Konima eshi Jesus va shakena naMarta naMaria popepi naBetania, ova li va ya kombila yaLasarus. Ombila oyo oya li ekololo noya li ya idilwa nemanya. Jesus okwa li a lombwela ovanhu a ti: “Kufei ko emanya.” Marta okwa li a limbililwa molwaashi ka li e udite ko osho Jesus a li a hala okuninga, ndele ta ti kuye: “Omwene, oku na okukala ta nyika, shaashi okwa ninga mo omafiku ane.” Ashike Jesus okwe mu lombwela a ti: “Inandi ku lombwela kutya ngeenge owa itavele oto ka mona efimano laKalunga?” — Johannes 11:39-54.

Onghee emanya ola li la kufwa ko. Jesus okwa tala keulu, ndele ta ilikana ta ti: “Tate, ohandi ku pandula eshi wa uda eilikano lange. Ondi shi shii kutya oho udu nge alushe, ndele ohandi popi ngaha omolwongudu yovanhu ava va dingilila nge opo va itavele kutya oove wa tuma nge.” Eshi  Jesus a ilikana mokule, okwa li a hala okuulikila ovo tava tale kutya osho a li ta ka ninga osha li ashike tashi shiiva keenghono daKalunga. Opo nee Jesus okwa ingida mokule ta ti: “Lasarus, dja mo!” Lasarus okwa dja mo, a mangwa nomalapi komaoko fiyo okomaulu noshipala shaye osha li sha uvikwa nelapi. Ndele Jesus ta ti: “Mu mangululeni, ndele tamu mu efa a ye.” — Johannes 11:41-44.

Eshi Ovajuda vahapu ovo va li ve uya okuhekeleka Maria naMarta va mona oshikumwifilonga osho, ova li va itavela Jesus. Ashike vamwe ova li va ya ndele tava ka lombwela Ovafarisai osho Jesus a ninga. Ovafarisai novapristeri ovakulunhu ova li va ongala pamwe noilyo yOmhangu yoPombada yOvajuda. Moilyo omo omwa li mwa kwatelwa omupristeri munene, Kajafas. Vamwe vomuvo ova li va popya va ti: “Molwaashi omulumenhu ou ota longo oikumwifilonga ihapu, oshike tu na okuninga po? Ngeenge otwa efa a twikile okuninga ngaho, ovanhu aveshe otave ke mu itavela, nOvaroma otave ke uya ndele tave tu kufa otembeli novanhu vetu.” (Johannes 11:47, 48) Nonande ova li ve na oumbangi muhapu kutya Jesus okwa ‘longa oikumwifilonga ihapu,’ ovalumenhu ovo kava li va hafa eshi Kalunga te mu longifa. Ova li ashike tave lipula shi na sha neendodo davo nosho yo eenghonopangelo davo.

Ovasadukai ova li va findwa eshi Lasarus a nyumunwa koufi, molwaashi kava li va itavela menyumuko. Opo nee Kajafas, oshilyo shOmhangu yoPombada yOvajuda, okwa ti: “Nye onghalo kamu i udite ko. Mbela kamu wete kutya oshiwa kunye omunhu umwe a fye ponhele yovanhu aveshe va hanaunwe po?” — Johannes 11:49, 50; Oilonga 5:17; 23:8.

Molwaashi Kajafas okwa li omupristeri munene, Kalunga okwa li e mu ningifa a popye kutya oilonga aishe oyo Jesus a li ta longo ite i longo “pahalo laye mwene.” Kajafas okwa li a hala okutya Jesus oku na okudipawa opo ve mu kelele aha ye moshipala eenghonopangelo davo nokuha nwefe mo ovawiliki velongelokalunga lOshijuda. Ashike nande ongaho, Kajafas okwa li a xunganeka kutya Jesus ita ka yandjela ashike Ovajuda ekuliloyambo okupitila mefyo, ndele ‘novana yo vaKalunga ovo va li va halakanifwa.’ — Johannes 11:51, 52.

Kajafas okwa li a pondola okunwefa mo oilyo yOmhangu yoPombada yOvajuda i ninge omhangela yokudipaa Jesus. Ndele mbela Nikodemus, oo a li oshilyo shOmhangu yoPombada yOvajuda noku li kaume kaJesus, okwa li te ke mu lombwela omhangela oyo? Jesus okwa li a dja mo diva moshitukulwa shaJerusalem opo aha dipawe fimbo eufwafimbo laKalunga inali fika.