1-2. (a) She likolelela kOvaefeso 6:16, omolwashike twa pumbwa ‘oshikelelifo sha kula sheitavelo’? (b) Omapulo elipi hatu ka kundafana?

MBELA ou na ‘oshikelelifo sha kula sheitavelo’? (Lesha Ovaefeso 6:16.) Heeno. Ngaashi ashike oshikelelifo sha kula hashi amene olutu, eitavelo ohali ku amene koinima inai koshoka mounyuni ou wa xutuka ngaashi oluhaelo, elongifo leenghono nosho yo oshinima keshe shihe li metwokumwe nehalo laKalunga.

² Eitavelo letu ohali yelekwa efiku nefiku, molwaashi otu li “momafiku axuuninwa.” (2 Tim. 3:1) Ongahelipi to dulu okukonakona oshikelelifo shoye sheitavelo opo u shilipaleke kutya osha pama? Noshike u na okuninga opo u kaleke eitavelo loye la pama? Natu ka kundafaneni omanyamukulo omapulo oo.

3. Ovakwaita ova li hava ningile shike oikelelifo yavo, nomolwashike?

³ Pefimbo Ombiibeli ya li tai shangwa, ovakwaita ova li hava kala ve na oikelelifo ya tulwa oshipa kombada. Ova li hava vaeke omaadi kombada yoshikelelifo opo va amene oshipa nosho yo oshitenda shoshikelelifo shiha kwatwe kolushu. Ngeenge omukwaita okwa didilike kutya oshikelelifo shaye osha teka, okwa li ha shilipaleke kutya osha pangelwa opo e lilongekidile olwoodi la landula ko. Oshikelelifo osha pambafana ngahelipi neitavelo loye?

4. Omolwashike u na okukonakona oshikelelifo shoye sheitavelo, nongahelipi u na oku shi ninga?

⁴ Ngaashi ovakwaita vopefimbo lonale, naave owa pumbwa okukala ho konakona nokukaleka oshikelelifo shoye sheitavelo  monghalo iwa opo u kale alushe we lilongekidila olwoodi. Tu li Ovakriste, otu li molwoodi lopamhepo hatu lwifa eemhepo dowii. (Ef. 6:10-12) Kape na oo ta dulu okufila oshisho oshikelelifo shoye sheitavelo. Ongahelipi to dulu okukala noushili kutya owe lilongekidila omayeleko? Tete, ilikana kuKalunga e ku kwafele. Opo nee owa pumbwa okulongifa Eendjovo daKalunga di ku kwafele u kale ho litale ko ngaashi Kalunga he ku tale ko. (Heb. 4:12) Ombiibeli oya ti: “Nomutima woye aushe lineekela Omwene, ino liameka keendunge doye mwene.” (Omayel. 3:5, 6) Paife diladila shi na sha nonghalo yonhumba oyo wa li wa taalela efimbo opo la di ko, naasho wa li wa ninga po. Pashihopaenenwa, mbela owa li wa taalela oupyakadi wopashimaliwa? Mbela owa li wa diladila kombinga yeudaneko laJehova olo tali hangwa mOvaheberi 13:5 tali ti: “Ame ihandi ku efa noitandi ku fii po nande”? Mbela eudaneko olo ola li le ku twa omukumo kutya Jehova ote ku kwafele? Ngeenge osho, osha yela kutya oho kaleke oshikelelifo shoye sheitavelo monghalo iwa.

5. Oshike tashi dulika u ka mone eshi to konakona eitavelo loye?

⁵ Otashi dulika u kale wa kumwa kwaasho to ka mona ngeenge owa konakona noukeka eitavelo loye. Otashi dulika u mone kutya ou na ounghundi oo wa li ino didilika. Pashihopaenenwa, otashi dulika u didilike kutya ope na oinima yonhumba oyo tai nghundipaleke eitavelo loye ngaashi oshisho sha pitilila, oipupulu nosho yo etekomukumo. Ngeenge osho osha li she ku ningilwa, ongahelipi to dulu okwaamena eitavelo loye liha nghundipale?

6. Oihopaenenwa ilipi tai ulike kutya inashi puka okukala noshisho?

⁶ Inashi puka okukala u na oshisho. Pashihopaenenwa, oshiwa okukala u na oshisho ngeenge to lipula shi na sha nokuhafifa Jehova naJesus. (1 Kor. 7:32) Ngeenge twa nyona enyono la kwata moiti, ohatu kala tu na oshisho shokukaleka po vali oukaume wetu naKalunga. (Eps. 38:18) Ohatu kala yo tu na oshisho shokuhafifa kaume ketu kopahombo, okufila oshisho oilyo youkwaneumbo wetu nosho yo ovaitaveli vakwetu. — 1 Kor. 7:33; 2 Kor. 11:28.

7. Omolwashike tuhe na okutila ovanhu metwokumwe nOmayeletumbulo 29:25?

⁷ Shikwao vali, oshisho sha pitilila otashi dulu okunyona po eitavelo letu. Pashihopaenenwa, otashi dulika tu kale hatu lipula unene shi na sha noikulya nosho yo oidjalomwa. (Mat. 6:31, 32) Ngeenge otwa kala hatu lipula unene naasho, otashi dulika tu hovele okulikongela omaliko. Otashi dulika tu kwatwe kohole yokuhola oimaliwa. Ngeenge osho oshe tu ningilwa, eitavelo letu otali ka nghundipala, nekwatafano letu naJehova otali ka kala moshiponga. (Mark. 4:19; 1 Tim. 6:10) Ile otashi dulika tu ninge oshihakanwa shokukala noshisho sha pitilila, okukala hatu lipula kutya ovanhu ove tu tala ko ngahelipi. Otashi dulika tu kale twa tila okushekwa ile okuhepekwa kovanhu shi dulife okukala twa tila okunyemateka Jehova. Opo tu finde omwiyo oo, otwa pumbwa okwiilikana kuJehova e tu pe eitavelo la kola nosho yo ouladi opo tu dule okutaalela omashongo oo. — Lesha Omayeletumbulo 29:25; Luk. 17:5.

8. Ohatu ka ninga po shike ngeenge otwa udu oipupulu kombinga yovamwatate ile yehangano laJehova?

⁸ Satana, ‘xe yoipupulu,’ oha nwefa mo ovo ve li koshi yepangelo laye va tandaveleke oipupulu kombinga yaJehova nosho yo yovamwatate novamwameme. (Joh. 8:44) Pashihopaenenwa, ovashunimonima otashi dulika va tandaveleke oipupulu kombinga yehangano laJehova kee-website, koTV ile koikundaneki imwe. Oipupulu ya tya ngaho oi li ‘oikuti ya xwama omundilo’ yaSatana. (Ef. 6:16) Ohatu ka ninga  po shike ngeenge umwe okwa hovele okupopya nafye kombinga yoipupulu ya tya ngaho? Itatu ka pwilikina nandenande. Omolwashike mbela? Omolwaashi otu na eitavelo la kola muJehova notwe lineekela ovamwatate. Ihatu kwatafana nandenande novashunimonima. Itatu ka pwilikina kovanhu va tya ngaho ile okutomhafana navo nonande otu kale twa halelela okuuda osho tava popi.

9. Etekomukumo ohali tu kumu ngahelipi?

⁹ Etekomukumo otali dulu okunghundipaleka eitavelo letu. Itatu dulu okulidimbika omaunghundi oo tu na. Osho otashi ka kala shihe li pandunge ngeenge otwa ningi ngaho. Omafimbo amwe, otashi dulika tu kale twa teka omukumo. Ashike inatu efa omaupyakadi a nwefe mo okudiladila kwetu. Ngeenge otwa ningi ngaho, ohatu ka dimbwa eudaneko litunhula olo Jehova e tu udanekela. (Eh. 21:3, 4) Etekomukumo ohali nghundipaleke omunhu noku mu shololifa. (Omayel. 24:10) Ashike inatu efa nande osho shi tu ningilwe.

10. Oshike hatu lihongo monhumwafo oyo ya shangwa komumwameme?

¹⁰ Natu ka taleni koshihopaenenwa shomumwameme umwe wokoUnited States nghee a li a pameka eitavelo laye eshi a li ta file oshisho omushamane waye oo a li ta vele sha kwata moiti. Okwa popya monhumwafo oyo a shangela keembelewa da kula a ti: “Nonande otu li monghalo idjuu nomafimbo amwe ohatu kala twa teka omukumo, otu na eteelelo la twa. Onda pandula Jehova neenghono mukeshe osho he tu pe opo tu pameke eitavelo letu nokukala tu na omukumo. Otwa pumbwa neenghono omayele netwomukumo. Omayele a tya ngaho ohae tu kwafele tu pule komesho notu dule okulididimikila omayeleko oo taa dilile kuSatana.” Eendjovo domumwameme oo otadi ulike kutya ohatu dulu okufinda etekomukumo. Ngahelipi mbela? Dimbuluka kutya omaupyakadi oo wa taalela oku li eyeleko tali dilile kuSatana. Kala u na elineekelo kutya Jehova ote ku hekeleke. Kala u na olupandu leendja dopamhepo odo he ku pe.

11. Opo tu mone ngeenge eitavelo letu otali yelekwa, omapulo elipi twa pumbwa okulipula?

¹¹ Mbela ou wete kutya oshikelelifo shoye sheitavelo osha pumbwa okupamekwa? Mbela owa dula okuhenuka oshisho sha pitilila oule weemwedi  dinini opo da di ko? Mbela owa li wa dula okuhenuka okupwilikina ile okutomhafana novashunimonima ovo tava tandaveleke oipupulu? Mbela owa li wa dula okuungaunga netekomukumo? Ngeenge osho, otashi ulike kutya ou na eitavelo la pama. Otwa pumbwa okukala tu li oupafi molwaashi Satana ota dulu okulongifa oilwifo imwe opo e tu lwife. Natu ka kundafaneni shimwe shomuyo.

12. Oshike tashi ka ningwa po ngeenge otwa kala tu hole omaliko?

¹² Ngeenge otwa kala tu hole omaliko, eitavelo letu otali ka nghundipala nohatu ka pa Jehova shinini. Omuyapostoli Paulus okwa ti: ‘Kape na omukwaita te lipyakidile noipalwifa, osheshi a hala okuwapalela ou, e mu shivila moukwaita.’ (2 Tim. 2:4) Ovakwaita vaRoma kava li va pitikwa va kale hava kufa ombinga moilonga imwe i lili ngaashi okulandifa nosho tuu. Oshike tashi dulika shi ningwe po ngeenge omukwaita okwe lipwililikile omhango oyo?

13. Omolwashike omukwaita ina pumbwa okukala e lipyakidila nomangeshefelo?

¹³ Diladila koshihopaenenwa tashi shikula. Ongudu yovakwaita tave lideula nomaongamukonda avo efimbo longula, ashike umwe womuvo ke po. Omukwaita oo oku li modoolopa ta landifa oikulya. Efimbo lokonguloshi, ovakwaita ove lipyakidila nokukonakona oilwifo nokuupika omaongamukonda avo. Ashike oo ha landifa oikulya okwe lipyakidila nokuteleka oikulya oyo ta ka landifa efiku la landula ko. Ngomongula, ova li va ponokelwa komutondi inave shi teelela. Omukwaita elipi po ta kala e lilongekidila olwoodi nota ka hafifa komanda waye? Elipi to ka kala wa hala a kale kombinga yoye, oye ou a li te lideula ile oye ou a li ta landifa?

14. Oshike osho twa pumbwa okukala twa lenga unene tu li ovakwaita vaKristus?

¹⁴ Ngaashi ovakwaita ovo ve lilongekidila olwoodi, nafye inatu efa tu piyaanekwe tuha yandje elitulemo kelalakano letu, okukala twa hokiwa kEekomanda detu, Jehova naKristus. Osho osha fimanenena unene shi dulife keshe osho hatu dulu okumona mounyuni ou waSatana. Natu shilipaleke kutya otu na efimbo neenghono odo twa pumbwa opo tu longele Jehova nokukaleka oshikelelifo shetu sheitavelo  nosho yo oilwifo yetu yopamhepo monghalo iwa.

15. Elondwelo lilipi Paulus e tu pa, nomolwashike?

¹⁵ Natu kale alushe oupafi. Omolwashike? Omuyapostoli Paulus okwa popya kutya ‘ava va hala okupunapala otava ka puka mo meitavelo.’ (1 Tim. 6:9, 10) Outumbulilo ‘okupuka’ otau ulike kutya ohatu dulu okupiyaanekwa mokukala twe lihalela oinima oyo inatu pumbwa. Kungaho otashi ke tu ningifa tu ye ‘mouhalu uhapu woulai nowoiponga.’ Ashike natu dimbuluke kutya Satana ota longifa omahalo a tya ngaho e li oilwifo yokunghundipaleka eitavelo letu.

16. Ehokololo olo li li muMarkus 10:17-22 otali tu linyengifa tu lipule omapulo elipi?

¹⁶ Natu tye nee ngeno otu na oimaliwa hatu dulu okulanda oinima ihapu. Mbela osha puka ngeenge otwa lande oinima oyo twa hala ndele inatu i pumbwa? Hasho naanaa. Ashike diladila komapulo aa: Mbela otu na ngoo efimbo neenghono oku shi longifa noku shi kaleka monghalo iwa? Mbela ohatu ka kala tu hole unene oinima yetu yopamaliko? Mbela ohole yetu yokuhola omaliko otai ke tu ningifa tu katuke ngaashi omulumenhu omunyasha oo a li a anya eshivo laJesus lokulongela Kalunga pauyadi? (Lesha Markus 10:17-22.) Itashi ka kala tuu  shiwa okukala tu na onghalamwenyo ya nafangwa nokulongifa efimbo neenghono detu mokulonga ehalo laKalunga!

17. Oshike tuhe na okudimbwa?

¹⁷ Inatu dimbwa nande kutya otu li moita nokukala twe lilongekidila olwoodi efiku keshe. (Eh. 12:17) Ovamwatate novamwameme itava dulu okuhumbata oshikelelifo shetu sheitavelo. Keshe umwe pauhandimwe na diinine oshikelelifo shaye sheitavelo.

18. Omolwashike ovakwaita vopefimbo lonale va li hava diinine oikelelifo yavo?

¹⁸ Pefimbo lonale, omukwaita okwa li ha fimanekwa ngeenge okwa kala e na onyati. Ashike okwa li ha kala a fya ohoni ngeenge okwa shuna keumbo ehe na oshikelelifo shaye. Omunandjokonona umwe waRoma, Tacitus, okwa ti: “Osha li hashi kala shififa ohoni ngeenge omukwaita okwa fiye po oshikelelifo shaye.” Nomolwaasho ovakwaita hava shilipaleke kutya ova diinina oikelelifo yavo.

19. Ongahelipi hatu dulu okukala twa diinina oshikelelifo shetu sheitavelo?

¹⁹ Ohatu diinine oshikelelifo shetu sheitavelo mokukala pandjikilile pokwoongala kwopaKriste nokulombwela vamwe kombinga yedina laJehova nosho yo Ouhamba waye. (Heb. 10:23-25) Natango, ohatu lesha Eendjovo daKalunga efiku keshe nokwiilikana e tu kwafele tu tule moilonga osho tadi ti. (2 Tim. 3:16, 17) Ngeenge otwa ningi ngaho, oshilwifo keshe Satana ta ka longifa itashi ke tu etela ouyahame tau kalelele. (Jes. 54:17) ‘Oshikelelifo shetu sha kula sheitavelo’ otashi ke tu amena. Ohatu ka kala ovadiinini nokulongela kumwe novamwatate novamwameme. Ohatu ka findana molwoodi olo hatu kala twa taalela efiku keshe, nohatu ka kala tu udite etumba eshi twa ama kombinga yaJesus eshi ta ka findana moita oyo i li pokati kaSatana novashikuli vaye. — Eh. 17:14; 20:10.