Jesus okwa li a ya koshilando shaEfraim osho sha li koushilolundume waJerusalem, molwaashi Omhangu yoPombada yOvajuda oya li ya pangela omhangela yoku mu dipaa. Oko a kala oko novahongwa vaye, kokule novatondi vaye. (Johannes 11:54) Opaasa yomo 33 O.P. oya li pokufika, na Jesus okwa li e na okuya vali molweendo. Okwa li a dja muSamaria ndele tai kuGalilea, naasho osha li oshikando shaye shaxuuninwa ta talele po oshitukulwa osho fimbo ina fya.

Eshi Jesus a li molweendo laye ta udifa omukunda nomukunda, okwa li a shakena novalumenhu omulongo ve na oudu woshilundu. Omukifi oo ohau lemaneke kanini nakanini oilyo yolutu lomunhu, ngaashi ominwe dokeenyala nodokeemhadi ile omatwi. (Numeri 12:10-12) Omhango yaKalunga oya li tai pula omunashilundu a ingide ta ti, “Omunashilundu! Omunashilundu,” nokwa li e na okulikalela. — Levitikus 13:45, 46.

Ovanashilundu ovo omulongo ova li kokule naJesus. Ashike ova li va ingida mokule tava ti: “Jesus, Omuhongi, tu fila onghenda!” Eshi Jesus e va mona, okwa tya kuvo: “Indeni mu ke liulike kovapristeri.” (Lukas 17:13, 14) Kungaho, okwa li a ulika kutya okwa fimaneka Omhango yaKalunga, oyo ya ufa ovapristeri va lombwele ovanashilundu kutya ova veluka koudu wavo. Ova li tava dulu okukala vali mokati kovanhu. — Levitikus 13:9-17.

Ovanashilundu ovo omulongo ova li ve na eitavelo kutya Jesus ota dulu oku va velula. Ova li tava i kovapristeri, nokuli fimbo inava velulwa. Omolweitavelo olo va li va ulika, Jesus okwe va pa ondjabi. Ova li va mona kutya ova veluka.

Ovanashilundu omuwoi ovo va li velulwa ova li va twikila nolweendo lavo. Ashike umwe ka li a ya navo. Omulumenhu oo Omusamaria okwa li a shuna a ka konge Jesus. Omolwashike mbela? Omolwaashi okwa li a pandula Jesus eshi e mu velula. Okwa li yo a hovela ‘okutanga Kalunga newi lopombada,’ ta ulike kutya Kalunga oye e mu velula. (Lukas 17:15) Eshi a mona Jesus, okwe linyongamena puye, ndele te mu pandula.

Jesus okwa li a lombwela ovo va li po, a ti: “Ovo va velulwa kave li omulongo hano? Vakwao omuwoi ove li peni? Kape na vali oo a aluka a tange Kalunga kakele komulumenhu ou womoiwana imwe.” Opo nee Jesus okwa lombwela Omusamaria a ti: “Fikama ndele to i; eitavelo loye ole ku velula.” — Lukas 17:17-19.

Eshi Jesus a velula ovanashilundu ovo omulongo, okwa li a ulika kutya Jehova Kalunga ote mu kwafele mokulonga oilonga oyo. Umwe womwaavo omulongo ka li ashike a velulwa, ndele okwa li yo e li mondjila oyo tai twala komwenyo waalushe. Kunena Kalunga iha longifa vali Jesus a longe oikumwifilonga ya tya ngaho. Ashike ngeenge otwa kala tu na eitavelo muJesus, ohatu dulu okukala mondjila oyo tai twala komwenyo waalushe. Mbela ohatu ulike ngoo olupandu ngaashi omulumenhu oo Omusamaria?