TALA eshi onghuti tai nambele komutwe womulumenhu oo! Omulumenhu oo oJesus. Pefimbo opo, okwa li e na omido 30 lwaapo. Omulumenhu oo ve li pamwe naye oJohannes. Otwe lihonga sha nale kombinga yaJohannes. Mbela oto dimbuluka eshi Maria a li a ka talela po omupambele waye Elisabet, ndele okahanana oko ka li medimo laElisabet taka nuka kehafo? Okahanana oko ka li medimo natango oJohannes. Ndele mbela Jesus naJohannes otava ningi shike opo?

Johannes okwa hangwa opo a ninginifa Jesus momulonga waJordan. Ovanhu osho hava ninginifwa ngaho. Tete, olutu lomunhu ohali tulwa koshi yomeva, ndele ta kufwa ko vali. Onghee hano, Johannes okwa li ha ifanwa Johannes Omuninginifi, molwaashi okwa li ha ninginifa ovanhu. Ndele mbela omolwashike Johannes a li a ninginifa Jesus?

Osho okwa li e shi ninga, molwaashi Jesus okwa li e uya kuJohannes ndele ta pula a ninginifwe. Johannes okwa li ha ninginifa ovanhu ovo ve livela ombedi koilonga yavo ii oyo va li va longa. Ndele mbela Jesus naye okwa li a ninga sha shii osho sha li shi mu uditife nai ndele te livele ombedi? Ahowe, Jesus ina ninga sha shii nandenande, molwaashi okwa li Omona waKalunga a dja meulu. Onghee hano, okwa li a pula Johannes e mu ninginife omolwetomheno limwe li lili. Natu ka taleni kutya etomheno olo olashike.

Jesus fimbo ine uya kuJohannes, okwa li omuhongi woipilangi. Omuhongi woipilangi omunhu oo ha hongo oiti, ndele ta ningi oitaafula noipundi nosho tuu. Omushamane waMaria, Josef, okwa li omuhongi woipilangi nokwa li yo a honga Jesus okuhonga oipilangi. Ndele Jehova ka li a tuma Omona waye kombada yedu a ninge omuhongi woipilangi. Jehova okwa li a tuma Jesus kombada yedu a longe oshilonga she likalekelwa. Efimbo laJesus lokuhovela oshilonga osho ola li la fika. Onghee hano, Jesus okwa ya a ka pule Johannes e mu ninginife, opo a ulike kutya paife okwe lilongekida okuwanifa po ehalo laXe. Mbela Kalunga okwa li ngoo a hokwa onghatu oyo Jesus a li a katuka?

Heeno, molwaashi konima eshi Jesus a dja momeva, ondaka oya li ya popya ya dja meulu tai ti: ‘Ou Omona wange, onde mu hokwa.’ Natango, eulu ola li la yeuluka nomwa dja onghuti, ndele tai nambele kombada yomutwe waJesus. Ndelenee onghuti oyo kai fi okadila ko venevene. Otashi monika ashike sha fa onghuti, ndele paulelalela, osha li omhepo iyapuki yaKalunga.

Okudja opo, Jesus okwa li a ya mombuwa e ke likalele oule womafiku 40, molwaashi okwa li a hala oku ka dilonga kombinga yoinima ihapu. Ndele fimbo a li oye aeke, Satana okwa li e uya kuye. Satana okwa li ta kendabala okuningifa Jesus a nyone eemhango daKalunga. Okwa li a kendabala lwoikando itatu, ashike Jesus ina nyona nande eemhango daKalunga.

Konima yaasho, Jesus okwa ka aluka ndele ta shakene novalumenhu vonhumba ovo va ka ninga ovahongwa vaye votete. Omadina ovalumenhu vamwe ongaashi Andreas, Petrus (ha ifanwa yo Simon), Filippus naNatanael (ha ifanwa yo Bartolomeus). Opo nee, Jesus novahongwa vaye ovo vape ova li va ya koshitukulwa shaGalilea. Eshi ve uya muGalilea, ova ya moshilando shooNatanael hashi ifanwa Kaana. Fimbo va li muKaana, Jesus okwa li a ya koshivilohombolo shinene nokwa li a longa oshikumwifilonga shaye shotete fimbo va li moshivilo osho. Mbela ou shi shii kutya oshikumwifilonga osho oshilipi? Jesus okwa li a shitukifa omeva omaviinyu.