1, 2. Ongahelipi Bileam a li a konga ondunge yokutwalifa oshiwana shaJehova moshiponga?

DILADILA kefaneko e li: Omuyuli weeshi umwe okwa li a ya konhele oko e hole okuyula eeshi. Okwa li a hala okuyula eeshi doludi lonhumba. Okwa tula okakulya kondjolo yaye ndele te i ekele momeva. Konima yefimbo, okwa li e udite kutya ondjolo yaye oya kwata nokwa nipula mo oshi oyo a yula. Okwa li te limemesha a hafa, molwaashi oku shii kutya okwa hoolola okakulya oko taka wapalele.

² Osho otashi tu dimbulukifa oshiningwanima shimwe osho sha ningilwe nale. Momudo 1473 K.O.P., omulumenhu wedina Bileam okwa li a diladila onghedi yonhumba oyo a li ta dulu okulongifa opo a yule Ovaisrael. Okwa li a lalakanena okuyula oshiwana shaKalunga, osho sha li sha onga onhanda mOmaluhaela aMoab, popepi nEdu lEudaneko. Bileam okwa li te liti kutya omuprofeti waJehova, ndele paulelalela okwa li ashike omulumenhu omunalwisho oo a pulwa a finge Ovaisrael. Ndele nande ongaho, Jehova okwa li a yukifa oinima opo Bileam a nangeke noupuna Ovaisrael, ponhele yoku va finga. Molwaashi Bileam okwa li a tokola okumona ondjabi yaye, okwa li a diladila kutya Kalunga otashi dulika a finge oshiwana shaYe ngeenge osha yelekwa shi nyone sha kwata moiti. Onghee hano, Bileam okwa longifa okakulya kopafaneko, ovakainhu Ovamoab ve na ekonda, opo a yule Ovaisrael. — Numeri 22:1-7; 31:15, 16; Ehololo 2:14.

3. Ondunge yaBileam oya li ya pondola shi fike peni?

³ Mbela ondunge yaBileam oya li ngoo ya pondola? Heeno, oya li ya pondola. Ovalumenhu Ovaisrael omayovi omilongo  ova li va yulwa komwiyo oo ‘mokuhaela novana oukadona Ovamoab.’ Ova li nokuli va longela oikalunga yOvamoab, mwa kwatelwa Baal-Peor, oshikalunga shitondifa sholudalo ile shomilele. Oshidjemo, Ovaisrael 24 000 ova li va fila popepi nEdu lEudaneko. Kasha li tuu shi nyikifa oluhodi! — Numeri 25:1-9.

4. Omolwashike Ovaisrael omayovi va li va ya momwiyo woluhaelo?

⁴ Oshike sha li sha ningifa Ovaisrael va ye monghalo ya nyika oshiponga ya tya ngaho? Ovanhu vahapu ova li va kulika oikala ii momitima davo mokweefa po Jehova, Kalunga oo a li e va mangulula muEgipti, e va palula mombuwa nokwa li e va endifa meameno fiyo opeengaba dedu leudaneko. (Ovaheberi 3:12) Omuyapostoli Paulus okwa popya shi na sha noshiningwanima osho a ti: “Inatu kaleni mohole yoipala, ngaashi vamwe vomuvo ve shi ninga, nova nyonwa po omayovi omilongo mbali nomayovi atatu mefiku limwe alike.” * — 1 Ovakorinto 10:8.

5, 6. Omolwashike ondjokonona i na sha nenyono lOvaisrael eshi va li mOmaluhaela aMoab ya fimana kufye kunena?

⁵ Ondjokonona oyo i li muNumeri oi na oilihongomwa ihapu ya fimana koshiwana shaKalunga kunena, osho shi li komungenge wokuya medu leudaneko olo la denga mbada. (1 Ovakorinto 10:11) Pashihopaenenwa, ovanhu mounyuni kunena  ova duvila omilele neenghono ngaashi sha li muMoab shonale, ndele kunena ova duka neenghono. Kakele kaasho, omudo keshe Ovakriste omayovi ohava i momwiyo woluhaelo, oo wa li wa yula yo Ovaisrael vonale. (2 Ovakorinto 2:11) Vamwe ovo hava endafana noshiwana shaKalunga kunena ove li enwefemo lii meongalo lopaKriste, ngaashi naanaa Simri, oo a li a eta omukainhu Omumidian monhanda yOvaisrael ndele te mu twala ketwali laye nopehe na oumbada. — Numeri 25:6, 14; Judas 4.

⁶ Mbela ou shii ngoo kutya otu li monghalo ya faafana naayo mwa li Ovaisrael eshi va li mOmaluhaela aMoab? Mbela ou wete u li pokumona ondjabi oyo wa kala wa teelela, sha hala okutya, ounyuni mupe oo u li poduka? Ngeenge osho ngaho, kendabala okuninga ngaashi to dulu opo u likaleke mohole yaKalunga mokudulika koshipango osho tashi ti: “Kukumeni oluhaelo.” — 1 Ovakorinto 6:18.

7, 8. “Oluhaelo” oshike, nongahelipi ovo hava i moluhaelo hava teya osho tava kunu?

⁷ Outumbulilo “oluhaelo” (mOshigreka, por·neiʹa) oo wa longifwa mOmbibeli, otau ulike komilele kondje yohombo. Oluhaelo ola kwatela mo enyonohombo, oumbwada, omilele pokati kovanhu inava hombolafana nosho yo enangalafano tali ningwa mokufipafana koilyo yoludalo. Ola kwatela mo yo okweendafana konima nosho yo okulikwatakwata koilyo yoludalo kwovanhu inava hombolafana. Natango, ola kwatela mo ovanhu voukashike kookanhu wa faafana tava ningi oinima oyo ya tumbulwa metetekelo nosho yo okunangala noimuna. *

⁸ Omishangwa oda yelifa nawa kutya: Ovo tava haele itava dulu okukala meongalo lopaKriste noitava ka mona omwenyo waalushe. (1 Ovakorinto 6:9; Ehololo 22:15) Ovahaeli ohava mono oilanduliko iyahameka, ngaashi okuhelineekelwa, okulishundula, okuhaudafana mohombo, eliudo li  udite etimba, okumita, omikifi nosho yo efyo nokuli. (Lesha Ovagalati 6:7, 8.) Omolwashike u na okweenda mondjila oyo i na omaupyakadi mahapu a tya ngaho? Shi nyikifa oluhodi, ovanhu vahapu ihava diladila kombinga yoilanduliko oyo tai dulu oku va hanga ngeenge ova katuka eenghatu donhumba, odo luhapu hadi hovele nokutala omafano oipala.

9. Mbela oshoshili ngoo kutya okutala omafano oipala inaku nyika oshiponga, ngaashi vamwe hava ti? Shi yelifa.

⁹ Moilongo ihapu, omafano oipala ohaa kala moifo oyo hai landifwa meefitola, moikwamusika, ko-TV nokwa hapupala neenghono kointaneta. * Ovanhu vamwe ohava ti kutya omafano a tya ngaho inaa nyika oshiponga, ndele okwa nyika oshiponga filufilu. Ovo hava tale omafano oipala otava dulu okukwatwa koikala yokulidanena koilyo yoludalo nokukala “mouhalu wohoni,” oo tau dulu okuningifa omunhu a kale a pikwa komilele, a kwatwe komahalo mai, nokweetifa okuhaudafana mohombo kwa kwata moiti nosho yo nokuli eteyohombo. * (Ovaroma 1:24-27; Ovaefeso 4:19) Omunhu umwe oo ha kongo omauyelele e na sha nokuhakula ovo va pikwa komilele okwa faafanifa okupikwa komilele nokukwatwa kokankela. Okwa ti: “Okupikwa komilele ohaku kulu nohaku tandavele efimbo keshe. Ihaku di po kuko vene, noshidjuu neenghono oku ku hakula noku ku velula.”

10. Omeenghedi dilipi hatu dulu okutula moilonga efinamhango olo li li muJakob 1:14, 15? (Tala yo  oshimhungu pepandja 101.)

¹⁰ Konakona eendjovo odo di li muJakob 1:14, 15, tadi ti: “Keshe umwe ota hongaulwa kokahalu kaye mwene, oko hake mu shili notake mu heke; nokahalu ngenge ka fimbapala, otaka dala oulunde, noulunde eshi [wa] wanifwa, otau dala efyo.” Ngeenge  omahalo mai tae uya momadiladilo oye, endelela okudiladila kombinga yoinima imwe. Pashihopaenenwa, ngeenge owa mono ombadilila omafano oo taa pendula omahalo mai, endelela u tale kumwe ku lili ile u dime okompiuta, ile u lundulule oshitaashi yo-TV. Ninga keshe osho to dulu opo u kondjife omahalo inaa koshoka, opo ehe ku dule eenghono. — Lesha Mateus 5:29, 30.

11. Ongahelipi hatu dulu okuulika kutya otwe lineekela Jehova ngeenge hatu kondjifa omahalo mai?

¹¹ Jehova oo e tu shii nawanawa, okwe tu kumaida netomheno liwa a ti: “Dipaeni hano oinhimbu yeni yopadu: oluhaelo, onyata, olwisho loipala, okahalu kaii, nolwisho leliko olo elongelo loikalunga.” (Ovakolossi 3:5) Okutula moilonga ekumaido olo otaku dulu okukala eshongo. Ndele dimbuluka kutya ohatu dulu okupula ekwafo kuTate yetu womeulu omunahole  nomunanheni. (Epsalme 68:20) Onghee hano, ilikana meendelelo kuJehova ngeenge owa kwatwa komadiladilo inaa koshoka. Ilikana e ku pe ‘eenghono,’ navali kendabala okudiladila kombinga yoinima imwe i lili. — 2 Ovakorinto 4:7; 1 Ovakorinto 9:27; tala oshimhungu “ Ongahelipi handi dulu okweefa po onghedindjikilile ii?” pepandja 104.

12. “Omutima” wetu otau ulike kushike, nomolwashike tu na oku u amena?

¹² Omulumenhu omunaendunge Salomo okwa ti: “Omutima woye [u] amena komesho yoinima aishe oyo i nokwaamenwa, osheshi muo tamu di omwenyo.” (Omayeletumbulo 4:23) “Omutima” wetu oo omunhu wetu womeni, osho tu li lela koshipala shaKalunga. Kakele kaasho, Kalunga oha tale ‘komitima’ detu opo a tokole ngeenge otwa wana oku ka mona omwenyo waalushe ile hasho, ndele hakunghee vamwe have tu tale ko. Molwaashi Kalunga oha dulu okumona oikala yomitima detu, osha fimanenena okulungamena omitima detu opo tu ka mone omwenyo waalushe. Omulumenhu omudiinini Job okwa li a ninga eudafano nomesho aye opo aha tale kovakainhu nokahalu. (Job 31:1) Kashi fi tuu oshihopaenenwa shiwa kufye! Omupsalme umwe okwa li a ulika oikala ya fa yaJob, eshi a li a ilikana a ti: “Omesho ange a alula ko, a ha tale koinima yongaho.” — Epsalme 119:37.

13. Dina okwa li lyelye, nomolwashike a li a ninga etokolo lihe li pandunge mokupanga kwaye oukaume?

¹³ Ngaashi twa mona mEtukulwa 3, ookaume ketu otava dulu oku tu nwefa mo neenghono, kutya nee onawa ile onai. (Omayeletumbulo 13:20; lesha 1 Ovakorinto 15:33.) Tala koshihopaenenwa shaDina, omonakadona watatekulululwa Jakob. Nonande Dina okwa li a tekulwa nawa, okwa li a ninga etokolo lihe li pandunge mokupanga oukaume noukadona Ovakanaan. Ngaashi Ovamoab, Ovakanaan navo ova li va shiivikila oluhaelo. (Leviticus 18:6-25) Sikem, omulumenhu Omukanaan, oo a “li a fimana” moukwaneumbo waxe, okwa li a ninga Dina oshihakanwa shaye. — Genesis 34:18, 19.

14. Okupanga oukaume kwaDina nOvakaanan okwa li kwa etifa omaupyakadi elipi?

 ¹⁴ Dina otashi dulika ka li a diladila okuya momilele eshi a li a mona Sikem. Ndele Sikem okwa li a ninga osho Ovakanaan vahapu va tala ko shi li paushitwe okuninga ngeenge ve na omahalo omilele. Nonande ngeno Dina okwa ningile eenghendabala a anye Sikem, kasha li tashi kwafa sha molwaashi Sikem ‘okwa li e mu kwata nokwe mu fininika.’ Konima yefimbo, Sikem okwa ka kala “e hole” Dina, ndele nande ongaho, osho kasha li sha lundulula osho Sikem a ningila Dina. (Lesha Genesis 34:1-4.) Dina haye aeke a li a mona oilanduliko yoshiningwanima osho. Okupanga oukaume kwaye nOvakaanan okwa li kwa etifa oiningwanima oyo ya li ya fifa ohoni nokushekifa oukwaneumbo wavo aushe. — Genesis 34:7, 25-31; Ovagalati 6:7, 8.

15, 16. Ongahelipi hatu dulu okumona ounongo washili? (Tala yo  oshimhungu pepandja 109.)

¹⁵ Ngeenge Dina okwa li e lihonga oshilihongomwa sha fimana moiningwanima oyo, okwa li e shi lihonga konima eshi a li a pita meenghalo dinyikifa oluhodi. Ovo ve hole Jehova nohava  dulika kuye kave na okulihonga oilihongomwa monghalamwenyo okupitila meenghalo dinyikifa oluhodi. Molwaashi ohava pwilikine kuye, ova tokola ‘okweenda novanongo.’ (Omayeletumbulo 13:20a) Kungaho, ohave lihongo “ondjila keshe youwa” nohava henuka omaupyakadi inaa pumbiwa nouyahame wokomutima oo hau etifwa komaupyakadi a tya ngaho. — Omayeletumbulo 2:6-9; Epsalme 1:1-3.

¹⁶ Ounongo wopakalunga otau dulu okumonika kovanhu  aveshe ovo ve na ehalo, ovo hava ilikana alushe opo ve u pewe nokukonakona Eendjovo daKalunga pandjikilile nosho yo oishangomwa oyo ya nyanyangidwa komupiya omudiinini nomunaendunge. (Mateus 24:45; Jakob 1:5) Osha fimana yo okukala nelininipiko, nomunhu oha ulike kutya omulininipiki mokudulika nehalo liwa komayele opamishangwa. (2 Eehamba 22:18, 19) Pashihopaenenwa, Omukriste otashi dulika a dimine efinamhango olo kutya omutima otau dulu okukala u na omakoto nowa nyonauka. (Jeremia 17:9) Ndele ngeenge opa holoka onghalo yonhumba omo ita katuka pandunge, mbela ote ke lininipika ngoo opo a dule okutambula ko omayele nekwafo lopahole olo ta pewa?

17. Hokolola onghalo oyo tai dulu okuholoka po moukwaneumbo, nokuulika nghee xe omudali ta dulu okutomhafana nokamonakadona kaye.

¹⁷ Natu tye nee ngeno xe omudali iha pitike omonakadona waye nomumati omunyasha Omukriste va ka endaende ovo aveke vavali. Okakadona oka pula xe ka ti: “Tate, ino lineekela nge hano? Itatu ka ninga sha sha puka.” Okakadona oko oke hole Jehova noke na omalalakano mawa, ndele mbela ota ka katuka ngoo ‘pandunge’ pataleko laKalunga? Mbela ota ka ‘kukuma ngoo oluhaelo’? Ile oka nyika oulai mokulineekela ‘omutima wako’? (Omayeletumbulo 28:26) Otashi dulika oto dulu okudiladila kombinga yomafinamhango amwe vali oo taa dulu okukwafela xe oo omudali a tomhafane nokamonakadona kaye kombinga yoshinima osho. — Tala Omayeletumbulo 22:3; Mateus 6:13; 26:41.

18, 19. Eyeleko lilipi la li la hanga Josef monghalamwenyo yaye, nokwa li a ungaunga nalo ngahelipi?

¹⁸ Josef, omumwaina waDina, okwa li omulumenhu omunyasha e na omaukwatya mawa noku hole Kalunga nokwa li a ya onhapo oluhaelo. (Genesis 30:20-24) Eshi Josef a li okaana, okwa li a mona nomesho oilanduliko oyo ya li ya etifwa komatokolo ehe li pandunge omumwainakadona Dina. Nopehe na omalimbililo, okudimbuluka oshinima osho nosho yo okukala a hala okulikaleka mohole yaKalunga, oshe ke mu amena  konima yomido muEgipti eshi omukainhu womwene waye a li a kendabala “efiku nefiku” oku mu hekela momilele. Molwaashi Josef okwa li omupika, ka li ta dulu okweefa po noupu oilonga yaye ndele ta i. Ponhele yaasho, okwa li tashi mu pula a ungaunge nonghalo ya tya ngaho pandunge nonouladi, naasho okwa li e shi ninga mokwaanya omukainhu waPotifar lwoikando, nohauxuuninwa okwa li a ya onhapo omukainhu oo. — Lesha Genesis 39:7-12.

¹⁹ Diladila kwaashi: Ngeno Josef okwa li ha kala te litungile ouumbo kombinga yomukainhu waPotifar ile ha kala ta diladila kombinga yomilele, ngeno mbela okwa dula ngoo okukanyatela oudiinini waye? Ngeno otashi dulika ina dula nandenande. Ponhele yokukala ta diladila kombinga yoinima inai koshoka, Josef okwa li a lenga ekwatafano laye naJehova, naasho osha li shi liwetikile meendjovo odo a li a lombwela omukainhu waPotifar. Josef okwa ti: “[Omwene wange] ina kelela nge sha, kakele kaave, osheshi oove omwalikadi waye. Ndi dule ngahelipi okuninga owii u fike opo nokunyona kuKalunga?” — Genesis 39:8, 9.

20. Ongahelipi Jehova a li a yukifa oinima moshinima shi na sha naJosef?

²⁰ Jehova ka li tuu a hafa eshi a li ta tale omunyasha Josef oo a kala a kanyatela oudiinini waye nonande okwa li kokule noukwaneumbo wavo! (Omayeletumbulo 27:11) Konima yefimbo, Jehova okwa li a yukifa oinima opo Josef a mangululwe mo modolongo ndele ta ningwa omupangeli omutivali waEgipti nomutukuli woikulya. (Genesis 41:39-49) Eendjovo dEpsalme 97:10 inadi yeleka tuu, odo tadi ti: “Akutu, onye ava, mu hole  Omwene, tondeni owii! Eemwenyo dovakoshoki vaye, ote di amene, ote di xupifa momake ovadinikalunga”!

21. Omumwatate umwe omunyasha moshilongo shimwe shomuAfrika okwa li a ulika ngahelipi kutya okwa koshoka paenghedi?

²¹ Kunena, ovapiya vaKalunga vahapu navo ohava ulike kutya ove ‘tonde eshi shii nove hole eshi shiwa.’ (Amos 5:15) Omumwatate umwe omunyasha moshilongo shimwe shomuAfrika okwa ti kutya omunafikola mukwao umwe omukainhu okwa li e mu lombwela kutya ota dulu okuya naye momilele ngeenge omumwatate oo okwe mu kwafele pefimbo lokakonakono komwaalu. Omumwatate oo okwa ti: “Onda li nda anya diva eetepo lomukainhu oo. Omolwokukanyatela oudiinini wange, kanda li nde lishundula. Kungaho onda li nde lifimaneka, oshinima osho shi na ondilo inene i dule yoshingoli noshisiliveri.” Oshoshili kutya enyono otali dulu okweetifa ‘ouwa wopokafimbo,’ ndele ouwa wa tya ngaho luhapu ohau eta omaupyakadi mahapu. (Ovaheberi 11:25) Kakele kaasho, ouwa wa tya ngaho kau na ongushu yasha moku u yelekanifa nehafo tali kalelele olo hali di mokudulika kuJehova. — Omayeletumbulo 10:22.

22, 23. (a) Ngeenge Omukriste okwa nyono enyono la kwata moiti, mbela osha hala okutya ke na ekwafo lasha? Omunyoni ota dulu okukwafelwa ngahelipi?

²² Atusheni ohatu kondjo opo tu finde omahalo opambelela notu longe osho sha yuka koshipala shaKalunga molwaashi inatu wanenena. (Ovaroma 7:21-25) Jehova oku shii kutya inatu wanenena ‘noha dimbulukwa nokutya fye ondwi yedu.’ (Epsalme 103:14) Ndele omafimbo amwe, Omukriste otashi dulika a nyone enyono la kwata moiti. Mbela osho osha hala kutya Omukriste a tya ngaho ke na ekwafo lasha? Hasho nandenande! Oshoshili kutya omunhu oo a nyona otashi dulika a mone oilanduliko inyikifa oluhodi, ngaashi ohamba David. Ndele nande ongaho, Kalunga oha ‘kufile po’ alushe ovo ve livela ombedi nohava ‘hepaulula’ omanyono avo. — Epsalme 86:5; Jakob 5:16; lesha Omayeletumbulo 28:13.

²³ Kakele kaasho, Kalunga okwa yandja yo “eeshali”  komaongalo opaKriste, odo di li ovafita ovo va pyokoka pamhepo nove na ehalo oku tu kwafela. (Ovaefeso 4:8, 12; Jakob 5:14, 15) Elalakano lovafita va tya ngaho olo okukwafela omunyoni a kale vali e na ekwatafano liwa naKalunga noku “likongele eendunge” opo aha endulule vali enyono laye. — Omayeletumbulo 15:32.

24, 25. (a) Omulumenhu omunyasha oo a hokololwa mOmayeletumbulo 7:6-23 okwa li a ulika ngahelipi kutya ‘ke na eendunge’? (b) Ongahelipi hatu dulu ‘okulikongela eendunge’?

²⁴ Ombibeli oya popya kombinga yovanhu ovo ‘vehe na eendunge’ nosho yo ovo tave ‘likongele eendunge.’ (Omayeletumbulo 7:7) Omunhu oo ‘ehe na eendunge’ otashi dulika a ninge omatokolo ehe li pandunge molwaashi ina pyokoka pamhepo noke na owino moilonga yaKalunga. Ngaashi omulumenhu omunyasha oo a hokololwa mOmayeletumbulo 7:6-23, omunhu a tya ngaho ota dulu okunyona noupu enyono la kwata moiti. Ndele oo ‘te lihapupalifile eendunge’ oha pashukile omutima waye okupitila mokukonakona Eendjovo daKalunga nokwiilikana pandjikilile. Nonande ina wanenena, oha ningi yo eenghendabala da mana mo opo a yukife omadiladilo aye, omahalo aye, omaliudo aye nosho yo omalalakano aye monghalamwenyo a kale metwokumwe nehalo laKalunga. Kungaho, omunhu a tya ngaho ota ulike kutya ‘oku hole okukalamwenyo kwaye,’ ile tu tye ote lietele omanangeko noupuna nota “ka mona ouwa.” — Omayeletumbulo 19:8.

²⁵ Lipula kutya: ‘Mbela onda tomwa ngoo filufilu ndi itavele kutya omifikamhango daKalunga odi li mondjila? Mbela onda itavela ngoo filufilu kutya okudulika komifikamhango daKalunga ohashi eta ehafo linenenene?’ (Epsalme 19:8-11; Jesaja 48:17, 18) Ngeenge owa limbililwa kanini, ninga po sha. Dilonga kombinga yoilanduliko oyo hai etifwa kokulipwililikila eemhango daKalunga. Kakele kaasho, ‘makela, ove u tale ouwa wOmwene apa u fike’ mokukala metwokumwe noshili nokuyadifa omadiladilo oye noinima oyo yoshili, ya yuka, ya koshoka, i holike noiwa. (Epsalme 34:9; Ovafilippi 4:8, 9) Mokuninga ngaho, oto ka kala u hole Kalunga nohole yomoule, oto ka kala u hole  osho e hole nou tonde osho e tonde. Dimbuluka kutya Josef ka li a wanenena, ndele nande ongaho, okwa li a dula ‘okukukuma oluhaelo’ molwaashi okwa li a efa Jehova e mu me oule womido opo a kale e na ehalo loku mu hafifa. Naave osho u ninga ngaho. — Jesaja 64:8.

26. Oshikundafanwa sha fimana shilipi tashi ka kundafanwa momatukulwa avali taa landula?

²⁶ Omushiti wetu okwe tu shita tu na oilyo yoludalo opo tu dule okudala ounona nokuhafela omilele mohombo, ndele haku danauka nayo mokulihafifa kwongaho. (Omayeletumbulo 5:18) Momatukulwa avali taa landula ohatu ka kundafana kutya Kalunga oha tale ko ngahelipi ohombo.