ou ta longo oinima oyo, oye oixuna koshipala shOmwene Kalunga koye.” (Deut. 18:10-12) Ovakriste kave li koshi yOmhango oyo Kalunga a li a pa Ovaisrael. Ndele otu shii kutya etaleko laye li na sha noumhulile inali lunduluka. — Mal. 3:6.
6. (a) Satana oha longifa ngahelipi oumhulile opo a etele ovanhu oupyakadi? (b) She likolelela kOmuudifi 9:5, oshili kombinga yoonakufya oilipi?
6 Jehova okwe tu londwela shi na sha noumhulile molwaashi oku shii kutya Satana ohe u longifa opo a etele ovanhu oupyakadi. Satana oha longifa oumhulile opo a xumife komesho oipupulu, mwa kwatelwa oipupulu oyo kutya oonakufya ove li konhele imwe i lili ve na omwenyo. (Lesha Omuudifi 9:5.) Oha longifa yo oumhulile opo a mbadapaleke ovanhu noku va amuna ko kuJehova. Elalakano laye okwa hala ovanhu ovo hava kufa ombinga moumhulile ve lineekele meemhepo dowii ponhele yaJehova.
NGHEE HATU DULU OKUKONDJIFA EEMHEPO DOWII
7. Jehova okwe tu lombwela shike?
7 Ngaashi sha popiwa metetekelo, Jehova okwe tu lombwela osho twa pumbwa okushiiva opo tu henuke okupukifwa kuSatana nokeendemoni. Diladila keenghatu dimwe odo hatu dulu okukatuka eshi hatu kondjifa Satana nosho yo eendemoni.
8. (a) Omonghedi ya denga mbada ilipi hatu dulu okuhenuka eemhepo dowii? (b) Epsalme 146:4 ola nyaneka ngahelipi pomutenya oipupulu yaSatana i na sha nefyo?
8 Lesha nokudilonga kEendjovo daKalunga. Oyo oyo onghedi ya denga mbada hatu dulu okuhenuka oipupulu oyo eemhepo dowii tadi xumifa komesho. Eendjovo daKalunga oda fa eongamukonda olo tali dulu okutetaula pafaneko oipupulu oyo Satana ta xumifa komesho. (Ef. 6:17) Pashihopaenenwa, Eendjovo daKalunga oda nyaneka pomutenya oipupulu oyo kutya oonakufya otava dulu okupopya naavo ve li momwenyo. (Lesha Epsalme 146:4.) Otadi tu dimbulukifa yo kutya Jehova oye aeke ta dulu okupopya osho tashi ka ningwa monakwiiwa. (Jes. 45:21; 46:10) Ngeenge ohatu lesha nokudilonga kEendjovo daKalunga pandjikilile, ohatu ka kala twe lilongekida nokukala tu tonde oipupulu oyo eemhepo dowii da hala tu itavele.
9. Oilonga i na ekwatafano noumhulile ilipi hatu henuka?
9 Henuka okuninga oshinima keshe shi na ekwatafano noumhulile. Tu li Ovakriste vashili, ihatu kufa nande ombinga moludi keshe loumhulile. Pashihopaenenwa, ihatu pula ekwafo keemhepo doonakufya, ile tu kendabale okukwatafana novafi monghedi keshe. Ngaashi sha kundafanwa moshitukulwa sha tetekela, ohatu henuka eenghedindjikilile di na sha nomapako odo de likolelela keitavelo olo kutya, oonakufya ove na omwenyo ponhele imwe i lili. Ihatu i yo kovanyanekeli, ile keemhule opo di tu lombwele kombinga yonakwiiwa. (Jes. 8:19) Otu shi shii kutya oilonga aishe ya tya ngaho oya nyika oshiponga neenghono notai dulu oku tu ningifa tu kale tu na ekwatafano naSatana nosho yo neendemoni.
Hopaeneneni Ovakriste vomefelemudo lotete moku efa po oinima aishe oyo tashi dulika mu na i na ekwatafano noumhulile nosho yo mokuhenuka omalihafifo oo a kwatela mo oumhulile (Tala okatendo 10-12)
10-11. (a) Vamwe ovo va li ko mefelemudo lotete ova li va ninga po shike eshi ve lihonga oshili? (b) She likolelela ko 1 Ovakorinto 10:21, omolwashike tu na okushikula oshihopaenenwa shOvakriste vopefimbo lonale, nongahelipi hatu dulu oku shi ninga?
10 Efa po oinima aishe oyo i na ekwatafano noumhulile. Ovanhu vamwe ovo va li hava di muEfeso mefelemudo lotete, ova li hava kufa ombinga moumhulile. Eshi ve lihonga oshili ova li va katuka eenghatu da kwata moiti. “Vahapu vomwaava va li va longifa oupule wavo, ova eta omishangwa davo doupule da ndubilwa onduba, ndele ve di xwika po moipafi yovanhu.” (Oil. 19:19) Ovanhu ovo ova li va ninga keshe osho tava dulu opo va kondjife eemhepo dowii. Omambo avo oupule okwa li e na ondilo. Ndele ponhele yoku a yandja po, ile yoku a landifa po, ova li ve a xwika po. Ova li ve na ko nasha unene nokuhafifa Jehova shi dulife ongushu yomambo oo.
11 Ongahelipi hatu dulu okushikula oshihopaenenwa shOvakriste vomefelemudo lotete? Oshi li pandunge okweefa po oinima aishe oyo tashi dulika tu na i na ekwatafano noumhulile. Oinima oyo oya kwatela mo oilanda, oiketi, ile oinima imwe oyo ovanhu hava djala, ile ve na opo ve liamene keemhepo dowii. — Lesha 1 Ovakorinto 10:21.
12. Omapulo elipi twa pumbwa okulipula shi na sha nomalihafifo etu?
12 Konakona noukeka omalihafifo oye. Lipula kutya: ‘Mbela ohandi lesha omambo, oifo, ile oitukulwa kointaneta i na sha noumhulile? Ongahelipi shi na sha neemusika odo handi pwilikine, eemuvi neeprograma doko-TV odo handi tale, ile omaudano eevidio oo handi dana? Mbela omalihafifo ange okwa kwatela mo oumhulile? Mbela okwa kwatela mo oifalakanena nosho yo oishitukila ile oinima i na eenghono di dule dopaushitwe? Mbela okwa kwatela mo oinima oyo tai ulike kutya oumhulile, oulodi nokufinga ovanhu inai nyika oshiponga? Hamalihafifo aeshe a kwatela mo omahokololo oinima ihe fi yoshili e na ekwatafano noumhulile. Ngeenge to konakona omalihafifo oye, kala wa tokola toko okuninga omatokolo oo tae ke ku kwafela u kale kokule nakeshe osho Jehova e tonde. Otwa hala okuninga ngaashi hatu dulu opo tu kale tu na ‘eliudo lihe noshipo’ koshipala shaKalunga. — Oil. 24:16. *
13. Otwa hala okuhenuka okuninga shike?
13 Henuka okupopya omahokololo e na sha neendemoni. Moshinima eshi, otwa hala okushikula oshihopaenenwa osho sha tulwa po kuJesus. (1 Pet. 2:21) Ofimbo ine uya kombada yedu, okwa li ha kala meulu, nokwa li e shii shihapu kombinga yaSatana nosho yo eendemoni. Ndele ka li ha popi omahokololo e na sha naasho va ninga. Jesus okwa li a hala okukala Ondombwedi yaJehova, ndele kai fi yaSatana. Otwa hala okuhopaenena Jesus mokuhatandaveleka omahokololo e na sha neendemoni. Ponhele yaasho, otwa hala okuulika meendjovo detu kutya, ‘omutima wetu ou yadi ndoondoo, tau xunga eendjovo diwa,” sha hala okutya oshili. — Eps. 45:1.
Inatu pumbwa okutila eemhepo dowii. Jehova, Jesus novaengeli ove na eenghono ve di dule (Tala okatendo 14-15) *
14-15. (a) Omolwashike tuhe na okutilifwa keemhepo dowii? (b) Oumbangi ulipi tau ulike kutya Jehova oha amene oshiwana shaye kunena?
14 Ino tilifwa keemhepo dowii. Kunena otashi dulika tu ningilwe oinima ii. Oiponga, ouyahame ile nokuli efyo, otai dulu oku tu hanga ombadilila. Ashike katu na okudiladila kutya oinima oyo ohai etifwa keemhepo odo ihadi monika. Ombiibeli oya yelifa kutya, “efimbo nesheyelo” tali pangele keshe umwe. (Omuud. 9:11) Jehova okwa ulika kutya oku na eenghono e dule eendemoni. Pashihopaenenwa, Kalunga ka li a efa Satana a dipae Job. (Job 2:6) Pefimbo laMoses, Jehova okwa li a ulika kutya oku na eenghono e dule eemhule domuEgipti. (Ex. 8:18; 9:11) Jesus, oo a li a pewa eenghono kuJehova, okwa li a ulika kutya oku na eenghono e dule Satana neendemoni eshi e va umba mo meulu. Nomonakwiiwa i li popepi, otava ka ekelwa mombwili, omo itava ka dula vali okweetela ovanhu oupyakadi. — Eh. 12:9; 20:2, 3.
15 Otu na oumbangi muhapu u na sha nanghee Jehova ha amene oshiwana shaye kunena. Diladila kwaashi: Ohatu udifa nohatu hongo oshili mounyuni aushe. (Mat. 28:19, 20) Oshidjemo, ohatu nyaneke pomutenya oilonga ii yOndiaboli. Paulelalela, ngeno Satana okwa li ta dulu okuxulifa po oilonga yetu aishe, ngeno okwe i xulifa po, ashike ita dulu oku shi ninga. Onghee inatu pumbwa okutilifwa keemhepo dowii. Otu shi shii kutya ‘omesho Omwene ohaa tale edu alishe, opo a kwafe neenghono ovo have liameke kuye nomutima aushe.’ (2 Omaf. 16:9) Ngeenge otwa kala ovadiinini kuJehova, eendemoni itadi ke tu etela oupyakadi tau kalelele.
OVO HAVA TAMBULA KO EKWAFO LAJEHOVA OHAVA NANGEKWA NOUPUNA
16-17. Yandja oshihopaenenwa shanghee hashi pula ouladi okukondjifa eemhepo dowii.
16 Ohashi pula ouladi okukondjifa eemhepo dowii, unene tuu ngeenge ookaume ile ovapambele ovo va fa ve tu lile po tave tu pataneke. Ashike Jehova oha nangeke noupuna ovo hava ulike ouladi meenghalo da tya ngaho. Diladila koshihopaenenwa shomumwameme Erica, oo hadi moGhana. Erica okwa li e na omido 21 eshi a hovela okukonakona Ombiibeli. Molwaashi xe okwa li omupristeli oo ha kufa ombinga moumhulile, okwa li a teelelwa a kufe ombinga meenghedindjikilile di na sha noumhulile, odo da kwatela mo okulya po ombelela oyo ya yambelwa oikalunga yaxe. Eshi Erica a anya, ovapambele ova li ve wete a tuka oikalunga. Ovapambele ova li va itavela kutya oikalunga otai ke mu handukila nomukifi wopamadiladilo nowopalutu.
17 Ovapambele vaErica ova li tava kendabala oku mu kondjifa a shikule eenghedindjikilile, ashike ka li e liyandja, nonande osha li tashi pula a fiye po eumbo lavo. Eendombwedi dimwe oda li de mu pitika a kale hadi pudo. Kungaho, Jehova okwa nangeka noupuna Erica noukwaneumbo upe, ovaitaveli vakwao ovo va ka ninga ovamwaxe. (Mark. 10:29, 30) Nonande ovapambele ova li ve mu liteeka po nova xwika po oinima yaye, okwa kala omudiinini kuJehova, a ninginifwa nopaife oku li omukokolindjila wondjikilile. Ka li a tilifwa keendemoni. Okwa popya kombinga yovapambele vaye a ti, “Ohandi ilikana efiku keshe ovapambele vange va mone omanangeko noupuna okushiiva Jehova nokukala nemanguluko olo hali di mokulongela Kalunga ketu omunahole.”
18. Omanangeko noupuna elipi hatu mono ngeenge otwe lineekela muJehova?
18 Haatushe eitavelo letu li na okuyelekwa monghedi ya tya ngaho. Ashike atushe otwa pumbwa okukondjifa eemhepo dowii nokulineekela muJehova. Ngeenge otwa ningi ngaho, ohatu ka mona omanangeko noupuna mahapu, nohatu ka henuka okupukifwa koipupulu yaSatana. Natango, itatu ka efa oumbada wokutila eendemoni u tu efife po okulongela Jehova. Komesho yaaishe, ohatu ka pameka ekwatafano letu naJehova. Omuhongwa Jakob okwa shanga a ti: “Dulikeni hano kuKalunga, kondjifeni Satana, ndele ye te mu i onhapo. Eheneni kuKalunga, opo nee Ye ta ehene kunye.” — Jak. 4:7, 8.
EIMBILO 150 Kongeni Kalunga opo mu ka xupifwe
^ par. 5 Jehova okwe tu londwela pahole kombinga yeemhepo dowii nosho yo oupyakadi oo tadi dulu okweeta. Eemhepo dowii ohadi kendabala ngahelipi okupukifa ovanhu? Eenghatu dilipi hatu dulu okukatuka opo tu kondjife eemhepo dowii? Oshitukulwa eshi otashi ka kundafana nghee Jehova he tu kwafele tu henuke enwefemo lado.
^ par. 3 OUTUMBULILO WA YELIFWA: Oumhulile oo okwiitavela nokulonga oilonga oyo i na ekwatafano neendemoni. Owa kwatela mo eitavelo olo kutya eemhepo doonakufya ohadi kala po ngeenge olutu la fya nosho yo kutya ohadi dulu okupopya naavo ve li momwenyo, unene tuu okupitila movanyanekeli. Oumhulile owa kwatela mo yo oilonga ngaashi oulodi nokunyanekela. Oumhulile ou wa popiwa moshitukulwa eshi, owa yukifwa koinima aishe oyo i na ekwatafano noulodi, ile neenghono de likalekelwa di dule dopaushitwe. Otashi dulika wa kwatela mo oinima ngaashi okufinga ile okuta mo eemhepo da nyata. Itau ulike koutriksa, oo vamwe hava ningi neenyala, nelalakano ashike lokuhafifa vamwe.
^ par. 12 Ovakulunhuongalo kave na oufemba woku tu tulila po eemhango di na sha nomalihafifo. Ponhele yaasho, Omukriste keshe oku na okuwilikwa keliudo laye la deulwa kOmbiibeli ngeenge ta hoolola osho ta lesha, ta tale, ile ta dana. Omitwe domaukwaneumbo dinaendunge ohadi shilipaleke kutya omalihafifo oo ovaneumbo lavo tava kufa ombinga muo oku li metwokumwe nomafinamhango Ombiibeli. Tala oshitukulwa ko-jw.org® “Mbela Eendombwedi daJehova ohadi tula po eendjidikila di na sha neemuvi donhumba, omambo ile omaimbilo?” Inda opo pa shangwa KOMBINGA YETU > OMAPULO OO HAA PULWA LUHAPU KOMBINGA YEENDOMBWEDI DAJEHOVA.
^ par. 54 OMASHANGELO OMAFANO: Efano tali ulike Jesus e li Ohamba yetu yomeulu inaenghono ta wilike etangakwaita lovaengeli. Pombada ope na olukalwapangelo laJehova.
