EFIKU limwe Fernando * okwa li a tila eshi ovakulunhuongalo vavali ve mu pula va kundafane naye. Konima eshi va kala tava talelwa po komupashukilishikandjo lwoikando, ovakulunhuongalo ova li va yelifila Fernando osho a pumbwa okuninga opo a kale a wana okupewa omaufembanghenda a wedwa po meongalo. Mokweendela ko kwefimbo, Fernando okwa li a hovela okulipula nongeenge oku na ngoo fiku a ka nangekwe po e li omukulunhuongalo. Lwanima omupashukilishikandjo okwa ka talela po vali eongalo lavo. Mbela oshikando eshi ovakulunhuongalo otave ke mu lombwela shike?

Fernando okwa li a pwilikina nawa eshi umwe womovakulunhuongalo a li a popya naye. Omumwatate okwa li a popya shi na sha na-1 Timoteus 3:1 ndele ta ti kutya ovakulunhuongalo ova shangelwa onhumwafo tai ti kutya Fernando okwa nangekwa po e li omukulunhuongalo. Eshi Fernando e di uda, okwa kala omutumba nawa a yukilila ndele ta pula ta ti: “Wa ti ngahelipi?” Eshi omumwatate a endulula eendjovo daye, Fernando okwe limemesha. Opo nee, eshi sha ka shiivifwa meongalo kutya okwa ninga omukulunhuongalo, keshe umwe okwa li te limemesha.

Mbela osha puka okukala wa hala okupewa omaufembanghenda meongalo? Hasho nandenande. Timoteus wotete 3:1 okwa ti: “Umwe ngenge a hala oshilonga shoufitaongalo, oye okwe [lihalela] oshilonga shiwa.” Ovalumenhu vahapu Ovakriste ohava tula moilonga etwomukumo olo nokuninga exumokomesho lopamhepo opo va kale va wana okupewa omaufembanghenda meongalo. Osho osha etifa pa kale ovakulunhuongalo omayovi omilongo moshiwana shaJehova va pyokoka novayakuliongalo, naasho oshi li enangekonoupuna. Ndele molwaashi ope na ekulo linene momaongalo, opa pumbiwa ovamwatate vahapu va ninge exumokomesho. Mbela omonghedi ya yuka ilipi tava dulu oku shi ninga? Mbela ovo va hala oshilonga shokupashukila meongalo ove na okukala tava diladila unene shi na sha nasho ngaashi Fernando?

Outumbulilo womOmbibeli oo wa tolokwa “hala” owa dja koshityalonga shOshigreka osho tashi yandje ediladilo lokukala wa halelela ile okulovelela oshinima  shonhumba. Osho otashi dulika shi ku diladilife omunhu oo ta lovelele oshiimati shiwa osho sha endjelela komuti. Ashike okukala wa hala ‘oufitaongalo’ itashi ti omunhu oku na okukala a fa te u lovelele pafaneko molwaashi a hala ondodo. Omolwashike mbela? Omolwaashi ovo va hala shili okulonga ve li ovakulunhuongalo ove na okulonga ‘oilonga iwa’ ponhele yokukala va hala ondodo.

Oiteelelwa ihapu i na sha nokulonga oilonga iwa otai hangwa mu 1 Timoteus 3:2-7 nosho yo Titus 1:5-9. Raymond oo a kala omukulunhuongalo oule wefimbo lile okwa popya shi na sha nomifikamhango da denga mbada odo da popiwa momishangwa odo, a ti: “Ame ondi wete kutya omaukwatya etu oo unene e na oshilonga. Oshoshili kutya okupopya nokuhonga oinima ya fimana, ashike [oo ta lalakanene oinakukwanifwa] okwa pumbwa yo okukala omuhenoshipo, a koshoka paenghedi, omunaendunge, e na elandulafano, ha yakula ovaenda noku na ondjele.”

Omumwatate oo a hala shili okuyakula meongalo oku na okukala omuhenoshipo mokuhenuka oludi keshe lokuhenouyuki nokuhenoukoshoki. Oku na okukala e na eenghedi diwa, omunaendunge, e na elandulafano noku na ondjele, novaitaveli vakwao ove mu lineekela a kwatele komesho noku va kwafela ngeenge ve na omaupyakadi. Ngeenge oha yakula ovaenda, oku li odjo yetwomukumo kovanyasha nokwaavo va pe moshili. Oha hekeleke noha kwafele ovo tava vele novanamido molwaashi oku hole osho shiwa. Oha kulike omaukwatya oo opo a etele vamwe ouwa ndele hakukala ashike ta yandje elitulemo kokunangekwa po e li omukulunhuongalo. *

Nonande olutu lovakulunhuongalo ohali hafele okuyandja omayele netwomukumo, omunhu oo ta lalakanene okuyakula meongalo oye e na okutula moilonga oiteelelwa yopamishangwa. Omukulunhuongalo a pyokoka wedina Henry okwa ti: “Ngeenge owa hala okuyakula meongalo, longa noudiinini opo u kale wa wana.” Okwa yelifa ta ulike kOmuudifi 9:10, a ti: “‘Longa ashishe to shi dulu neenghono doye.’ Keshe ngoo oshilonga ovakulunhuongalo tave ku pe, shi longa nelitulemo. Kala u hole oilonga keshe oyo to pewa u longe meongalo, mwa kwatelwa okukomba mOlupale. Mokweendela ko kwefimbo, oilonga yoye neenghendabala doye otadi ka didilikwa mo.” Ngeenge owa hala fiku limwe u ka  ninge omukulunhuongalo, kala ho longo noudiinini nokukala omulineekelwa moilonga aishe iyapuki. Kala u shiivikile elininipiko ndele haunhwa. — Mat. 23:8-12.

Ovo va hala okupewa omaufembanghenda meongalo otashi dulika va yelekwe va holole ehalo lavo monanguwi ile va kendabale okunwefa olutu lovakulunhuongalo. Vamwe ohava kenyanana ngeenge ovakulunhuongalo tave va pe omayele. Ovanhu va tya ngaho ove na okulipula kutya, ‘Mbela onda hala okuxumifa komesho omahalo ange mwene ile onda hala okufila oshisho eedi daJehova nelininipiko?’

Ovo va hala okupewa omaufembanghenda kave na okudimbwa oshiteelelwa shimwe vali shovakulunhuongalo, okuninga “ovahopaelelwa voufita.” (1 Pet. 5:1-3) Omunhu oo e li oshihopaenenwa shiwa keongalo oha henuka omadiladilo neenghatu doukengeleledi. Oku na okukulika elididimiko kashi na nee mbudi kutya okwa nangekwa po ile hasho. Okuninga omukulunhuongalo inaku hala okutya omunhu ita ningi vali omapuko. (Num. 12:3; Eps. 106:32, 33) Shikwao vali, omumwatate otashi dulika aha kale e udite ‘meliudo laye mu na sha,’ ile tu tye, e na eliudo la yela, ashike vamwe otashi dulika ve na omatomheno oku mu pa oushima moshinima shonhumba. (1 Kor. 4:4) Onghee hano, ngeenge ovakulunhuongalo ove ku pe omayele mawa a kanghamena kOmbibeli, kendabala okupwilikina nopehe na okukenyanana. Opo nee, a tula moilonga.

Ovamwatate vahapu ohava kala ve wete va teelela efimbo lile fimbo inava nangekwa po ve li ovakulunhuongalo. Ngeenge owa kala wa “hala oshilonga shoufitaongalo” oule womido, mbela efimbo limwe oho kala to lipula unene nasho? Ngeenge osho, didilika eendjovo edi da nwefwa mo: “Okuteelela efimbo lile taku kulaukifa omwenyo. Ndelenee eteelelo la wanifwa olo omuti womwenyo.”— Omayel. 13:12.

Omunhu otashi dulika a kale a polimana ngeenge ita hange diva elalakano olo a halelela okuhanga. Abraham naye osho a li e udite ngaho. Jehova okwa li e mu udanekela kutya ota ka dala okaana okamati, ndele opa pita omido dihapu vo naSara vehe na okaana. (Gen. 12:1-3, 7) Eshi Abraham a ninga omunamido, okwa ti: ‘Omwene Kalunga, Ove to pe nge shike, osheshi ame handi i ndihe noludalo. Ove ino pa nge oludalo.’ Jehova okwa li e mu shilipaleka kutya eudaneko olo e mu udanekela li na sha noludalo otali ka wanifwa po. Ndele opa li pa pita vali omido di dulife 14 fimbo Kalunga ina wanifa po eendjovo daye odo. — Gen. 15:2-4; 16:16; 21:5.

Mbela Abraham okwa li a kanifa ehafo laye mokulongela Jehova eshi a li a teelela eudaneko olo li wanifwe po? Hasho nandenande. Ka li a limbililwa eudaneko laKalunga. Okwa twikila okukala a teelela nodjuulufi oidjemo iwa. Omuyapostoli Paulus okwa ti: “[Abraham okwa] mona osho sha udanekwa, eshi a teelela nokulididimika.” (Heb. 6:15) Xuuninwa, Kalunga Omunaenghono adishe okwa li a nangeka noupuna omulumenhu oo omudiinini shi dulife pwaasho a li a teelela. Oshike hatu lihongo kuAbraham?

Ngeenge owa hala okuyakula u li omukulunhuongalo ndele ino nangekwa po natango nonande opa pita omido dihapu, twikila okukala we lineekela Jehova. Ino kanifa ehafo loye moilonga yaye. Warren, oo a kala ta kwafele ovamwatate vahapu va ninge exumokomesho  lopamhepo, okwa ti: “Otashi pula efimbo opo pa kale pe na oumbangi wa yela oo tau ulike kutya omumwatate wonhumba okwa wana okunangekwa po. Mokweendela ko kwefimbo, okudula noikala yomumwatate otai ka hololwa kanini nakanini konghedi omo te lihumbata naashi ta wanifa po oinakuwanifwa yaye. Vamwe ova itavela kutya otava ka pondola ashike ngeenge ova nangekwa po. Omadiladila a tya ngaho okwa puka notaa ningifa omunhu a kale a wililwa po. Ngeenge oto longele Jehova noudiinini keshe apa u li nakeshe eshi to longo, kungaho owa pondola.”

Omumwatate umwe okwa kala a teelela okunangekwa po e li omukulunhuongalo omido di dulife pomulongo da pita. E na momadiladilo eyelifo li shiivike nawa olo li li membo laHesekiel etukulwa 1, okwa popya oshilihongomwa osho e li honga a ti: “Jehova oha shingi etemba laye, ile tu tye ehangano laye, ponhapo oyo a hoolola. Osho sha fimana efimbo laJehova ndele haletu. Ngeenge tashi uya poshinima shi na sha nokukala nda hala okuyakula ndi li omukulunhuongalo, kashi na sha naasho nda hala ile handi diladila osho shi ningwe. Otashi dulika osho nda hala hasho Jehova e wete nda pumbwa.”

Ngeenge ou na elineekelo loku ka longa fiku limwe u li omupashukili Omukriste, shi ninga elalakano loye okuyambidida omhepo iwa yeongalo. Ngeenge ou wete ito nangekwa po diva, henuka okukala u na oshisho nokuhe na elididimiko. Raymond oo a tumbulwa metetekelo, okwa ti: “Okukala wa halelela oshinima shonhumba ohashi imbi omunhu a kale a wanenwa. Ovo hava kala alushe tave lipula ashike nokupewa oinakuwanifwa, ohave liimbi ehafo olo hali di mokulongela Jehova.” Kulika oiimati yomhepo yaKalunga pauyadi, unene tuu elididimiko. Kendabala okuxwepopaleka oupamhepo woye okupitila mokukonakona Omishangwa. Tamununa mo oilonga yoye yokuudifa onghundana iwa nokukonakona Ombibeli naavo ve na ohokwe. Kwatela komesho oukwaneumbo woye mokuninga oinima yopamhepo nokuninga elongelokalunga loukwaneumbo. Kala ho hafele omhito keshe u li novamwaxo. Kungaho oto ka hafela efimbo olo wa teelela okuhanga elalakano loye.

Okulalakanena oinakuwanifwa meongalo oku li oufembanghenda wa dja kuJehova. Onghee hano, Ye nehangano laye ina hala ovo tava lalakanene oinakuwanifwa va kale va kenyanana noinava hafa eshi tava longo oilonga yaye. Kalunga oha yambidida noha nangeke noupuna aveshe ovo tave mu longele nomalinyengotomheno a yuka. Ngaashi tu shi shii, komanangekonoupuna aye aeshe ‘ita wedele ko oshilonga shidjuu.’— Omayel. 10:22.

Nonande owa kala to lalakanene oinakuwanifwa efimbo lile, oto dulu natango okuninga exumokomesho lopamhepo liwa. Eshi to kendabala okukulika omaukwatya oo a pumbiwa, nokulonga noudiinini meongalo nopehe na okuhauluka oukwaneumbo weni, oto ka kala u na ondjokonona yoilonga oyo itai ka dimbuwa nande. Kala alushe wa hafa eshi to longele Jehova, kashi na nee mbudi kutya owa pewa oshilonga sha tya ngahelipi.