MBELA ou shii oshinima shonhumba shihokwifa? Tala keke loye. Kumatela eke loye. Kendabala okutoola sha pedu. Omake oye otaa dulu okuninga oinima ihapu. Mbela ou shi shii kutya olyelye a shita omake etu? —

Kalunga, Xe yOmuhongi Munene, oye a shita omake etu, omakanya etu, omayulu etu nosho yo omesho etu. Mbela ino hafa eshi Kalunga e tu shita tu na omesho? — Ohatu dulu okutala oinima ihapu nomesho etu. Ohatu dulu okutala eengala, omwiidi mutalala nosho yo evalelwa limbulau. Otashi dulika nokuli tu mone oudilona tava li ngaashi ovo tu wete pefano eli. Mbela kashi kumwifi okutala oinima ya tya ngaho? —

Ndele mbela olyelye a shita oinima oyo? Mbela ope na omunhu wonhumba oo e i shita? Ahowe. Ovanhu otava dulu okutunga omaumbo, ndele itava dulu okumenifa omwiidi. Ovanhu itava dulu yo okushita oudilona, eengala, ile keshe tuu oshinima shi na omwenyo. Mbela owa kala nale u shi shii? —

Kalunga oye a shita oinima aishe oyo. Okwa shita eulu nedu nosho yo ovanhu. Oye a shita omulumenhu nomukainhu wotete. Omuhongi Munene, Jesus, okwa li a honga ovanhu kutya Kalunga oye a shita omulumenhu nomukainhu wotete. — Mateus 19:4-6.

 Mbela Jesus okwa li e shi shiiva ngahelipi kutya Kalunga oye a shita omulumenhu nomukainhu wotete? Mbela Jesus okwa li a mona Kalunga eshi a li te va shiti? — Heeno, okwa li e mu mona. Molwaashi Kalunga okwa shita tete Jesus, Jesus opo a li eshi Kalunga a shita omulumenhu nomukainhu wotete kombada yedu. Jesus okwa li omweengeli nokwa kala pamwe naXe meulu.

Ombibeli otai ti kutya Kalunga okwa tile: “Tu meni ovanhu.” (Genesis 1:26) Mbela ou shi shii kutya Kalunga okwa li ta popi nalyelye eshi a popya eendjovo odo? — Okwa li ta popi nOmona waye, oo konima yefimbo e ke uya kombada yedu nokwa li a shiivika nedina Jesus.

Mbela osho kashi hokwifa? Diladila kwaashi, ngeenge hatu pwilikine kuJesus, ohatu hongwa kwaao a li pamwe naKalunga eshi Kalunga a shita edu noinima ikwao aishe. Jesus okwa li e lihonga shihapu eshi a li a longa pamwe naXe meulu. Onghee hano, itashi kumwifa eshi e li Omuhongi Munene.

 Mbela oto diladila kutya Kalunga okwa li ina hafa fimbo ina shita Omona waye? — Hasho nandenande. Ngeenge osho shi li ngaho, omolwashike nee a shita oinima aishe ikwao i na omwenyo? — Okwe shi ninga molwaashi oye Kalunga omunahole. Okwa li a hala ovanhu va kale nomwenyo nove u hafele. Otu na okupandula Kalunga omolwomwenyo oo e tu pa.

Keshe osho Kalunga a shita otashi ulike ohole yaye. Kalunga okwa shita etango, olo hali tu pe ouyelele nohali tu pe oupyu. Ngeno Kalunga ka li a shita etango, oinima aishe i na omwenyo ngeno kai ko. Mbela ino hafa eshi Kalunga a shita etango? —

Kalunga oha lokifa yo odula. Omafimbo amwe otashi dulika u kale ino hala odula i loke molwaashi owa hala oku ka danauka pondje, ndelenee odula oyo hai kulike eengala. Oto ka pandula lyelye ngeenge owa mono eengala diwa? — Oto ka pandula Kalunga. Ngeenge hatu li oiimati nosho yo oikwambidi iwa, mbela otu na okupandula lyelye? — Otu na okupandula Kalunga molwaashi etango laye nosho yo odula yaye oyo hai shi ningifa tashi shiiva opo oinima oyo i mene.

Natu tye nee ngeno umwe okwe ku pula kutya: ‘Mbela Kalunga oye a shita ovanhu nosho yo oinamwenyo?’ Oto ka nyamukula ngahelipi? — Otashi ka kala sha yuka okunyamukula to ti: “Osho naanaa, Kalunga oye a shita ovanhu nosho yo oinamwenyo.” Ndele ongahelipi ngeenge ope na umwe a itavela kutya Kalunga haye shili a shita ovanhu? Ongahelipi ngeenge okwa ti kutya ovanhu ova dja moinamwenyo? Ombibeli hasho tai hongo ngaho. Ombibeli otai ti kutya Kalunga oye a shita oinima aishe i na omwenyo. — Genesis 1:26-31.

Otashi dulika pa kale umwe oo te ku lombwele kutya ye ina itavela muKalunga. Oto ke mu nyamukula ngahelipi? — Oto dulu oku mu ulikila eumbo. Ndele to mu pula to ti: “Olyelye a tunga eumbo olo?” Keshe umwe oku shi shii kutya eumbo oli na okukala la tungwa po komunhu wonhumba, ndele inali holoka po ashike ngahenya kulo vene. — Ovaheberi 3:4.

 Opo nee mu twala koshikunino shonhumba ndele to mu ulikile eengala. Ndele to mu pula kutya: “Olyelye a shita eengala edi?” Kape na nande omunhu umwe. Ngaashi ashike eumbo inali holoka po ngahenya kulo vene, eengala odo nado inadi holoka po ashike ngahenya kudo vene. Kalunga oye e di shita.

Mu lombwela a pwilikine koudila ovo tava imbi, opo nee mu pula kutya: “Olyelye a shita oudila nolyelye e va honga okwiimba?” OKalunga. Kalunga oye a shita eulu, edu nosho yo oinima aishe i na omwenyo. Kalunga oye yo e tu pa omwenyo.

Ndelenee ovanhu vamwe otava dulu okutya ohava itavele ashike osho tava dulu okumona nomesho. Otashi dulika va tye: ‘Itandi dulu okwiitavela oshinima shonhumba osho ihandi dulu okumona nomesho.’ Nomolwaasho, ovanhu vamwe ohava ti kutya inava itavela muKalunga molwaashi ihave mu mono.

Oshoshili kutya itatu dulu okumona Kalunga. Ombibeli otai ti kutya: ‘Kape na omunhu ta dulu okumona Kalunga.’ Kape na omunhu kombada yedu ta dulu okumona Kalunga, kutya nee omulumenhu, omukainhu ile okaana. Onghee hano, katu na okukendabala okuliningila efano laKalunga. Kalunga okwe tu lombwela nokuli kutya katu na okuliningila oiyelekelakalunga. Itatu ka hafifa Kalunga ngeenge otwa kala tu na oinima ya tya ngaho momaumbo etu. — Exodus 20:4, 5; 33:20; Johannes 1:18.

Ndele mbela ongahelipi hatu dulu okushiiva kutya Kalunga oko e li shili, ngeenge ihatu dulu oku mu mona? Diladila kwaashi, mbela ohatu dulu okumona omhepo? — Hasho nandenande. Kape na oo ha dulu okumona omhepo, ndele ohatu mono eshi tai linyengifa oinima. Ohatu mono omafo tae linyenge eshi omhepo tai pepe. Nokungaho otwa itavela kutya omhepo oko i li.

Sha faafana, ohatu dulu yo okumona oinima oyo Kalunga a shita, ngaashi eengala da temuna ile oudila. Oinima oyo otai ulike kutya Kalunga oko e li shili.

Otashi dulika umwe e ku pule ta ti: ‘Olyelye a shita etango nosho yo edu?’ Ombibeli otai ti kutya: “Kalunga okwa shita eulu nedu.” (Genesis  1:1) Kalunga oye a shita oinima aishe oyo ikumwifi. Mbela ou udite ngahelipi shi na sha naasho?

Mbela ino hafa eshi tu na omwenyo? Ohatu dulu okuuda oudila tava imbi omaimbilo mawa. Ohatu dulu okutala eengala nosho yo oinima imwe oyo Kalunga a shita, nohatu dulu yo okulya oikulya oyo e tu pa.

Otu na okuyandja olupandu kuKalunga omolwoinima aishe oyo e tu pa. Ndele osho sha fimanenena unene oshosho kutya otu na oku mu pandula omolwomwenyo oo e tu pa. Ngeenge otu na shili olupandu omolwoinima oyo Kalunga e tu pa, otu na okuninga po sha. Ohatu ka ninga po shike mbela? —  Ohatu ka pwilikina kuKalunga, nohatu ka ninga keshe osho te tu lombwele tu ninge okupitila mOmbibeli. Mokuninga ngaho, ohatu ka ulika kutya otu hole oo a shita oinima aishe.