Atushe otu na okuhoolola: Ngee ohatu longele Jehova ile ohatu longele Satana neendemoni daye. Itatu dulu okulongela aveshe vavali. Kashi li tuu pandunge okulongela Jehova!

Ngaashi twe shi mona, eendemoni ohadi nyakukilwa okuyahameka nokupukifa ovanhu. Jehova ye hasho e li ngaho. Ye oku hole ovanhu ngaashi tate e hole ounona vaye. Oye Omuyandji ‘wakeshe oshipewa shiwa, nokeshe oshali sha wanenena.’ (Jakob 1:17) Ye iha kondovekele ounhu sha shiwa, nonande tashi mu pula shihapu. — Ovaefeso 2:4-7.

Diladila koinima oyo ya longwa kombada yedu kuJesus, Omona waKalunga. Ye okwa fitulula ovafitandaka ndee ta twikulula ovapofi. Okwa velula ovanashilundu noingudu. Okwa ta mo eendemoni ndee ta velula oudu woludi keshe. Jesus, meenghono daKalunga, nokuli ye okwa nyumuna ovafi. — Mateus 9:32-35; 15:30, 31; Lukas 7:11-15.

Ponhele yokutonga oipupulu noku tu pukifa, Kalunga oha tongo alushe oshili. Ye iha pukifa nande umwe. — Numeri 23:19.

Ngaashi ashike ongodi yeluviluvi ya kwata odi, ovanhu omamiliyona mahapu ova kwatwa koidila nokoipupulu. Vo ohava tila oonakufya. Vo ohava tila eendemoni. Vo otave lipulapula shi na sha nomafingaelo, oipo noiketi. Vo ova mangwa komaitavelo nokomifyuululwakalo de likolelela koipupulu yaSatana Ondiaboli. Ovapiya vaKalunga inava yulwa kushimwe shomoinima ei

Jehova omunaenghono unene e dule Satana. Ngeenge ove oto longele Jehova, ye ote ke ku amena keendemoni. (Jakob 4:7) Omafingaelo itae ku ningi sha. Pashihopaenenwa, muNigeria, eendudu nhatu di na eenghono oda fingaela Ondombwedi yaJehova i fye molwaashi ya anya okudja moshilando. Eshi omafingaelo inaa pondola sha, imwe yomeendudu oya tila, oya ya kOndombwedi ndee tai indile e mu file onghenda.

Ngeenge eendemoni tadi ku ningile nai, oto dulu okwiifana edina laJehova ndee ye te ku amene. (Omayeletumbulo 18:10) Ndele opo u kale meameno laKalunga, ou na okumanguluka ko filu kukeshe shimwe shi na sha noumhulile nomailikano eendemoni. Ovailikani vaKalunga vomuEfeso shonale osho va ninga. Vo ova ongela omambo avo oupule ndee tave a xwike po. (Oilonga 19:19, 20) Ovapiya vaKalunga vonena ove na okuninga sha faafana. Ekelashi oiketi, eengodi “dokuliamena,” omambo oupule nosho yo keshe shimwe osho shi na ekwatafano neenghedi doumhulile.

Ngeenge owa hala okuhafifa Kalunga, inashi wana okukala ashike wa efa po eilikano loipupulu nokweefa po okulonga oinima ii. Ou na okulitula mo shili meilikano lashili. Ombibeli otai ulike osho sha pumbiwa:

Satana neendemoni ove na ovanhu kombada yedu ovo hava hongo nohava longo oinima ya puka. Ndele Jehova oku na yo oshiwana. Ovo Eendombwedi daJehova. (Jesaja 43:10) Mounyuni aushe, omu na Eendombwedi di dule omamiliyona ane. Adishe ohadi kendabala neenghono okulonga oinima iwa nohadi hongo ovanhu oshili. Moilongo ihapu, oto dulu oku di shakeneka pOlupale lOuhamba, opo tadi ke ku hambelela nehafo.

Oilonga yado oyo okukwafa vamwe va longele Kalunga. Do otadi ka konakona Ombibeli naave meumbo loye noku ku kwafa u lihonge okwiilikana Jehova monghedi ya yuka. Ito futu sha moshinima eshi. Eendombwedi oda hafa okuhonga oshili shaashi odi hole ovanhu nodi hole Jehova Kalunga.