Kaume omunhu oo hamu kala mu na ekwatafano naye “molwaashi u mu hole, ile we mu lenga.” Pashihopaenenwa, Jonatan naDavid ova li va panga oukaume wa twa kekipa, konima eshi David a dipaa Goliat. (1Sam 18:1) Keshe umwe womuvo, okwa li e na omaukwatya oo a hokwa mu mukwao. Onghee hano, oukaume wopofingo owe likolelela kokushiiva nawa omunhu oo tamu pange naye oukaume. Naasho ohashi pula efimbo lihapu neenghendabala. Ndele kointaneta, ovanhu otava dulu okupanga oukaume noupu mokukala ashike tava click. Molwaashi ovanhu kointaneta ohava dulu okuhoolola eendjovo davo noukeka nonghedi omo tave lihumbata, otava dulu okuliningifa va fa ve li nawa, nonande hasho ve li. Onghee hano, osha fimana okulongifa eendunge dokuyoolola, ngeenge tashi uya pokupanga oukaume kointaneta. Ino tila okwaanya okutambula ko omaindilo aavo va hala okupanga oukaume naave, molwaashi ashike wa tila oku va udifa nai. Vamwe ova hoolola okuhapanga oukaume kointaneta, opo vehe li tu le moshiponga. Ashike ngeenge owa hoolola okulongifa omakwatafano opaintaneta, oshike u na okukaleka momadiladilo?

TALENI OKAVIDIO LUNGAMENA OMAKWATAFANO OPAINTANETA, NDELE TAMU KUNDAFANA OMAPULO TAA SHIKULA:

• Omolwashike u na okulungama ofimbo ino shanga sha, ile ino tula omafano komakwatafano opaintaneta?

• Omolwashike u na okuhoolola pandunge ookaume kointaneta?

• Omolwashike u na okulitulila po omangambeko, ngeenge tashi uya pefimbo olo ho longifa komakwatafano opaintaneta ? — Ef 5:15, 16