Oshinagoga osha totwa po ngahelipi?

OSHITYA “oshinagoga” osha dja koshitya shOshigreka osho tashi ti “okwoongala pamwe.” Edina olo otali wapalele molwaashi okudja pefimbo lonale ovanhu muJuda ova kala hava ongala moinagoga opo va hongwe nova longele Kalunga kavo. Omishangwa dOshiheberi inadi yandja ouyelele u na sha noinagoga, ndele osha yela kutya eenhele da tya ngaho oda hangwa nale hadi longifwa eshi Omishangwa dopaKriste dOshigreka da ka shangwa.

Ovahongwanhu vahapu ova itavela kutya oinagoga oya hovela eshi Ovajuda va li moukwatwa waBabilon. O-Encyclopaedia Judaica oya yelifa ya ti: “Eenghwate, nonande kada li di na otembeli eshi da li moukwatwa, oda li di udite kutya oda pumbwa okuhekelekafana pefimbo olo loudjuu, okwoongala omafimbo nomafimbo, unene tuu mEshabata, nokulesha Omishangwa.” Eshi Ovajuda va mangululwa moukwatwa, osha yela kutya ova li va twikila okwoongala opo va ilikane nova leshe Omishangwa nokutota po oinagoga meenhele omo va ka tula.

Mefelemudo lotete O.P., oinagoga oya kala tai dana onghandangala melongelokalunga lOshijuda nomoipambele ikwao yonghalamwenyo kOvajuda ovo va li momukulambo wEfuta loPokati, moitukulwa yokOushilo wopOkati nosho yo muIsrael sho vene. Omushiivinawa wokounivesiti yOshiheberi muJerusalem, Lee Levine, okwa ti: “[Oinagoga] oya kala eenhele dokulihongela, doivilo iyapuki, deemhangulilo, dokufutila oifendela nosho yo yokuningila oyoongalele yopolotika, ile yakwalukeshe.” Okwa weda ko a ti: “Ashike okuningila mo oinima yopalongelokalunga osho unene sha li sha fimana.” Onghee itashi kumwifa eshi Jesus a li ha i moinagoga. (Mark. 1:21; 6:2; Luk. 4:16) Jesus okwa li a honga, a wilika nokwa twa omukumo ovo va li have uya koinagoga. Omuyapostoli Paulus naye okwa kala ha udifile luhapu moinagoga konima eshi pa totwa eongalo lopaKriste. Ovo va li ve na ohokwe mEendjovo daKalunga ova li hava i koshinagoga, onghee Paulus ngeenge ta i moshilando, oha i tete koshinagoga a ka udife. — Oil. 17:1, 2; 18:4.