MBELA ou shi shii kutya oshike tashi ningwa po mefano olo? Ovalumenhu ovo ovakwaita aveshe vomuIsrael. Ovakwaita ovo va petama pokamulonga otava nu omeva. Omulumenhu oo a fikama puvo omutokolipangeli wedina Gideon, ta tale nhumbi ovalumenhu ovo tava nu omeva.

Ngeenge owa tale nawa mefano olo, oto mono kutya ovalumenhu ovo otava nu omeva meenghedi da yoolokafana. Vamwe otava nu tava kotamene, ofimbo umwe ta nu ta shakumwine. Omulumenhu oo ta nu ta shakumwine ota dulu okutala keshe osho tashi linyenge momudingonoko waye. Ovalumenhu va tya ngaho ovo Jehova a hala. Nomolwaasho, okwa lombwela Gideon a hoolole mo ashike ovalumenhu ovo tava nu tava shakumwine nokutalaatala. Kalunga okwa ti kutya ava tava nu tava kotamene ove na okushuna komaumbo avo. Natu ka taleni kutya omolwashike Gideon ta hoolola ovakwaita.

Pefimbo opo, Ovaisrael ova li moupyakadi munene. Ova li va ya natango moupyakadi, molwaashi inava kala tava dulika kuJehova. Ovaisrael ova li va dulwa eenghono kOvamidian nova li tava hepekwa kuvo. Onghee hano, Ovaisrael ova indila ekwafo kuJehova, na Jehova okwa li a pwilikina komaindilo avo.

Jehova okwa li a lombwela Gideon a ongele etanga lovakwaita. Opo nee, Gideon okwa li a ongela ovakwaita ve li 32 000. Ovaisrael ova li tava ka lwifa etangakwaita lOvamidian ovo va li 135 000. Ndele nande ongaho, Jehova okwa li a lombwela Gideon a ti: ‘Owa ongela ovakwaita vahapu unene.’ Mbela omolwashike Jehova a popila ngaho?

Jehova okwa li e shi shii kutya ngeenge Ovaisrael ova findana molwoodi olo, otava ka kala tava diladila kutya ova findana keenghono davo vene. Otashi dulika nokuli va diladile kutya inava pumbwa ekwafo laJehova opo va findane. Onghee hano, Jehova okwa lombwela Gideon a ti: ‘Lombwela ovakwaita aveshe ovo va tila oku ka lwa va shune komaumbo.’ Eshi Gideon a lombwela ovakwaita eendjovo odo, ovakwaita 22 000 ova li va shuna komaumbo avo. Kungaho, Gideon okwa li ashike a fyaala po novakwaita 10 000 ovo va li tava ka lwifa ngeno ovakwaita Ovamidian 135 000.

Ndele Jehova okwa li a lombwela natango Gideon a ti: ‘Ou na natango ovakwaita vahapu neenghono.’ Onghee hano, Jehova okwa lombwela Gideon a twale ovalumenhu kokamulonga va ka nwe omeva. Okwa lombwelwa a shunife keumbo ovalumenhu aveshe ava tava nu omeva tava kotamene. Opo nee Jehova okwa udanekela Gideon a ti: ‘Ohandi ke ku pa efindano pamwe novakwaita 300, ovo va li tava nu tava shakumwine notava talaatala eshi tava nu.’

Eshi efimbo lolwoodi la fika, Gideon okwa tukula ovakwaita ovo 300 meengudu di li nhatu. Okwa pa keshe omukwaita enghuma noshitoo shi na onyika meni lasho. Lwopokati koufiku, ovakwaita aveshe vaGideon ova li va dingilila onhanda yovakwaita Ovamidian. Opo nee, ova shika omanghuma avo oshita ndele tava tataula po oitoo, nova ingida mokule, tava ti: ‘Olwoodi olaJehova nolaGideon!’ Eshi Ovamidian va penduka, ova li va ngwangwana nova li va tila neenghono. Ovatondi ovo ova hovela okuya onhapo, nokungaho, Ovaisrael ova findana olwoodi.