Jehova okwa hala ovanhu vavali, ovo va hombola, va kale va hafa nova hafele ekwatafano tali kalelele nolopofingo. (Mat. 19:4-6) Ngeenge owa hala okuya mohombo, ongahelipi to dulu okumona kaume kopahombo ta wapalele? Molwaashi Jehova oye Omushiti, oku shii kutya oshike twa pumbwa okuninga, opo eendelafano nosho yo ohombo yetu i pondole. Onghee hano, ngeenge owa tula moilonga omafinamhango oo e tu pa, oto ka mona oidjemo iwa. Natu ka taleni komafinamhango amwe omuo.

Tete, otwa pumbwa okuuda ko kutya: “Omutima woovene ou nomakoto u dule ashishe nowa nyonauka.” (Jer. 17:9) Ngeenge ovanhu vavali, ovo va hala okuhombola, ova shakene, ndele tava hovele okweendelafana, ohava kulike diva ekwatafano lomoule. Osho ohashi shi ningifa shidjuu kuvo okukatuka pandunge. Ngeenge ovanhu ova tokola okuhombola va kanghamena ashike komaliudo oo, lwanima ohashi ke va nyemateka. (Omayel. 28:26) Nomolwaasho shihe li pandunge kovanhu vavali okuulikilafana omaliudo omoule, ile okuliudanekela sha, ofimbo inave lishiiva nawanawa.

Omayeletumbulo 22:3 okwa ti: “Omunaendunge ota tale oshiponga ndele ta hondama, ndelenee ovashima tava ehene ko ndele tava hangika koshiponga.” Omolwashike tashi dulu okukala sha nyika oshiponga okukonga kaume kopahombo komapandja okointaneta? Shinyikifa oluhodi, vamwe ova shakena kointaneta novanhu ovo vehe shii, va hovela okweendelafana navo, nolwanima ova ka didilika kutya ovanhu va tya ngaho ove va kengelela ashike. Natango, ovanhu ovo vehe shii ovalineekelwa ohava toto po omapandja oipupulu kointaneta nokweenda medu ovo vehe na ondjo, opo va vake po oimaliwa yavo. Omafimbo amwe, ovanhu ovo ve kwetele komesho oilonga ya tya ngaho youlingilingi, ohave liti kutya ove li Eendombwedi.

Natu ka taleni vali koshinima shimwe sha nyika oshiponga. Omapandja amwe okointaneta e na sha nokukonga ookaume kopahombo, ohaa longifa omwaalu, ile eenomola, odo hadi ufa kutya omunhu wonhumba ota dulu okweendelafana nalyelye, ile ota wapalele lyelye. Ashike nande ongaho, kape na oumbangi, oo tau ulike kutya eenghedi odo ohadi pondola shili. Mbela otashi ka kala ngoo shi li pandunge okutula elineekelo moshinima osho sha totwa po kovanhu shi ku ningile ko etokolo la fimana, ngaashi ohombo? Eeprograma dokombiyuta itadi dulu nandenande okuyelekanifwa nomafinamhango Ombiibeli. — Omayel. 1:7; 3:5-7.

Efinamhango olo tali hangwa mOmayeletumbulo 14:15 otali ti: “Omushima ta itavele ondjovo keshe, ndelenee omunamayele ta diinine eenghatu daye.” Ofimbo ino fika pexulifodiladilo kutya omunhu wonhumba  ota dulu okuninga kaume kopahombo muwa, tete owa pumbwa oku mu shiiva nawa. Ndele okushakena ashike nomunhu kointaneta, itashi ke ku kwafela u mu shiive nawa. Nonande ohamu ulikilafana omauyelele nohamu popi efimbo lile okupitila kointaneta, mbela osho osha hala okutya ou shii omunhu oo nawanawa? Vamwe ovo va li tava diladila kutya ova mona ookaume kashili, lwanima oshe ke va kumwifa eshi va ka shakena novanhu ovo komudidi.

Omupsalme okwa ti: “Ame ihandi kala omutumba pamwe neembudi, noinandi endafana naava ve na koshi.” (Eps. 26:4) Ovanhu vahapu ohava diladila kutya osha tambulwa ko apeshe okupopya oipupulu komapandja avo okointaneta e na sha nokweendelafana, opo va kale va hokiwa kuvahapu. Otashi dulika va holeke omaukwatya avo mai, ile vehe a ulike, ngeenge tava kwatafana navamwe kointaneta. Nonande vamwe otashi dulika ve litye kutya vo Eendombwedi daJehova, mbela ove li ngoo Ovakriste va ninginifwa? Ova pyokoka ngoo pamhepo? Ove na ngoo ekwatafano lopofingo naJehova? Ove na ngoo edina liwa komaongalo avo? Ile ove li oshihopaenenwa shii, ile “ookaume vai”? (1 Kor. 15:33; 2 Tim. 2:20, 21) Mbela ova wana ngoo okuya mohombo she likolelela komafinamhango Ombiibeli? Owa pumbwa okushiiva omanyamukulo omapulo oo, ashike kashipu oku a mona nopehe na ekwafo lEendombwedi, odo di shii nawanawa omunhu oo. (Omayel. 15:22) Oshoshili kutya omupiya waJehova omudiinini, ita ka hala okuhumbata “ondjoko imwe” pamwe nomunhu oo ehe fi Ondombwedi. — 2 Kor. 6:14; 1 Kor. 7:39.

Molwaashi osha nyika oshiponga okulongifa omapandja okointaneta e na sha nokweendelafana, ope na eenghedi di li xwepo dokukonga kaume kopahombo. Osho otashi ke mu kwafela mu kulike ekwatafano lomoule nomu kale nohombo i shii okufimanekwa. Opeemhito dilipi to dulu okushakeneka oo wa hala a ninge kaume kopahombo muwa? Ngeenge okwoongala moipafi okwa pitikwa, Eendombwedi daJehova otadi dulu okushiivafana komudidi pokwoongala, poyoongalele inini naayo ya kula nosho yo pouvilo.

Ngeenge okwoongala meengudu okwa kalekwa, ngaashi pefimbo eli lomukifi wekomba wo-COVID-19, ohatu longifa oikwaelektronika tu kale pokwoongala kweongalo, opo hatu mono omhito yokushiiva Eendombwedi dikwetu, odo inadi ya mohombo. Oto ka mona nghee tava yelifa eitavelo lavo, eshi tava kufa ombinga pokwoongala okupitila moipopiwa nosho yo momatyekosha. (1 Tim. 6:11, 12) Oto dulu yo okuhafela eenghundafana konima yokwoongala. Okupitila mouvilo ovo hava ningwa kEendombwedi paelektronika, oto dulu okumona nghee omunhu oo wa hala okweendelafana naye ta ungaunga navakwao, naasho otashi ka holola omaukwatya aye ashili. (1 Pet. 3:4) Mokweendela ko kwefimbo, oto ka shiiva nawa omunhu oo. Opo nee otamu ka tokola, ngeenge omalalakano eni naasho mwa lenga otashi tu kumwe nokutala ngeenge amushe vavali otamu ka kala ovalihomboli vawa.

Ngeenge omunhu oo ina ya mohombo okwa kongo kaume kopahombo ta wilikwa komafinamhango Ombiibeli, kungaho otava ka kala va hafa mohombo, ngaashi ashike Omayeletumbulo a ti: “Ou a mona omwalikadi, [ile omushamane] ye a mona elao, ndele a mona ohokwe yOmwene.” — Omayel. 18:22.