OMOLWASHIKE epulo olo kutya: Kalunga koye oye lyelye, la fimana? —  Omolwaashi ovanhu ohava longele ookalunga ve lili noku lili. (1 Ovakorinto 8:5) Eshi omuyapostoli Paulus a li a pewa eenghono kuJehova opo a velule omulumenhu oo nghee a dalelwe a ende, ovanhu ovo va li po ova li va ingida tava ti: “Ookalunga ove lifefa ovanhu nove uya kufye.” Ovanhu ovo ova li va hala okwiilikana Paulus nosho yo kaume kaye Barnabas. Ova li nokuli tava ti kutya Paulus oye Merkurius nosho yo kutya Barnabas oye Jupiter, omadina oo a li oikalunga.

Ndele Paulus naBarnabas kava li va efa ovanhu ve va ilikane. Ova li va ya mokati kovanhu ndele tava ti: ‘Efeni oikalunga ei yongaho, nye mu alukile kuKalunga omunamwenyo.’ (Oilonga 14:8-15) ‘Kalunga omunamwenyo,’ oo ashita oinima aishe oye lyelye? —  Oye Jehova, “Omukombadambada kedu alishe.” Jesus okwa popya kutya Jehova oye ‘Kalunga aeke kashili.’ Hano, olyelye aeke a wana okwiilikanwa? —  OJehova aeke. — Epsalme 83:18, NW; Johannes 17:3; Ehololo 4:11.

Ovanhu vahapu ohava longele oikalunga ponhele yokulongela ‘Kalunga aeke kashili.’ Luhapu ohava longele oinima oyo ya hongwa moiti, momamanya nosho yo oyo ya ningwa moivela. (Exodus 32:3-7; Leviticus 26:1; Jesaja 44:14-17) Ovalumenhu novakainhu ovo va tumbala navo ohava talwa ko ve li oikalunga. Mbela osha yuka ngoo oku va pa efimano la tya ngaho? — 

Eshi Saulus a ninga omuyapostoli Paulus, okwa ti: “Muava ve he neitavelo, eendunge davo da twikifwa kukalunga kefimbo lounyuni eli.” (2 Ovakorinto 4:4) Mbela kalunga oo oye lyelye? —  Oye Satana Ondiaboli. Satana okwa dula okuningifa ovanhu vahapu va kale tava longele ovanhu vakwao nosho yo oinima imwe i lili.

Eshi Satana a li ta kendabala okuningifa Jesus e mu twile eengolo  noku mu longele, mbela Jesus okwa li a lombwela Satana ngahelipi? — Jesus okwa ti: ‘Omwene Kalunga koye u noku mu twila eengolo, noye aeke u noku mu kalela.’ (Mateus 4:10) Jesus okwa li e shi yelifa nawa kutya Jehova oye aeke e na okulongelwa. Natu ka lesheni kombinga yovalumenhu vamwe ovanyasha ovo va li ve shi shii kutya Jehova oye aeke e na okulongelwa. Omadina avo oo: Sadrak, Mesak naAbednego.

Ovanyasha ovo Ovaheberi ova li vomoshiwana shaKalunga, Israel, nova li va twalwa moupika kuBabilon. Fimbo va li oko, ohamba Nebukadnesar oya li ya dika oshihongwafano shinene shoshingoli. Opo nee efiku limwe oya li ya lombwela ovanhu aveshe kutya ngeenge ova udu omusika tai dana, ove na okulinyongamena oshihongwafano sha tya ngaho. Ndele okwa li a londwela ovanhu kutya ‘oo iteshi linyongamene ndele iteshi ilikana ota ekelwa mediko lomundilo.’ Ngeno oove wa li po ngeno owa ninga ngahelipi? — 

Shito Sadrak, Mesak naAbednego ova li hava dulika komalombwelo  aeshe ohamba. Ndele ova li va anya okudulika kelombwelo olo. Mbela ou shi shii kutya omolwashike? —  Omolwaashi omhango yaKalunga oya ti: ‘Ino kala u na ookalunga vamwe koshipala shange. Ino lihongela oshihongwafano noino shi linyongamena.’ (Exodus 20:3-5) Onghee hano, Sadrak, Mesak naAbednego ova li va dulika komhango yaJehova ponhele yokudulika koshipango shohamba.

Ohamba oya li ya handuka neenghono, noya li ya ifana ovanyasha ovo vatatu Ovaheberi ve uye kuyo. Ohamba oya li ye va pula ya ti: ‘Oshoshili ngoo kutya inamu linyongamena oshikalunga shange? Ohandi mu pe omhito natango, ngeenge tamu udu ondaka yomanghuma omu na okulinyongamena oshitelekwafano osho nda ninga. Ndelenee ngeenge itamu shi ilikana, otamu ka ekelwa mediko lomundilo. Ndele kalunga ou te mu xupifa momake ange olyelye?’

Mbela ovalumenhu ovo ovanyasha ova li tava ka ninga po shike? Ngeno okwa li oove ngeno owa ninga po shike? —  Ovalumenhu ovo ova li va lombwela ohamba va ti: ‘Kalunga ketu ou hatu mu longele, ota dulu oku tu xupifa. Ndelenee ngeenge hasho, fye itatu longele ookalunga koye, noshitelekelwafano shoshingoli itatu shi ilikana.’

Ohamba oya li ya handuka neenghono, nomolwaasho oya li ya lombwela ovapiya vayo ‘va hanyeke ediko lwoikando iheyali, li kale lipyu shi dulife shito.’ Opo nee oya li vali ya lombwela ovapiya vayo ovanaenghono  va mange Sadrak, Mesak naAbednego nove va ekele mediko lomundilo. Ediko ola li la pupyala neenghono, nomolwaasho ovapiya vohamba ova li va dipawa komalaka omundilo. Mbela oshike sha li sha ningilwa Ovahaberi vatatu?

Sadrak, Mesak naAbednego ova li va wila mokati kediko lomundilo. Ova li va fikama po ndele kava li tava pi komundilo. Kava li nokuli vali va mangwa. Mbela osho osha enda ngahelipi? —  Ohamba oya li ya tala mediko, ndele oya li ya mona oshinima she i tilifa, opo nee oya li ya pula ovapiya vayo ya ti: “Inatu ekela momundilo ovalumenhu vatatu?” Ovapiya vayo ova li va nyamukula va ti: “Oshili, ohamba.”

Opo nee ohamba oya ti: ‘Taleni, ame ondi wete mo ovalumenhu vane, tave linyenge momundilo, ndele vo inava mona nande oshiponga.’ Mbela ou shi shii kutya omunhu omutine oo a li navo oye lyelye? — Okwa li omweengeli waJehova. Omweengeli oo oye a li a amena Ovaheberi ovo vatatu vaha pye.

Eshi ohamba ya mona oshiningwanima osho, oya li ye uya pomuvelo wediko ndele tai ingida tai ti: “Sadrak, Mesak naAbednego, onye ovapiya vaKalunga wOkombadambada, djeni mo, ileni oku!” Eshi ovalumenhu ovo va dja mo mediko,  keshe umwe okwa li e wete kutya inava pya nandenande komundilo. Kava li nokuli tava nyika omuvavo. Opo nee ohamba oya ti: ‘Kalunga kaSadrak, kaMesak nokaAbednego na hambelelwe, ou a tuma omweengeli waye ndele a xupifa ovapiya vaye molwaashi ihava ilikana kalunga umwe e lili, ndelenee oKalunga kavo aeke.’ — Daniel etukulwa 3.

Ohatu dulu okulihonga mo oshilihongomwa moshiningwanima osho, molwaashi nokunena ovanhu ohava diki oihongwafano opo i ilikanwe. O-The Encyclopedia Americana oya ti: “Epandela oli li oshinima shiyapuki ngaashi ashike omushiyakano.” Ovanhu otashi dulika va kale ve na oihongwafano yoiti, yomamanya, yoivela ile yoiyata. Ovahongwa vaJesus vonale kava li hava ilikana omukesari waRoma, naasho osha li sha popiwa komunandjokonona Daniel P. Mannix kutya otashi dulu okuyelekanifwa “nokwaanya okusalutila epandela ile okweendulula eano li na sha nokukala omudiinini kepangelo.”

Mbela otashi kumu ngoo Kalunga ngeenge elongelokalunga oli na oshihongwafano sha ningwa moshiyata, sha hongwa moshiti, momamanya ile sha longwa moivela? —  Mbela osha yuka ngoo komupiya waJehova okwiilikana oihongwafano ya tya ngaho? —  Sadrak, Mesak naAbednego kava li va ilikana oshihongwafano, na Jehova okwa li e va hafela. Ongahelipi to dulu oku va hopaenena? —