Konima yoshivilohombolo osho sha li muKana, Jesus okwa li a ya kuKapernaum. Ina yaJesus novamwainamati vaye, ngaashi Jakob, Josef, Simon nosho yo Judas ova li va ya pamwe naye.

Mbela omolwashike Jesus a li a ya kuKapernaum? Oshilando osho osha li sha punapala noshinene shi dule Nasaret naKana. Natango, vahapu vomovahongwa vape vaJesus ova li hava di muKapernaum ile popepi nasho. Onghee Jesus okwa li ta dulu oku va deulila meduumbo lavo.

Efimbo alishe olo Jesus a kala muKapernaum, okwa longa oilonga ikumwifi. Ovanhu vomoshilando novomomudingonoko ova li va uda oinima aishe oyo a ninga. Ashike Jesus nosho yo ovashikuli vaye, ovo ve li ovalumenhu Ovajuda ovaladi, ova li pokuya kuJerusalem va ye koshivilo shOpaasa shomo 30 O.P.

Eshi va li motembeli muJerusalem, ovahongwa vaJesus ova li va mona sha shikumwifi sha yooloka ko filufilu kwaasho hava mono shito.

Omhango yaKalunga oya li ya teelela Ovaisrael va ninge omayambo oinamwenyo kotembeli, novaenda ohava kala va pumbwa oikulya pefimbo letalelepo. Onghee hano, Omhango oya li ya pitika aveshe ovo va li tave uya kuJerusalem tava di koitukulwa yokokule va etelele oimaliwa opo va dule okulanda “eengobe, eedi, oikombo” nosho yo oinima oyo va pumbwa pefimbo letalelepo. (Deuteronomion 14:24-26) Oshidjemo, ovashingifi vomuJerusalem ova li hava landifile motembeli oimuna ile oudila. Vamwe vomuvo ova li nokuli hava nyokoma ovanhu moku va pula shihapu.

Jesus okwa li a handuka neenghono, ndele ta hovele okutilashi oimaliwa yovakumaani, ta undulile pedu oitaafula yavo noku va taata mo. Opo nee Jesus okwa tya kuvo: “Kufei mo oinima ei omu! Inamu ninga eumbo laTate onhele yomalandifilo!” — Johannes 2:16.

Eshi ovahongwa va mona osho a ninga, ova dimbuluka exunganeko kombinga yOmona waKalunga tali ti: “Ouladi omolweumbo loye otau twaalele nge.” Opo nee Ovajuda ova pula tava ti: “Tu ulikila edidiliko olo tali ulike kutya ou na oufemba wokuninga oinima oyo.” Jesus okwe va nyamukula a ti: “Ngumaunei po otembeli ei, nohandi ke i tungulula moule womafiku atatu.” — Johannes 2:17-19; Epsalme 69:9.

Ovajuda ova li tava diladila kutya Jesus ota popi kombinga yotembeli yo venevene oyo i li muJerusalem, ndele tave mu pula tava ti: “Otembeli ei oya tungwa oule womido 46, ongahelipi to ke i tungulula moule womafiku atatu?” (Johannes 2:20) Ashike Jesus eshi a popya otembeli okwa li ta popi kombinga yolutu laye. Konima yomido nhatu eshi a nyumuka, ovahongwa vaye ova li va dimbuluka eendjovo odo.