Osho shi li mondjila naasho sha puka: Ehoololo olo u na okuninga
Elihumbato letu lopaenghedi, olo twa hoolola, olo tali ka ufa kutya ohatu kala twa hafa, ile hasho. Jehova Kalunga oku shi shii. Nomolwaashi a hala tu kale metwokumwe nomafinamhango aye.
Jehova okwa hala tu kale tu na ombili notwa hafa monghalamwenyo.
“Aame Omwene Kalunga koye, ou handi ku longo eshi tashi ku wapalele, ndele handi ku tula mondjila ei u nokweenda nayo. Akutu, ngeno ove wa li wa diinina oipango yange, ngeno ombili yoye oya kala ngaashi omulonga tau tondoka, nouyuki woye ngaashi omakufikufi omefuta.” — Jesaja 48:17, 18.
E li Omushiti wetu, Kalunga oku shii osho sha denga mbada kufye. Okwa hala tu shikule ewiliko laye, molwaashi otali ke tu etela ouwa. Ngeenge hatu dulika koipango yaKalunga, itatu ke lipula ngeenge otai ke tu etela ngoo ouwa. Ohatu ka ninga alushe ehoololo li li mondjila olo tali ke tu etela ombili nehafo.
Jehova ite tu pula tu ninge osho itatu dulu okuninga.
“Oshipango eshi handi mu lombwele nena kashidjuu kunye, nokashi li kokule nanye.” — Deuteronomion 30:11.
Okukala metwokumwe nomifikamhango daKalunga dopaenghedi otashi dulu okulundulula nghee hatu diladila nokukatuka. Jehova ita pula tu ninge shi dulife pwaasho itatu dulu okuninga. Komesho yaaishe, Omushiti wetu oku shii okudula kwetu. Eshi hatu ende hatu shiiva nawa Jehova, ohatu ka mona kutya ‘oipango yaye kai fi idjuu.’ — 1 Johannes 5:3.
Jehova okwa udaneka kutya ota ka kwafela ovo va hoolola okukala metwokumwe nomafinamhango aye.
“Aame Omwene Kalunga koye handi kwata eke loye lokolulyo, Ame ou handi ku lombwele: ‘Ino kala wa tila, Ame ohandi ku kwafa.’” — Jesaja 41:13.
Ohatu dulu okukala metwokumwe naasho Jehova ta pula tu ninge, molwaashi ote tu kwafele. Ota dulu oku tu kwafela okupitila mEendjovo daye Ombiibeli, odo hadi tu tu omukumo noku tu pa eteelelo.
Ovanhu omamiliyona mounyuni aushe ova mona kutya okukala metwokumwe nomafinamhango Ombiibeli osha xwepopaleka onghalamwenyo yavo. Lihonga shihapu kombinga yomayele mawa, oo taa hangwa mOmbiibeli. Oto dulu okuhovela nokambo ka kanghamena kOmbiibeli ke na oshipalanyole Nghee to dulu okuhafela onghalamwenyo fiyo alushe! oko to dulu oku ka lesha oshali ko jw.org. Oke na oileshwa tai shikula:
-
Ongahelipi Ombiibeli tai dulu oku ku kwafela?
-
Ombiibeli oya udaneka onakwiiwa itunhula
-
Mbela oto dulu ngoo okulineekela Ombiibeli?
Eshi to konakona Eendjovo daKalunga, Ombiibeli, oto ka mona kutya omayele ayo “ihaa hekuka nande, taa kalelele fiyo alushe.” (Epsalme 111:8) Okushikula omayele e na sha nelihumbato lopaenghedi, oo taa hangwa mOmbiibeli, osho onghedi ya denga mbada kuhe na vali. Ashike Kalunga ihe tu fininike tu ninge ngaho. (Deuteronomion 30:19, 20; Josua 24:15) Ehoololo olo keshe umwe womufye e na okuninga.
