Mbela ope na ngoo oumbangi wovalafululi voikulunima oo tau yambidida ondjokonona yOmbiibeli? Mo 2014, oshitukulwa shoshifo shedina Biblical Archaeology Review osha pula epulo sha ti: “Ovanhu vangapi mOmbiibeli yOshiheberi va shilipalekwa kovalafululi voikulunima?” Opa yandjwa enyamukulo tali ti: “Ove li 50 lwaapo.” Omunhu umwe oo ina tumbulwa momusholondodo moshitukulwa osho omulumenhu wedina Tattenai. Tattenai okwa li omulumenhu a tya ngahelipi? Natu kundafaneni onghandangala yaye pauxupi oyo a dana mondjokonona yOmbiibeli.

Pomhito imwe Jerusalem osha li oshitukulwa shOuhamba wa kula waPersia. Oshilando osho osha li moshitukulwa osho Ovapersia have shi ifana kOmbinga inya yOmulonga, sha hala okutya, kouninginino waEufrata. Konima eshi Ovapersia va finda Babilon, ova li va mangulula eenghwate daJuda noku di pa epitikilo di ka tungulule otembeli yaJehova muJerusalem. (Esra 1:1-4) Ashike ovatondi vOvajuda ova li va pataneka oilonga yavo nova ti kutya otai ulike kutya Ovajuda ova tukululila Persia oshibofa. (Esra 4:4-16) Pefimbo lepangelo laDarius wotete (522-486 K.O.P), omunambelewa waPersia wedina Tattenai okwa li a pula kombinga yoshinima osho. Ombiibeli oya ti kutya okwa li “omupangeli wombinga yokouninginino waEufrat.” — Esra 5:3-7.

Ope na omashangelo mahapu okoipelende e na edina Tattenai oo tashi dulika a li a talwa ko e li oinima ya tuvikilwa yovapambele. Oshipelende shimwe osho tashi ulike kepambafano lomupambele umwe naTattenai oo a popiwa mOmbiibeli osho omukanda welandakanifo oo wa shangwa mefelemudo eti-20 pefimbo laDarius wotete, mo 502 K.O.P. Omukanda oo owa tumbula ondombwedi oyo ya li omupiya “waTattannu, omupangeli wOmbinga inya yOmulonga,” oo ta ifanwa nedina Tattenai membo lOmbiibeli laEsra.

Omulumenhu oo okwa li a dana onghandangala ilipi? Mo 535 K.O.P., Kores Munene okwa li a unganekulula eenhele douhamba waye di kale hadi ifanwa oitukulwa, nashimwe shomuyo osha li hashi ifanwa Babilon nOmbinga inya yOmulonga. Oshitukulwa osho lwanima osha ka tukulwa moitukulwa ivali, nashimwe osha li hashi ifanwa kOmbinga inya yOmulonga. Oshitukulwa osho osha li sha kwatela mo Koele-Siria, Foinikia, Samaria nosho yo Juda, notashi dulika sha li hashi pangelwa okudja kuDamaskus. Tattenai okwa pangela oshitukulwa osho okudja mo 520 fiyo 502 K.O.P.

Konima eshi Tattenai a li a ya kuJerusalem a ka konakone omalundilo e na sha nounashibofa, okwa li a lombwela Darius kutya Ovajuda ova ti kutya ova pewa epitikilo kuKores va tungulule otembeli yaJehova. Omakonakono oo a ningwa moikulunima yomombala otaa koleke omapopyo oo. (Esra 5:6, 7, 11-13; 6:1-3) Onghee hano, Tattenai okwa li a lombwelwa aha ye mo olunyala, nokwa li a dulika. — Esra 6:6, 7, 13.

Oushili oyoo kutya “omupangeli wombinga yokouninginino waEufrat” ina longa oshilonga shonhumba shididilikwedi mondjokonona. Ndele didilika kutya Omishangwa ode mu tumbula node mu pa edinafimaneko li li mondjila. Oushili oo otau tu pe vali oumbangi munini kutya ovalafululi voikulunima luhapu ohava yambidida oushili wondjokonona yOmbiibeli.