ETUKULWA 1
“Tala, Kalunga ketu Oye ou”
1, 2. (a) Omapulo elipi ngeno to kala wa hala okupula Kalunga? (b) Moses okwa li a pula Kalunga shike?
DILADILA ashike ngeno to popi naKalunga! Ediladilo olo kali kumwifa tuu, Omupangeli weshito alishe ta popi naave! Otashi dulika u ongaonge pehovelo, ndele lwanima oto ka dula okunyamukula. Diladila ashike ngeno Jehova te ku pwilikine, te ku nyamukula nokwe ku lombwela nokuli kutya owa manguluka okupula keshe shimwe. Ndele mbela oto ka kala wa hala oku mu pula shike?
2 Nalenale, okwa li omulumenhu, oo a li ta dulu okupula Jehova keshe shimwe, nomulumenhu oo edina laye oMoses. Otashi dulika u kale wa kuminwa epulo olo a li a pula Kalunga. Ka li a pula kombinga yaye mwene, yonakwiiwa yaye ile yonghalo yovanhu. Ndele ponhele yaasho, okwa li a pula edina laKalunga. Otashi dulika u diladile kutya Moses ka li a wana okupula ngaho, molwaashi okwa li e shii nale edina laKalunga. Ndele epulo laye oli na eityo lomoule. Moses okwa li a pula epulo la fimanenena, nenyamukulo kepulo olo ole tu kuma atusheni. Otali tu kwafele opo tu katuke eenghatu da fimana opo tu ehene popepi naKalunga. Ngahelipi mbela? Natu ka konakoneni oshikalimo sheenghundafana odo di didilikwedi.
3, 4. Oiningwanima ilipi ya tetekela eenghundafana daKalunga naMoses, nova li tava kundafana kombinga yashike?
3 Moses okwa li e na omido 80. Okwa ninga omido 40 e li kokule noshiwana shavo shaIsrael, osho sha li moupika muEgipti. Efiku limwe fimbo Moses a li ta lifa oimuna yaxemweno, okwa li a mona oshiningwanima shikumwifi. Okwa li a mona oshixwa sheno sha tema omundilo, ndele itashi lungwina po. Oshixwa osho osha kala ashike sha tema, tashi taima sha fa onyika ya tema i li komhunda. Moses okwa li a ehena popepi opo e shi konenene. Ka li tuu a haluka eshi a uda ondaka tai popi naye tai di mokati komundilo! Kalunga naMoses ova kala tava popi oule wefimbo okupitila momweengeli. Ngaashi tu shi shii, Kalunga okwa li a lombwela Moses a shune kuEgipti a ka mangulule oshiwana shaIsrael moupika, ndele Moses okwa kala ta ongaonga okutambula ko oshinakuwanifwa osho, a li a hala ashike okutwikila ngeno nonghalamwenyo yaye ehe na mbudi. — Exodus 3:1-12.
4 Moses okwa li ta dulu okupula Kalunga kombinga yakeshe shimwe. Ndele didilika epulo olo a pula a ti: “Ndelenee ame ngenge handi i kOvaisrael ndele handi va lombwele: Kalunga kooxe okwa tuma nge kunye, ndele tava pula nge: Olyelye edina laye? Ohandi va nyamukula shike?” — Exodus 3:13.
5, 6. (a) Epulo laMoses otali tu hongo oushili u liwetikile wa fimana ulipi? (b) Oshinima sha puka shilipi sha ningwa po shi na sha nedina laKalunga? (c) Omolwashike shididilikwedi eshi Kalunga a hololela ovanhu edina laye?
5 Tetetete, epulo olo otali tu hongo kutya Kalunga oku na edina. Osha fimana okudimina oushili oo kutya Kalunga oku na edina, ashike vahapu inava dimina oushili oo u liwetikile. Edina laKalunga ola kufwa mo momatoloko mahapu Eembiibeli nola pingenwa po nomadinafimaneko ngaashi “Omwene” nosho yo “Kalunga.” Oshinima osho sha ningwa komalongelokalunga oshinyikifa oluhodi nosha puka filufilu. Ngeenge owa shakene nomunhu oshikando shotete, oho mu pula oshike? Mbela iho mu pula edina laye? Nafye opo tu shiive Kalunga, otwa pumbwa tete okushiiva edina laye. Kalunga oku na edina; ke fi omulikaleli oo itatu dulu okushiiva ile okuuda ko omaukwatya aye. Nonande iha monika, Kalunga omunhu wolela e na edina, nedina laye oJehova.
6 Molwaashi Kalunga okwa hololela ovanhu edina laye, osha yela kutya okwa hala tu hafele oufembanghenda mukumwifi nowa tongomana. Okwa hala tu mu shiive notu ehene popepi naye. Okuninga ngaho oshi li etokolo la denga mbada monghalamwenyo yetu. Ndele Jehova okwa ninga shihapu shihe fi ashike oku tu lombwela edina laye. Okwe tu honga yo omaukwatya aye.
Eityo ledina laKalunga
7. (a) Paudeko olo tu na, edina laKalunga otali ti shike? (b) Moses okwa li a hala lela okushiiva kombinga yashike eshi a li a pula edina laKalunga?
7 Jehova oye mwene e liluka edina olo, noli na eityo le likalekelwa. Paudeko letu, edina “Jehova” otali ti, “Oha ningifa.” Jehova okwe likalekelwa meshito alishe molwaashi oye a shita oinima aishe. Oha wanifa po yo elalakano laye keshe nota dulu okuningifa ovapiya vaye inava wanenena va ninge keshe osho a hala. Oshikumwifi neenghono okukala tu shii kutya oye a shita oinima aishe. Ndele mbela osho osho ashike sha kwatelwa mo meityo ledina laye? Osha yela kutya Moses okwa li a hala okulihonga shihapu shi na sha naJehova, molwaashi okwa li e shii nale edina laYe nonokutya Oye Omushiti. Edina laKalunga ola kala li shiivike okudja nale. Ovanhu ova kala noku li longifa oule womafelemido. Onghee hano, eshi Moses a li a pula Kalunga edina laye, okwa li ta pula shi na sha nOmunhu oo e lilwe po kedina olo. Paulelalela, okwa li a hala okutya: ‘Ohandi ka lombwela shike oshiwana shoye shaIsrael shi na sha naave, osho tashi ka pameka eitavelo lavo noku va shilipaleka kutya oto ke va mangulula shili?’
8, 9. (a) Jehova okwa li a nyamukula ngahelipi Moses, nenyamukulo laYe luhapu ola tolokwa ngahelipi papuko? (b) Outumbulilo “ame ohandi ka kala osho handi ka kala” owa hala okutya shike?
8 Jehova okwa li a lombwela Moses oshinima shihokwifa neenghono shi na sha noukwatya waYe, oo wa pambafana neityo ledina laYe. Okwa ti: “Ame ohandi ka kala osho handi ka kala.” (Exodus 3:14, NW) Eembiibeli dihapu oda toloka ediladilo olo tadi ti: “Aame tuu ame.” Ndele omushangwa oo paulelalela otau ulike kutya Kalunga ka li ashike ta koleke okukala po kwaye. Ponhele yaasho, Jehova okwa li ta hongo Moses, nafye atusheni twa kwatelwa mo, kutya “ota ka hoolola okukala osho a hala,” opo a wanife po omaudaneko aye. Etoloko la-J.B.Rotherham lovelishe oyo otali ti: “Ohandi ka kala keshe osho nda hala.” Omulumenhu umwe oo e shii nawa Oshiheberi shopefimbo lOmbiibeli okwa yelifa outumbulilo oo a ti: “Kutya nee onghalo ile omhumbwe oya fa peni . . . , Kalunga ota ka ‘ninga’ keshe osho sha pumbiwa opo a kandule po omhumbwe oyo.”
9 Mbela osho osha li tashi ka tya shike kOvaisrael? Jehova okwa li ta ka kala keshe osho a hala okukala opo a mangulule Ovaisrael moupika noku va twala mEdu lEudaneko, kashi na nee mbudi kutya omaupyakadi elipi va li tava ka shakeneka nosho yo kutya ova li tave ke lihanga meenghalo didjuu da tya ngahelipi. Edina olo ola li la ningifa Ovaisrael va kale ve lineekela Kalunga. Nafye kunena edina olo otali tu ningifa tu kale twe mu lineekela. (Epsalme 9:11) Omolwashike mbela?
10, 11. Edina laJehova otali tu kwafele ngahelipi tu ude ko kutya oha dulu okulonga oilonga i lili noku lili nonokutya oku li Tate a denga mbada? Shi yelifa to yandje efaneko.
10 Oku shi faneka: Diladila shi na sha novadali. Okufila oshisho ounona ohaku pula omunhu u kale ho tifuka meenghalo di lili noku lili nou longe oilonga i lili noku lili. Momukokomoko wefiku, omudali otashi dulika a kale omutekuli, omuteleki, omuhongi, omupukululi, omutokoli, naikwao ihapu. Ovadali vahapu ohava kala va kunwa ngeenge tava diladila koinakuwanifwa ihapu oyo ve na okuwanifa po. Ndele ohava didilike kutya ovana vavo ohava kala ve ve lineekela filufilu. Ounona ohava kala alushe ve na elineekelo kutya xe ile ina ota dulu okupoleka ouyahame keshe, okupongolola po eemhata, okupangela okadanaukifo keshe ka teka nota dulu yo okunyamukula epulo keshe tava pula. Omafimbo amwe, ovadali vamwe ohava kala ve udite inava wana nohava kala va nyemata omolwomangabeko avo. Ohava kala ve wete itava dulu nandenande okuwanifa po oinakuwanifwa ihapu yomwaayo ya tumbulwa metetekelo.
11 Jehova naye oku li omudali omunahole. Kakele kaasho, ota dulu okuninga keshe shimwe opo a file oshisho ovana vaye vokombada yedu monghedi ya denga mbada nopehe na okunyona omifikamhango daye da wanenena. Edina laye Jehova otali tu kwafela tu kale tu shii kutya oye Tate a denga mbada. (Jakob 1:17) Moses nosho yo Ovaisrael aveshe vakwao ovadiinini ova li va mona kutya Jehova oha kala alushe metwokumwe nedina laye. Ova li va mona kutya oku li Ondjai yOmatanga ovakwaita ihai findwa, Omupangeli weenghono domeshito, Omuyandjimhango omunaendunge elela, Omutokoli, Omuduti, Omuyandji woikulya nomeva, Omunefiloshisho oo e va kwafela opo oikutu neenghaku davo iha kulupe, naikwao ihapu.
12. Etaleko laFarao li na sha naJehova ola li la yooloka ko ngahelipi kwaalo laMoses?
12 Kungaho, Kalunga okwa shiivifa edina laye, okwa holola omaukwatya aye makumwifi oo a pambafana neityo ledina laye nokwa ulika nokuli kutya oha kala metwokumwe naasho a popya kombinga yaye mwene. Nopehe na omalimbililo, okwa hala tu mu shiive. Mbela otu na okulinyenga ngahelipi kwaasho? Moses okwa li a hala okushiiva Kalunga, naasho osha li she mu linyengifa a lundulule onghedi yaye yokukalamwenyo noshe mu kwafela a ehene popepi elela naXe womeulu. (Numeri 12:6-8; Ovaheberi 11:27) Shinyikifa oluhodi, ovanhu ashike vanini vopefimbo laMoses va li va hala okuninga ngaashi ye. Moses okwa li a tumbula edina laJehova eshi a li ta popi naFarao, ohamba yaEgipti oyo ya li i na ounhwa, noya li ya nyamukula ya ti: “Jehova oye lyelye?” (Exodus 5:2, NW) Farao ka li a hala okulihonga shihapu kombinga yaJehova. Ndele ponhele yaasho, okwa sheka Kalunga kaIsrael ta ulike kutya ke na onghwa naye nonokutya ina fimana kuye. Ovanhu vahapu kunena navo ove na etaleko la fa laFarao. Etaleko la tya ngaho ohali va imbi va tambule ko oshili ya fimanenena oyo kutya Jehova oye Omwene Omunamapangelo aeshe.
Omwene Jehova Omunamapangelo aeshe
13, 14. (a) Omolwashike Jehova e na omadinafimaneko mahapu oo taa hangwa mOmbibeli, naamwe omuo oelipi? (Tala oshimhungu pepandja 14.) (b) Omolwashike Jehova oye aeke a wana okwiifanwa “Omwene Omunamapangelo aeshe?”
13 Jehova oha tifuka, nomolwaasho okwa wana filufilu okukala e na omadinafimaneko mahapu oo taa hangwa mOmishangwa. Ndele omadinafimaneko a tya ngaho inaa fimana e dule edina laye lo venevene. Pashihopaenenwa, ota ifanwa “Omwene Jehova Omunamapangelo aeshe.” (2 Samuel 7:22, NW) Edinafimaneko olo la tumbala ola holoka mo lwoikando omafele mOmbiibeli notali tu lombwele kombinga yondodo oyo Kalunga e na. Jehova oye aeke e na oufemba wokukala Omupangeli weshito alishe. Natu ka konakoneni kutya omolwashike.
14 Jehova okwe likalekelwa molwaashi oye Omushiti. Ehololo 4:11 ola ti: “Jehova Kalunga ketu, oove wa wana okupewa efimano, etumbalo neenghono molwaashi oove wa shita oinima aishe, nomolwehalo loye, oya shitwa noi li po.” Kape na vali omunhu umwe ta dulu okupopilwa eendjovo dididilikwedi da tya ngaho. Keshe shimwe shi li meshito osha shitwa kuJehova. Nopehe na omalimbililo, Jehova okwa wana shili okupewa efimano netumbalo molwaashi oye Omwene Omunamapangelo aeshe nOmushiti woinima aishe.
15. Omolwashike Jehova ta ifanwa “ohamba yaalushe”?
15 Edinafimaneko limwe vali olo la yeleka ashike Jehova olo “ohamba yaalushe.” (1 Timoteus 1:17, OB-1986) Edinafimaneko olo ola hala okutya shike? Molwaashi otwa ngabekwa, itatu dulu okuuda ko filufilu eityo lalo, ashike ola hala okutya Jehova omukwaalushe, sha hala okutya, okwa kala ko alushe nota kala ko fiyo alushe. Epsalme 90:2 ola ti: “Ove u li po alushe fiyo alushe.” Jehova ke na ehovelo nota kala ko alushe. Onghee hano, osha yeleka eshi ta ifanwa “Omuxungu,” molwaashi okwa kala po nale ofimbo ina shita eshito alishe. (Daniel 7:9, 13, 22) Olyelye ta dulu okutula momalimbililo oufemba waye wokukala Omwene Omunamapangelo aeshe?
16, 17. (a) Omolwashike itatu dulu okumona Jehova, nomolwashike osho shihe na oku tu kumwifa? (b) Omeityo lilipi Jehova e dule oinima oyo hatu dulu okumona ile okukuma?
16 Ngaashi Farao, vamwe ova limbililwa oufemba waJehova wokupangela. Ovanhu inava wanenena ohave lineekele neenghono moinima oyo ve wete. Itatu dulu okumona Omwene Omunamapangelo aeshe, molwaashi oku li molupe lopamhepo. (Johannes 4:24) Kakele kaasho, omunhu wombelela nohonde ngeenge okwa mono Jehova Kalunga ota fi okufya. Nomolwaasho Jehova okwa lombwela Moses a ti: “Ove iho dulu okutala oshipala shange, osheshi kape nomunhu ta dulu okutala nge ndele ta kala nomwenyo.” — Exodus 33:20; Johannes 1:18.
17 Osho kashi na oku tu kumwifa. Oshoshili kutya Moses okwa li a dula okumona kanini oshinge shaJehova okupitila momweengeli. Ndele oshidjemo osha li shike? Oshipala shaMoses osha kala tashi “vema” konima eshi a li ta popi naJehova. Ovaisrael ova li va tila nokuli okutala odikilila koshipala shaMoses. (Exodus 33:21-23; 34:5-7, 29, 30) Ngeenge osho sha li ngaho, osha yela kutya kape na omunhu ta dulu okutala oshinge ashishe shOmwene Omunamapangelo aeshe. Ndele mbela molwaashi itatu dulu oku mu mona ile oku mu kuma osha hala okutya ke fi lela omunhu washili? Hasho nandenande, molwaashi ope na oinima ihapu oyo twa itavela kutya oko i li nonande itatu dulu oku i mona. Pashihopaenenwa, ngaashi omhepo, omakufikufi oradio nosho yo omadiladilo. Navali, Jehova Omukwaalushe noiha kumwa koule wefimbo kutya nee napa kale pa pita omido omabiliyona e fike peni! Onghee hano, Jehova ita dulu okuyelekanifwa noinima oyo hatu dulu okukuma ile okumona, molwaashi oinima yokombada yedu ohai kala po efimbo la ngabekwa nohai dulu okunyonauka. (Mateus 6:19) Mbela osho osha hala okutya otu na okutala ko Jehova e li eenghono dongaho di li mewangadjo ile e li ashike oshinima shonhumba osho sha etifa po oinima meshito? Natu ka konakoneni kombinga yaasho.
Kalunga oku na omaukwatya
18. Hesekiel okwa li a mona emoniko lilipi, noipala ine yoishitwa ‘i na omwenyo’ oyo hai kala popepi naJehova oi lile po shike?
18 Nonande itatu dulu okumona Kalunga, Ombiibeli otai tu lombwele kombinga yoinima ihafifa i na sha naasho shi li meulu. Pashihopaenenwa, etukulwa lotete lembo laHesekiel ola popya shi na sha nemoniko loshitukulwa shomeulu omo Hesekiel a li a mona etemba la kula lomeulu, olo li lile po ounene wehangano laJehova. Onghedi omo oishitwa yopamhepo inaenghono yomeulu, oyo ya dingilila Jehova, ya hokololwa otai kumwifa neenghono. (Hesekiel 1:4-10) Oishitwa oyo ‘i na omwenyo’ ohai kala popepi naJehova, neholokepo layo otali tu hongo oshinima shimwe sha fimana shi na sha naKalunga oo tai longele. Keshe shimwe shomuyo oshi na oipala ine: oshipala shongobe, oshipala shonghoshi, oshipala shonhwa nosho yo oshipala shomunhu. Nopehe na omalimbililo, oipala oyo otai faneke omaukwatya aJehova ane a tongomana. — Ehololo 4:6-8, 10.
19. Oukwatya ulipi tau fanekwa (a) koshipala shongobe? (b) koshipala shonghoshi? (c) koshipala shonhwa? (d) koshipala shomunhu?
19 MOmbiibeli, ongobe luhapu ohai faneke eenghono, naasho osha yeleka molwaashi ongobe oshinamwenyo shi na eenghono dinene. Onghoshi luhapu ohai faneke ouyuki, molwaashi ouyuki washili ohau pula ouladi. Onghoshi oya shiivikila ouladi. Onhwa oi shiivikile oukwatya wayo wokumona kokule nohai dulu okumona nokuli okanima kanininini ke li kokule oule weekilometa donhumba. Onghee hano, oshipala shonhwa otashi faneke ounongo waKalunga wokunongela oinima komesho yefimbo. Ndele mbela oshipala shomunhu otashi faneke shike? Molwaashi omunhu okwa shitwa oshifeka shaKalunga, oye aeke ta dulu okuhopaenena monghedi ye likalekelwa oukwatya waJehova wa denga mbada, ohole. (Genesis 1:26) Omaukwatya aJehova ngaashi eenghono, ouyuki, ounongo nosho yo ohole ohaa divilikwa luhapu mOmishangwa, nomolwaasho otaku dulu okutiwa kutya oku li omaukwatya aye a tongomana.
20. Omolwashike inatu pumbwa okukala twa limbililwa kutya pamwe omaukwatya aJehova otashi dulika a lunduluka, nomolwashike hatu tile ngaho?
20 Mbela otu na okukala twa limbililwa nokutya pamwe Kalunga okwa lunduluka momukokomoko womido omayovi da ka pita noke li vali ngaashi Ombiibeli ye mu popya? Hasho nandenande, molwaashi omaukwatya aKalunga ihaa lunduluka. Kalunga okwe tu lombwela a ti: “Ame Omwene ihandi lunduluka.” (Malakia 3:6) Ponhele yokulundulula omadiladilo aye nopehe na etomheno lasha, Jehova okwa holola kutya oku li Xe omunahole monghedi omo ha ungaunga nonghalo keshe. Oha ulike omaukwatya aye oo taa wapalele pomhito yonhumba. Ohole oyo oukwatya oo u dule omaukwatya makwao. Kalunga oha ulike ohole mukeshe osho ta ningi. Jehova oha longifa eenghono, ouyuki nosho yo ounongo waye pahole. Ombiibeli oya tumbula oshinima shimwe shididilikwedi shi na sha naKalunga nosho yo oukwatya waye oo wohole. Oya ti: “Kalunga Oye ohole.” (1 Johannes 4:8) Didilika kutya omushangwa oo itau ti kutya Kalunga oku na ohole ile kutya Kalunga oku hole, ndele ponhele yaasho, otau ti kutya Kalunga Oye ohole. Ohole oyo oukwatya oo hau linyengifa Kalunga a longe keshe osho ha longo.
“Tala, Kalunga ketu Oye ou”
21. Ohatu ka kala tu udite ngahelipi ngeenge otwa kala tu shii nawa omaukwatya aJehova?
21 Mbela owa mona nale okaana kanini ka hafa shili noke udite etumba taka popi taka lombwele ookaume ka ko taka ti, “Tate wange oye ou”? Ovalongelikalunga vashili ove na omatomheno okukala ve udite ngaho shi na sha naJehova. Ombiibeli oya xunganeka shi na sha nefimbo olo oshiwana shaKalunga oshidiinini tashi ka popya tashi ti: “Tala, Kalunga ketu Oye ou.” (Jesaja 25:8, 9) Ngeenge owa kala u na eshiivo lomoule li na sha nomaukwatya aJehova, oto ka kala u udite kutya oye Tate a denga mbada.
22, 23. Ombibeli oya popya shike shi na sha naTate yetu womeulu, notu shi shii ngahelipi kutya okwa hala tu ehene popepi naye?
22 Tate Jehova oku na ko nasha novanhu, ndele ke li ngaashi ovanhu vamwe ovo ve lishii oukalunga ile ovo va itavela momaufilosofi have mu tale ko, ovo hava ti kutya ke na ko nasha novanhu. Ngeno Kalunga ka li e na ko nasha novanhu, ngeno itatu ka kala twa nanenwa kuye, nOmbibeli inai popya nande kutya Tate yetu womeulu osho a tya ngaho. Ndele ponhele yaasho, Ombiibeli oye mu ifana ‘Kalunga Omunelao.’ (1 Timoteus 1:11, OB-1954) Oku na omaliudo omoule. Eshi oishitwa yaye inaendunge inai kala metwokumwe newiliko olo a li e i pa omolwouwa wayo, Ombiibeli oya ti kutya okwa “yehama momutima waye.” (Genesis 6:6; Epsalme 78:41) Ndele ngeenge otwa katuka pandunge metwokumwe nEendjovo daye, ohatu ka “hafifa omutima” waye. — Omayeletumbulo 27:11.
23 Tate yetu okwa hala tu ehene popepi naye. Eendjovo daye otadi tu ladipike tadi ti: ‘Kongeni Kalunga mwa mana mo fiyo ota mu mono, osheshi ke li kokule nakeshe umwe womufye.’ (Oilonga 17:27) Ongahelipi omunhu ina wanenena ta dulu okweehena popepi nOmwene Omunamapangelo aeshe?
