1, 2. (a) Mbela okukala u shii edina lomunhu wonhumba oo a fimana osha hala okutya ou mu shii nawanawa? Shi yelifa. (b) Ovanhu ova itavela shike shi na sha naJesus?

MOUNYUNI omu na ovanhu vahapu ovo ve shiivike apeshe. Otashi dulika u shii edina lomunhu umwe oo a fimana. Ndele okukala ashike u shii edina laye itashi ti kutya ou mu shii nawanawa. Itashi ti yo kutya ou shii ondjokonona yaye aishe ile omaukwatya aye.

² Nonande Jesus okwa li ko omido 2 000 da pita, otashi dulika wa uda sha kombinga yaye. Ndele ovanhu vahapu kave shii kutya Jesus okwa li omunhu a tya ngahelipi. Vamwe ohava ti omunhu ashike muwa a li ko, vamwe ohava ti omuprofeti, ofimbo vamwe va itavela kutya Jesus oye Kalunga. Mbela ove oto ti ngahelipi? — Tala omafatululo oitya pexulilo lembo, oshitwa 12.

3. Omolwashike sha fimana kwoove okushiiva Jehova Kalunga naJesus Kristus?

³ Osha fimanenena okushiiva oshili kombinga yaJesus. Omolwashike mbela? Ombiibeli oya ti: “Nomwenyo waalushe owo tuu ou, vo ve ku shiive, Oove auke Kalunga kashili, naau we mu tuma, Jesus Kristus.” (Johannes 17:3) Ngeenge owa shiiva oshili kombinga yaJehova naJesus, oto dulu oku ka kala nomwenyo fiyo alushe moparadisa kombada yedu. (Johannes 14:6) Okukala u shii Jesus otashi ke ku kwafela yo molwaashi okwe tu tulila po oshihopaenenwa shiwa shanghee tu na okukala nosho yo okuungaunga navamwe. (Johannes 13:34, 35) MEtukulwa 1, otwe lihonga oshili kombinga yaKalunga. Natu ka kundafane kutya Ombiibeli otai hongo shike kombinga yaJesus.

4. Omadinafimaneko “Messias” nosho yo “Kristus” otaa ulike shike?

⁴ Omido dihapu fimbo Jesus ina dalwa e li omunhu kombada yedu, Jehova okwa li a udaneka okupitila mOmbiibeli kutya ota ka tuma Messias ile Kristus. Oshitya “Messias” osha dja kOshiheberi, noshitya “Kristus” osha dja kOshigreka. Omadinafimaneko aeshe oo otaa ulike kutya Kalunga okwa li ta ka hoolola Messias omuudanekwa ndele te mu pe ondodo ye likalekelwa. Messias ote ke shi ninga tashi shiiva opo omaudaneko aKalunga aeshe a wanifwe. Ekuliloyambo laJesus otali dulu yo oku ku etela ouwa kunena. Ndele fimbo Jesus a li ina dalwa, ovanhu vahapu ova li tave lipula kutya, ‘Olyelye ta ka ninga Messias?’

5. Mbela ovahongwa vaJesus ova li va itavela kutya oye Messias?

⁵ Ovahongwa vaJesus kava li ve na omalimbililo kutya oye a li Messias omuudanekwa. (Johannes 1:41) Pashihopaenenwa, Simon Petrus okwa lombwela Jesus ta ti: “Oove Kristus.” (Mateus 16:16) Ongahelipi hatu dulu okukala noushili kutya Jesus oye Messias?

6. Jehova okwa kwafela ngahelipi ovanamitimadiwa va didilike mo Messias?

⁶ Oule womido fimbo Jesus a li ina dalwa, ovaprofeti vaKalunga ova li va shanga omauyelele mahapu oo a li taa ka kwafela ovanhu va didilike mo Messias. Osho otashi ku kwafele ngahelipi? Natu tye nee ngeno owa tumwa u ka tale omunhu oo uhe shii nale ketulilo leebesa oko ku yadi ovanhu. Ngeenge owa pewa ouyelele u na sha nomunhu oo to ka tala, otashi ke ku kwafela u mu mone diva. Sha faafana, Jehova okwa longifa ovaprofeti vaye ve tu lombwele kombinga yaasho Messias a li ta ka ninga naasho a li ta ka ningilwa. Okuwanifwa kwomaxunganeko aeshe oo okwa kwafela ovanamitimadiwa va mone kutya Jesus oye Messias.

7. Omaxunganeko avali elipi taa yandje oumbangi kutya Jesus oye Messias?

 ⁷ Natu ka kundafane avali omomaxunganeko oo. Lotete, omido 700 fimbo Jesus ina dalwa, Mika okwa xunganeka kutya Messias ota ka dalelwa mokadoolopa kanini, Betlehem. (Mika 5:1) Shilishili Jesus omo a li a dalelwa mokadoolopa oko. (Mateus 2:1, 3-9) Etivali, Daniel okwa li a xunganeka kutya Messias ota ka holoka momudo 29. (Daniel 9:25) Oo oku li ashike avali omomaxunganeko mahapu oo taa yandje oumbangi kutya Jesus oye Messias oo a li a udanekwa. — Tala omafatululo oitya pexulilo lembo, oshitwa 13.

8, 9. Oshike sha li sha ningwa po pefimbo lokuninginifwa kwaJesus osho sha li sha ulika kutya oye Messias?

⁸ Jehova okwa ulika kutya Jesus oye Messias. Okwa li a udaneka kutya ota ka yandja edidiliko kuJohannes omuninginifi olo tali ke mu kwafela a mone kutya olyelye Messias. Eshi Jesus a li a ya kuJohannes a ka ninginifwe mOmulonga waJordan momudo 29, Johannes okwa li a mona edidiliko olo. Ombiibeli oye tu lombwela osho sha ningwa po ya ti: “Ndele Jesus eshi [a ninginifwa, NW] okwa dja momeva diva, ndele tala, eulu la yeuluka, ndele e wete Omhepo yaKalunga [ya] fonghuti ya kuluka ndee tai uya kombada yaye. Ndele tala, ondaka ya dja meulu ndee tai ti: Ou Omona wange omuholike, onde mu hokwa.” (Mateus 3:16, 17) Eshi Johannes a uda nokumona edidiliko olo, okwa mona kutya Jesus oye Messias. (Johannes 1:32-34) Jesus okwa ninga Messias mefiku olo tuu olo eshi a tililwa omhepo iyapuki kuJehova. Oye a li a hoololwa kuKalunga a ninge Ohamba nOmupangeli. — Jesaja 55:4.

 ⁹ Omaxunganeko Ombiibeli, eendjovo odo Jehova a popya pokuninginifwa kwaJesus nosho yo edidiliko olo la li la pewa Johannes oya yandja oumbangi kutya Jesus oye Messias. Ndele mbela Jesus okwa dile peni nokwa li omunhu a tya ngahelipi? Natu ka tale kutya Ombiibeli otai ti ngahelipi.

10. Ombiibeli oya popya shike shi na sha nonghalamwenyo yaJesus fimbo a li ine uya kombada yedu?

¹⁰ Ombiibeli oya popya kutya Jesus okwa kala meulu oule womido ofimbo ine uya kombada yedu. Mika okwa ti kutya ehovelo laMessias “oloshitonale.” (Mika 5:1) Jesus okwa popya mwene lwoikando kutya okwa kala nale meulu fimbo ina dalwa e li omunhu kombada yedu. (Lesha Johannes 3:13; 6:38, 62; 17:4, 5.) Nokuli fimbo a li ine uya kombada yedu, okwa kala e na ekwatafano le likalekelwa naJehova.

11. Omolwashike Jehova a lenga Jesus monghedi ye likalekelwa?

¹¹ Jehova okwa lenga Jesus monghedi ye likalekelwa. Omolwashike? Omolwaashi oye a shitwa tete koishitwa aishe. Onghee ota ifanwa “Omudalwa wotete [woishitwa] aishe.” * (Ovakolossi 1:15) Jesus ota ifanwa yo “Omona waye Ewifa” molwaashi oye aeke a shitwa odikilila. (Johannes 3:16) Shimwe vali, Jesus oye aeke a longifwa kuJehova okushita oishitwa ikwao. (Ovakolossi 1:16) Natango Jesus oye aeke ta ifanwa ‘Ondjovo,’ molwaashi okwa li ha longifwa kuJehova okuyandja omalombwelo kovaengeli nokovanhu. — Johannes 1:14.

12. Otu shi shii ngahelipi kutya Jesus naKalunga kave fi omunhu umwe?

¹² Ovanhu vamwe ova itavela kutya Jesus naKalunga omunhu umwe. Ndele osho hasho Ombiibeli tai hongo. Ombiibeli oya ti kutya Jesus okwa shitwa, osho tashi ulike kutya oku na ehovelo. Ashike Jehova oo a shita oinima aishe ke na ehovelo. (Epsalme 90:2) Nonande Jesus oku li Omona waKalunga, ina kendabala nande okukala e fike puXe. Ombiibeli otai hongo kutya Xe oku dule  Omona. (Lesha Johannes 14:28; 1 Ovakorinto 11:3.) Jehova oye aeke “Kalunga Omunaenghono adishe.” (Genesis 17:1) Oye munenenene noku na eenghono da shiya ko meshito alishe. — Tala omafatululo oitya pexulilo lembo, oshitwa 14.

13. Omolwashike Ombiibeli ya ti kutya Jesus oye “olupe laKalunga iha monika”?

¹³ Jehova nosho yo Omona waye, Jesus, ova kala tava longo pamwe oule womido omabiliyona ofimbo eulu nedu inali shitwa nove na okukala va li ve holafane lela. (Johannes 3:35; 14:31) Jesus okwa kala ha hopaenene filufilu omaukwatya axe, nomolwaasho Ombiibeli ya ti kutya oye “olupe laKalunga iha monika.” — Ovakolossi 1:15.

14. Osha enda ngahelipi opo Omona waJehova a dalwe e li omunhu kombada yedu?

¹⁴ Omona waJehova oo e na ondilo okwa dja meulu nehalo liwa ndele ta dalwa e li omunhu kombada yedu. Osho osha li sha enda ngahelipi? Jehova okwa li a lundululila pashikumwifilonga omwenyo wOmona waye moshidalelo shokakadona Maria. Osho otashi ulike kutya Jesus ka li a pumbwa xe wopanhu opo a dalwe. Onghee Maria okwa li a dala omonamati a wanenena nokwe mu luka Jesus. — Lukas 1:30-35.

15. Ongahelipi to dulu okulihonga kombinga yaJehova?

¹⁵ Oto dulu okulihonga shihapu kombinga yaJesus, onghalamwenyo yaye nosho omaukwatya aye momambo Ombiibeli ngaashi, Mateus, Markus, Lukas nosho yo Johannes. Omambo oo ohaa ifanwa Omavangeli. Molwaashi Jesus okwa fa Xe, osho to lesha kombinga yaye otashi ke ku kwafela yo u shiive nawa Jehova. Nomolwaasho Jesus a ti kutya: ‘Ou a mona nge, oye a mona Tate.’ — Johannes 14:9.

16. Jesus okwa li a honga kombinga yashike, nehongo laye ola dja peni?

 ¹⁶ Ovanhu vahapu ova li hava ifana Jesus “Rabbi,” osho tashi ti omuhongi. (Johannes 1:38; 13:13) Shimwe shomoinima ya fimanenena oyo a honga osho “evangeli louhamba,” ile tu tye, onghundana iwa yOuhamba. Ouhamba oshike? Oo epangelo laKalunga olo tali ka pangela kombada yedu alishe okudja meulu notali ka etela ovanhu ovo hava dulika kuKalunga omanangekonoupuna. (Mateus 4:23) Keshe osho Jesus a li a honga osha dja kuJehova. Jesus okwa ti: “Elongo lange kali fi lange, ndele laau a tuma nge.” (Johannes 7:16) Jesus okwa kala e shii kutya Jehova okwa hala ovanhu va ude onghundana iwa, oyo kutya Ouhamba waKalunga otau ka pangela kombada yedu.

17. Jesus okwa li ha udifile peni? Omolwashike a li a longa noudiinini opo a honge ovanhu?

¹⁷ Jesus okwa li ha udifile peni? Keshe opo a li a hanga ovanhu. Okwa li ha udifile momikunda, moilando, meenhele domalandifilo, moinagoga nosho yo momaumbo. Ka li ha teelele ovanhu ve uye kuye, ndele oye a li ha i kuvo. (Markus 6:56; Lukas 19:5, 6) Jesus okwa li ha longo noudiinini nokwa longifa eenghono nefimbo laye lihapu mokuhonga ovanhu. Omolwashike mbela? Omolwaashi okwa kala e shii kutya Kalunga osho a hala a ninge ngaho, nokwa kala alushe ha dulika kuXe. (Johannes 8:28, 29) Jesus okwa li yo ha udifa omolwonghenda oyo a li ha kala e uditile ovanhu. (Lesha Mateus 9:35, 36.) Okwa li a mona kutya ovawiliki vomalongelokalunga kava li tava hongo ovanhu oshili kombinga yaKalunga nOuhamba waYe. Onghee okwa li a hala okukwafela ovanhu vahapu ngaashi ta dulu opo va ude onghundana iwa.

18. Omaukwatya aJesus elipi u hole unene?

¹⁸ Jesus okwa li e hole ovanhu nokwa li he va kwafele. Okwa li e na onghenda noha popiwa naye noupu. Okwa li e holike nokuli nokounona. (Markus 10:13-16) Jesus ka li e  nokatongo. Okwa li e tonde oukengeleledi nokuhenouyuki. (Mateus 21:12, 13) Pefimbo olo, ovakainhu ova li ve na omaufemba manini nokava li va fimanekwa. Ashike Jesus okwa li a lenga ovakainhu nokwa kala e va fimaneka. (Johannes 4:9, 27) Jesus okwa li yo omulininipiki shili. Pashihopaenenwa, onguloshi imwe okwa li a kosha eemhadi dovayapostoli vaye, oshinima osho sha li hashi ningwa kovapiya. — Johannes 13:2-5, 12-17.

19. Oshihopaenenwa shilipi tashi ulike kutya Jesus okwa li e shii osho ovanhu va pumbwa nonokutya okwa li a halelela oku va kwafela?

¹⁹ Jesus okwa li e shii kutya ovanhu ova pumbwa shike lela, nokwa li a halelela oku va kwafela. Osho okwa li e shi ulika eshi a li a velula ovanhu pashikumwifilonga ta longifa eenghono odo a pewa kuKalunga. (Mateus 14:14) Pashihopaenenwa, kuye okwa li kwe uya omulumenhu ta vele oshilundu ndele ta ti: “Oove ngenge wa hala, oto dulu okuyelifa nge.” Ouyahame nokumona oixuna kwomulumenhu oo okwa li kwe linyengifa Jesus. Okwa li e mu uditile onghenda nokwa li a hala oku mu kwafela. Onghee hano, okwa nana eke laye, noku mu kuma, ndele ta ti: “Onda hala, yela.” Opo nee omulumenhu oo a li ta vele okwa veluka. (Markus 1:40-42) Mbela omulumenhu oo oku na okukala a li e udite ngahelipi?

20, 21. Jesus okwe tu tulila po oshihopaenenwa sha denga mbada shilipi shi na sha nokudulika kuKalunga?

²⁰ Jesus okwe tu tulila po oshihopaenenwa sha denga mbada shi na sha nokudulika kuKalunga. Kashi na nee mbudi kutya omashongo elipi a li ta shakeneke okudja kovatondi vaye, okwa kala alushe omudiinini kuXe. Pashihopaenenwa, Jesus ina nyona sha nande nokuli nopefimbo opo a li ta yelekwa kuSatana. (Mateus 4:1-11) Vamwe vomovapambele vaJesus kava li va itavela kutya oye Messias,  nomolwaasho va li ve mu ula kutya “ota i eenghwengu.” Ashike Jesus okwa li a twikila noilonga oyo a li a pewa kuKalunga. (Markus 3:21) Eshi ovatondi vaye va li tava ungaunga naye nonyanya, ka li a kendabala oku va shunifila owii, ndele okwa kala ashike omudiinini kuKalunga. — 1 Petrus 2:21-23.

²¹ Jesus okwa kala omudiinini kuJehova nokuli nopefimbo opo a li ta hepekwa fiyo omefyo linyanyalifi. (Lesha Ovafilippi 2:8.) Diladila ashike kouyahame oo a li e na okulididimikila mefiku olo a fya. Okwa li a kwatwa po, a lundilwa keembangi doipupulu kutya okwa sheka Kalunga, a tokolwa kovapanguli vehe fi ovayuki, a shekwa, a hepekwa kovakwaita ndele tave mu valele komuti womahepeko.  Eshi a li pokufya, okwa ingida a ti: “Sha longwa sha pwa.” (Johannes 19:30) Konima yomafiku atatu eshi Jesus a fya, Jehova okwe mu nyumunina molutu lopamhepo. (1 Petrus 3:18) Konima yoivike yonhumba, Jesus okwa shuna meulu ndele ta “kala omutumba kolulyo laKalunga,” nokuteelela Kalunga e mu ninge Ohamba. — Ovaheberi 10:12, 13.

22. Okudulika kwaJesus kuXe okwe tu pa etimaumbwile lilipi?

²² Molwaashi Jesus okwa kala omudiinini kuXe, paife otu na eteelelo loku ka kala fiyo alushe moparadisa kombada yedu, osho shi li elalakano laJehova. Metukulwa tali landula, ohatu ke lihonga kutya ongahelipi efyo laJesus le shi ninga tashi shiiva opo tu ka kale fiyo alushe.