Jehova okwa li a lombwela Samuel ta ti: ‘Inda keumbo laIsai. Omonamati waye umwe ota ka ninga ohamba.’ Opo nee Samuel okwa li a ya keumbo laIsai. Eshi a mona omonamati waIsai oo womukulunhu, okwa ti: ‘Omumati ou oye e na okukala a hoololwa kuJehova.’ Ashike Jehova okwa li a lombwela Samuel kutya haye. Opo nee Jehova okwa tya kuye: ‘Ondi shii osho shi li momutima womunhu, ndele haholoke po lokombada.’

Isai okwa li a eta ovanamati vamwe vaye vahamano kuSamuel. Samuel okwa ti: ‘Jehova ina hoolola nande oumwe womuvo. Ou na vali ovanamati vamwe?’ Isai okwa ti: ‘Ondi na vali umwe, omona wange omumati David oo munini, a ka lifa eedi.’ Eshi David a aluka, Jehova okwa li a lombwela Samuel a ti: ‘Oye nee ta ningi ohamba oo.’ Samuel okwa li a vaeka David nomaadi momutwe noku mu nangeka po e li ohamba yaIsrael yomonakwiiwa.

Pomhito imwe, Ovaisrael ova li tava lu nOvafilisti ovo va li ve na omukwaita omutongolume wedina Goljat. Efiku nefiku, Goljat okwa li ha sheke Ovaisrael. Okwa li a ingida ta ti: ‘Tumine i nge omulumenhu e uye a lwife nge. Ngeenge okwa findana, ohatu ka ninga ovapika veni. Ashike ngeenge onde mu findi, otamu ka ninga ovapika vetu.’

Efiku limwe, David okwa li a twaalela vamwaina oikulya kokamba yovakwaita vaIsrael. Okwa li a uda Goljat ndele ta ti: ‘Ohandi ke mu lwifa.’ Ohamba Saul oya tya: ‘Ove okamatyona natango.’ David okwa nyamukula ta ti: ‘Jehova ota ka kwafela nge.’

 Saul okwa li a kendabala oku pa David oikutu youkwaita, ashike David okwa ti: ‘Itandi dulu okulwa nda djala oikutu ei.’ Opo nee David okwa kufa okafuta kaye ndele ta i komulonga. Okwa li a hoolola oumanya vatano va lalakana ndele te va tula mokakutu kaye. Opo nee okwa tondoka a yuka kuGoljat, ndele omutongolume oo ta ingida ta ti: ‘Ila oku kamatyona, ohandi ka yandja ombelela yoye keedila dokeulu nokoifitukuti.’ David ka li a tila, naye okwa li a ingida ta ti: ‘Oto uya kwaame neongamukonda neonga, ame ohandi uya kwoove medina laJehova. Hafye to lwifa, oto lwifa Kalunga. Keshe umwe ota ka mona kutya Jehova oku na eenghono e dule eongamukonda ile eonga. Amushe ote ke mu yandja momake etu.’

David okwa li a tula okamanya mokafuta ndele ta umbu a nana neenghono. Kekwafo laJehova, okamanya oka denga Goljat mombaba yoshipala ndele ta ka ningine. Omutongolume oo okwe lidenga po a fya. Okudja opo Ovafilisti ova ya onhapo. Mbela owe lineekela ngoo Jehova ngaashi David?