Josua okwa ka fya e na omido 110, konima eshi a kala ta wilike oshiwana shaJehova oule womido dihapu. Eshi a li e na omwenyo, Ovaisrael ova li hava longele Jehova. Ashike konima eshi a fya, oshiwana osha li sha tameka okulongela oikalunga, ngaashi Ovakanaan. Molwaashi Ovaisrael kava li va twikila okulongela Jehova, okwa li a efa ohamba yaKanaan yedina Jabin i va hepeke. Oshiwana osha li sha ilikana Jehova eshi kwafele. Opo nee Jehova okwa li e va pa omuwiliki mupe, Barak. Okwa li ta ka kwafela ovanhu va alukile kuJehova.

Debora, omuprofeti omukainhu, okwa li a ifana Barak. Okwa li e mu lombwela etumwalaka la dja kuJehova tali ti: ‘Kufeni ovalumenhu 10 000, ndele tamu ka shakeneka ovakwaita vaJabin pomulonga waKison. Otamu ka finda Sisera, omukulunhu wetangakwaita laJabin.’ Opo nee Barak okwa nyamukula Debora a ti: ‘Ohandi i ashike ngeenge oto i pamwe naame.’ Debora okwa nyamukula a ti: ‘Ohandi i naave. Ashike kala u shii kutya haave to ka dipaa Sisera, Jehova okwa ti kutya ota ka dipawa komukainhu.’

Debora okwa li a ya naBarak novakwaita vaye komhunda yaTabor opo ve ke lilongekidile olwoodi. Diva eshi Sisera eshi uda, okwa li a ongela omatemba aye oita novakwaita mefilu. Debora okwa lombwela Barak ta ti: ‘Nena Jehova  ote ke ku pa efindano.’ Barak novakwaita vaye 10 000 ova li va enda meemhunda opo va ka shakeneke etangakwaita laSisera enaenghono.

Opo nee Jehova okwa li a ningifa olufilu laKison li kunguluke omeva. Omatemba oita aSisera okwa li a dama meenhata. Sisera okwa fiya po etemba laye ndele ta faduka po. Barak novakwaita vaye ova li va finda etangakwaita laSisera, ashike Sisera okwa faduka po. Okwa li a ya onhapo fiyo omotenda yomukainhu wedina Jael. Jael okwa li e mu pa omashini a nwe ndele te mu uvike ekumbafa. Omukwaita oo a li a loloka okwa kofa, ndele Jael te mu hondjaunine noku mu valela ombosha yotenda momutwe ndele ta fi.

Barak okwa li ta kongo Sisera. Eshi Jael a mona Barak, okwa li a ya pondje yotenda ndele ta ti: ‘Ila omu, ndi ku ulikile omulumenhu oo to kongo.’ Barak okwa ya meni ndele ta mono Sisera a nangala a fya. Barak naDebora ova li va hambelela Jehova neimbilo eshi a kwafela Ovaisrael va finde ovatondi vavo. Okudja opo, Israel osha kala shi na ombili oule womido 40.