NATU tye nee ngeno okaana kokakadona otaka lombwele meme wako taka ti: “Ohandi uya diva keumbo ngeenge ofikola ya dimbuka.” Ndele okakadona oko oka ka kala taka danauka nookahewa kako ndele taka lombwele meme wako taka ti: “Omuhongi wetu oye a ti nandi kale kofikola eshi twa dimbuka.” Mbela osha yuka ngoo okupopya oshinima sha tya ngaho? — 

Ile otashi dulika okamati ka lombwele tate wako taka ti: “Ame haame nda lyatela etanga meumbo.” Ndele mbela ongahelipi ngeenge oko ke li lyatela mo shili? Mbela osha puka okupopya kutya hako ke li lyatela mo? — 

Omuhongi Munene okwe tu ulikila oshinima sha yuka osho tu na okuninga, a ti: ‘Eendjovo deni nadi tye: Heeno, heeno, ile: ahowe, ahowe. Odo da wedwa ko, oda dja mowii.’ (Mateus 5:37) Jesus okwa li a hala okutya shike eshi a li a popya eendjovo odo? —  Okwa li a hala okutya kutya otu na okuninga osho hatu popi.

Ope na ehokololo limwe mOmbibeli olo tali ulike nghee sha fimana okukala hatu popi oshili. Ehokololo oli na sha novanhu  vavali ovo va li tave liti kutya ove li ovahongwa vaJesus. Natu ka tale kutya oshike sha li sha ningwa po.

Eemwedi mbali lwaapo okudja eshi Jesus a li a fya, ovanhu vahapu va dja koilando yokokule ova li ve uya kuJerusalem omolwoshivilo sha fimana shOvajuda, hashi ifanwa Opentekoste. Omuyapostoli Petrus okwa li a yandja oshipopiwa shiwa omo a li a lombwela ovanhu kombinga yaJesus, oo a nyumunwa kuJehova koufi. Ovanhu vahapu ovo va li ve uya kuJerusalem opo va li tave lihongo lwotete kombinga yaJesus. Ndele ovanhu ovo ova li va hala okulihonga shihapu. Mbela ova li va ninga po shike?

Ova li va kala efimbo lile muJerusalem. Ndele konima yefimbo, oimaliwa yavamwe vomuvo oya li ya pwapo, nova li va pumbwa okukwafelwa opo va dule okulanda oikulya. Ovahongwa vomuJerusalem ova li va hala okukwafela ovaenda. Onghee hano, vahapu vomuvo ova li va landifa po oiniwe yavo nokutwala oimaliwa kovayapostoli vaJesus, opo nee, ovayapostoli tava yandje oimaliwa kwaavo va li ve na omhumbwe.

Ananias nomukulukadi waye Safira, ovo va li oilyo yeongalo lopaKriste muJerusalem, ova li va landifa po epya lavo. Kape na oo a li e va lombwela va landife po epya olo, ndele ova li va tokola kuvo vene. Ndele  kava li va landifa po epya lavo molwaashi ve hole ovahongwa vape vaJesus. Ananias naSafira ova li va hala okuningifa ovanhu va diladile kutya vo ovanhu ve li nawa neenghono. Onghee hano, ova li va tokola okupopya kutya otava yandje oimaliwa aishe opo va kwafele vamwe. Ashike ova li ashike tava ka yandja imwe yomoimaliwa oyo, ndele tava ti kutya ova yandja aishe. Mbela oto diladila ngahelipi kombinga yoshinima osho? — 

Ananias okwa li a ya kovayapostoli, ndele te va pe oimaliwa. Ashike Kalunga okwa li e wete kutya Ananias ina yandja oimaliwa aishe. Nomolwaasho, Kalunga okwa li a hololela omuyapostoli Petrus kutya Ananias ita popi oshili.

Petrus okwa li a pula Ananias a ti: ‘Ananias, oshike wa efela Satana e ku ningife ngaho? Epya ola li loye, kwa li u na oku li landifa po. Naashi we li landifa po, oove mwene wa li u na okutokola kutya oto ka longifa ngahelipi oimaliwa yoye. Omolwashike hano to liningifa kutya owa yandja oimaliwa aishe ofimbo wa yandja ashike imwe yomuyo? Hafye ashike wa fufya, ndele owa fufya yo Kalunga.’

Oshinima osho osha li sha kwata moiti neenghono. Ananias okwa li ta popi oipupulu, molwaashi ka li a ninga ngaashi a popya. Ananias okwa li ashike te liningifa. Ombibeli oye tu lombwela osho sha ningwa po konima yaasho ya ti: ‘Ananias eshi a uda eendjovo daPetrus, okwa wila poshi ndele ta fi.’ Kalunga oye a li a dipaa Ananias, nokonima yaasho, oshimhu shaye osha li sha twalwa pondje ndele tashi pakwa.

 Eevili nhatu lwaapo konima yaasho, Safira okwa li e uya kuPetrus. Safira ka li e shii osho sha ningilwa omushamane waye. Onghee hano, Petrus okwa li a pula Safira a ti: ‘Lombwele nge, epya leni omwe li landifa po ngoo oimaliwa ei mwe tu pa?’

Safira okwa li a nyamukula Petrus a ti: ‘Heeno, oimaliwa oyo oyo twa landifa epya letu.’ Ashike Safira okwa li ta popi oipupulu, molwaashi ova li ve lifiila po oimaliwa imwe yomwaayo va landifa epya. Onghee hano, Kalunga okwa li yo a dipaa Safira. — Oilonga 5:1-11.

Oshike tu na okulihonga mwaasho sha li sha ningilwa Ananias naSafira? —  Otu na okulihonga mo kutya Kalunga ke hole ovanaipupulu. Okwa hala tu kale hatu popi alushe oshili. Ashike ovanhu vahapu ohava ti kutya okupopya oipupulu kashi fi oshinima shii. Mbela oto diladila kutya ovanhu ovo ove li mondjila? —  Mbela ou shi shii ngoo kutya okupopya oipupulu oko kwa etifa omikifi nomaupyakadi aeshe nosho yo efyo? — 

Dimbuluka kutya Ondiaboli oya li ya lombwela oipupulu omukainhu wotete, Eva. Ondiaboli oya li ya lombwela Eva kutya ita ka fya shili ngeenge okwa kala ina dulika kuKalunga nokulya oshiimati osho Kalunga a ti kutya ine shi lya. Eva okwa li a itavela osho a lombwelwa kOndiaboli, ndele ta li oshiimati osho. Eva okwa li yo a pa Adam a lye oshiimati osho. Okudja opo, Adam naEva ova li va ninga ovalunde, nounona vavo aveshe ova li tava ka dalwa moulunde. Molwaashi Adam naEva ova li va ninga ovalunde, ounona vavo aveshe ova li va mona oixuna, nohauxuuninwa ova ka fya. Mbela oshike sha li sha etifa oupyakadi oo? —  Owa etifwa koipupulu.

Hano itashi kumwifa eshi Jesus a ti kutya Ondiaboli oyo “omunaipupulu naxe yayo”! Ondiaboli oyo ya li ya popya oipupulu oshikando shotete. Ngeenge omunhu wonhumba oha popi oipupulu, ota ningi ngaashi Ondiaboli ya li ya  ninga. Natu kale hatu diladila kombinga yaasho ngeenge otwa kwatwa keamo lokupopya oipupulu. — Johannes 8:44.

Onaini shi na oupu u kwatwe keamo lokupopya oipupulu? —  Mbela hangeenge wa ninga sha sha puka? —  Otashi dulika u tatule oshinima shonhumba nonande ino shi tatulila owina. Ngeenge owa pulwa kutya olyelye a tatula oshinima osho, mbela oto ka tya kutya umwe womovamwaina voye oye e shi tatula? Ile mbela oto ke liningifa kutya ku shii kutya osha tatuka ngahelipi? — 

Ongahelipi ngeenge owa li u na okulonga oilonga yoye yokofikola ndele owa ninga po ashike imwe? Mbela ou na okupopya kutya owe i ninga aishe nonande hasho shili? —  Natu dimbuluke Ananias naSafira ovo va li va popya oipupulu, na Kalunga okwa li a ulika kutya oshinima osho va li va ninga oshii eshi e va dipaa.

Onghee hano, kashi na nee mbudi kutya otashi dulika tu ninge shike, otashi ka naipaleka ashike oshinima ngeenge otwa popi oipupulu ile ouyelele inau lixwa po. Ombibeli oya ti: “Popyeni oshili.” Ombibeli oya ti yo vali: “Inamu lombwelafana oipupulu.” Jehova oha popi alushe oshili, nokwa hala nafye tu kale hatu popi oshili. — Ovaefeso 4:25; Ovakolossi 3:9.