Omapulo a dja kovaleshi
Ngeenge Omukriste okwa henge po omukulukadi waye netomheno lihe fi lopaMishangwa, ndele ta hombola vali umwe, eongalo oli na okutala ko ngahelipi ohombo yotete nosho yo oyo ipe?
Monghalo ya tya ngaho, ngeenge omulumenhu okwa hombolulula, eongalo oli na okutala ko ohombo yotete kutya oya xula po. Opo tu ude ko omatomheno e na sha nexulifodiladilo olo, natu ka kundafaneni eendjovo daJesus di na sha neteyohombo nosho yo okuhombolulula.
MuMateus 19:9, Jesus okwa yelifa kutya ope na ashike etomheno limwe, olo tali dulu okuningifa omunhu a teye ohombo. Okwa popya a ti: “Keshe ou ta teya ohombo nomukulukadi waye omolwoshinima shimwe shihe fi oluhaelo, ndele ta hombola umwe, ota haele.” Okutala kEendjovo daJesus, ohatu lihongo kutya (1) oluhaelo olo ashike etomheno lopaMishangwa lokuteya ohombo nonokutya (2) omulumenhu ou ta henge po omukulukadi waye netomheno lihe fi lopaMishangwa, ndele ta hombola umwe, ota haele. *
Mbela eendjovo daJesus oda hala okutya omulumenhu, oo a ya moluhaelo nokuhenga po omukulukadi waye, okwa manguluka okuhombolulula paMishangwa? Hasho naanaa. Ngeenge omushamane okwa i moluhaelo, kaume kopahombo, oo ehe na ondjo, oku na okutokola ngeenge ote mu dimine po, ile hasho. Ngeenge ine mu dimina po, ndele tava teya ohombo paveta, aveshe ova manguluka okuhombolulula, ile okuhombolululwa konima yeteyohombo.
Mepingafano naasho, kaume kopahombo, oo ehe na ondjo, otashi dulika a tokole okudimina po mukwao nokutwikila okukala mohombo. Ndele ongahelipi ngeenge omushamane okwa tokola okuteya ohombo paveta, nonande omukulukadi waye okwe mu dimina po? Molwaashi omukulukadi okwa hala oku mu dimina po nokutwikila okukala mohombo, kungaho, paMishangwa, omushamane ina manguluka okuhombolulula. Ngeenge okwa tokola okuhombola omunhu umwe, nonande ke na emanguluko lopaMishangwa la tya ngaho, kungaho ota haele vali. Ovakulunhuongalo ove na natango okuya naye momutumba wopamhangu, opo va ungaunge nenyono laye. — 1 Kor. 5:1, 2; 6:9, 10.
Ngeenge omulumenhu ke na emanguluko lokuhombolulula lopaMishangwa, eongalo oli na okutala ko ngahelipi ohombo yotete nosho yo oyo ipe? PaMbiibeli, mbela ohombo yotete oi na ashike okutalwa ko onga tai twikile? Kaume kopahombo, oo ehe na ondjo, ota dulu ngoo vali okutokola a dimine po omushamane waye mukulu, ile ehe mu dimine po? Mbela ovo ve li mohombo ipe ove na okutalika ko tava haele?
Monakudiwa, eongalo ola li la tala ko ovo ve li mohombo ipe tava haele, ofimbo kaume kopahombo, oo ehe na ondjo, e li momwenyo, ina hombolululwa noina ya moluhaelo. Ashike Jesus ka li a tumbula kaume kopahombo, oo ehe na ondjo, eshi a li ta kundafana shi na sha neteyohombo nosho yo okuhombolulula. Ponhele yaasho, omulumenhu, oo ta henge po omukulukadi waye netomheno lihe li paMishangwa, ndele ta hombolulula umwe, okwa ya moluhaelo. Monghalo ya tya ngaho, eteyohombo nosho yo okuhombolulula, oko Jesus a popya, okwa faafana nomunhu a ya moluhaelo, notaku xulifa po ohombo yotete.
“Keshe ou ta teya ohombo nomukulukadi waye omolwoshinima shimwe shihe fi oluhaelo, ndele ta hombola umwe, ota haele.” — Mat. 19:9
Ngeenge omushamane okwa henge po omukulukadi waye, ndele ta hombola umwe e lili, omukulukadi waye wotete, oo ehe na ondjo, ke na vali ehoololo lokutya ote mu dimine po, ile hasho. Nomolwaasho ke na vali okukala te lipula ngeenge ota ka dimina po omushamane waye mukulu, ile ite ke mu dimina po. Natango, kashi na nee mbudi kutya kaume kopahombo, oo ehe na ondjo, okwa fya, a hombolululwa, ile okwa ya moluhaelo, osho itashi lundulula etaleko leongalo li na sha nohombo ipe. *
Moshihopaenenwa osho twa kundafana pombada, omushamane okwa ya moluhaelo, naasho osho sha etifa eteyohombo. Ongahelipi ngeenge omushamane ina ya moluhaelo, ashike okwa henga po omukulukadi waye nokuhombolulula umwe? Ile ongahelipi ngeenge omushamane ina ya moluhaelo, fimbo inava teya ohombo, ashike okwe ke shi ninga, eshi va teya ohombo nokuhombolulula umwe, nonande omukulukadi waye okwa li a halelela oku mu dimina po? Meenghalo adishe odo, eteyohombo nosho yo okuhombolulula oya talika ko i li okuya moluhaelo, naasho otashi xulifa po ohombo ikulu. Ohombo ipe oi li paveta, noi na okutalwa ko ngaho. Oshungonangelo yOshiingilisha yo 15 Novemba 1979, epandja 32, oya popya ya ti: “Paife okwa ya mohombo ipe noita dulu vali oku i xulifa po nokushuna komukulukadi waye mukulu. Ohombo ikulu oya xula po, eshi a ya moluhaelo, a teya ohombo nokwa hombolulula.”
Eudeko letu olo la pepalekwa kali na oku tu diladilifa kutya ohombo kai fi iyapuki, ile kutya okuya moluhaelo kaku fi enyono la kwata moiti. Omulumenhu, oo ta henge po omukulukadi waye netomheno lihe fi lopaMishangwa, ndele ta hombolulula umwe, ehe na emanguluko loku shi ninga paMishangwa, oku na okuya momutumba wopamhangu ta tamanekelwa oluhaelo. (Ngeenge kaume kopahombo mupe Omukriste, naye oku na okuya momutumba wopamhangu ta tamanekelwa oluhaelo.) Nonande ovo ve li mohombo ipe kave na okutalika ko tava haele, omulumenhu, oo e li mohombo ya tya ngaho, ke na okupewa oinakuwanifwa ye likalekelwa meongalo oule womido dihapu. Oku na okuteelela fiyo osheshi ovanhu meongalo va lundulula etaleko lavo li na sha naye nokukala vali ve mu fimaneka. Ofimbo ovakulunhuongalo inave mu pa oshinakuwanifwa shasha, ove na yo okudiladila shi na sha nonghalo omo kaume kaye kopahombo mukulu e li, oo tashi dulika a kengelelwa, nosho yo ounona vanini ovo a fiya po. — Mal. 2:14-16.
Okutala koilanduliko ya kwata moiti, oyo hai etifwa keteyohombo nosho yo kokuhombolulula kuhe li paMishangwa, oshi li pandunge kOvakriste okuhopaenena Jehova mokutala ko ohombo iyapuki. — Omuud. 5:4, 5; Heb. 13:4.
^ okat. 2 Pomhito ei, omulumenhu ota popiwa oye a ya moluhaelo, ofimbo omukainhu ehe na ondjo. Ashike metwokumwe naMarkus 10:11, 12, Jesus okwe shi yelifa nawa kutya omayele aye, e na sha noshinima osho, otaa longo kovakainhu nokovalumenhu.
^ okat. 1 Osho osha lundulula eudeko letu likulu, olo kutya ofimbo kaume kopahombo, oo ehe na ondjo, e li momwenyo, ina hombolululwa, ile ina ya moluhaelo, ovo ve li mohombo ya tya ngaho otava haele.
