1. Shi na sha nelongelokalunga, ovanhu ova taalelwa kehoololo lilipi kunena?

JESUS okwa ti: “Ou iha kala kumwe naame, oye e nondubo naame.” (Mateus 12:30) Otashi dulika tu li kombinga yaJehova ile kombinga yaSatana. Ovanhu vahapu ohava diladila kutya otava longele Kalunga monghedi oyo a hokwa, ndelenee Ombibeli otai ti kutya Satana ota “hongaula ounyuni aushe.” (Ehololo 12:9) Omamiliyona ovanhu okwa itavela kutya otaa longele Kalunga, ndelenee doshili otaa longele Satana Ondiaboli. Ovanhu kunena ova taalelwa kehoololo eli: Ove na okulongela Jehova, “Kalunga kashili,” ile Satana, ‘xe yoipupulu.’ — Epsalme 31:5, NW; Johannes 8:44.

2. Onghedi imwe oilipi oyo Satana ta kendabala okukelela ovanhu va ha longele Jehova?

² Okuninga etokolo okulongela Jehova oko ehoololo lopandunge, ehoololo olo tali eta okuhokiwa kuYe. Ndelenee Satana ina hafela keshe umwe oo ta longele Kalunga; ota etele omaupyakadi ovo tave mu longele. Onghedi imwe oyo he shi ningi oyo okweeta omasheko ile omapataneko okudja kuvamwe, nokuli okudja kookaume nosho yo koilyo youkwaneumbo. Jesus okwa londwela ta ti: “Ndele novaneumbo vomunhu mwene otava ningi ovatondi vaye.” — Mateus 10:36.

3. Ngeenge oukwaneumbo woye ile ookaume koye tava pataneke okulongela Kalunga kwoye, oto ka ninga shike?

³ Ngeenge eshi otashi ku ningilwa, mbela oto ke linyenga ngahelipi? Ovanhu vahapu ove shi shii kutya onghedi yavo yokulongela Kalunga oya puka, ndelenee otava ongaonga okumanguluka  ko kuyo. Otava diladila kutya oku shi ninga otashi ka kala oku he na oudiinini komaukwaneumbo avo. Mbela eshi oshi li tuu pandunge? Ngeenge ou shii kutya oilyo youkwaneumbo otai longifa oingangamifi ya nyika oshiponga, mbela ito ke i londwela kutya oingangamifi oyo otai ke va etela oshiponga? Ove ito ke limbwanga nande mumwe navo moku i longifa, hasho mbela?

4. Josua okwa popya shike kOvaisrael shi na sha nelongelokalunga pomafiku aye?

⁴ Josua okwa ladipika Ovaisrael va efe eenghedi domalongelokalunga a puka nosho yo eenghulunghedi dooxekululwa. Okwa ti: “Tileni hano paife Omwene noku mu longela mouyuki nomoshili ndee ekeleishi ookalunga ava ooxo yeni va longela kombada yaEufrat nomuEgipti, ndele longeleni Omwene.” (Josua 24:14) Josua okwa li omudiinini kuKalunga, na Jehova okwe mu nangeka noupuna. Ngeenge otu li ovadiinini kuJehova, ote ke tu nangeka yo noupuna. — 2 Samuel 22:26.

5. Omolwashike tu na okweekelashi oinima youmhulile?

⁵ Okumanguluka ko komalongelokalunga oipupulu otaku ti yo kutya otu na okuhanauna po oshinima keshe shoumhulile osho tashi dulika tu na, ngaashi oiketi nosho yo oinima ya fa opo. Eshi osha fimana molwaashi otashi ulike kutya otwe lineekela muJehova filufilu.

6. Ovakriste vonale ova ninga shike shi na sha nomambo avo kombinga youmhulile?

⁶ Tala osho Ovakriste vonale va ninga eshi va tokola okukufa ombinga melongelokalunga lashili. Ombibeli otai ti: “Vahapu vomuava va li va longifa oupule wavo, ova eta omishangwa davo doupule da ndubilwa onduba, ndele ve di xwika po moipafi yovanhu.” — Oilonga 19:19.

7. Oshike hatu dulu okuninga ngeenge eendemoni otadi tu hepeke?

⁷ Vamwe ovo va tameka okulongela Jehova ndele ova kala nale va kufa ombinga sha yukilila moulodi ile moumhulile otashi dulika tava hepekwa keendemoni. Ngeenge otashi ku ningilwa, ifana Jehova mokule meilikano, to longifa edina laye. Ote ke ku kwafela. — Omayeletumbulo 18:10; Jakob 4:7.

8. Ovakriste ohava tale ko ngahelipi oihongwafano nomafano oo taa longifwa momalongelokalunga oipupulu?

⁸ Ovo va hala okulongela Jehova kave na okukala ile okulongifa oshihongwafano ile efano keshe olo li li oshitukulwa shomalongelokalunga oipupulu. Ovakriste vashili ‘otava ende meitavelo, hamokumona.’ (2 Ovakorinto 5:7) Ohava fimaneke omhango yaKalunga oyo tai kelele elongifo lomafano oludi keshe meilikano. — Exodus 20:4, 5.

9. Ombibeli otai yandje omayele elipi kombinga yokuninga ovanaendunge?

⁹ Ombibeli otai ti: “Kala nokweenda novanongo, opo nee naave yo u ninge omunongo.” (Omayeletumbulo 13:20) Ngeenge otwa hala okukala ovanaendunge, otwa pumbwa okweenda ile okweendafana nEendombwedi daJehova. Do odi li ovanhu ovo tava ende mondjila oyo tai twala komwenyo. — Mateus 7:14.

10. Ongahelipi Eendombwedi daJehova tadi dulu oku ku kwafela u longele Kalunga?

¹⁰ Eendombwedi odi na ko nasha shili novanhu. Oilonga yado oyo okukwafela ovanamitima diwa va ude ko oshili yOmbibeli oyo tai twala komwenyo waalushe. Otadi dulu oku ku kwafela u konakone Ombibeli oshali. Otadi ka nyamukula omapulo oye noku ku ulikila nghee u na okutula moilonga eshiivo lOmbibeli monghalamwenyo yoye. — Johannes 17:3.

11. Ongahelipi okwoongala kwopaKriste taku ke ku kwafela?

¹¹ Pokwoongala kwado, oko haku ningilwa unene tuu pOlupale lOuhamba, oto ke lihonga shihapu kombinga yeenghedi daJehova. Ehalo loye otali ka pamekwa u kale melongelokalunga lashili. Noto ka mona yo edeulo nghee to dulu okukwafela vamwe ve lihonge oshili yOmbibeli. — Ovaheberi 10:24, 25.

12. Ongahelipi eilikano tali dulu oku ku kwafela u longele Kalunga?

¹² Eshi to lihongo shihapu kombinga yehalo nelalakano laJehova, olupandu loye lokupandula eenghedi daye dopahole otali ka hapupala. Ehalo loye lokuninga osho tashi mu  hafifa nokuhenuka osho tashi mu nyematifa otali ka kula yo. Dimbuluka kutya oto dulu okupopya naJehova meilikano u mu pule e ku kwafele u longe eshi sha yuka nokuhenuka osho sha puka. — 1 Ovakorinto 6:9, 10; Ovafilippi 4:6.

13. Ongahelipi to dulu okuhafifa omutima waJehova?

¹³ Konima yefimbo, eshi wa kula pamhepo, nope he na omalimbililo oto ka mona omhumbwe yokukala Ondombwedi yaJehova ye mu liyapulila noya ninginifwa. Mokulimbwanga mumwe nongudu yoshiwana shaJehova, oto ka hafifa omutima waYe. (Omayeletumbulo 27:11) Oto ka kala mokati koshiwana shi na elao osho Kalunga a popya ta ti: “Ame nda hala okukala muvo, nokweenda mokati kavo, Ame ohandi kala Kalunga kavo, ovo notava ningi oshiwana shange.” — 2 Ovakorinto 6:16.