1, 2. (a) Otwa pumbwa okushikula ewiliko lalyelye? (b) Omapulo elipi hatu ka kundafana metukulwa eli?

ESHI wa li okaana, otashi dulika omafimbo amwe ovadali voye va li have ku pula u ninge oshinima shonhumba ndele kwa li ho kala wa hala. Ou hole ovadali voye noushi shii kutya ou na okudulika kuvo. Ashike, otashi dulika haalushe wa li ho kala wa hala okudulika kuvo.

² Otu shii kutya Tate yetu Jehova oku tu hole. Ohe tu file oshisho nohe tu pe alushe osho twa pumbwa opo tu hafele onghalamwenyo. Ohe tu pe ewiliko olo twa pumbwa opo tu pondole. Omafimbo amwe, oha longifa ovanhu vakwetu ve tu pe ewiliko. Otwa pumbwa okudulika keenghonopangelo daJehova. (Omayeletumbulo 24:21) Ndele mbela omolwashike efimbo limwe hashi kala shidjuu kufye okutambula ko ewiliko? Omolwashike Jehova a hala tu landule ewiliko laye? Ongahelipi hatu dulu okuulika kutya ohatu dulika keenghonopangelo daye? — Tala omafatululo oitya pexulilo lembo, oshitwa 9.

3, 4. Osha enda ngahelipi opo ovanhu va kale inava wanenena? Omolwashike hashi kala shidjuu kufye okutambula ko ewiliko olo hatu pewa kuvamwe?

³ Tu li ovanhu, otu na eamo lokukala inatu hala  okudulika. Osho osho sha kala ngaho okudja eshi omulumenhu nomukainhu wotete, Adam naEva va nyona. Nonande ova li va shitwa va wanenena, ova hoolola okuhadulika keenghonopangelo daKalunga. Okudja opo, ovanhu aveshe ova dalwa inava wanenena. Okuhawanenena kwetu oko kwe tu ningifa tu kale ihatu tambula ko noupu ewiliko olo hali di kuJehova nokovanhu. Etomheno limwe vali ololo kutya Jehova oha longifa ovanhu inava wanenena opo ve tu pe ewiliko. — Genesis 2:15-17; 3:1-7; Epsalme 51:5; Ovaroma 5:12.

⁴ Molwaashi inatu wanenena, ohatu kwatwa kounhwa. Ounhwa ohau shi ningifa shidjuu kufye okutambula ko ewiliko. Pashihopaenenwa, muIsrael shonale, Jehova okwa li a hoolola Moses a kwatele komesho oshiwana shaYe. Ashike Kora oo a li a longela Jehova omido dihapu okwa li a kwatwa kounhwa noka li a fimaneka Moses nandenande. Nonande Moses okwa li ta kwatele komesho oshiwana shaKalunga, ka li e na ounhwa. Moses okwa hokololwa nokuli kutya okwa li omulininipiki e dule ovanhu aveshe pefimbo opo. Ndele nande ongaho, Kora kali a tambula ko ewiliko laMoses. Okwa li nokuli a nwefa mo ovanhu vahapu ve mu waimine mokutukululila Moses oshibofa. Oshike sha ka ningilwa Kora naavo va li ve mu waimina? Ova li va dipawa. (Numeri 12:3; 16:1-3, 31-35) MOmbiibeli omu na oihopaenenwa ihapu tai tu hongo kutya ounhwa owa nyika oshiponga. — 2 Omafimbo 26:16-21; tala omafatululo oitya pexulilo lembo, oshitwa 10.

5. Ovanhu vamwe ova li va longifa nai ngahelipi eenghonopangelo davo?

⁵ Otashi dulika wa uda outumbulilo oo hau ti, “eenghonopangelo ohadi nyonauna ovanhu.” Ondjokonona aishe otai ulike kutya ovanhu vahapu ihava longifa nawa eenghonopangelo davo. (Lesha Omuudifi 8:9.) Pashihopaenenwa,  Saul okwa li e na omaukwatya mawa nomulininipiki eshi Jehova e mu hoolola a ninge ohamba yaIsrael. Ashike omutima waye owa li wa kwatwa kounhwa nokondubo, nosha li she mu ningifa a hepeke David, omulumenhu ehe na etimba. (1 Samuel 9:20, 21; 10:20-22; 18:7-11) Lwanima, David okwa ka ninga ohamba, nokwa li ohamba ya denga mbada muIsrael ashishe. Konima yefimbo, David naye okwa ka longifa nai eenghonopangelo daye. Okwa li a nangala naBatseba, omukulukadi waUria, nokwa li a kendabala okuholeka enyono laye mokutuma Uria a ka dipaelwe moita. — 2 Samuel 11:1-17.

6, 7. (a) Ohole yetu yokuhola Jehova ohai tu linyengifa tu ninge shike? (b) Oshike tashi ke tu kwafela tu kale hatu dulika nokuli nongeenge shidjuu kufye okuninga ngaho?

⁶ Ohatu dulika kewiliko laJehova molwaashi otu mu hole. Otwa hala okuhafifa Jehova molwaashi otu mu hole komesho yoinima aishe. (Lesha Omayeletumbulo 27:11; Markus 12:29, 30.) Okudja eshi ovalihomboli votete va li moshikunino shaEden, Satana okwa li a hala ovanhu va kale va limbililwa ounamapangelo waJehova. Ondiaboli oya hala tu diladile kutya Jehova ke na oufemba woku tu lombwela osho tu na okuninga. Ashike otu shii kutya osho kashi fi shoshili. Ohatu tu kumwe neendjovo edi tadi ti: “Omwene wetu naKalunga ketu, Ove owa wana okutambula efimano nefimaneko nepangelo, osheshi Ove owa shita oinima aishe, ndele kehalo loye oi li po, noya shitwa.” — Ehololo 4:11.

⁷ Eshi wa li okaana, otashi dulika wa hongwa u kale ho dulika kovadali voye, nokuli nongeenge wa li ino hala. Sha faafana, tu li ovapiya vaJehova, otashi dulika omafimbo amwe shi kale shidjuu kufye okudulika. Ashike otu hole  Jehova notwe mu fimaneka, onghee ohatu ningi keshe shimwe opo tu dulike kuye. Jesus okwe tu tulila po oshihopaenenwa. Okwa li a dulika kuJehova nokuli naashi sha li shidjuu kuye okuninga ngaho. Nomolwaasho a li a dula okulombwela Xe a ti: “Tate, ngeenge wa hala kufe nge eholo eli, ndele hahalo lange, ndelenee oloye.” — Lukas 22:42; tala omafatululo oitya pexulilo lembo, oshitwa 11.

8. Omeenghedi dimwe dilipi Jehova he tu wilike? (Tala oshimhungu “ Kala ho tambula ko omayele.”)

⁸ Kunena, Jehova ohe tu wilike okupitila meenghedi di lili noku lili. Pashihopaenenwa, okwe tu pa Ombiibeli. Okwe tu pa yo ovakulunhuongalo momaongalo. Ohatu ulike kutya ohatu dulika keenghonopangelo daJehova ngeenge hatu dulika kwaavo ta longifa oku tu kwatela komesho. Ngeenge inatu hala ekwafo lavo, kungaho ohatu ulike kutya otwa ekelashi Jehova. Eshi Ovaisrael va li va ekelashi Moses, Jehova okwa li e shi tala ko sha kwata moiti. Okwa li e shi tala ko kutya oye va ekelashi. — Numeri 14:26, 27; tala omafatululo oitya pexulilo lembo, oshitwa 12.

9. Ongahelipi ohole tai dulu oku tu linyengifa tu landule ewiliko?

⁹ Ngeenge ohatu dulika kwaavo ve na eenghonopangelo, otashi ulike kutya otu hole yo ovamwatate novamwameme. Diladila kwaashi: Ngeenge pa holoka oshiponga shopaushitwe, luhapu oshipaana yokukwafela ohai longele kumwe opo i xupife ovanhu vahapu ngaashi tashi dulika. Opo oshipaana oyo i pondole, oya pumbwa omuunganeki, noshilyo keshe osha pumbwa okulandula ewiliko. Ndele mbela oshike tashi dulu okuningwa po ngeenge umwe womuvo ina dulika kewiliko nota ningi ashike ngaashi a hala? Nokuli nongeenge omalinyengotomheno aye omawa, okukala ina hala okulandula ewiliko otaku dulu okweetela ovalongi pamwe naye omaupyakadi, tashi dulika nokuli va mone oiponga neenghono. Sha faafana, ngeenge itatu landula ewiliko laJehova nosho yo ovo a pa eenghonopangelo, vamwe  otashi dulika va hangwe komaupyakadi. Ashike ngeenge otwa dulika kuJehova, ohatu ulike kutya otu hole ovamwatate notwa fimaneka elongekido laJehova. — 1 Ovakorinto 12:14, 25, 26.

10, 11. Ohatu ka kundafana shike?

¹⁰ Keshe osho Jehova ta pula tu ninge oshi na sha nouwa wetu vene. Ngeenge otwa kala hatu dulika kwaavo ve na eenghonopangelo momaukwaneumbo, meongalo nosho yo ovakwanepangelo, atushe ohatu ka mona mo ouwa. — Deuteronomion 5:16; Ovaroma 13:4; Ovaefeso 6:2, 3; Ovaheberi 13:17.

¹¹ Ngeenge otwa udu ko kutya omolwashike Jehova a hala tu kale hatu dulika kuvamwe, otashi ke tu kwafela tu shi ninge nehalo liwa. Natu ka kundafaneni ouyelele muhapu u na sha nanghee hatu dulu okudulika moinima yopatatu mokukalamwenyo kwetu.

12. Ongahelipi omushamane ta dulu okuulika kutya oha dulika kwaavo ve na eenghonopangelo?

¹² Jehova oye a tota po oukwaneumbo, nokwa pa oshilyo keshe shoukwaneumbo oshinakuwanifwa osho shi na okuwanifa po. Ngeenge keshe umwe moukwaneumbo oku udite ko kutya Jehova okwa teelela a ninge shike, oukwaneumbo otau ka longela kumwe, noshilyo keshe otashi ka mona ouwa. (1 Ovakorinto 14:33) Jehova okwa tula po omushamane oye a kale omutwe woukwaneumbo. Osho osha hala kutya Jehova okwa teelela omushamane a file oshisho pahole nokuwilika omukulukadi waye nounona. Onghee hano, omushamane oku na okulihokolola kuJehova shi na sha nanghee ha file oshisho oukwaneumbo waye. Omushamane Omukriste oku na olukeno, ohole noha ungaunga nawa noukwaneumbo waye, ngaashi ashike Jesus  ha ungaunga neongalo. Ngeenge omushamane osho ha ningi ngaho, ota ulike kutya oha dulika kuJehova. — Ovaefeso 5:23; tala omafatululo oitya pexulilo lembo, oshitwa 13.

13. Ongahelipi omukulukadi ta dulu okuulika kutya oha dulika kwaavo ve na eenghonopangelo?

¹³ Omukulukadi Omukriste naye oku na oshinakuwanifwa sha fimana moukwaneumbo. Oha yambidida omushamane waye eshi ta longo noudiinini opo a kale omutwe woukwaneumbo muwa. Oha longele kumwe nomushamane waye mokutekula ounona vavo. Omukulukadi oha hongo ounona vaye va kale hava dulika okupitila moshihopaenenwa shaye. (Omayeletumbulo 1:8) Oha dulika komushamane waye nokulongela kumwe naye ngeenge ta ningi omatokolo. Nokuli nonande ita tu kumwe naye moshinima shonhumba, oha popi omaliudo aye nombili nonefimaneko. Oshi li eshongo linene ngeenge omukainhu Omukriste okwa hombolwa komushamane ehe fi Ondombwedi. Ashike ngeenge okwa twikile okuungaunga pahole nonefimaneko nomushamane waye, otashi dulika naye a kale a hala okulihonga kombinga yaJehova noku mu longela. — Lesha 1 Petrus 3:1.

14. Ongahelipi ounona tava dulu okuulika kutya ohava dulika kwaavo ve na eenghonopangelo?

¹⁴ Ounona ove na ondilo kuJehova, nova pumbwa unene tuu okwaamenwa nokupewa ewiliko. Ngeenge ounona ova kala tava dulika kovadali vavo, ohashi hafifa ovadali. Osho sha fimanenena, ngeenge ounona ohava dulika, otashi ulike kutya ova fimaneka Jehova notave mu hafifa. (Omayeletumbulo 10:1) Momaukwaneumbo mahapu, ounona otava tekulwa komudali umwe. Osho otashi dulu okukala shidjuu komudali nokounona. Ashike ngeenge ounona ohava dulika nokuyambidida xe ile ina, oukwaneumbo otau ka kala u na onghalamwenyo i li xwepo. Kutya nee oukwaneumbo ou li monghalo ya tya ngahelipi, kape na oukwaneumbo wa fikama  po movanhu va wanenena. Ndele oukwaneumbo keshe otau dulu okukala wa hafa ngeenge oshilyo keshe ohashi dulika kewiliko laJehova. Osho ohashi fimanekifa Jehova, oo e li Omushiti womaukwaneumbo aeshe. — Ovaefeso 3:14, 15.

15. Ongahelipi hatu okuulika kutya ohatu dulika kwaavo ve na eenghonopangelo meongalo?

¹⁵ Jehova ohe tu wilike okupitila meongalo lopaKriste, nokwa pa Jesus eenghonopangelo a kale omutwe weongalo. (Ovakolossi 1:18) Kakele kaasho, Jesus okwa pa “omupiya omudiinini nomunaendunge” oshinakuwanifwa shokufila oshisho oshiwana shaKalunga kombada yedu. (Mateus 24:45-47) Kunena, “omupiya omudiinini nomunaendunge” oye Olutuwiliki. Olutuwiliki ohali tu pe osho twa pumbwa pefimbo la wapala opo tu dule okupameka eitavelo letu. Ovakulunhuongalo, ovayakuliongalo nosho yo ovapashukilishikandjo ohava yambidida omaongalo mounyuni aushe nohava pewa ewiliko kOlutuwiliki. Ovamwatate aveshe ovo ove na oshinakuwanifwa shoku tu fila oshisho. Otave ke lihokolola kuJehova shi na sha nanghee va ungaunga noinakuwanifwa yavo. Onghee hano, ngeenge otwa kala hatu dulika kuvo, kungaho ohatu ulike kutya ohatu dulika kuJehova. — Lesha 1 Ovatessaloniki 5:12; Ovaheberi 13:17; tala omafatululo oitya pexulilo lembo, oshitwa 14.

16. Omolwashike hatu dulu okutya ovakulunhuongalo novayakuliongalo ova nangekwa po komhepo iyapuki?

¹⁶ Ovakulunhuongalo novayakuliongalo ohava kwafele eongalo opo li kale lidiinini nola hangana. Oshoshili kutya inava wanenena, ngaashi ashike fye. Ohava nangekwa po ngahelipi? Ovamwatate ovo ove na okukala va wanifa po oiteelelwa oyo i li mOmbiibeli. (1 Timoteus 3:1-7, 12; Titus 1:5-9) Jehova okwa longifa omhepo iyapuki opo a nwefe  mo ovashangi vOmbiibeli va dule okushanga oiteelelwa oyo. Ovakulunhuongalo ohava ilikana kuJehova e va pe omhepo iyapuki i va kwafele ngeenge tava kundafana kutya olyelye a wana okunangekwa po e li omukulunhuongalo ile omuyakuliongalo. Osho otashi ulike kutya eongalo otali wilikwa kuJehova nokuJesus. (Oilonga 20:28) Ovalumenhu ovo va nangekwa po ve tu kwafele nove tu file oshisho ove li eeshali da dja kuKalunga. — Ovaefeso 4:8.

17. Opo omumwameme a ulike kutya oha dulika, oshike tashi dulika a pumbwa okuninga omafimbo amwe?

¹⁷ Omafimbo amwe otashi dulika paha kale ovakulunhuongalo ile ovayakuliongalo va kwatele komesho meongalo. Ovamwatate vamwe ovo va ninginifwa otava dulu okukwafela, ashike ngeenge kape na omumwatate, omumwameme wonhumba ota dulu okulonga po oilonga oyo i na okulongwa komumwatate a ninginifwa. Ngeenge omumwameme oye ta longo po oilonga yonhumba, oku na okudjala sha komutwe, kutya nee embale ile oshikaiwa. (1 Ovakorinto 11:3-10) Kungaho, ota ulike kutya okwa fimaneka elongekido laJehova li na sha noukwamutwe, kutya nee omoukwaneumbo ile omeongalo. — Tala omafatululo oitya pexulilo lembo, oshitwa 15.

18, 19. (a) Oshike hatu lihongo mOvaroma 13:1-7? (b) Ohatu ulike ngahelipi kutya otwa fimaneka ovapangeli?

¹⁸ Kunena, Jehova okwa efa omapangelo a kale e na eenghonopangelo donhumba, notu na okudulika kuo. Ohaa unganeke oilongo noitukulwa opo oinima i kale tai ende nawa nohaa pe ovanhu omayakulo oo a pumbiwa. Ovakriste ohava dulika komalombwelo oo e li mOvaroma 13:1-7. (Lesha.) Ohatu dulika “kovapangeli” nokeemhango doilongo ile domoitukulwa omo tu li. Eemhango odo otadi dulu okukuma omaukwaneumbo etu, eengeshefa detu ile oiniwe  yetu. Pashihopaenenwa, ohatu futu oifendela nohatu yandje omauyelele oo taa pulwa kepangelo. Ndele mbela otu na okuninga po shike ngeenge epangelo ole tu pula tu ninge oshinima osho tashi nyono eemhango daKalunga? Omuyapostoli Petrus okwa ti: “Okudulika kuKalunga ku dule okudulika kovanhu.” — Oilonga 5:28, 29.

¹⁹ Ngeenge hatu ungaunga novakwanepangelo, ngaashi ovapanguli ile ovapolifi, otu na alushe oku va fimaneka. Ovakriste ovanyasha ohava fimaneke ovahongi vavo nosho yo ovanailonga vamwe keefikola. Ohatu fimaneke ovayandji voilonga vetu, nokuli nonande ovanailonga vakwetu ihave shi ningi. Ngeenge ohatu ningi ngaho, ohatu hopaenene omuyapostoli Paulus, oo a li a fimaneka ovakwanepangelo nonande omafimbo amwe osha li shidjuu. (Oilonga 26:2, 25) Nokuli nonande vamwe itava ungaunga nawa nafye, ohatu va fimaneke. — Lesha Ovaroma 12:17, 18; 1 Petrus 3:15.

20, 21. Ohashi eta ouwa ulipi ngeenge hatu ulike kutya otwa fimaneka vamwe?

²⁰ Ovanhu ihava fimanekafana mounyuni aushe. Ashike oshiwana shaJehova osha yooloka ko. Ohatu kendabala okufimaneka ovanhu aveshe. Ohatu dulika komayele omuyapostoli Petrus oo taa ti: “Fimanekeni aveshe.” (1 Petrus 2:17) Ngeenge hatu fimaneke vamwe, ohave shi didilike. Jesus okwa ti: ‘Ouyelele weni nau minikile moipafi yovanhu, va mone oilonga yeni iwa nova hambelele Xo yeni meulu.’ — Mateus 5:16.

²¹ Ngeenge ohatu dulika moukwaneumbo, meongalo nosho yo moinima imwe vali yokukalamwenyo, oshihopaenenwa shetu shiwa otashi dulu okulinyengifa vamwe ve lihonge shihapu kombinga yaJehova. Kakele kaasho, ngeenge otwa fimaneka vamwe, ohatu ulike kutya otwa fimaneka Jehova. Osho ohashi hafifa Jehova notashi ulike kutya otu mu hole.