1. Ovamwameme ohava yambidida ngahelipi ehangano, nomashongo elipi vahapu va taalela? (Tala efano kombada yoshifo.)

INATU hafa tuu eshi tu na ovamwameme vahapu tava longo noudiinini meongalo letu! Pashihopaenenwa, ohava kufa ombinga pokwoongala nosho yo moilonga yokuudifa. Vamwe ohava kwafele mokukaleka po Olupale lOuhamba monghalo iwa nohava ulike kutya ove na ko nasha nOvakriste vakwao. Ndele nande ongaho, ova taalela omashongo. Vamwe otava file oshisho ovadali vavo ovanamido. Vamwe otave lididimikile omafininiko okudja kovapambele. Vamwe ove li ovadali tava tekula ounona ovo aveke, nohava longo noudiinini opo ve va file oshisho.

2. Omolwashike twa pumbwa okukala hatu yambidida ovamwameme?

² Omolwashike twa pumbwa okukala hatu yambidida ovamwameme? Omolwaashi mounyuni ovakainhu ihava ungaungiwa navo nefimaneko. Shikwao vali, Ombiibeli oye tu ladipika tu va yambidide. Pashihopaenenwa, omuyapostoli Paulus okwa lombwela eongalo lokuRoma li tambule ko nohamu omumwameme Foibe noli mu “kwafele mukeshe osho a pumbwa.” (Rom. 16:1, 2) Eshi Paulus a li Omufarisai okwa li mongudu oyo ya li ya dina ovakainhu noihai ungaunga navo nefimaneko. Ashike, eshi a ninga Omukriste, okwa shikula oshihopaenenwa shaJesus mokukala ha ungaunga novakainhu nefimaneko nononghenda. — 1 Kor. 11:1.

3. Jesus okwa li ha ungaunga ngahelipi novakainhu, nokwa li a tala ko ngahelipi ovakainhu ovo va li hava longo ehalo laKalunga?

³ Jesus okwa li ha ungaunga novakainhu aveshe nefimaneko. (Joh. 4:27) Ka li ha ungaunga navo ngaashi ovawiliki vomalongelokalunga Oshijuda vopefimbo laye. Embo limwe lomauyelele Ombiibeli ola ti: “Jesus ka li a popya sha osho tashi ulike kutya ka li a fimaneka ovakainhu.” Jesus okwa li a fimaneka unene ovakainhu ovo va li hava longo ehalo laXe. Shikwao vali, okwa li e va tala  ko ve li ovamwainakadona nokwe va tumbula pamwe novalumenhu ovo ve li oshitukulwa shoukwaneumbo waXe. — Mat. 12:50.

4. Oshike hatu ka kundafana moshitukulwa eshi?

⁴ Jesus okwa li ha kala e lilongekida okukwafela ovakainhu ovo hava longele Kalunga. Okwa li e va lenga neenghono nokwa li he va popile. Natu ka taleni nghee hatu dulu okuhopaenena Jesus mokuulika kutya otu na ko nasha novamwameme.

5. Omolwashike ovamwameme vamwe hava mono shidjuu okukala peendafano tali tungu?

⁵ Atusheni, kutya nee ovamwatate ile ovamwameme, otwa pumbwa eendafano liwa. Ndele omafimbo amwe, otashi dulika ovamwameme va mone shidjuu okukala peendafano la tya ngaho. Omolwashike mbela? Natu ka taleni komaetepo taa shikula. Omumwameme umwe wedina Jordan * okwa ti, “Molwaashi inandi hombolwa, luhapu ohashi kala shidjuu okumona onghandangala oyo handi dana meongalo, nohandi kala ndi udite ndihe li oshitukulwa shalo.” Kristen, omukokolindjila, oo a tembukila koshitukulwa shimwe, opo a ka tamunune mo oukalele waye, okwa ti: “Ngeenge opo wa tembukile meongalo lipe, oho kala u udite owike.” Ovamwatate vamwe navo otashi dulika va kale ve udite ngaho. Vamwe ovo hava di moukwaneumbo wa tukauka palongelokalunga ohava kala ve udite va tongolwa ko koukwaneumbo wavo, nohava kala ve udite va tukuka ko keongalo. Vamwe ohava kala ve udite owike, molwaashi tava ehama ile tava file oshisho oilyo youkwaneumbo wavo oyo tai vele. Annette okwa ti, “Kanda li handi dulu okuya kouvilo, molwaashi aame unene nda li handi file oshisho meme.”

6. Ngaashi sha popiwa muLukas 10:38-42, ongahelipi Jesus a kwafela Marta naMaria?

⁶ Jesus okwa li ha kongo efimbo opo a kale novakainhu, nokwa li kaume kavo kashili. Diladila koukaume wopofingo oo a li a panga naMaria nosho yo Marta, ovakainhu ovo va li inava hombolwa. (Lesha Lukas 10:38-42.) Jesus okwa li e va ningifa va kale va manguluka okupitila meendjovo nomeenghatu daye. Maria okwa li a manguluka okukala peemhadi daJesus e li omuhongwa. * Marta naye okwa li a manguluka okulombwela Jesus, eshi Maria a li ite mu kwafele nokuviyauka. Pokavilo oko, Jesus okwa li a kwafela ovakainhu ovo vavali ve lihonge oshilihongomwa sha fimana. Eshi a kala he va talele po peemhito da yoolokafana, okwa li e va ulikila kutya oku na ko nasha navo nosho yo omumwaina Lasarus. (Joh. 12:1-3) Nopehe na omalimbililo, eshi Lasarus a li ta ehamenene, Maria naMarta ova li va ka konga ekwafo kuJesus. — Joh. 11:3, 5.

7. Omonghedi imwe ilipi hatu dulu okutwa omukumo ovamwameme?

⁷ Ovamwameme vamwe ohava mono kutya okwoongala oku li omhito iwa yokweendafana nOvakriste vakwao. Onghee hano, otwa hala okukala hatu longifa eemhito da tya ngaho tu va hambelele, hatu popi navo, noku va ulikila kutya otu na ko nasha navo. Jordan, oo a popiwa metetekelo, okwa ti: “Ohashi tunge omukumo ngeenge vamwe tava pandula nge omolwomatyekosha oo nda yandja pokwoongala, tava ningi elongekido tu ka longe pamwe moukalele, nokuulikila nge kutya ove na ko nasha naame meenghedi vali dimwe.” Natu kaleni hatu lombwele ovamwameme kutya ova fimana kufye. Kia okwa ti: “Ngeenge inandi uya kokwoongala, ovamwatate ohava tumine nge omatumwalaka tava pula nge ngeenge onda lele po tuu nawa. Osho ohashi ulikile nge kutya ovamwatate novamwameme ove na ko nasha naame.”

8. Omeenghedi dimwe vali dilipi hatu dulu okuhopaenena Jesus?

 ⁸ Ngaashi Jesus, nafye otwa pumbwa okukonga efimbo tu kale hatu endafana novamwameme. Pashihopaenenwa, ohatu dulu oku va shiva ve uye va lye pamwe nafye ile tu ye navo komalihafifo onhumba. Eenghundafana detu nadi kale alushe tadi tungu ngeenge tu li peemhito da tya ngaho. (Rom. 1:11, 12) Ovakulunhuongalo ova pumbwa alushe okukaleka momadiladilo oikala yaJesus. Okwa li e shii kutya oshi li eshongo kuvamwe okukala inava ya mohombo, ashike okwa li e shi yelifa nawa kutya ohombo, ile okukala nounona hasho hashi etele omunhu ehafo tali kalelele. (Luk. 11:27, 28) Ponhele yaasho, ohatu ka mona ehafo tali kalelele ngeenge otwa kala twa pitifa komesho okulongela Jehova. — Mat. 19:12.

9. Oshike ovakulunhuongalo tava dulu okuninga po opo va kwafele ovamwameme?

⁹ Ovakulunhuongalo ovo unene va pumbwa okuungaunga novakainhu Ovakriste ngaashi ovamwainakadona nooina. (1 Tim. 5:1, 2) Ovakulunhuongalo ova pumbwa okulitulila po efimbo va kale hava popi novamwameme ofimbo okwoongala inaku hovela nosho yo konima yako. Kristen okwa ti: “Omukulunhuongalo umwe okwa li a mona kutya onde lipyakidila neenghono, nokwa li a hala okuuda kutya onde lipyakidila nashike. Onda li nda hafa molwaashi onda mona kutya oku na ko nasha naame.” Ngeenge ovakulunhuongalo ohava kongo efimbo lokupopya  novamwameme, kungaho otava ulika kutya ove na ko nasha navo. * Annette, oo a tumbulwa pehovelo, okwa mona ouwa eshi ha popi novakulunhuongalo pandjikilile. Okwa ti: “Osho osha kwafela nge ndi va shiive nawa, navo ova dula yo okushiiva nge nawa. Ngeenge nda taalela omaudjuu, ohandi kala nda manguluka oku ka popya navo va kwafele nge.”

10. Oshike tashi ka kwafela ovamwameme va kale va hafa?

¹⁰ Atusheni, kutya nee ovalumenhu ile ovakainhu, ohatu kala twa hafa ngeenge otwa mono kutya vamwe ove wete oilonga oyo hatu longo noku tu pandula. Mepingafano naasho, ohashi tu teya omukumo ngeenge ovanhu ihave tu pandula omolwoilonga oyo twa longa. Omukokolindjila ina hombolwa wedina Abigail okwa popya kutya omafimbo amwe ovanhu ihava didilike oilonga yomunhu. Okwa ti: “Ovanhu kave shii nge pauhandimwe, ove shii ashike ovamwaina vange nosho yo ovadali vange. Omafimbo amwe, osho ohashi ningifa nge ndi kale ndi udite ndihe na oshilonga.” Didilika osho omumwameme umwe wedina Pam a popya. Okwa kala ta longo oule womido dihapu e li omutumwa ina hombolwa. Lwanima, okwa ka shuna keumbo opo a ka file oshisho ovadali vaye. Paife oku na omido 70 nasha, nota longo e li omukokolindjila. Pam okwa ti: “Osho sha kwafela nge unene, ongeenge ovanhu tava pandula nge omolwoilonga oyo nda longa.”

11. Jesus okwa ulika ngahelipi kutya okwa lenga ovakainhu ovo va li ve mu waimina moukalele?

¹¹ Jesus okwa li a lenga neenghono ekwafo olo a li ha pewa kovakainhu ovatilikalunga, ovo va li hava “longifa oiniwe yavo” opo ve mu kwafele. (Luk. 8:1-3) Ka li ashike e va pa oshinakuwanifwa, ndele okwa li yo e va hololela oshili yomoule yopamhepo. Pashihopaenenwa, okwa li e va lombwela kutya ota ka fya nota ka nyumunwa. (Luk. 24:5-8) Ngaashi ovayapostoli, okwa li a longekida ovakainhu ovo omolwomayeleko oo va li tava ka shakeneka. (Mark. 9:30-32; 10:32-34) Nonande ovayapostoli ova li va fiya po Jesus eshi a mangwa po, ovakainhu vamwe ova li tave mu yambidida eshi va kala va ehena popepi eshi a li ta valelwa komuti womahepeko. — Mat. 26:56; Mark. 15:40, 41.

12. Jesus okwa li e lineekelela ovakainhu oshilonga shilipi?

¹² Jesus okwa li e lineekelela ovakainhu oshilonga sha fimana. Pashihopaenenwa, ovakainhu ovatilikalunga ovo votete va li va mona kutya Jesus okwa nyumuka. Jesus okwa li a tuma ovakainhu ovo va ka lombwele ovayapostoli kutya okwa nyumuka koufi. (Mat. 28:5, 9, 10) Ngeenge ovakainhu ovo navo opo va li pOpentekoste yomo 33 O.P., otashi dulika navo va vaekwa eshi omhepo iyapuki ya tililwa ovahongwa. Ngeenge osho, ovakainhu ovo opo va vaekwa navo ova li va dula okupopya omalaka oshinailongo nokulombwela ovanhu kombinga “yoinenelonga yaKalunga.” — Oil. 1:14; 2:2-4, 11.

13. Oilonga ilipi hai longwa kovakainhu Ovakriste kunena, nongahelipi hatu dulu okuulika kutya otwa pandula oilonga oyo tava longo?

¹³ Ovamwameme ova pumbwa okupandulwa omolwoilonga aishe oyo tava longo moilonga yaJehova. Oilonga oyo oya kwatela mo okutunga nokukaleka omatungo monghalo iwa, okuyambidida eengudu domalaka oshinailongo nosho yo okulonga koBetel. Ohava kwafele mokuyandja oikwafa, mokutoloka oishangomwa nosho yo okulonga ve li ovakokolindjila novatumwa. Ovamwameme ohava i kOfikola yOvaudifi vOuhamba nosho yo Ofikola yaGilead ngaashi ashike ovamwatate. Shikwao vali, ovakulukadi ohava kwafele ovashamane vavo opo va dule okuwanifa po oilonga yavo meongalo nosho yo mehangano. “Ovalumenhu ve li eeshali” ile tu tye ovo ve na oinakuwanifwa, itava dulu okuwanifa po oilonga yavo pauyadi nopehe na ekwafo lovakulukadi vavo. (Ef. 4:8) Mbela omeenghedi dilipi  to dulu okuyambidida ovamwameme omolwoilonga oyo tava longo?

14. She likolelela kwaasho sha popiwa mEpsalme 68:11, ovakulunhuongalo oshike hava ningi po?

¹⁴ Ovakulunhuongalo ove shii kutya ovamwameme ove li “ongudu inene” tai longo nehalo liwa, naluhapu ovo unene hava pondola mokuudifa onghundana iwa. (Lesha Epsalme 68:11.) Ovakulunhuongalo ohave lihongo koimoniwa yavo. Abigail, oo a tumbulwa nale, okwa popya kutya ohashi mu tu omukumo ngeenge omumwatate te mu pula eenghedi odo ha longifa opo a dule okupopya novanhu moukalele. Okwa ti: “Osho ohashi kwafele nge ndi mone kutya Jehova okwa pa nge oilonga ya fimana mehangano laye.” Shikwao vali, ovakulunhuongalo ohava didilike kutya ovamwameme ovadiinini, ovo va pyokoka pamhepo, ohave shi endifa nawa ngeenge tava kwafele ovanyasha va ungaunge nomashongo. (Tit. 2:3-5) Oshoshili kutya ovamwameme ova wana okupandulwa!

15. Onaini omumwameme tashi dulika a pumbwa umwe e mu popile?

¹⁵ Omafimbo amwe, omumwameme otashi dulika a pumbwa umwe oo te mu popile ngeenge a taalela eshongo lonhumba. (Jes. 1:17) Pashihopaenenwa, omufiyekadi ile omumwameme oo a hengwa otashi dulika a pumbwa umwe e mu popile noku mu kwafela noilonga oyo ya li hai longwa komushamane waye. Omumwameme omunamido otashi dulika a pumbwa okukwafelwa ngeenge ta popi neendokotola. Ile omumwameme omukokolindjila, oo e na vali oilonga imwe oyo ha longo mehangano laJehova, otashi dulika a pumbwa umwe e mu popile ngeenge vamwe tave mu kembaula kutya iha i moukalele luhapu ngaashi ovakokolindjila vakwao. Ongahelipi vali hatu dulu okukwafela ovamwameme? Natu ka taleni vali koshihopaenenwa shaJesus.

16. Jesus okwa li a popila ngahelipi Maria metwokumwe neendjovo odo tadi hangwa muMarkus 14:3-9?

¹⁶ Jesus okwa li ha kwafele diva ovamwameme ngeenge va udiwa ko pambabo. Pashihopaenenwa, okwa li a popila Maria eshi a li ta kembaulwa kuMarta. (Luk. 10:38-42) Okwa li a popila Maria oshikando oshitivali eshi vamwe va li tave mu kembaula kutya okwa ninga etokolo la puka. (Lesha Markus 14:3-9.) Jesus okwa li e udite ko elinyengotomheno laMaria nokwa li e mu pandula ta ti: “Okwa longela nge oshilonga shiwa. . . . Okwa ninga ngaashi ta dulu.” Jesus okwa li a xunganeka kutya oilonga yomukainhu oo yolukeno otai ka hepaululwa “keshe apa onghundana iwa tai udifwa mounyuni aushe,” ngaashi ashike a tumbulwa moshitukulwa eshi hatu kundafana nena. Oshihokwifa eshi Jesus a popya kutya onghundana iwa otai ka udifwa mounyuni aushe eshi a pandula Maria omolwoilonga yaye yokuheliholamwene. Eendjovo daJesus kada li tuu da hekeleka Maria eshi a li ta ungaungiwa naye shihe li pauyuki!

17. Yandja oshihopaenenwa osho tashi ulike kutya onaini twa pumbwa okupopila omumwameme.

¹⁷ Mbela oho popile ngoo ovamwameme apa sha pumbiwa? Diladila koshihopaenenwa tashi shikula. Ovaudifi vamwe ova mona kutya omumwameme umwe, oo omushamane waye ehe fi Ondombwedi, ohe uya kokwoongala a shelelelwa noha shuna diva keumbo konima yokwoongala. Ove shii kutya omafimbo amwe ohe uya nounona kokwoongala. Onghee ova li tave mu kembaula, tava diladila kutya omolwashike ita kondjifa omushamane waye ha kale he uya nounona alushe kokwoongala. Oushili oyoo kutya omumwameme oo oha ningi eenghendabala ngaashi ta dulu. Oha longo fiyo onakemutwaalele; nonokutya haye e na okuninga etokolo laxuuninwa li na sha nounona vavo. Mbela oto ka ninga po shike ngeenge owa udu vamwe tave mu kembaula? Ngeenge owa pandula omumwameme nokulombwela vamwe nghee te shi endifa nawa, ito ka kala vali ho mu popile mowii.

18. Omeenghedi vali dimwe dilipi hatu dulu okukwafela ovamwameme?

¹⁸ Ohatu dulu okuulikila omumwameme kutya  otu na ko nasha naye noku mu pa ekwafo tali longo. (1 Joh. 3:18) Annette, omumwameme oo a li ta file oshisho ina oo ta vele, okwa ti: “Ovamwatate novamwameme vamwe ova li have uya keumbo letu va file meme oshisho, ofimbo ame handi lipyakidile nashimwe shi lili, navamwe ova li hava etelele oikulya. Osho osha kwafela nge ndi mone kutya ondi holike nondi li oshitukulwa sheongalo.” Omumwameme Jordan naye okwa li a kwafelwa. Omumwatate umwe okwa li e mu kwafela nghee e na okupangela ohauto yaye. Okwa ti: “Onda li nda tunhukwa molwaashi onda mona kutya ovamwatate novamwameme ove na ko nasha neameno lange.”

19. Omeenghedi vali dimwe dilipi ovakulunhuongalo tava dulu okukwafela ovamwameme?

¹⁹ Ovakulunhuongalo ova pumbwa okukala hava kwafele ovamwameme paemhumbwe davo. Ove shii kutya Jehova okwa hala ovamwameme va ungaungiwe navo nawa. (Jak. 1:27) Ovakulunhuongalo ohava hopaenene Jesus nosho yo ondjele yaye. Osho ohashi va kwafele vehe va tulile po eemhango apa tashi shiva omolwolukeno. (Mat. 15:22-28) Ohava ningi eenghendabala opo va kwafele ovamwameme, naasho ohashi va kwafele va mone kutya ove holike. Eshi omupashukili wongudu yooKia a mona kutya Kia ota tembukile keumbo limwe okwa li a ninga omalongekido diva opo a kwafelwe. Kia okwa ti: “Ohashi ninipike oisho. Ovakulunhuongalo ova ulikila nge kutya ondi li oshitukulwa sha fimana sheongalo nosho yo kutya ove lilongekida okukwafela nge ngeenge ndi li moudjuu okupitila meendjovo davo detwomukumo nekwafo olo va pa nge.”

20-21. Ongahelipi hatu dulu okuulika kutya otwa lenga ovamwameme Ovakriste aveshe?

²⁰ Ngeenge hatu tale momaongalo etu kunena, omu na ovamwameme Ovakriste ovo hava longo noudiinini nova pumbwa ekwafo letu. Ngaashi twe lihonga koshihopaenenwa shaJesus, ohatu dulu oku va kwafela mokukala navo nosho yo moku va shiiva nawa. Ohatu dulu okuulika olupandu moilonga oyo tava longele Kalunga. Ohatu dulu oku va popila apa sha pumbiwa.

²¹ Omuyapostoli Paulus okwa tumbula komadina ovakainhu Ovakriste omuwoi lwopexulilo lonhumwafo oyo a shangela Ovaroma. (Rom. 16:1, 3, 6, 12, 13, 15) Nopehe na omalimbililo, oshi na okukala sha li she va twa omukumo eshi e va kundila po nokwe va pandula. Nafye natu kaleni hatu pandula ovamwameme aveshe meongalo letu. Ngeenge otwa ningi ngaho, ohatu ka ulika kutya otu va hole shili nove li oshitukulwa sheongalo.