1-2. Ongahelipi eendjovo daJehova odo di li muJesaja 65:16, 17, tadi tu ladipike tuha sholole?

OSHOONGALELE shoshitukulwa shomo 2017 osha li shi na oshipalanyole shihokwifa, “Ino sholola.” Oshoongalele osho osha li she tu ulikila nghee hatu dulu okulididimikila omayeleko. Paife opa pita omido nhee okudja poshoongalele osho, ashike natango ohatu lididimikile onghalelo yoinima younyuni ou.

² Omaupyakadi elipi wa li to ungaunga nao efimbo opo la di ko? Mbela efyo lomupambele, ile lakaume koye? Omukifi wa kwata moiti? Omaupyakadi oo haa etifwa koukulupe? Oiponga yopaushitwe, ominyonena, ile omahepeko? Ile oto mono oixuna omolwomukifi, ngaashi o-COVID-19? Otwa teelela nodjuulufi eshi fikulimwe omaupyakadi oo taa ka xulifwa po, hatu ke a dimbwa noitaa ka holoka vali. — Lesha Jesaja 65:16, 17.

3. Oshike tu na okuninga paife, nomolwashike?

³ Onghalamwenyo mounyuni ou oya djuupala neenghono. Otashi dulika nokuli tu ka hangike komaudjuu a kwata moiti monakwiiwa. (Mat. 24:21) Onghee hano, otwa pumbwa okutwikila okupameka elididimiko letu. Omolwashike mbela? Omolwaashi Jesus okwa ti: “Ngeenge omwe lididimike, otamu ke lixupifila eemwenyo deni.” (Luk. 21:19) Ngeenge otwa diladila kunghee vamwe have lididimikile omayeleko nomupondo a fa oo twa taalela, otashi ke kwafela yo tu lididimike.

4. Omolwashike hatu dulu okutya Jehova oku li oshihopaenenwa dingi shelididimiko?

⁴ Olyelye e li oshihopaenenwa dingi shelididimiko? OJehova  Kalunga. Mbela enyamukulo olo ole ku kumwifa? Otashi dulika le ku kumwifa. Ashike ngeenge owe li diladila moule, ito ka kala wa kumwa. Ounyuni ou otau pangelwa kOndiaboli nomu yadi omaupyakadi. Jehova oku na eenghono doku u xulifa po, ndele okwa teelela efiku la nunwa loku shi ninga. (Rom. 9:22) Ofimbo a teelela, Kalunga ketu ota twikile nokulididimika fiyo efimbo olo la fika. Natu ka kundafaneni oinima i li omuwoi, oyo Jehova te lididimikile.

5. Ongahelipi edina laKalunga la kala nokushekwa, nou shi uditile ngahelipi?

⁵ Okushekwa kwedina laye. Jehova oku hole edina laye nokwa hala keshe umwe a kale e li fimaneka. (Jes. 42:8) Ashike edina laye ola kala nokushekwa oule womido 6 000. (Eps. 74:10, 18, 23) Osho osha li sha hovela moshikunino shaEden, eshi Ondiaboli (osho sha hala okutya “Omunaipupulu”) ya li ya lundila Kalunga kutya okwa kelela Adam naEva oshinima shonhumba osho va li va pumbwa, opo va kale va hafa. (Gen. 3:1-5) Okudja opo, Jehova okwa kala ta lundilwa kutya okwa kelela filufilu ovanhu osho va pumbwa. Jesus okwa kala te lipula shi na sha nomalundilo, oo a kala taa ningilwa edina laXe. Omolwetomheno olo, okwa honga ovahongwa vaye va ilikane ngaha: “Tate yetu ou u li meulu, edina loye nali yapulwe.” — Mat. 6:9.

6. Omolwashike Jehova a efa pa pite efimbo lihapu, ofimbo ina kandula po omhata i na sha nounamapangelo waye?

⁶ Omapataneko e na sha nounamapangelo waye. Jehova oku na filufilu oufemba wokupangela eulu nedu, nonghedi yaye yokupangela oya denga mbada. (Eh. 4:11) Ashike Ondiaboli oya kendabala okupukifa ovaengeli nosho yo ovanhu moku va diladilifa kutya Kalunga ke na oufemba wa tya ngaho. Otashi pula efimbo, opo Jehova a ulike kutya oku na oufemba wokupangela, noku li omupangeli a denga mbada. Kalunga okwa efa ovanhu ve lipangele, opo va mone kutya ngeenge otave lipangele vo vene va manguluka ko kOmushiti wavo, itava pondola nandenande. (Jer. 10:23) Omolwelididimiko laKalunga, omhata ya tya ngaho otai ka kandulwa po lumwe nofiyo alushe. Ota ka tumbalekwa eshi ta ka ulika kutya Ouhamba waye, oo auke tau ka eta ombili yashili nosho yo eameno kombada yedu.

7. Oolyelye va tukulila Jehova ounashibofa, note ke va ningila shike?

⁷ Ounashibofa wavamwe vomoludalo laye. Jehova okwa shita ovana vaye vopamhepo nosho yo vopambelela va wanenena. Ndele omonamati waye umwe wopamhepo omunashibofa, Satana (osho sha hala okutya “Omupataneki”) okwa li a amuna ko kuJehova ovanhu va wanenena, Adam naEva, nove mu tukululila oshibofa ngaashi ye. Ovaengeli vamwe nosho yo ovanhu ova li va waimina mounashibofa oo. (Jud. 6) Lwanima, nokuli noshiwana shaIsrael, osho sha li sha hoololwa kuKalunga, osha li she mu liteeka po nokulongela oikalunga. (Jes. 63:8, 10) Jehova okwa li e udite a endwa medu. Okwa kala nokulididimika nota twikile okuninga ngaho fiyo osheshi efimbo laye lokuhanauna po ovanashibofa aveshe la fika. Osho otashi ka etela ovapiya vaye ovadiinini epepelelo, ovo va kala tave lididimikile pamwe naye oukolokoshi mounyuni ou.

8-9. Jehova okwa li a lundilwa ngahelipi, nohatu kala tu udite ngahelipi shi na sha nomalundilo oo?

⁸ Omalundilo akeshe fiku Ondiaboli. Satana okwa li a lundila omupiya omudiinini waJehova, Job nosho yo ovapiya vaYe aveshe ovadiinini kutya ohava longele ashike Kalunga omolwokulihola mwene. (Job 1:8-11; 2:3-5) Ondiaboli otai twikile okulundila ovanhu fiyo okunena. (Eh. 12:10) Ohatu dulu okuulika kutya omalundilo aSatana kae fi ashili mokulididimikila omayeleko nokukala ovadiinini kuJehova, hatu linyengifwa kohole yoku mu hola. Ngaashi Job, nafye ohatu ka nangekwa noupuna omolwelididimiko letu. — Jak. 5:11.

 ⁹ Satana oha longifa ovawiliki vomalongelokalunga oipupulu va popye kutya Jehova omukwanyanya noye ha etele ovanhu okumona oixuna. Vamwe ohava ti nokuli kutya ngeenge ounona va fi, Kalunga oye e va kufa po, molwaashi okwa pumbwa ovaengeli vahapu meulu. Oyo kai fi tuu odino lelalela! Otu shii kutya Jehova oku li Tate omunahole. Ngeenge twa kwatwa komukifi wa kwata moiti, ile twa filwa umwe oo tu hole, katu na okupa Kalunga ombedi nandenande. Ponhele yaasho, otu na eitavelo kutya efiku limwe lomomafiku ota ka velula ovanaudu nota ka nyumuna ovafi. Ohatu dulu okulombwela keshe oo ta pwilikine kutya Jehova oKalunga omunahole. Kungaho, Kalunga ota ka nyamukula oo te mu lundile. — Omayel. 27:11.

10. Epsalme 22:23, 24 ola popya shike kombinga yaJehova?

¹⁰ Okumona oixuna kwovapiya vaye ve na ondilo. Jehova oku li Kalunga omunanghenda. Oha kala a nyemata neenghono, ngeenge te tu tale hatu mono oixuna, tashi dulika ya etifwa komahepeko, komikifi, ile kokuhawanenena kwetu. (Lesha Epsalme 22:23, 24.) Jehova oku shii ouyahame wetu. Okwa hala oku u xulifa po, note ke shi ninga. (Yelekanifa naExodus 3:7, 8; Jesaja 63:9.) Efiku otali ke uya, eshi ta ka “feta po omahodi aeshe momesho [etu], nefyo itali ka kala po vali, ile oluhodi, okulila nouyahame itau ka kala po vali.” — Eh. 21:4.

11. Jehova oku uditile ngahelipi ovapiya vaye ovadiinini ovo va fya?

¹¹ Ke na vali ekwatafano nookaume kaye ovo va fya. Jehova oku uditile ngahelipi ovalumenhu novakainhu ovadiinini ovo va fya? Okwa djuulukwa oku va mona natango. (Job 14:15) Diladila ashike nghee Jehova a halelela okumona vali kaume kaye Abraham! (Jak. 2:23) Ile nghee e uditile Moses, oo a li a popya naye ‘oshipala noshipala.’ (Ex. 33:11) Okwa teelela nodjuulufi oku ka uda David nosho yo ovashangi vomapsalme vakwao tava imbi omaimbilo a tunhula  ehambelelo. (Eps. 104:33) Nonande ookaume kaKalunga ovo ova fya, Jehova ine va dimbwa. (Jes. 49:15) Ota dimbuluka ashishe shi na sha nomaukwatya avo. Ombiibeli oya ti: “Okwe va tala ko ve na omwenyo.” (Luk. 20:38) Fikulimwe, ote ke va nyumuna nota ka uda omailikano avo taa di komutima nokutambula ko onghedi yavo yoku mu longela. Ngeenge owa filwa umwe oo u hole, eendjovo odo otadi dulu oku ku hekeleka.

12. Oshike unene hashi nyemateke Jehova momafiku aa madjuu axuuninwa?

¹² Ovanhu ovakolokoshi ovo hava ehameke vakwao. Eshi ounashibofa wa hovela muEden, Jehova okwa li e shii kutya eenghalo otadi ka enda nokunaipala, ofimbo inadi xwepopala. Jehova oku tonde oukolokoshi, okuhenouyuki nosho yo elongifo leenghono, olo li li mounyuni kunena. Oha udile alushe olukeno ovo itava dulu okulikwafela, ngaashi ovanghundi, eefiye nosho ovafiyekadi. (Sak. 7:9, 10) Jehova oha kala unene e udite nai, ngeenge e wete ovapiya vaye ovadiinini tava fininikwa nokutulwa modolongo. Shilipalekwa kutya oku hole aveshe ovo tave lididimike pamwe naye.

13. Elihumbato inali koshoka lilipi Kalunga e wete movanhu, nota ka ninga po shike shi na sha nalo?

¹³ Ovanhu ova duvila neenghono omilele. Ovanhu ova shitwa oshifeka shaKalunga, ashike Satana ohe va nwefa mo va longe oilonga inai koshoka. Eshi Kalunga “a mona owii wovanhu kombada yedu wa li uhapu” pefimbo laNoa, ‘okwe lialuluka eshi a ninga omunhu kombada yedu, ndele Ye ta ehama momutima waye.’ (Gen. 6:5, 6, 11) Mbela okudja opo eenghalo oda xwepopala? Hasho nandenande. Ondiaboli ihai kala tuu ya hafa, ngeenge tai tale ovanhu va duvila omilele domaludi aeshe, mwa kwatelwa oilonga inai koshoka pokati kovanhu voukashike kookanhu wa faafana, ile wa yoolokafana! (Ef. 4:18, 19) Satana oha kala unene a hafa, ngeenge ta ningifa ovanhu, ovo ve li melongelokalunga lashili, va ye momanyono a tya ngaho a kwata moiti. Ngeenge efimbo laJehova lokulididimika ola pu ko, ota ka ulika kutya ina hokwa elihumbato la nyata la tya ngaho.

14. Oshike osho ovanhu tava ningile edu nosho yo oinamwenyo?

¹⁴ Okunyonwa kweshito laye. ‘Omunhu ita pangelele ashike mukwao omupya,’ ndele oha nyono yo edu noha ungaunga nonyanya noinamwenyo, oyo ya shitwa kuJehova nokwe i lineekelela ovanhu ve i file oshisho. (Omuud. 8:9; Gen. 1:28) Ovanongononi vamwe ova popya kutya omolweenghatu dovanhu, omaludi oinamwenyo nosho yo omiti emiliyona limwe itaa ka kala po vali momido dinini tadi ke uya. Nomolwaasho ovanhu hava popi kutya eshito oli li monghuwo i nonghambe. Shihafifa, Jehova okwa udaneka kutya ‘ota ka hanauna po ovo tava nyono edu’ noku li ninga oparadisa. — Eh. 11:18; Jes. 35:1.   

15-16. Oshike shi na oku tu linyengifa tu lididimike pamwe naJehova? Shi faneka.

¹⁵ Diladila ashike shi na sha nomaupyakadi aeshe a nyemateka, oo Tate yetu womeulu a kala nokulididimikila oule womido omayovi. (Tala oshimhungu “ Osho Jehova te lididimikile.”) Jehova okwa li ta dulu okuxulifa po ounyuni ou woukolokoshi efimbo keshe. Ashike elididimiko laye ole tu kwafela neenghono. Ohatu dulu oku shi faneka ngaha. Natu tye nee ngeno omushamane nomukulukadi waye ova lombwelwa kutya okaana kavo oko inaka dalwa oke na oupyakadi wopalutu wa kwata moiti. Okaana oko itaka ka kala nonghalamwenyo i li nawa notaka ka fya fimbo kanini. Ashike ovadali va tya ngaho, otava ka kala va hafa shimha okaana ka dalwa, nonande otashi ka kala shidjuu oku ka fila oshisho. Ohole yokuhola okaana kavo otai ke ve linyengifa, opo va dule okulididimikila oudjuu keshe ve ka file oshisho ngaashi tava dulu.

 ¹⁶ Sha faafana, oludalo alishe laAdam naEva inali wanenena eshi la dalwa. Ashike nande ongaho, Jehova oku li hole nohe li file oshisho. (1 Joh. 4:19) Mepingafano novadali ovo va popiwa mefaneko letu, Jehova ota ka xulifa po okumona oixuna kwoludalo laye. Okwa tula po efimbo e shi ta ka xulifa po okumona oixuna akushe kwovanhu. (Mat. 24:36) Ohole yaJehova otai dulu oku tu linyengifa tu lididimike ngaashi tashi dulika.

17. Ongahelipi eendjovo odo da popya shi na sha naJesus, odo di li mOvaheberi 12:2, 3, tadi tu ladipike tu twikile okulididimika?

¹⁷ Jehova okwa tula po oshihopaenenwa shiwa shi na sha nelididimiko. Jesus okwa pondola mokuhopaenena elididimiko laXe. Eshi a li kombada yedu, Jesus okwa li e lididimikila eendjovo dikukutu, omasheko nosho yo ouyehame komuti womahepeko omolwetu. (Lesha Ovaheberi 12:2, 3.) Oshihopaenenwa shaJehova shelididimiko osha li sha pa Jesus eenghono, opo e lididimike. Nafye otashi dulu yo oku tu pameka.

18. Ongahelipi 2 Petrus 3:9, te tu kwafele tu ude ko osho sha ningwa po omolwelididimiko laJehova?

¹⁸ Lesha 2 Petrus 3:9. Jehova oku shii efimbo la wapala lokuxulifa po ounyuni ou woukolokoshi. Omolwelididimiko laye, ovanhu vahapu ova dula oku mu shiiva, nongudu inene yovanhu omamiliyona paife otai mu longele noku mu tanga. Aveshe ova hafa, eshi Jehova e lididimika efimbo lile opo va dalwe, ve lihonge okukala ve mu hole noku mu liyapulila. Ohatu ka mona ouwa melididimiko laJehova e shi ta ka pa nehafo ovanhu omamiliyona ondjabi, ovo ve lididimika fiyo okexulilo.

19. Otu na okukala twa tokola toko okuninga shike, nohatu ka pewa ondjabi yashike?

¹⁹ Otwe lihonga kuJehova nghee hatu dulu okulididimika nehafo. Nonande Satana okwa etifa po oluhodi nokumona oixuna kuhapu, Jehova oha kala “alushe a hafa.” (1 Tim. 1:11) Nafye ohatu dulu okukala twa hafa, ofimbo twa teelela nelididimiko Jehova a yapulife edina laye, a tumbalekife ounamapangelo waye nokuxulifa po owii nomaupyakadi aeshe, oo e li ko kunena. Natu kale twa tokola toko okulididimika nokuhekelekwa mokukala tu shii kutya Tate yetu womeulu naye ote lididimike. Ngeenge otwa ningi ngaho, keshe umwe womufye ota ka wanifilwa eendjovo odo tadi ti: “Ou te lididimikile eyeleko ota kala a hafa, osheshi ngeenge okwa kala a hokiwa kuJehova, ota ka pewa ondjabi yomwenyo oo Kalunga a udanekela ovo tava twikile okukala ve mu hole.” — Jak. 1:12.