1. Omalongelokalunga amwe elipi e li muAfrika?

KONYALA keshe umwe muAfrika ota dimine kutya osha fimana okulongela Kalunga. Ndelenee kape na etwokumwe kombinga yanghee e na okulongelwa. Vamwe ohava ningile elongelokalunga lavo meenhele hadi ifanwa eemoski navamwe ohava i keenhele odo da talika ko diyapuki pamifyuululwakalo. Natango vamwe ohava i kongeleka. Ndelenee otashi ka kala sha puka okudiladila kutya ope na ashike omalongelokalunga atatu muAfrika. Mokati kOvamoslema, omu na eemhango nomahongo e lili noku lili. Omaitavelo opamifyuululwakalo okwa yooloka unene meenhele di lili noku lili. Mokati keengeleka odo tadi liti odopaKriste, omu na nokuli okuhenoukumwe kwa kula. Kakele kaado dinene, ope na natango eengeleka dihapu omayovi de lifikamena muAfrika alishe.

2. (a) Luhapu oshike hashi ufa elongelokalunga omo omunhu e li? (b) Oshike osho itashi ulike kutya elongelokalunga letu otali hafifa Kalunga?

² Omolwashike ovanhu hava longele Kalunga meenghedi omo tave shi ningi? Ovanhu vahapu ova tambula ko elongelokalunga lovadali vavo. Oiningwanima yonalenale oya nwefa mo yo elongelokalunga omo ovanhu ve li kunena. Embo The Africans​—A Triple Heritage otali ti: “Eshi oilongo imwe ya findwa, Ouislama owa tandavela kolundume laSahara [ombuwa ya kula ya mana ko Afrika lokOlundume] okupitila momalwoodi, . . . Oukriste owa tandavela yo kolukadi laSahara monghedi ya faafana. Ouislama owa tandavela kolundume laSahara okupitila melongifo leongamukonda, ndelenee Oukriste owa  tandavela kuSahara lokolukadi okupitila melongifo leendjebo.” Natango, vahapu vomufye ova itavela kutya elongelokalunga letu otali hafifa Kalunga. Ndelenee elongelokalunga kali fi lashili molwaashi ashike ovadali vetu omo ve li ile molwaashi oshilongo shimwe oshinaenghono she li fininikila mootatekulululwa.

3-5. Efaneko lilipi tali tu kwafele tu mone kutya omalongelokalunga aeshe itaa hongo oshili?

³ Nonande omalongelokalunga aeshe otae liti kutya otaa yandje ewiliko li shii okulineekelwa kombinga yokulongela Kalunga, omadiladilo ao okwa yooloka. Otaa hongo oinima ihapu i lili noku lili kombinga yaKalunga kutya oye lyelye noshike osho a teelela kufye. Diladila kombinga yaashi: Natu tye nee owa mona oilonga mehangano lonhumba la kula. Mefiku lotete loilonga, owa uda kutya omukulunhu woilonga oku li mefudo. Opo nee owa pula ovanailonga vatatu osho u na okuninga. Omunailonga wotete ota ti kutya omukulunhu woilonga okwa hala u kombe olukolongo. Omutivali ota ti kutya ou na okupainda etungo. Omutitatu ote ku lombwele u tukule eembapila.

⁴ Opo nee, to pula ovanailonga kombinga yomukulunhu woilonga. Wotete ota ti kutya omukulunhu woilonga omule, omunyasha noku na onyanya. Omutivali ota ti kutya omuxupi, a kulupa noku na onghenda. Omutitatu ote ku lombwele ta ti kutya omukulunhu woilonga ke fi nande omulumenhu ndelenee omukainhu. Otashi dulika oto ka fika pexulifodiladilo kutya ovanailonga aveshe vatatu itava popi oshili. Ngeenge owa hala okukala moilonga yoye ipe, osha yela kutya oto ka tala nawa opo u mone kutya olyelye naanaa omukulunhu woilonga nokwa hala u ninge shike.

⁵ Osha faafana nelongelokalunga. Molwaashi ope na omadiladilo mahapu shi na sha naKalunga kutya oye naanaa lyelye noshike osho ta pula kufye, otwa pumbwa okushilipaleka kutya onghedi yetu yokulongela Kalunga oi li metwokumwe noshili. Ndelenee ongahelipi hatu dulu okulihonga oshili kombinga yaKalunga?