OSHILESHWA 43
Ovakriste ove na okutala ko ngahelipi oikunwa yoalkoholi?
Mounyuni aushe, ovanhu ove na omataleko a yoolokafana e na sha noikunwa yoalkoholi. Vamwe ohava hafele okunwa omafimbo amwe pamwe nookaume kavo. Vamwe ova hoolola vaha nwe nandenande. Ofimbo vamwe hava nu, fiyo osheshi va kolwa. Ndele mbela Ombiibeli oya popya shike shi na sha noikunwa yoalkoholi?
1. Mbela osha puka okunwa oikunwa yoalkoholi?
Ombiibeli inai tokola okunwa oikunwa yoalkoholi. Mepingafano naasho, eshi ya tumbula mepsalme limwe eeshali dihapu, odo Kalunga e tu pa, omwa kwatelwa yo ‘omaviinyu, oo taa hafifa omutima womunhu.’ (Epsalme 104:14, 15) Ovalumenhu novakainhu vamwe ovadiinini, ovo va popiwa mOmbiibeli, ova li hava nu oikunwa yoalkoholi.— 1 Timoteus 5:23.
2. Ombiibeli oya yandja omayele elipi kwaavo va hoolola okunwa oikunwa yoalkoholi?
Jehova ita popile okunwa sha pitilila nosho yo oukolwe. (Ovagalati 5:21) Eendjovo daye oda ti: “Ino kala mokati kaava hava finyuna omaviinyu.” (Omayeletumbulo 23:20) Onghee hano, ngeenge otwa hoolola okunwa, kutya nee otu li ofye atuke, katu na okunwa sha pitilila. Ngeenge otwa nu sha pitilila, otashi ka kala shidjuu okupangela omadiladilo, okupopya nosho yo eenghatu detu, notashi nyono po oukolele wetu. Ngeenge ihatu dulu okulipangela, otu na okweefa po okunwa filufilu.
3. Ongahelipi hatu dulu okuulika kutya otwa fimaneka omatokolo avamwe, ngeenge tashi uya pokunwa oikunwa yoalkoholi?
Omunhu keshe oku na okuninga etokolo kutya ota nu oikunwa yoalkoholi, ile hasho. Katu na okutokola oo a hoolola okunwa oikunwa yoalkoholi pandjele, nokatu na yo okufininika oo ina hala okunwa. (Ovaroma 14:10) Ohatu dulu yo okuhoolola tuha nwe, ngeenge otashi pundukifa vamwe. (Lesha Ovaroma 14:21.) Ihatu ‘lalakanene ouwa wetu vene, ndele ohatu lalakanene ouwa wavamwe.’— Lesha 1 Ovakorinto 10:23, 24..
KONAKONA MOULE
Konakona omafinamhango oo taa dulu oku ku kwafela u tokole ngeenge oto nu oikunwa yoalkoholi, ile hasho, nongeenge osho, oto nu shi fike peni. Tala yo kutya oshike to dulu okuninga po, ngeenge oto kondjo nounghundi wokunwa sha pitilila.
4. Tokola ngeenge owa pumbwa okunwa oikunwa yoalkoholi, ile hasho
Jesus okwa li a tala ko ngahelipi okunwa oikunwa yoalkoholi? Opo tu mone enyamukulo, natu ka taleni koshikumwifilonga shaye shotete. Lesha Johannes 2:1-11, ndele tamu kundafana omapulo taa shikula:
-
Oshike hatu lihongo moshikumwifilonga osho shi na sha netaleko laJesus li na sha noikunwa yoalkoholi nosho yo ovo have i nu?
-
Molwaashi Jesus ka li e li omhinge nokunwa oikunwa yoalkoholi, mbela Omukriste oku na okutala ko ngahelipi oo a hoolola okunwa oikunwa yoalkoholi?
Ashike inashi hala okutya molwaashi Omukriste oku na emanguluko lokunwa oikunwa yoalkoholi, oshi li pandunge alushe okunwa. Lesha Omayeletumbulo 22:3, ndele tamu konakona oinima tai landula, mu tale nghee tai dulu okunwefa mo etokolo lomunhu, ngeenge oku na okunwa, ile hasho:
-
Ngeenge oto ka shinga, ile to ka longa noikwamashina.
-
Ngeenge ou li meteelelo.
-
Ngenge ndokotola okwe ku lombwela uha nwe oikunwa yoalkoholi.
-
Ngeenge oho mono shidjuu okulipangela.
-
Ngeenge ino pitikwa paveta u nwe.
-
Ngeenge ou li naumwe, oo a hoolola okuhanwa vali, molwaashi e na ounghundi wokuhelipangela.
Mbela ou na okuyandja oikunwa yoalkoholi pohango, ile poivilo imwe vali? Opo u mone osho tashi dulu oku ku kwafela, dana OKAVIDIO.
Lesha Ovaroma 13:13 nosho yo 1 Ovakorinto 10:31, 32. Konima eshi mwa lesha omushangwa keshe, kundafaneni epulo tali shikula:
-
Ongahelipi okutula moilonga efinamhango olo taku ku kwafele u ninge etokolo olo tali hafifa Jehova?
Omukriste keshe oku na okuninga etokolo kuye mwene kutya ota nu oikunwa yoalkoholi, ile hasho. Nonande oha nu, otashi dulika a hoolole okuhanwa omafimbo amwe
5. Tokola kutya oto nu shi fike peni
Ngeenge owa hoolola okunwa oikunwa yoalkoholi, kaleka oshinima eshi momadiladilo: Nonande Jehova ina tokola okunwa oikunwa yoalkoholi, okwa tokola oukolwe. Omolwashike mbela? Lesha Hosea 4:11, 18, ndele tamu kundafana epulo tali shikula:
-
Oshike tashi dulu okuningwa po, ngeenge omunhu okwa nu sha pitilila?
Ongahelipi hatu dulu okuhenuka okunwa sha pitilila? Otwa pumbwa okukala tu na ondjele, ile tu shii omangabeko etu. Lesha Omayeletumbulo 11:2, ndele tamu kundafana epulo tali shikula:
-
Omolwashike shiwa okulitulila po omangabeko okondadalunde e na sha nokutya oto nu shi fike peni?
6. Efa po okunwa sha pitilila
Tala kutya oshike sha kwafela omulumenhu umwe a efe po okunwa sha pitilila. Dana OKAVIDIO, ndele tamu kundafana omapulo taa shikula.
-
Ngaashi sha ulikwa mokavidio, oikunwa yoalkoholi oya li ya kuma ngahelipi eenghatu daDmitry?
-
Mbela okwa li a efa po diva okunwa oikunwa yoalkoholi?
-
Ongahelipi a li a efa po xuuninwa okukala a pikwa kokunwa oikunwa yoalkoholi?
Lesha 1 Ovakorinto 6:10, 11, ndele tamu kundafana omapulo taa shikula:
-
Oukolwe owa kwata moiti shi fike peni?
-
Oshike tashi ulike kutya ongholwe otai dulu okuninga omalunduluko?
Lesha Mateus 5:30, ndele tamu kundafana epulo tali shikula:
-
Eshi Jesus a longifa efaneko li na sha nokuteta ko eke, okwa hala okutya otwa pumbwa okuninga omaliyambo, opo tu hafife Jehova. Oshike to dulu okuninga po, ngeenge oto kondjo nounghundi wokunwa sha pitilila? a
Lesha 1 Ovakorinto 15:33, ndele tamu kundafana epulo tali shikula:
-
Ngeenge ookaume koye ohava nu sha pitilila, otashi ke ku kuma ngahelipi?
UMWE OTASHI DULIKA A PULE KUTYA: “Mbela osha puka okunwa oikunwa yoalkoholi?”
-
Oto ka nyamukula ngahelipi?
ENGONGO
Jehova okwe tu pa oikunwa yoalkoholi, opo tu i hafele, ashike okwa tokola okunwa sha pitilila nosho yo oukolwe.
Eendululo
-
Ombiibeli oya popya shike shi na sha noikunwa yoalkoholi?
-
Okunwa sha pitilila ohaku etifa omaupyakadi elipi?
-
Ongahelipi hatu dulu okuulika kutya otwa fimaneka omatokolo avamwe e na sha noikunwa yoalkoholi?
TALA OUYELELE WA WEDWA PO
Ongahelipi ovanyasha tava dulu okuninga omahoololo e li pandunge shi na sha noikunwa yoalkoholi?
Tala eenghatu odo to dulu okukatuka, opo u efe po okunwa sha pitilila.
“Kala u na etaleko la yuka li na sha noikunwa yoalkoholi” (Oshungonangelo, 1 Februali 2010)
Mbela Omukriste oku na okukufa ombinga mokudenga ouhalasha kumwe poivilo?
“Omapulo a dja kovaleshi” (Oshungonangelo, 15 Februali 2007)
Mehokololo “Onda li nda ninga ombuvi yomalodu,” tala nghee omulumenhu umwe a efa po okunwa sha pitilila.
“Ombiibeli ohai lundulula onghalamwenyo yovanhu” (Oshungonangelo, 1 Mei 2012)
a Ovo va pikwa koikunwa yoalkoholi, otashi dulika va pumbwa ekwafo landokotola, opo ve i efe po. Eendokotola dihapu oda popya kutya ovo va li hava nu sha pitilila inava nwa vali nandenande.
Otashi dulika yo u hafele oikundafanwa ei
OMAPULO OO HAA PULWA LUHAPU
Ekonakonombiibeli olo hali ningwa kEendombwedi daJehova oshike?
Peenghundafana doshali odo hadi ningwa kEendombwedi daJehova, oto dulu okulongifa etoloko lOmbiibeli keshe. Owa manguluka okushiva oukwaneumbo weni aushe, ile keshe umwe oo wa hala a kale po.
