TALA koshinima shinyikifa oluhodi osho sha ningwa po mefano olo! Jesus okwa dipawa. Ove mu valela koshiti, va pamela eemboxa momake aye nokeemhadi daye. Omolwashike mbela ovanhu va ningila Jesus oshinima shii sha tya ngaho?

Omolwaashi ovanhu vamwe ova li ve tonde Jesus. Mbela ou shi shii kutya ovanhu ovo ovo oolyelye? Umwe womuvo, omweengeli omunawii Satana Ondiaboli. Omweengeli oo oye naanaa a li a heka Adam naEva vaha dulike kuJehova. Satana oye ngoo natango a li a heka ovatondi vaJesus va longe omunyonena wa tya ngaho.

Ofimbo nokuli Jesus ina valelwa koshiti oko, ovatondi vaye ova kala tave mu hepeke. Mbela oto dimbuluka nghee va li va ya koshikunino shaGetsemane, ndele tave mu kwata po? Ovatondi ovo ova li oolyelye? Ova li ovawiliki velongelokalunga. Paife natu ka taleni kutya oshike sha li sha ningwa po.

Eshi Jesus a kwatwa po kovawiliki velongelokalunga, ovayapostoli vaye ova li va faduka po. Ova fiya po Jesus oye aeke momake ovatondi vaye, molwaashi ova li va tila. Ashike omuyapostoli Petrus naJohannes kava li va ya kokule lela. Ova li tava shikula mo opo va tale kutya oshike tashi ka ningilwa Jesus.

Ovapristeri ova twala Jesus komulumenhu omunamido wedina Hannas, oo a li nale omupristeri omukulunhu. Ongudu oyo yovatondi inai kala po efimbo lile puHannas. Okudja opo, ova twala Jesus keumbo laKajafas, oo a li omupristeri omukulunhu pefimbo opo. Ovawiliki vahapu velongelokalunga ova li va ongala peumbo laye.

Fimbo ve li peumbo laKajafas, ova li tava hokololifa Jesus. Ova li va konga ovanhu va popye oipupulu tava lundile Jesus. Ovawiliki aveshe velongelokalunga ova ti kutya: ‘Jesus oku na okudipawa.’ Opo nee, ova hovela okufiila Jesus omate moshipala noku mu denga neengonyo.

Petrus okwa li ashike omutumba moluumbo, fimbo tava ningi oinima aishe oyo. Ovanhu ova li tava xuxumukwa pomundilo oufiku oo, molwaashi okwa li ku na outalala. Fimbo tava xuxumukwa, okakadona kamwe oko ka li omupiya oka mona Petrus, ndele taka ti: ‘Omulumenhu ou naye yo okwa li pamwe naJesus.’

Petrus okwa nyamukula a ti: ‘Ahowe! Ame kanda li pamwe naye.’

Ovanhu ova li va popya lwoikando itatu kutya Petrus okwa li ha kala naJesus, ndele Petrus okwa li e lidimbika Jesus lwoikando aishe oyo. Fimbo Petrus a li te lidimbike Jesus oshikando oshititatu, Jesus okwa pungulula oshipala shaye, ndele te mu tale. Okudja opo, Petrus okwa li a nyika oluhodi neenghono eshi e lidimbika Jesus nokwa ya pondje, ndele ta lili.

Ongula yEtitano eshi etango tali piti, ovapristeri ova li va twala Jesus komhangu yopombada yOvajuda. Moshoongalele osho ova li tava kundafana shi na sha naasho tave ke mu ningila. Opo nee, ove mu twala kuPontius Pilatus, oo a li omupangeli woshitukulwa shaJudea.

Ovapristeri ova lombwela Pilatus tava ti: ‘Omulumenhu ou oku na okudipawa, molwaashi omukolokoshi.’ Konima eshi Pilatus a pula Jesus omapulo, okwa ti: ‘Ame nghi wete etimba momulumenhu ou.’ Opo nee, Pilatus okwa tumina Jesus kuHerodes Antipas. Herodes okwa li omupangeli waGalilea, ashike okwa li ha di muJerusalem. Herodes naye okwa li a mona kutya Jesus ke na etimba nokwe mu shunifa kuPilatus.

Pilatus okwa li a hala okweefa Jesus a ye. Ndele ovatondi vaJesus ova li va hala omunadolongo umwe oye a mangululwe ponhele yaJesus. Omunadolongo oo okwa li omukolokoshi wedina Barabas. Onghee hano, Pilatus okwa li a eta Jesus pondje lwopokati komutenya, ndele ta lombwele ovanhu ta ti: ‘Taleni ohamba yeni!’ Ovapristeri ovakulunhu ova li tava uyaana tava ti: ‘Mu kufa po! Mu dipaa! Mu dipaa!’ Okudja opo, Pilatus okwa mangulula Barabas nokwa yandja Jesus kovatondi vaye, ndele tave ke mu dipaa.

Diva komatango mEtitano, ova li va valela Jesus neemboxa komuti womahepeko. Jesus okwa li a valelwa pokati kovakolokoshi vavali, umwe okolulyo naumwe okolumosho, nonande ku va wete mefano omo. Okafimbo kaxupi fimbo Jesus ina fya, omukolokoshi umwe oo a li a valelwa pamwe naye, okwa ti kuye: ‘Dimbuluke nge ngeenge wa i mouhamba woye.’ Jesus okwe mu nyamukula a ti: ‘Ohandi ku udanekele kutya oto ka kala pamwe naame mOparadisa.’

Mbela olo kali fi eudaneko litunhula? Mbela ou shi shii kutya Jesus okwa li ta popi kombinga yoparadisa ilipi? Oparadisa ei Kalunga a li a shita pehovelo oya li peni? Oparadisa oyo oya li kombada yedu. Onghee hano, pefimbo lokupangela kwaJesus meulu e li ohamba ota ka nyumuna omulumenhu oo opo a hafele onghalamwenyo moparadisa ipe kombada yedu. Osho itashi tu etele tuu ehafo!