OSHILESHWA 06
Oinima i na omwenyo oye uya po ngahelipi?
‘Kalunga oye ofifiya yomwenyo.’ (Epsalme 36:9) Mbela oto shi itavele ngoo? Ovanhu vamwe ohava ti kutya oinima i na omwenyo inai shitwa. Ngeenge osho oshoshili, osha hala okutya otwe uya po ashike oshitwelipuma. Ndele ngeenge Jehova Kalunga oye a shita oinima i na omwenyo, osha yela kutya oye uya po nelalakano. a Natu ka kundafane ehokololo lopaMbiibeli li na sha nanghee oinima i na omwenyo ye uya po, nokutala kutya omolwashike shi li pandunge oku shi itavela.
1. Oinima oyo i li meshito oye uya po ngahelipi?
Ombiibeli oya ti: “Pehovelo Kalunga okwa shita eulu nedu.” (Genesis 1:1) Ovanongononi vahapu otava tu kumwe kutya oinima oyo i li meshito oi na ehovelo. Mbela Kalunga okwe i shita ngahelipi? Okwa longifa omhepo iyapuki, “eenghono daye tadi longo,” opo a shite oinima aishe oyo i li meshito, mwa kwatelwa omihalavili, eenyofi neepulaneta.— Genesis 1:2.
2. Omolwashike Kalunga a shita edu?
Jehova ina ‘shita edu li kale ombuwa, ndelenee okwe li ma li kalwe.’ (Jesaja 45:18) Okwa shita edu li li onhele iwa nokukala nokwa shitila ko oinima aishe oyo ovanhu va pumbwa, opo va dule okukala nomwenyo. (Lesha Jesaja 40:28; 42:5.) Ounongononi otau ulike kutya edu ola yooloka ko keepulaneta dikwao. Olo ashike opulaneta oko taku dulu okukala oinima i na omwenyo.
3. Oshike sha ningifa ovanhu va kale va yooloka ko koinamwenyo?
Konima eshi Jehova a shita edu, okwa shitila ko yo oinima i na omwenyo. Tete, okwa shitila ko oimeno noinamwenyo. Opo nee, “Kalunga okwa shita omunhu oshifefa shaye.” (Lesha Genesis 1:27.) Mbela oshike sha ningifa ovanhu va kale ve likalekelwa? Molwaashi otwa shitwa oshifefa shaKalunga, ohatu dulu okuhopaenena omaukwatya aye, ngaashi ohole nosho yo ouyuki. Okwe tu shita yo hatu dulu okulihonga omalaka, okuhafela oinima iwa nosho yo omusika. Mepingafano noinamwenyo, fye ohatu dulu okutanga Omushiti wetu.
KONAKONA MOULE
Konakona oumbangi oo tau ulike kutya oinima i na omwenyo oya shitwa nosho yo kutya ehokololo lopaMbiibeli li na sha neshito oli li paushili. Lihonga osho omaukwatya oo e li movanhu tae tu hongo kombinga yaKalunga.
4. Oinima i na omwenyo oya shitwa
Ovanhu ohava tangwa omolwoinima oyo va nduluka, nonande ova tapa keshito. Ndele mbela olyelye a pumbwa okutangwa omolweshito? Dana OKAVIDIO, ndele tamu kundafana epulo tali shikula.
-
Oinima ilipi oyo ovanhu va nduluka, eshi va tapa keshito?
Eumbo keshe oli na omufaneki woplana yalo nomutungi walo. Ndele mbela olyelye a eta po, ile a shita oinima aishe oyo i li meshito? Lesha Ovaheberi 3:4, ndele tamu kundafana omapulo taa shikula:
-
Mbela oinima ilipi hai ku kumwifa meshito?
-
Mbela oshi li ngoo pandunge okwiitavela kutya oinima aishe oyo i li meshito oya shitwa? Omolwashike to tile ngaho?
Owe shi shiiva tuu?
Oto dulu okumona oitukulwa nosho yo ouvidio ovo va kundafana kombinga yaasho, ko jw.org koshi yoshitukulwa “Mbela oinima oya shitwa?” nosho yo “Omataleko e na sha nanghee oinima i na omwenyo ye uya po.”
“Eumbo keshe oli na omutungi walo, ndele Kalunga oye a shita oinima aishe”
5. Ehokololo lopaMbiibeli li na sha neshito oli li paushili
Ombiibeli oya popya muGenesis etukulwa 1, nghee edu nosho yo oinima i na omwenyo oyo i li ko ye uya po. Mbela ehokololo olo oloshili ngoo, ile omitotolombo ashike? Dana OKAVIDIO, ndele tamu kundafana omapulo taa shikula.
-
Mbela Ombiibeli otai hongo kutya edu nosho yo oinima i na omwenyo oyo i li ko oya shitwa ashike moule womafiku ahamano?
-
Mbela oto diladila kutya ehokololo lopaMbiibeli li na sha neshito oli na ngoo eityo noli shii okulineekelwa? Ngeenge osho, omolwashike, nongeenge hasho, omolwashike?
Lesha Genesis 1:1, ndele tamu kundafana epulo tali shikula:
-
Ovanongononi ova popya kutya eshito oli na ehovelo. Ngeenge to shi yelekanifa naasho wa lesha mOmbiibeli, mbela otashi tu kumwe, ile hasho?
Vamwe ova fika pexulifodiladilo kutya Kalunga okwa eta po oinima okupitila moevolusi. Lesha Genesis 1:21, 25, 27, ndele tamu kundafana omapulo taa shikula:
-
Mbela Ombiibeli otai hongo kutya Kalunga okwa shita ashike oinima yonhumba nokudja opo oya ka enda tai lunduluka paevolusi, ngaashi eeshi, oinamwenyo imwe vali nosho yo ovanhu? Ile okwe i shita “pamaludi” i li ngaashi i li? b
6. Ovanhu ova shitwa monghedi ye likalekelwa
Otwa yooloka ko koinamwenyo oyo Jehova a shita. Lesha Genesis 1:26, ndele tamu kundafana epulo tali shikula:
-
Molwaashi otwa shitwa oshifeka shaKalunga, okudula kwetu okuulikila vamwe ohole nosho yo olukeno otaku holola shike kombinga yomaukwatya aKalunga?
VAMWE OHAVA TI: “Ehokololo lopaMbiibeli li na sha neshito oli li omitotolombo.”
-
Mbela ove oto ti ngahelipi? Omolwashike to tile ngaho?
ENGONGO
Jehova oye a shita oinima aishe mwa kwatelwa oyo i na omwenyo.
Eendululo
-
Ombiibeli otai hongo shike shi na sha nanghee oinima ye uya po?
-
Mbela Kalunga okwa eta po oinima i na omwenyo paevolusi, ile okwe i shita i li ngaashi i li?
-
Omolwashike ovanhu va yooloka ko koishitwa ikwao?
TALA OUYELELE WA WEDWA PO
Lihonga kombinga yoinima oyo tai ulike kutya oku na omushiti.
“Oshike hatu lihongo keshito?” (Kala oupafi!, Septemba 2006)
Tala nghee xe omudali ta dulu okuyelifila omonamati kombinga yehokololo lopaMbiibeli li na sha neshito.
Konakona ngeenge oevolusi nosho yo osho Ombiibeli tai ti, otai tu kumwe.
Konakona ngeenge oikulunima, ile omakonakono opaunongononi otaa ulike kutya oinima i na omwenyo oya shitwa, ile oye uya po ashike ngahenya.
Nghee oinima i na omwenyo ye uya po— Omapulo atano a fimanenena (okambo)
a Moshileshwa 25 ohatu ka kundafana elalakano laKalunga li na sha novanhu.
b Oshitya “pamaludi,” osho shi li mOmbiibeli, otashi ulike kongudu inene yoinima i na omwenyo.
Otashi dulika yo u hafele oikundafanwa ei
OMAPULO OO HAA PULWA LUHAPU
Ekonakonombiibeli olo hali ningwa kEendombwedi daJehova oshike?
Peenghundafana doshali odo hadi ningwa kEendombwedi daJehova, oto dulu okulongifa etoloko lOmbiibeli keshe. Owa manguluka okushiva oukwaneumbo weni aushe, ile keshe umwe oo wa hala a kale po.
