Omapulo a dja kovaleshi

Omolwashike Eendombwedi daJehova ihadi kufa ombinga mokudenga ouhalasha kumwe, ngeenge Ombiibeli inai popya kombinga yasho?

Okudenga kumwe ouhalasha vomaviinyu (ile oshikunwa vali shimwe shoalkoholi) oku li onghedi ya kala ko nale, nohaku ningwa sha yoolokafana keenhele di lili noku lili. Omafimbo amwe ovo tava denge ouhalasha kumwe ohave va denge kumwe tava kwelengedja. Omunhu oo ha hovele okuyelula okahalasha kaye luhapu oha kala a hala okuhalelwa, ile okuhalela vamwe ehafo, oukolele muwa, okukalamwenyo kule, naikwao ya fa oyo. Vamwe ohave mu waimine mokutya sha, tava ulike kutya otava tu kumwe nasho, ile va yelule ouhalasha vavo nokunwa mo momaviinyu. Ovanhu vahapu ova tala ko onghedi oyo inai nyika oshiponga, ile i li ashike onghedi iwa yokuhafela pamwe novanhu vakweni, ashike Eendombwedi daJehova odi na omatomheno mawa eshi ihadi kufa ombinga mokudenga ouhalasha kumwe.

Osho itashi ti ngeno Ovakriste inava halela ovanhu vakwao ehafo, ile oukolele muwa. Olutuwiliki lomefelemudo lotete ola li la shangela omaongalo onhumwafo, nola xulifa noitya oyo taku dulu okutiwa kutya otai ti; “kaleni noukolele muwa,” “kaleni nawa,” ile “nashi mu endele nawa.” (Oilonga 15:29) Novalongelikalunga vamwe ova li va lombwela eehamba dopanhu va ti kutya: “Omwene wange . . . na kale nomwenyo fiyo alushe,” ile “Ohamba nai kale nomwenyo fiyo alushe.” — 1 Eehamba 1:31; Nehemia 2:3.

Ashike mbela, oshike naanaa sha kwatelwa meenghedindjikilile dokudenga ouhalasha kumwe? Oshungonangelo yOshiingilisha, ye 1 Januali 1968, oya popya ya kufa mo-The Encyclopædia Britannica (1910), Embo 13, epandja 121, ya ti: “Onghedindjikilile yokulongifa okahalasha komaviinyu yokuhalela vamwe ‘oukolele muwa’ otashi dulika ya dja konghedi yonale yopalongelokalunga yokunwa opo omunhu a yambele oikalunga noonakufya. Ovagreka nOvaroma ngeenge tava li ohava tile oikunwa koikalunga yavo, nopoitendele yavo yomadano ohava denge ouhalasha kumwe tave shi ningile oikalunga noonakufya.” O-encyclopedia oya weda ko ya ti: “Onghedindjikilile oyo i na ekwatafano neenghedindjikilile domayambo oikunwa, oi na okukala ya kala onghedi yokunwa omolwoukolele wovanamwenyo.”

Mbela osho otashi longo nokunena? O-International Handbook on Alcohol and Culture yomo 1995, oya ti: “[Okudenga ouhalasha kumwe] oku na okukala onghedi yoshipaani yokuyamba oikunguluki, omo oshikunwa shonhumba shiyapuki hashi yambelwa oikalunga: nomunhu oha yandje ohonde, ile omaviinyu opo a mone elao, nohai ilikana pauxupi ta ti; ‘omwenyo mule,’ ile ‘oukolele.’ ”

Oshoshili kutya nonande oshinima shonhumba, okulongwa kwasho, ile onghedi yonhumba, oya dilila, ile oya fela kwaai yomalongelokalunga oipupulu onale, itashi ti kutya omulongelikalunga washili ita dulu okulongifa oshinima sha tya ngaho. Diladila koiimati yedina pomegranate. O-Bible encyclopedia oya ti kutya: “Oiimati ya-pomegranate oya fa ya kala hai longifwa i li edidiliko liyapuki momalongelokalunga oshipaani.” Ndele nande ongaho, Kalunga okwa li a tya kutya, eengodi da-pomegranate nadi tulwe kominghulo doshikutu shomupristeri, nosho yo kutya o-pomegranate nai longifwe mokufeweka eengudi dotembeli oyo ya tungwa kuSalomo. (Exodus 28:33; 2 Eehamba 25:17) Shikwao vali, olinga yehombolo oya li pomhito imwe ya talika ko i li oshinima shopalongelokalunga. Ashike ovanhu vahapu kunena kave shii oshinima osho, nohava tale ko olinga i li ashike edidiliko kutya omunhu okwa hombola, ile okwa hombolwa.

Ongahelipi shi na sha nokulongifa omaviinyu moinima yelongelokalunga? Pashihopaenenwa, pomhito imwe ovalumenhu vokuSekem ovo va li hava longele Baal “ova ya mongulu yoshikalunga shavo, va lya nova nwa, ndele tava tuku Abimelek,” Omona waGideon. (Ovatokolipangeli 9:​22-​28) Mbela oto diladila kutya umwe oo e li omudiinini kuJehova ota kufa ombinga mokunwa kwa tya ngaho, omo tashi dulika tava halele Abimelek a ningilwe sha shii koikalunga? Pefimbo opo pa li Ovaisrael vahapu va tukululila Jehova oshibofa, Amos okwa li a popya kutya: “Ndele poaltari keshe hava nangala kombada yeenhanga da yandjelwa ombabyona oshikwatifo, ndele vo hava nu omaviinyu a futifwa mongulu yakalunga kavo.” (Amos 2:8) Mbela ovalongelikalunga vashili otava ka kufa ngoo ombinga moshinima sha tya ngaho, kutya nee oshikunwayambo otashi yambelwa oikalunga, ile otashi nuwa ashike pomhito oyo? (Jeremia 7:​18) Ile omulongelikalunga washili ota dulu ngoo okuyelula okahalasha komaviinyu nelalakano lokuhalela umwe omanangekonoupuna, ile a pewe onakwiiwa iwa koikalunga?

Shihokwifa, peemhito dimwe ovalongeli vashili vaJehova ova li hava yelula omake avo tava pula va ningilwe sha shiwa. Ova li va yelula omaoko avo kuKalunga kashili. Ombiibeli oya ti: “Salomo eshi a ehena po, a kala ofika koaltari yOmwene . . . nokwa yelula omake aye keulu ndele ta ti: Omwene Kalunga kaIsrael, meulu nokombada yedu alishe kakuna ou e kufa . . . meumbo loye meulu tu uda hano u tu dimine po.’ ” (1 Eehamba 8:​22, 23, 30) Sha faafana, ‘Esra okwa hambelela Omwene Kalunga . . . oshiwana ashishe osha nyamukula nokuyelula omake asho: “Amen! Amen!” opo ve linyongamena nokwiilikana Omwene, oipala yavo ya twa pedu.’ (Nehemia 8:6; 1 Timoteus 2:8) Oshoshili kutya, ovadiinini ovo kava li tava yelula omaoko avo keulu va pewe omanangeko noupuna kukalunga kelao. — Jesaja 65:11.

Ovanhu vahapu kunena ovo hava kufa ombinga mokudenga ouhalasha kumwe otashi dulika ihava kala ve shii kutya otava pula va pewe sha, ile va nangekwe noupuna koikalunga, nokave shii yo kutya omolwashike hava yelula ouhalasha vavo vomaviinyu mombada. Ndele nande ongaho, okukala inave shi diladila nawa, hako taku ningifa Ovakriste vashili va kale ve udite va fininikwa ve va hopaenene.

Osha shiivika nawa kutya Eendombwedi daJehova ohadi henuka okukufa ombinga moinima imwe vali oyo ovanhu vahapu hava ningi. Pashihopaenenwa, ovanhu vahapu ohava ningi omadidiliko ngeenge ve li pomadidiliko opashiwana, ile pomapandela, ndele inava tala ko oshinima sha tya ngaho shi li onghedi yokwiilikana. Ovakriste vashili ihava piyaaneke vamwe ngeenge tava ningi omadidiliko a tya ngaho, ashike ihava kufa ombinga pauhandimwe. Molwaashi Eendombwedi ohadi kala di shii kutya eenghalo odo ohadi holoka naini, ohadi katuka pandunge opo diha udife nai vamwe. Luhapu ohadi kala da tokola toko diha kufe ombinga moinima yopashiwana oyo itai tu kumwe nOmbiibeli. (Exodus 20:4, 5; 1 Johannes 5:21) Okudenga ouhalasha kumwe otashi dulika kuha talike ko kuvamwe ku li edidiliko lopalongelokalunga. Ashike ope na omatomheno e shii okuudiwa ko eshi Ovakriste ihava kufa ombinga mokudenga ouhalasha kumwe, oko ku na oudilo wopalongelokalunga, nokunena okwa talika ko ku li onghedi yokupula keulu enangekonoupuna, sha fa ngeno omunhu ta pula sha keenghono di dule dopaushitwe. — Exodus 23:2.