ETUKULWA 8

Ongahelipi handi dulu okupanga oukaume muwa?

Brittany okwa ti: “Ngeenge nda handuka, onda pumbwa umwe ndi mu lombwele osho ndi udite. Ngeenge nda nyemata, onda pumbwa umwe oo ta hekeleke nge nokushilipaleka nge kutya onghalo otai ka xwepopala. Ngeenge nda hafa, onda hala okulombwela umwe a hafele pamwe naame. Ookaume ova fimanenena kwaame.”

OHAKU tiwa kutya ounona vanini ova pumbwa vakwao va danauke navo, ofimbo ovo ve li ovanyasha va pumbwa ookaume. Eyooloko oli li peni?

Oo ho danauka naye omunhu oo ho kala naye.

Kaume omunhu oo e na eenghedi da fa doye.

Shikwao vali, Ombiibeli oya popya kutya “kaume oku na ohole alushe, nomumwaina ta dalwa, a kwafe moluhepo.” (Omayeletumbulo 17:17) Oo oku na okukala kaume lela ina fa ngaashi ounona ovo hava danauka navakwao.

Oshili: Eshi to ende to ningi omukulunhu, owa pumbwa ookaume ovo

1. Ve na omaukwatya mawa

2. Ve na elihumbato liwa

3. Tave ku nwefa mo nawa

Epulo: Ongahelipi to dulu okumona ookaume va tya ngaho? Natu kundafane oinima oyo kooshimwe.

Oushili u na sha noukaume #1 Omaukwatya mawa

Osho wa pumbwa okushiiva. Hakeshe umwe ta dulu okukala kaume kashili. Ombiibeli oya popya nokuli kutya “omulumenhu e na ookaume vahapu ta ka mona oluhepo.” (Omayeletumbulo 18:24) Osho otashi dulika sha fa okuwedela. Ashike diladila kwaashi: Mbela owa li u na kaume oo e ku hala ashike shaashi e shii kutya ota mono ouwa washa kwoove? Ongahelipi shi na sha nakaume oo he ku popi nai povanhu, ile ha lombwele ovanhu oinima ii noyoipupulu kombinga yoye? Oshinima sha tya ngaho otashi ku kanififa elineekelo mukaume a tya ngaho. * Dimbuluka alushe kutya, ngeenge tashi uya pookaume, ongushu oyo ya fimana shi dulife ouhapu.

 

Osho to dulu okuninga. Hoolola ookaume ovo ve na omaukwatya mawa e shii okuhopaenenwa.

“Keshe umwe oku na etaleko liwa li na sha nakaume kange Fiona. Naame onda hala okukala handi popiwa nawa. Naame onda hala okukala ndi na edina liwa ngaashi ye. osho Oshinima shiwa kwaame.” — Yvette 17.

Kendabala okuninga ngaha.

1. Lesha Ovagalati 5:22, 23.

2. Lipula kutya, ‘Mbela ookaume kange ohava ulike ngoo omaukwatya oo a kwatelwa ‘moiimati yomhepo?’

3. Shanga pedu omadina ookaume koye kopofingo. Pedina keshe shanga po oukwatya oo hau ulikwa unene komunhu oo.

Edina

․․․․․

Oukwatya

․․․․․

Eetepo: Ngeenge omaukwatya mai oo unene tae uya momadiladilo oye, otashi dulika wa pumbwa oku ka konga ookaume ava ve li xwepo.

Oushili u na sha noukaume #2 Elihumbato liwa

Osho u na okushiiva. Ngeenge owa kala wa pumbwa unene ookaume, oho ka tambula ko ashike naavo vehe fi vawa. Ombiibeli oya ti: “Ou ha endafana novashima, ota ka laipala.” (Omayeletumbulo 13:20) ‘Ovashima’ ovo tava popiwa kave fi ovanhu ovo ihava piti mofikola, ile hava nyengwa okuuda ko oinima. Ponhele yaasho, otava ulike kovanhu ovo ihava tambula ko omayele opandunge nokave na eenghedi. Oshiwa okuhenuka okupanga oukaume novanhu va tya ngaho.

Osho to dulu okuninga. Ponhele yokupanga oukaume nakeshe umwe, hoolola to tale nawa. (Epsalme 26:4) Osho inashi hala okutya ou na okukala u na okatongo. Eshi tashi popiwa apa oshosho kutya u kale to dulu okumona ‘etongoko pokati kovayuki novadinikalunga, pokati kaau ha longele Kalunga naau ihe mu longele.’ — Malakia 3:18.

“Onda pandula eshi ovadali vange va kwafela nge ndi mone ookaume, ovanhu vepupi lange ovo tave shi endifa nawa pamhepo.” — Christopher, 13.

Nyamukula omapulo taa shikula:

Ngeenge ndi li nookaume kange, mbela ohandi kala nda tila kutya pamwe otava ka fininika nge ndi ninge oshinima osho ndi shii kutya osha puka?

□ Heeno

□ Ahawe

Mbela ohandi kala inandi hala nawa okuulikila ovadali vange ookaume kange, nda tila kutya pamwe itave va tambula ko?

□ Heeno

□ Ahawe

Eetepo: Ngeenge owa nyamukula heeno komapulo oo e li pombada, konga ookaume ovo ve na elihumbato liwa, ovo hava tula po oshihopaenenwa shiwa meongalo lopaKriste.

Ouyelele u na sha noukaume #3 Enwefemo liwa

Osho u na okushiiva . Ombiibeli oya ti: “Ookaume vai ohava nyono po eenghedi diwa.” (1 Ovakorinto 15:33) Omunyasha umwe wedina Lauren okwa ti: “Ovanafikola vakwetu ohava tambula nge ko, shimha ashike handi ningi osho tava lombwele nge ndi ninge. Onda li handi kala ndi lilile, nomolwaasho nda tokola ndi lihumbate ngaashi vo opo ndi dule okuwapalela mo muvo.” Lauren okwa ti kutya okukala to efa vamwe va kale tave ku tokolele osho u na okuninga, owa fa ashike ounima ovo hava danifwa moudano wo-Chess, hava teelele ashike okulinyengifwa kovadani. Mepingafano naasho, oto dulu okuninga omatokolo a diladilwa.

Osho to dulu okuninga. Ino kala vali ho kala novanhu ovo have ku kondjifa u lunduluke opo u kale nelihumbato lafa lavo. Ngeenge owa katuka onghatu oyo, otashi dulika u ka fyaale po nookaume vanini, ashike oto ka kala wa hafa, noto ka mona omhito yokumona ookaume vawa, ookaume ovo tave ke ku nwefa mo nawa. — Ovaroma 12:2.

“Kaume kange kopofingo Clint oha ningi omatokolo mawa noku na onghenda, naasho oshi li etwomukumo linene kwaame.” — Jason, 21.

Lipula omapulo taa shikula:

Mbela ohadi lundulula onghedi yange yokudjala, yokupopya, ile ndi lihumbate monghedi ii, opo ndi wapalele ookaume kange?

□ Heeno

□ Ahowe

Mbela ohandi lihange handi i keenhele oko haku kala elihumbato lopaenghedi inali koshoka, oko ngeno itandi i ko ngeno kanda li nookaume kange?

□ Heeno

□ Ahowe

 LESHA SHIHAPU KOMBINGA YOSHIKUNDAFANWA ESHI MEMBO 2, ETUKULWA 9

 METUKULWA LETU TALI LANDULA

Mbela oo hakutiwa kutya okaume koye, ile omutima woye otau ku fininike u ninge oinima ii? Mona kutya ongahelipi to dulu okwaanya!

[Eshangelo lopedu]

 OMUSHANGWA WENENEDILADILO

“Ope nookaume ve dule ovalumenhu ovamwaina ovalumenhu mokulineekelwa.” — Omayeletumbulo 18:24.

EETEPO

Ngeenge owa kala ho dulika komifikamhango douyuki, vamwe ovo tava kendabala okuninga sha faafana, otava ka kala va hala okupanga oukaume naave. Otava ka ninga ookaume koye va denga mbada.

 OWE SHI SHIIVA NGOO . . . ?

Kalunga ke na okatongo, ashike oha hoolola nawa ovo tava dulu ‘okukala monduda yaye.’ — Epsalme 15:1-5.

 OSHO TO NINGI PO!

Opo ndi mone ookaume vawa, ohandi ka ․․․․․

Vamwe ovo ve dule nge, ovo nda hala okushiiva nawa, ongaashi ․․․․․

Osho nda hala okupula omudali, ile ovadali vange, shi na sha noshikundafanwa eshi, ongaashi ․․․․․

OTO DILADILA NGAHELIPI?

● Omaukwatya elipi oo wa hala unene kaume koye a kale e na, nomolwashike?

● Omaukwatya elipi wa pumbwa okuxwepopaleka opo u kale kaume e li xwepo?

[Eendjovo da divilikwa pepandja 60]

“Eshi ovadali vange va li va kelela nge ndiha endafane nokangudu kamwe kookaume, onda li nde lipopila kutya ovo ashike nda li nda hala okweendafana navo. Ashike omayele ovadali vange okwa li mawa, naashi nde ke shi diladila nawa, onde ke shi mona mo kutya ope na ookaume vawa vahapu.’’​—Cole

 [Oshimhungu pepandja 61]

Kendabala omaetepo aa

Kundafana novadali voye shi na sha nookaume. Va pula kutya ova li ve na ookaume va tya ngahelipi eshi va li ve fike pwoove. Mbela ova li ve lipa oushima molwaashi va hoolola ookaume va tya ngaho? Ngeenge osho, omolwashike? Va pula kutya ongahelipi to dulu okuhenuka omaupyakadi a fa oo va pita muo.

Ulikila ovadali voye ookaume koye. Ngeenge owa fa ino hala nawa, lipula kutya, ‘Omolwashike mbela inandi hala nawa?’ Mbela ope na sha shi na sha nookaume koye osho u shii kutya ovadali voye itava ka twa kumwe nasho? Ngeenge osho, otashi dulika wa pumbwa okukala ho hoolola nawa ookaume koye.

Kala omupwilikini muwa. Ulika kutya ou na ko nasha nonghalonawa yookaume koye nosho yo osho tave lipula nasho. — Ovafilippi 2:4.

Kala ho dimine po. Ino kala wa teelela ookaume koye va kale va fa va wanenena. “Atushe ohatu ningi omapuko luhapu.” — Jakob 3:2.

Ou pa ngoo ookaume koye omhito. Ino pumbwa okukala u li nookaume koye efimbo keshe. Ookaume koye vashili otave ke uya kwoove ngeenge we va pumbwa. — Omuudifi 4:9, 10.

[Efano pepandja 63]

Okukala to efa vamwe va kale tave ku tokolele osho u na okuninga, owa fa ashike ounima ovo hava danifwa moudano wo-Chess, hava teelele ashike okulinyengifwa kovadani.