Oshipalanyole Shokombada | OTO DULU OKWEEHENA POPEPI NAKALUNGA
Mbela ou wete wa ehena popepi naKalunga?
CHRISTOPHER omulumenhu omunyasha wokuGhana okwa ti: “Okukala u na ekwatafano lopofingo naKalunga ohashi ku ningifa u kale u udite u li meameno nowa pama. Oho kala u wete kutya Kalunga oku na ko nasha naave.”
HANNAH okakadona komido 13 kokuAlaska, ko-U.S.A oka ti: “Kalunga oha kala e wete omaudjuu oye aeshe, he ku ulikile ohole inene nohe ku pe elitulemo li dulife pwaalo wa pumbwa.”
GINA omukainhu wokoJamaica womido 40 nasha okwa ti: “Okukala u shii kutya ou na ekwatafano lopofingo naKalunga oshinima sha denga mbada nohashi ngungumaneke omaliudo.”
Kakele kaChristopher, Hannah naGina, ovanhu vahapu mounyuni aushe ova tomhwa kutya Kalunga ohe va tale ko ve li ookaume kaye. Mbela naave osho ho kala u udite ngaho? Mbela oho kala u wete wa ehena popepi naKalunga? Ile owa hala okweehena popepi elela naye? Otashi dulika u lipule kutya: ‘Mbela otashi shiiva ngoo omunhu wongaho a kale e na ekwatafano lopofingo naKalunga Omunaenghono adishe? Nongeenge osho, ongahelipi mbela?’
OTO DULU OKUKALA WA EHENA POPEPI NAKALUNGA
Ombibeli otai ti oto dulu okweehena popepi naKalunga nokukala nekwatafano lopofingo naye. Oya popya yo kutya Kalunga okwa ifana tatekulululwa Omuheberi Abraham ‘kaume kaye.’ (Jesaja 41:8) Didilika eshivo lopahole olo tali hangwa muJakob 4:8, olo tali ti: “Eheneni kuKalunga, opo nee Ye ta ehene kunye.” Osho otashi ulike kutya oto dulu okukala u na ekwatafano lopofingo naKalunga nokupanga oukaume naye. Ndele molwaashi Kalunga iha monika, ongahelipi hatu dulu ‘okweehena’ popepi naye opo tu hafele ekwatafano liwa naye?
Opo tu nyamukule epulo olo, diladila kwaasho hashi ningwa po ngeenge ovanhu tava pange oukaume. Okupanga oukaume luhapu ohaku hovele pokati kovanhu vavali tava lombwelafana omadina. Opo nee, eshi tava ende tava kundafana pandjikilile, tava tukulilafana omadiladilo nokuhololelafana omaliudo, oukaume wavo ohau ende tau kolo. Naashi nee tava kendabala okuningilafana oinima, ohashi pameke ekwatafano lavo. Okupanga oukaume naKalunga nako otaku dulu okuningwa monghedi ya faafana. Natu ka taleni kutya ongahelipi taku dulu okuningwa.
Otashi dulika yo u hafele oikundafanwa ei
OSHUNGONANGELO
Edina laKalunga ou li shii ngoo noho li longifa tuu?
Kalunga okwe tu hololela edina laye okupitila mOmbibeli eshi a ti: “Aame Jehova. Olo edina lange.”
