1, 2. (a) Okukala ondombwedi osha hala okutya shike, noikundaneki younyuni ou oya dopa okuyandja oundombwedi wa fimanenena u na sha nashike? (b) Omolwashike Jehova ita longifa oikundaneki younyuni ou?

OKUKALA ondombwedi osha hala okutya shike? Emboitya limwe ola fatulula la ti kutya ondombwedi “omunhu oo a mona oshiningwanima eshi tashi ningwa ye ta yandje ouyelele waasho a mona.” Pashihopaenenwa, moshilando Pietermaritzburg, moSouth Africa, omu na oshifokundaneki shedina The Witness osho sha kala tashi nyanyangidwa oule womido di dulife 160. Edina olo otali wapalele molwaashi elalakano lasho okuyandja omauyelele e li paushili aasho tashi linyenge mounyuni. Omutotipo wo-The Witness okwa li a popya kutya oshikundaneki osho otashi ka kundaneka “oshili ye lixwapo.”

² Shinyikifa oluhodi, oikundaneki mounyuni oye lidimbika ile nokuli ya pengifa oushili wa fimanenena u na sha nondjokonona yovanhu. Kalunga okwa popya okupitila muHesekiel, a ti: ‘Oiwana otai ka shiiva nokutya Aame Jehova.’ (Hes. 39:7, NW) Ashike Omupangeli weshito alishe ita longifa oikundaneki younyuni ou. Oku na Eendombwedi omamiliyona ahetatu lwaapo odo tadi shiivifile ovanhu vomoiwana aishe kombinga yaye nonghee a ungaunga novanhu mefimbo la pita nosho yo kunena. Eendombwedi odo da fa etangakwaita, ohadi shiivifa yo shi na sha nomanangeko noupuna omonakwiiwa oo Kalunga a udaneka. Ngeenge otwa kala twa lenga oilonga yetu yokuyandja oundombwedi, ohatu ka ulika kutya otu li metwokumwe nedina olo twa pewa kuKalunga ngaashi sha popiwa muJesaja 43:10  eshi a ti: “Onye eendombwedi dange, Omwene ta ti; nomupiya wange, ou nde mu hoolola.”

3, 4. (a) Onaini Ovakonakoni vOmbibeli va mona edina lipe, nova li ve li uditile ngahelipi? (Tala efano pehovelo loshitukulwa.) (b) Omapulo elipi hatu ka kundafana?

³ Kashi fi tuu oufembanghenda okuhumbata edina laJehova molwaashi oye “Ohamba yomafimbo ounyuni,” ile tu tye Ohamba yaalushe, oo a popya ta ti: “Olo edina lange fiyo alushe nalo Ame handi ifanwa kepupi fiyo kepupi”! (1 Tim. 1:17; Ex. 3:15; yelekanifa nOmuudifi 2:16.) Mo 1931, Ovakonakoni vOmbibeli ova li va tambula edina Eendombwedi daJehova. Lwanima, eenhumwafo dihapu dolupandu oda li da nyanyangidwa mOshungonangelo. Eongalo limwe lomuKanada ola shanga la ti: “Onghundana iwa oyo kutya otu li eendombwedi daJehova oye tu hafifa noya xwameka etokolo toko letu tu kale twa wana okuhumbata edina olo lipe.”

⁴ Ongahelipi to dulu okuulika olupandu loye li na sha noufembanghenda wokuhumbata edina laKalunga? Oto dulu mbela okuyelifa oshikalimo shomushangwa omo mwa kufwa edina Eendombwedi daJehova?

5, 6. (a) Omonghedi ilipi ovadali Ovaisrael va li ve na okuyandja oundombwedi kombinga yaJehova? (b) Oshike vali osho ovadali Ovaisrael va li va lombwelwa va ninge, nomolwashike ovadali vokunena ve na okuninga sha faafana?

⁵ Oohandimwe Ovaisrael vopefimbo laJesaja ova li “eendombwedi” daJehova, noshiwana ashishe shi li ongudu osha li ‘omupiya’ waKalunga. (Jes. 43:10) Onghedi imwe omo ovadali Ovaisrael va li hava yandje oundombwedi omokuhonga ovana vavo shi na sha nanghee Kalunga a li a ungaunga nooxekulululwa. Pashihopaenenwa, eshi va li va lombwelwa va kale hava dana Opaasa omudo keshe, ova li va lombwelwa taku ti: ‘Ovana veni ngeenge tave mu pula: Eenghedi odo otadi ti ngahelipi? Opo nee nye mu na oku va lombwela: Olo eyambo lekoyo lOmwene ou a koyelela po omaumbo Ovaisrael muEgipti, Ye eshi a denga Ovaegipti, ndelenee a filonghenda omaumbo  etu.’ (Ex. 12:26, 27) Ovadali ovo ove na yo okukala va li va lombwela ovana vavo kutya eshi Moses a li a ya kohamba yaEgipti oshikando shotete a ka pule epitikilo lokweefa Ovaisrael va ka longele Jehova mombuwa, Farao okwa nyamukula ta ti: “Omwene olyelye, ame ndi pwilikine ondaka yaye ndi lekele Israel?” (Ex. 5:2) Nopehe na omalimbililo, konima eshi omahandukilo omulongo a denga edu laEgipti, nokonima eshi Ovaisrael va xupa momake etangakwaita laEgipti pEfuta Litilyana, keshe umwe okwa li a mona kutya enyamukulo lepulo laFarao ola li la yela mo nawa. Jehova okwa kala, noku li Omunaenghono adishe. Oshiwana shaIsrael nasho osha li sha mona kutya Jehova oKalunga kashili noha wanifa po omaudaneko aye.

⁶ Ovaisrael ovo va li va lenga oufembanghenda wokuhumbata edina laJehova, nopehe na omalimbililo, ove na okukala va li va hokolola oiningwanima ikumwifi ya tya ngaho kovana vavo nosho yo kovanailongo ovo va li ovapiya vavo. Shikwao vali, Ovaisrael ova li va lombwelwa va deule ovana vavo va shiive omufika waKalunga uyapuki. Jehova okwa ti: “Mu nokukala ovayapuki, osheshi Aame, Omwene Kalunga keni, omuyapuki.” (Lev. 19:2; Deut. 6:6, 7) Kashi fi tuu oshihopaenenwa shiwa kovadali vokunena, ovo navo ve na okutekulila ovana vavo meendjila diyapuki moku va kwafela va fimanekife edina laKalunga la tumbala! — Lesha Omayeletumbulo 1:8; Ovaefeso 6:4.

7. (a) Ngeenge Ovaisrael va li ovadiinini kuJehova, osha li hashi kumu ngahelipi oiwana oyo ye va dingilila? (b) Aveshe ovo va humbata edina laKalunga ove na oshinakuwanifwa shashike?

⁷ Ngeenge Ovaisrael va li ovadiinini, osha li hashi yandje oundombwedi u na sha nedina laKalunga. Ova kala nale va lombwelwa taku ti: “Noiwana aishe yokombada yedu otai ka mona nokutya, edina lOmwene la tumbulwa kombada yoye, ndee yo otai ke ku tila.” (Deut. 28:10) Shinyemateka, hanga ondjokonona yOvaisrael aishe otai ulike ashike okuhe na oudiinini. Omafimbo nomafimbo, ova kala hava longele oikalunga. Shikwao vali, ngaashi oikalunga yOvakaanan oyo va li hava longele, ova li va ninga ovakwanyanya, hava yambe po ovana vavo nova li hava fininike eehepele. Osho kashi fi tuu oshilihongomwa sha denga mbada kufye okukala alushe hatu hopaenene Omuyapuki a shiya ko, oo twa humbata edina laye mokulikaleka twa yapuka!

8. Jesaja okwa li a pewa oshilonga shilipi kuJehova, naJesaja okwa li e linyenga ngahelipi?

⁸ Jehova okwa li a xunganeka kutya ota ka katuka onghatu oyo tai ke limonikila koshiwana shaye eshi te ke shi mangulula moupika. (Jes. 43:19) Omatukulwa 6 opehovelo embo laJesaja otaa londwele unene shi na sha noiponga oyo ya li tai ka hanga Jerusalem noilando oyo ye shi dingilila. Jehova oo ha konakona omitima monghedi ya wanenena, okwa li a lombwela Jesaja a twikile nokushiivifa elondwelo olo nonande ka li ta ka pwilikinwa kuvahapu. Jesaja okwa li a kumwa nokwa li a hala okushiiva kutya ofiyo onaini oshiwana shaKalunga tashi kala inashi hala okulivela ombedi. Mbela Kalunga okwa li e mu nyamukula ngahelipi? Okwa ti: “Fiyo oilando tai ningi omaputu mu he na ovanhu, nomaumbo mu he novanhu, nedu tali ka ninga ofuka.” — Lesha Jesaja 6:8-11.

9. (a) Onaini exunganeko laJesaja li na sha naJerusalem la li la wanifwa? (b) Onghalo ilipi i li po kunena oyo tai pula tu kale oupafi?

⁹ Jesaja okwa li a pewa oshilonga osho momudo waxuuninwa wokupangela kwohamba Ussia, ile mo 778 K.O.P. lwaapo. Okwa kala ta longo e li omuprofeti oule womido 46 lwaapo fiyo okonima yo 732 K.O.P., a twaalela fiyo opefimbo lepangelo lohamba Hiskia. Osho osha li omido 125 fimbo Jerusalem inashi hanaunwa po mo 607 K.O.P. Kungaho, oshiwana shaKalunga osha kala nale sha londwelwa sha wana kutya oshike sha li tashi ke va ningilwa monakwiiwa. Kunena, Jehova oku na yo oshiwana shaye osho tashi yandje elondwelo laasho tashi ka ningwa monakwiiwa. Okudja ashike eshi oshifo shOshungonangelo  sha hovela okunyanyangidwa oule womido 135, osha kala tashi ladipike ovaleshi vasho va kale ve li oupafi molwaashi epangelo laSatana loukolokoshi otali ka xulifwa po mafiku notali ka pingenwa po kEpangelo lOmido Eyovi laJesus Kristus. — Eh. 20:1-3, 6.

10, 11. Ewanifo lexunganeko laJesaja lilipi Ovaisrael va mona eshi va li muBabilon?

¹⁰ Ovajuda ovaduliki ovo va li ve liyandja kOvababilon ova li va xupa eshi Jerusalem sha hanaunwa po nova li va twalwa moukwatwa kuBabilon. (Jer. 27:11, 12) Konima yomido 70 eshi oshiwana shaKalunga shi li moukwatwa, osha li sha mona nghee exunganeko likumwifa tali wanifwa, olo tali ti: “Omwene, omukulili weni, Omuyapuki waIsrael osho ta ti: Omolweni ohandi tumu kuBabel, handi va shingi ngaashi oonakufaduka po.” — Jes. 43:14.

¹¹ Metwokumwe nexunganeko olo, opa li pa ningwa oshiningwanima moufiku umwe lwopehovelo laOktoba 539 K.O.P., osho sha li sha tilifa ounyuni. Fimbo ohamba yaBabilon novanenenhu vakwao va li tava nu omaviinyu oo a li moikwatelwa oyo ya tinhwa kotembeli yaJerusalem nova li tava fimaneke oikalunga yavo, omatangakwaita Ovamedia nOvapersia okwa li a kwata ko Babilon. Mo 538 ile 537 K.O.P. oo a li a kwata ko Babilon, Kores, okwa li a lombwela Ovajuda va shune nova ka tungulule otembeli yaKalunga muJerusalem. Ashishe osho osha hangwa nale sha xunganekwa kuJesaja, mwa kwatelwa eudaneko laJehova lokufila oshisho nokwaamena oshiwana shaye osho she livela ombedi eshi sha alukila kuJerusalem. Kalunga okwa li a popya shi na sha navo a ti: “Oshiwana eshi nde limela, tashi ka vilikila ehambelelo lange.” (Jes. 43:21; 44:26-28) Eshi oshiwana osho sha li moupika sha shuna kuJerusalem nokutungulula otembeli yaJehova, osha li sha mona oumbangi kutya Jehova Kalunga aeke kashili, oha wanifa po alushe omaudaneko aye.

12, 13. (a) Oolyelye va li va kwatelwa mo mOvaisrael eshi va tungulula elongelokalunga lashili? (b) ‘Eedi dimwe’ oda teelelwa di ninge shike eshi tadi yambidida ‘Israel yaKalunga,’ nodi na eteelelo lilipi?

¹² Ovanhu omayovi ovo vehe fi Ovaisrael ova li va ninga oshitukulwa shoshiwana osho sha aluka kuBabilon, nolwanima ovanhu vahapu vomoiwana imwe ova ka ninga ovauyimo mOujuda. (Esra 2:58, 64, 65; Est. 8:17) Kunena, “ongudu inene” ‘yeedi dimwe’ daJesus, otai yambidida noudiinini Ovakriste ovavaekwa ovo ve li ‘Israel yaKalunga.’ (Eh. 7:9, 10; Joh. 10:16, NW; Gal. 6:16) Ovavaekwa nosho yo ongudu inene ove na oufembanghenda wokwiifanwa nedina Eendombwedi daJehova.

¹³ Momukokomoko wEpangelo lOmido Eyovi laKristus, ongudu inene otai ka hepaululila nehafo linene ovanyumunwa kutya osha li sha tya ngahelipi okukala umwe womEendombwedi daJehova momafiku axuuninwa exulilo longhalelo  ei yoinima. Tu li oilyo yongudu inene, ohatu ka dula ashike okuninga ngaho ngeenge otwa kala metwokumwe nedina letu nokukendabala okukala ovayapuki. Shikwao vali, kashi na nee mbudi kutya ohatu kendabala shi fike peni, otu na okupula ediminepo apa twa dopa okukala ovayapuki efiku keshe, nokudimina kutya otu va lunde nosho yo kutya okukala twa humbata edina laKalunga liyapuki oshi li oufembanghenda munenenene. — Lesha 1 Johannes 1:8, 9.

14. Paudeko letu, edina Jehova otali ti shike?

¹⁴ Opo tu hapupalife olupandu letu li na sha noufembanghenda wokuhumbata edina laKalunga, osha fimana okukala hatu dilonga keityo lalo. Edina laKalunga, olo la dja koshityalonga shOshiheberi osho tashi ulike kokukatuka eenghatu notashi dulu okutolokwa ‘okuningifa,’ luhapu ohali tolokwa “Jehova.” Onghee hano, paudeko letu, edina Jehova otali ti, “Oha ningifa.” Eityo olo otali wapalele onghandangala oyo Jehova ta dana e li Omushiti weshito alishe nOmuwanifi womaudaneko aye. Ngaashi oiningwanima tai shi ulike, Jehova ota twikile okuningifa ehalo nelalakano laye li shiivike kashi na nee mbudi kutya ovapataneki, ngaashi Satana, otava kendabala okuninga shike opo va ye moshipala okuwanifwa kwehalo laYe.

15. Jehova okwa holola ngahelipi oukwatya waye wonhumba eshi a li ta yelifa kombinga yedina laye? (Tala oshimhungu “ Edina olo tali ti sha lela.”)

¹⁵ Eshi Jehova a li a pa Moses oshinakuwanifwa shokupitifa mo Ovaisrael muEgipti, okwa li a yelifa eityo ledina laye te litangumuna, ta holola oukwatya waye wonhumba ta longifa oshityalonga shOshiheberi sha yukila keityo ledina laye. Ombibeli oya ti: “Ndele Kalunga ta ti kuMoses: Ohandi ka kala osho nda hoolola okukala [ile, Ame ohandi ka kala osho handi ka kala]. Ndee ta ti vali: U nokunyamukula ngaha Ovaisrael, u tye: Ohandi ka kala okwa tuma nge kunye.” (Ex. 3:14, NW) Kungaho, Jehova ota ka kala keshe osho sha pumbiwa opo a wanife po elalakano laye kashi na nee mbudi kutya omonghalo ya tya ngahelipi. Okwa li a ulikila Ovaisrael ovo va li moupika kutya oku li omuxupifi, omwaameni, omuwiliki nomufilishisho oo a li a wanifa po eemhumbwe davo dopalutu nodopamhepo.

16, 17. (a) Ongahelipi hatu dulu okuulika olupandu li na sha noufembanghenda wokuhumbata edina laKalunga? (b) Oshike hatu ka kundafana moshitukulwa tashi landula?

¹⁶ Kunena, Jehova ota twikile okukala metwokumwe neityo ledina laye mokuwanifa po eemhumbwe detu adishe dopamhepo nodopalutu. Ashike eityo ledina laKalunga inali ngabekelwa ashike kwaasho a hoolola a kale. Ola kwatela mo yo osho ha ningifa tashi shiiva shi na sha noilonga yEendombwedi daye eshi tadi wanifa po elalakano laye. Okudilonga kwaasho otaku ke tu kwafela tu kale metwokumwe nedina laye. Kåre wokoNorway oo e na omido 84 nokwa kala Ondombwedi iladi oule womido 70 da pita, okwa ti: “Ondi wete kutya oshi li oufembanghenda munene okulongela Jehova, Ohamba yaalushe nokukala oshitukulwa shovanhu ovo va lukilwa edina laye liyapuki. Oshi li alushe oufembanghenda munene okuyelifa oshili yOmbibeli nokumona oipala yovanhu tave limemesha kehafo nove udite ko. Pashihopaenenwa, ohashi hafifa nge ngeenge handi va hongo nghee ekuliloyambo laKristus hali longo, nonghee okupitila mulo tava dulu okumona omwenyo waalushe mounyuni mupe wombili nowouyuki.”

¹⁷ Natango onghee ngoo ku na oitukulwa imwe omo shidjuu okumona ovanhu ovo va hala okulihonga kombinga yaKalunga. Ndele nande ongaho, ngaashi Kåre, mbela iho kala wa hafa neenghono ngeenge owa hange umwe ta pwilikine noto dulu oku mu honga shi na sha nedina laKalunga? Ndele mbela ongahelipi hatu dulu okukala Eendombwedi daJehova nopefimbo opo tuu opo ohatu yandje oundombwedi kombinga yaJesus? Epulo olo olo hatu ka kundafana moshitukulwa tashi landula.