Omunafikola a lyalyakana
Faneka Peter e li mongulu kofikola, e kwetwe koumbada. Fiku olo, omuhongi wavo omufimanekwa okwa li ta hongo kutya Charles Darwin nosho yo ehongo loevolusi ola kwafela ovanongononi va ude ko oinima moule, nola mangulula ovanhu koinima ihapu. Eshi a mana okuhonga, okwa pula ovanafikola va popye nghee ve udite shi na sha nehongo olo.
Peter okwa li a lyalyakana. Ovadali vaye ove mu honga kutya Kalunga oye a shita edu nosho yo oinima aishe i na omwenyo oyo i li ko. Ove mu honga kutya ehokololo lOmbiibeli li na sha neshito oli shii okulineekelwa, ndele ehongo loevolusi oli li ashike omutotolombo, oo inau kanghamena koumbangi washa. Ovadali vaPeter nosho yo omuhongi waye, aveshe ove na ko nasha naye. Mbela Peter na itavele osho a hongwa kovadali vaye, ile okomuhongi waye?
Omudo keshe, ovanafikola vahapu mounyuni aushe ohave lihange monghalo ya tya ngaho. Oshike osho Peter nosho yo ovanafikola vakwao, ovo have lihange meenghalo da tya ngaho, ve na okuninga po? Mbela ito dimine kutya ova pumbwa okukonakona oshinima osho moule nokuninga etokolo lopandunge? Ova pumbwa okukonakona ngeenge ope na oumbangi, oo tau popile ehongo loevolusi, ile eshito nokutokola kuvo vene kutya oshike tava ka itavela po.
Ombiibeli oye tu londwela tuha itavele ashike ngaho osho vamwe tava hongo. Omushangi umwe wOmbiibeli okwa ti: “Omushima ta itavele ondjovo keshe, ndelenee omunamayele ta diinine eenghatu daye.” (Omayeletumbulo 14:15) Ombiibeli oya ladipika Ovakriste va kale hava “diladila pandunge” nokushilipaleka ngeenge osho tava hongwa oshoshili ngoo. — Ovaroma 12:1, 2.
Okambo aka inaka shangwa nelalakano lokuyambidida omalongelokalunga, oo taa ti kutya ovanhu nava kale tava hongwa kombinga yeshito mofikola. Elalakano lokambo aka okukwafela ovanhu va mone ngeenge oshoshili ngoo kutya oinima i na omwenyo oye uya po ashike ngahenya nonokutya ehokololo lOmbiibeli li na sha neshito oloipupulu, ile hasho.
Ohatu ka yukifa elitulemo kosele, molwaashi eesele odo di li oihovelitungifi yoinima i na omwenyo. Ohatu ka tala komauyelele amwe makumwifi e na sha nanghee eesele hadi tungwa po. Ohatu ka tala yo koinima imwe oyo taku tiwa otai yandje oumbangi u na sha nehongo loevolusi.
Keshe umwe womufye okwa pumbwa okukala e na enyamukulo la yela kepulo kutya: Mbela oinima i na omwenyo oya shitwa, ile oye uya po ashike ngahenya? Otashi dulika wa diladila nale moule kombinga yoshinima osho. Okambo aka otaka ka yandja amwe omomaumbangi, oo a kwafela vahapu va itavele kutya oinima i na omwenyo oya shitwa.
