Samuel okwa kala omudiinini kuJehova monghalamwenyo yaye aishe. Eshi a li okamatyona, kali a hopaenena elihumbato lii lovanamati vaEli, Hofni naPinehas. (1Sam 2:22-26) Samuel okwa li a twikila okukula, na Jehova okwa kala pamwe naye. (1Sam 3:19) Eshi a ninga omukulunhu, okwa li a twikila okulongela Jehova noudiinini, nonande ovanamati vaye kava li ovadiinini. — 1Sam 8:1-5.

Oshihopaenenwa shaSamuel otashi tu hongo shike? Ngeenge ou li omunyasha, kala u shii kutya Jehova oku wete omashongo oo to piti muo nonghee u udite. Ota dulu oku ku kwafela u kale u na ouladi. (Jes 41:10, 13) Ngeenge ou na omona woye iha longele Jehova, kala wa hekelekwa okushiiva kutya Samuel kali ta dulu okufininika ovanamati vaye va kale ovadiinini kuJehova. Nonande okwa li a efela oinima momake aJehova, okwa li a kanyatela oudiinini waye nokuhafifa Xe womeulu, Jehova. Otashi dulika oshihopaenenwa shoye shiwa tashi ke linyengifa okaana koye ka longele Jehova.

TALENI OKAVIDIO LIHONGA KUVO — SAMUEL, NDELE TAMU KUNDAFANA OMAPULO TAA SHIKULA:

• Ongahelipi Samuel a li a ulika ouladi eshi a li okamati?

• Danny okwa li a ulika ouladi ngahelipi?

• Samuel okwa tula po oshihopaenenwa shilipi e li omukulunhu?

• Ovadali vaDanny ova tula po oshihopaenenwa shiwa shilipi?