1. Oshike tu na okuninga opo tu shilipaleke kutya natango otu na eitavelo la kola?

OVANHU vahapu ohava ti kutya ohava itavele ashike oinima oyo va mona nomesho. Ndele Ombibeli oya ti kutya “kape na ou a mona Kalunga nande.” (Joh. 1:18) Molwaashi itatu dulu okumona Jehova, ongahelipi hatu dulu okukwafela oohandimwe va tya ngaho va kale va itavele muye? Oshike tu na okuninga po opo tu shilipaleke kutya natango otu na eitavelo la kola ‘muKalunga iha monika,’ Jehova? (Kol. 1:15) Tete otu na okushiiva kutya omahongo elipi taa imbi ovanhu va shiive oshili kombinga yaJehova. Opo nee, hatu lihongo okulongifa Ombibeli noukeka opo tu dule okutomha ovanhu va mone kutya omahongo oo otae va imbi ‘okushiiva Kalunga.’ — 2 Kor. 10:4, 5.

2, 3. Omahongo opavali elipi taa imbi ovanhu va shiive oshili kombinga yaKalunga?

² Ehongo loevolusi olo limwe lomomahongo oipupulu oo taa imbi ovanhu va shiive oshili kombinga yaKalunga. Ehongo olo lopanhu otali kondjifafana nOmbibeli nola ningifa ovanhu va kale vehe na eteelelo. Ovo va itavela mehongo olo ohava ti kutya oinima i na omwenyo oye uya po ashike kuyo vene, naasho osha hala kutya onghalamwenyo yetu kai na elalakano lasha.

³ Mepingafano naasho, ovanhu vamwe ovo have liti Ovakriste ohava hongo kutya evalelwa, edu nosho yo oinima aishe i na omwenyo oya kala po ashike omido omayovi manini. Ovanhu ovo hava hongo ehongo olo otashi dulika va fimaneka ngoo Ombibeli, ashike ohava ti kutya Kalunga okwa shita oinima aishe moule womafiku a-6, oo keshe limwe li na oule weevili 24, e shi ninga omido ashike omayovi opo da di ko. Ihava tu kumwe nomaumbangi opaunongononi e shii okulineekelwa oo e li omhinge neitavelo lavo. Oshidjemo, ohava pataneke ounashili wOmbibeli, have i ningifa i kale ya  fa tai popi oinima ihe li pandunge ile paushili. Ovanhu ovo ve na etaleko la tya ngaho otave tu dimbulukifa vamwe vomefelemudo lotete ovo va li ve na ouladi wokulongela Kalunga “ndele hapakushiiva.” (Rom. 10:2) Ongahelipi hatu dulu okulongifa Eendjovo daKalunga opo tu nyaneke pomutenya ehongo olo li na sha neshito nosho yo loevolusi oo taa faafanifwa ‘nomapopilongulu’? Osho ohatu dulu ashike oku shi ninga ngeenge otwa ningi eenghendabala da mana mo tu mone eshiivo lashili li na sha naasho Ombibeli tai hongo.

4. Eitavelo letu oli na okukala le likolelela kushike?

⁴ Ombibeli oya ti kutya natu kale twa lenga eshiivo. (Omayel. 10:14) Jehova okwa hala eitavelo letu muye li kale la kanghamena koumbangi nosho yo kokutomhafana kwopandunge, ndele hakomahongo opanhu ile keenghulunghedi domalongelokalunga. (Lesha Ovaheberi 11:1.) Opo tu kale tu na eitavelo la kola muKalunga, tete otu na okukala twa tomhwa kutya oko e li. (Lesha Ovaheberi 11:6.) Ndele katu na okufika pexulifodiladilo la tya ngaho molwaashi ashike twa hala okwiitavela muye, ndele omolwaashi twa mona oumbangi oo tau ulike kutya oko e li nokulongifa ‘eenghono detu dokudiladila.’ — Rom. 12:1, NW.

5. Omolwetomheno limwe lilipi hatu dulu okukala twa tomhwa kutya Kalunga oko e li?

⁵ Omuyapostoli Paulus okwa yandja etomheno limwe kutya omolwashike hatu dulu okukala twa tomhwa kutya Kalunga oko e li, nonande ihatu mu mono. Okwa popya shi na sha naJehova ta ti: “Oinima i he wetike kokutya, eenghono daye daalushe noukalunga waye, otai monika nawa moilonga yaye okudja keshito lounyuni, ngenge tai konakonwa.” (Rom. 1:20) Ongahelipi to dulu okukwafela umwe oo a limbililwa ngeenge Kalunga oko e li a mone oushili weendjovo daPaulus da nwefwa mo? Oto dulu okukundafana naye omaumbangi taa landula e na sha neshito, oo taa holola eenghono dOmushiti nounongo waye.

6, 7. Eenghono daJehova odi liwetikile ngahelipi moinima ivali oyo hai tu amene?

⁶ Eenghono daJehova odi liwetikile moinima ivali oyo hai tu amene, ewangadjo nosho yo omangenete edu. Pashihopaenenwa, ewangadjo kali lile po ashike oku tu pa omhepo oyo hatu fudile mo. Ohali tu amene yo koitandu yomaminikilo oyo hai u mombada. Oitandu oyo tai dulu okweetifa oushada munene ohai pi po shimha ya fiki mewangadjo olo li li popepi nedu, nohai kala tai vilima nawa eshi tai tavakana mewangadjo oufiku.

⁷ Omangenete edu nao ohae tu amene koiponga. Omangenete oo ohaa di moule pokati kedu. Exuku ledu, olo la fikama po unene tuu moshivela sha hengumuka, nolo hali nduluka omangenete e na eenghono, oo e tu dingilila nokwa ya fiyo omewangadjo. Omangenete oo ohae tu amene keenhe detango odo da nyika oshiponga odo hadi fiki kedu. Ngeno kapa li omangenete oo, ngeno eenhe detango odo da nyika oshiponga ohadi lungwinifa po oinima aishe i na omwenyo oyo i li kombada yedu. Ndele ponhele yaasho, omangenete edu ohaa nane eenhe odo noku di shunifa mewangadjo. Ohatu dulu okumona oumbangi u na sha nomangenete oo okupitila mouyelele muhokwifa oo hau kala ko oufiku mevalelwa popepi noxulo yedu yokOlundume nosho yo yokOlukadi. Nopehe na omalimbililo, Jehova “eenghono daye odinene.” — Lesha Jesaja 40:26.

8, 9. Ounongo waJehova ou liwetikile ngahelipi momadingonoko oo haa kwafele oishitwa i kale nomwenyo?

⁸ Ounongo waKalunga ou liwetikile monghedi omo eshi ninga tashi shiiva opo oinima i na omwenyo i dule okukala kombada yedu. Oku shi faneka, diladila nee ngeno u li moshilando sha dingililwa kekuma nomu yadi ovanhu, ndele ihamu uya omeva mawa neendova ihadi di mo. Oshilando osho otashi ka nyata diva novanhu itava dulu okukala mo. Eduumbo letu ola fa oshilando osho meenghedi donhumba. Kedu oku na  omeva mawa manini nokashipu okukufa ko eendova adishe odo di li ko di twalwe ngeno mewangandjo. Ashike edu otali dulu okukwafela oinima i na omwenyo omabiliyona oyo i li ko, okudja kepupi nepupi. Ngahelipi mbela? Edu ohali dulu okulongulula monghedi ikumwifi oinima oyo oishitwa ya pumbwa opo i kale i na omwenyo.

⁹ Diladila pashihopaenenwa kedingonoko lomhepo yohapi. Oishitwa omabiliyona ohai fudile mo omhepo yohapi nohai fuda mo yokaaboni (carbon dioxide). Ndele nande ongaho, omhepo yohapi kai na efiku ya pwile po, newangadjo kali na nande efiku la yadele omhepo oyo hatu fuda mo. Omolwashike mbela? Onghedi ikumwifi omo oimeno hai longo oikulya otai tu kwafele tu mone enyamukulo lepulo olo. Oimeno ohai longifa omhepo yokaaboni oyo hatu fuda mo, omeva, eenhe detango nosho yo oitungifi opo i nduluke po oikulya yayo (carbohydrates) nosho yo omhepo yohapi. Eshi hatu fudile mo omhepo yohapi, kungaho ohatu manifa edingonoko olo. Meityo lolelalela, Jehova oha longifa oimeno oyo a shita opo a pe “ovanhu aveshe omwenyo nomufudo.” (Oil. 17:25) Oo kau fi tuu ounongo mukumwifi!

10, 11. Ongahelipi ounongo waJehova u liwetikile monghedi omo a shita okambilimbili nosho yo naitayalukunghu?

¹⁰ Ounongo waJehova ou liwetikile yo monghedi omo a shita oinamwenyo ihapu oyo i li kombada yedu. Omuvalu womaludi oinamwenyo oyo i li kombada yedu otau tengenekelwa pokati komamiliyona 2 fiyo 100. (Lesha Epsalme 104:24.) Natu ka taleni nghee oinamwenyo imwe tai holola ounongo waKalunga.

¹¹ Pashihopaenenwa, ope na okambilimbili (onghanga) konhumba oko ke na ouluvi u fike pokaxulo kopena yohinga. Ndele nande ongaho, ohaka dulu okutuka oshinano sheekilometa hanga 3 000, okudja koKanada fiyo okofuka imwe yaMeksiko, nohaka kwafelwa ketango ka shiive oko ka yuka. Ndele mbela ohake shi ende ngahelipi ngeenge etango ohali tavakana mevalelwa? Jehova okwa shita ouluvi wako muningholi monghedi oyo taka dulu okutuka ka yukilila oko taka i nonande etango nali kale tali ende. Ile diladila keisho lanaitayalukunghu. Epuka olo oli na omesho avali. Eisho keshe lalo oli na eemuni 30 000. Ndele nande ongaho, ouluvi walo muningholi ohau dulu okutambula ko nokufatulula ouyelele keshe oo tau piti meemuni adishe odo domesho nohali didilike elinyengo keshe linini tali ningwa momudingonoko walo.

12, 13. Oshike tashi ku kumwifa shi na sha nonghedi omo Jehova a shita eesele odo da tunga po olutu loye?

¹² Osho shikumwifa natango oshi na sha nonghedi omo Jehova a shita eesele doinima aishe i na omwenyo. Pashihopaenenwa, olutu lomunhu ola fikama po meesele eetriliyona 100. Meni losele keshe omu na okatukulwa kanininini ka fa ongodi, haka ifanwa o-DNA. Okatukulwa oko ohaka humbata ouyelele oo hau tungifa po olutu alishe lomunhu.

¹³ O-DNA ohai humbata ouyelele u fike peni? Natu yelekanife nee ngeno ograma imwe yee-DNA noka-CD. Moka-CD otamu dulu okutuvikilwa ouyelele aushe oo u li memboitya, naasho  oshikumwifi molwaashi oka-CD oshinima ashike shinini. Ashike ograma imwe yo-DNA otai dulu okutuvikila ouyelele oo tau wana mou-CD otriliyona imwe. Ee-DNA da kukutikwa odo tadi wana kokanguto kamwe kotee odi na ouyelele wa wana okutunga po ovanhu aveshe ovo ve li momwenyo lwomapa 350.

14. Osho ovanongononi va mona oshe ku ningifa u kale u udite ngahelipi shi na sha naJehova?

¹⁴ Ohamba David oya popya shi na sha nouyelele oo hau tungu po olutu lomunhu kutya owa fa ngeno wa shangwa membo lopafaneko. Oya popya shi na sha naJehova Kalunga tai ti: “Omesho oye okwa li taa shipulula nge, fimbo nda li engwili inandi tongoka, nomembo loye omo omwa nyolelwa omafiku ange aeshe, . . . fimbo inapa holoka nande limwe lao.” (Eps. 139:16) Oshi shii okuudiwa ko eshi David e linyengifwa a tange Jehova eshi a konakona onghedi omo olutu laye la shitwa. Omido opo da di ko, ovanongononi ova mona oinima ihapu i na sha nolutu lomunhu oyo tai tu kumwifa. Osho va mona otashi tu pe etomheno lokudimina osho omupsalme a popya shi na sha naJehova, eshi a ti: “Ohandi ku pandula, eshi nda tungwa nda tungikikika; oilonga yoye oya longekekeka, nomwenyo wange otau shi shiiva nawa.” (Eps. 139:14) Ndele mbela ovanhu kave wete ngoo shili kutya eshito otali holola kutya Kalunga oko e li?

15, 16. (a) Oishangomwa yetu ohai tu kwafele ngahelipi tu kale tu na olupandu lokupandula Jehova omolweshito laye? (b) Oshitukulwa shilipi shomoitukulwa oyo i na oshipalanyole “Was It Designed?” she ku kumwifa unene?

¹⁵ Oule womido dihapu, oshifo sho-Awake! osha kala nokukwafela ovanhu omamiliyona ve lihonge kombinga yaKalunga omunamwenyo okupitila meshito laye. Pashihopaenenwa, mo 2006, oshifo shaSeptemba osha li shi na oshipalanyole “Is There a Creator?” Osha li sha nuninwa okupashula omesho aavo va twikifwa kehongo loevolusi nosho yo komahongo makwao oipupulu. Omumwameme umwe wokoshitaimbelewa shokOilongo ya Hangana okwa popya shi na sha noshifo osho she likalekelwa a ti: “Oshikonga shokuyandja oshifo osho she likalekelwa osha enda nawa lela. Omukainhu umwe okwa pula a pewe oifo 20. Omukainhu oo omuhongi woshilongwa sho-biology nokwa li a hala ovahongwa vaye navo va mone oshifo osho.” Omumwatate umwe okwa shanga ta ti: “Onda kala handi kufa ombinga moukalele nouladi okudja pexulilo lo 1940 nasha nopaife ondi li pokuwanifa omido 75, ndele inandi hafela nande onale oukalele ngaashi nde u hafela omwedi ou twa li hatu yandje oshifo she likalekelwa sho-Awake!”

¹⁶ Okudja mo 2008, moifo ihapu yo-Awake! ohamu kala oshitukulwa shi na oshipalanyole, “Was It Designed?” Oitukulwa oyo i li pauxupi oya divilika nghee eshito likumwifi nosho yo nghee ovanhu va kendabala okuhopaenena oinima oyo Omushiti a shita. Mo 2010, opa li pa pita okambo Was Life Created? oko nako take tu kwafele tu fimane Kalunga. Omafano mawa oo e li mokambo oko okwa nuninwa oku tu kwafela tu hapupalife olupandu letu lokupandula Jehova omolweshito laye. Omapulo oo e li pexulilo loshitukulwa keshe otaa kwafele omuleshi a tomhafane kombinga youyelele oo a konakona. Oho hafele ngoo okulongifa okambo oko ngeenge to udifa eumbo neumbo, meenhele daaveshe ile ngeenge to yandje oundombwedi wohangelela?

17, 18. (a) Ongahelipi ovadali tava dulu okukwafela ovana vavo va kale ve na elineekelo kutya otava dulu okupopila eitavelo lavo? (b) Okambo ke na sha neshito omwa li mwe ka longifa ngahelipi pelongelokalunga loukwaneumbo weni?

¹⁷ Ovadali, omwa konakona ngoo okambo oko ke na omaluvala mawa pamwe nounona veni pefimbo lelongelokalunga loukwaneumbo weni? Ngeenge omwa ningi ngaho, otamu ke va kwafela va kale ve na eitavelo la kola muKalunga omunamwenyo. Otashi dulika u na ounona vomido omulongo nasha ovo hava i kofikola nove li meengudu dopombada. Ounona va tya ngaho ovo unene ve li oihakanwa yaavo hava hongo ehongo loipupulu loevolusi. Ediladilo olo kutya ehongo loevolusi oli li paushili ohali xumifwa komesho kovanongononi, ovahongifikola, eeprograma di na sha noushitwe nosho yo nokuli momalihafifo,  mwa kwatelwa eemuvi noinima imwe oyo hai ulikwa ko-TV. Oto dulu okukwafela ovana voye vomido omulongo nasha va nyaneke pomutenya ehongo olo loipupulu tava longifa okambo, The Origin of Life — Five Questions Worth Asking, oko nako ka pitile mo 2010. Ngaashi ashike okambo Was Life Created?, oshishangomwa osho otashi ladipike ovanyasha va kale va ‘lungama.’ (Omayel. 2:10, 11) Otashi va hongo va kale ve shii okutala ngeenge osho tava hongwa kofikola oshi li ngoo pandunge.

¹⁸ Okambo Origin of Life oka nuninwa okukwafela ovanafikola va shiive osho ve na okuninga po ngeenge ova udu oikundaneki tai popi kutya ovanongononi ova mona oipongolo yoinamwenyo oyo ya li ko nale, oyo tai ulike kutya ehongo loevolusi oli li paushili. Otake va ladipike va tokole kuvo vene ngeenge omahokololo oo otaa koleke ngoo shili kutya ovanhu ohava lunduluka okudja moinamwenyo. Otake va hongo yo nghee ve na okulinyenga komapopyo oo kutya ovanongononi ova dula okuulika melabora davo kutya oinima i na omwenyo oya holoka po ombadilila. Ovadali, ngeenge omwa longifa okambo oko, otamu ka dula okukwafela neenghono ovana veni va kale ve na elineekelo kutya otava dulu okunyamukula keshe oo te va pula ekanghameno leitavelo lavo mOmushiti. — Lesha 1 Petrus 3:15.

19. Atusheni otu na oufembanghenda ulipi?

¹⁹ Ouyelele wa konakonwa nawa oo hatu pewa okupitila mehangano laJehova ohau tu kwafele tu lihonge kombinga yomaukwatya aye mawa okupitila meshito. Oumbangi oo wa kola otau tu linyengifa tu tange Kalunga ketu tashi di komutima. (Eps. 19:2, 3) Kau fi tuu oufembanghenda munene okupa Omushiti woinima aishe, Jehova, efimano netumbalo olo a wana shili okupewa! — 1 Tim. 1:17.